News

POST TYPE

YOUTH

စတိဗ်ဂျော့၏ ခေါင်းဆောင်မှုဆိုင်ရာ အတွေးအမြင်
26-Feb-2017 tagged as


Apple ကုမ္ပဏီကြီးအား ထူထောင်ခဲ့သော ကွယ်လွန်သွားရှာပြီဖြစ်သည့် စတိဗ်ဂျော့ (Steve Jobs) ၏ ခေါင်းဆောင်မှုဆိုင်ရာ အယူအဆများကို လူငယ်များ အတုယူစရာ ဖော်ပြပါသည်။

ပညာ အရေးမပါဟု မဆိုလို

“ကျွန်တော် ကျောင်းပညာကို ပြီးဆုံးအောင် မသင်ခဲ့ရလို့ ပညာရေးဟာ အရေးမပါဘူးလို့ မဆိုလိုဘူး။ ပညာကို အခြေခံပြီး ဉာဏ်နဲ့ ချဲ့ထွင်ရမှာတွေရှိတယ်”

စတိဗ်ဂျော့က ဘဝဆိုသည်မှာ ဖန်တီးနေရမည်။ ဖန်တီးနိုင်ရန်အတွက် အတွေ့အကြုံလိုသည်ဟု ဆိုပါသည်။ ယင်းအတွေ့အကြုံဆိုသည်မှာ ပညာတွင် အခြေခံသည်။ ဂျော့သည် ကောလိပ်တက်နေစဉ် အိန္ဒိယကို သူငယ်ချင်းများနှင့် ထွက်သွားသည်။ 

သူသည် အိန္ဒိယတွင် ရောက်နေစဉ် အိန္ဒိယသမိုင်း၊ ယဉ်ကျေးမှုနှင့် အနုပညာများကို လေ့လာသည်။ ကျောင်းတွင် လေ့လာရခြင်းထက် လက်တွေ့ လေ့လာခဲ့ရမှုများကို သူ အလွန် သဘောကျသည်။ ထို့ကြောင့်လည်း သူက ကျောင်းသင်ပညာထက် ပြင်ပ အပိုဘာသာရပ်များကို ထပ်ဆင့် လေ့လာခြင်းသည် ပိုကောင်းသည်ဟု ခံယူထားသည်။ တစ်နည်းဆိုရလျှင် ကျောင်းသင်ပညာရေးထက် ပြင်ပပညာရေးကို သူက ပိုပြီးနှစ်သက် သဘောကျသွားသည်ဟု ဆိုရမည်။ ထိုသို့ ပြင်ပတွင် လေ့လာ သင်ယူခဲ့ရခြင်းများက သူကုမ္ပဏီထောင်ပြီး အလုပ်များ လုပ်သည့်အခါ များစွာ အထောက်အကူ ပြုနိုင်ခဲ့သည်။ ကျောင်းထဲတွင် သင်ယူလျှင် ပေးသလောက်သာ ရမည်။ ကျောင်းကသိခဲ့သည့် အသိကို အပြင်တွင် ချဲ့ထွင်နိုင်ခြင်းက သူ့ဘဝအတွက် တန်ဖိုးမဖြတ်နိုင်သည့် ပညာများ ဖြစ်ခဲ့သည်။

စွန့်စားမှသာ အောင်မြင်မည်

“ဒီလန်၊ ပီကာဆိုနဲ့ နယူတန်ဆိုတဲ့ ပုဂ္ဂိုလ်ကြီးတွေဟာ အများကြီး စွန့်စား လုပ်ကိုင်ခဲ့ရတယ်။ ခင်ဗျား ကြီးကျယ်အောင်မြင်သူဖြစ်ချင်ရင် စွန့်စားလုပ်ဆောင် နိုင်ရမယ်”

စတိဗ်ဂျော့သည် စွန့်စား လုပ်ဆောင်ရမည်ဆိုလျှင် မည်သည့်အခါမှ နောက်မတွန့်သူတစ်ဦးဖြစ်သည်။ သူတစ်ခုခုကို လိုချင်ပြီဆိုလျှင် သူ မရမက မေးသည်။ မသိ သိအောင် လုပ်တတ်သည်။ သူ့ထက် ငယ်သူထံကလည်း တပည့်ခံရန် ဝန်မလေးသူ ဖြစ်သည်။ 

ဂျော့ ၁၂ နှစ်သား အရွယ်တွင် သူက HP ကုမ္ပဏီထံ ဖုန်းဆက်သည်။ HP ကုမ္ပဏီကို ထူထောင်သူ ဘီလ်ဟူးလက်ထံ သူက တိုက်ရိုက် ဖုန်းဆက်ပြီး ပစ္စည်း အစိတ်အပိုင်းလေး တစ်ခုကို အပိုမရနိုင်ဘူးလားဟု လှမ်းမေးခြင်းဖြစ်သည်။ ဟူးလက်က စတိဗ်ဂျော့ကို အပိုပစ္စည်းလေး ရောင်းလိုက်ရုံမက ထူးဆန်းစွာ စပ်စု မေးမြန်းတတ်သည့် လူငယ်လေးကို အလုပ်တစ်ခါတည်း ခန့်လိုက်တော့သည်။ 

“ခင်ဗျားမှာ ဖျက်ဆီးပြီးတော့ မီးရှို့ပစ်ချင်တဲ့စိတ်ရှိရင် လုပ်သာ လုပ်လိုက်။ စိတ်ရှိပြီး ကြောက်နေရင် အလုပ်မဖြစ်ဘူး”ဟု သူက ဆိုသည်။ သူ့စိတ်ဓာတ်က ရှင်းသည်။

“လူတွေက ဖုန်းလေး ကောက်ကိုင်ပြီး ပြောရမှာကိုတောင် ဝန်လေးတယ်။ မေးဖို့ဆိုရင် အဝေးကြီး။ ဒီလိုလူမျိုးတွေဟာ သူတို့ အိပ်မက်တွေကို အကောင်အထည် မဖော်နိုင်ဘူး”ဟု သူကဆိုသည်။

“လောကမှာ အခက်အခဲတွေ၊ ဆုံးရှုံးမှုတွေ မကြုံခဲ့ရတဲ့ အောင်မြင်သော လုပ်ငန်းရှင်ကြီးတွေ၊ စီအီးအို ဆိုသူတွေနဲ့ ကျွန်တော် စကားပြောလေ့ မရှိဘူး။ သူတို့ ဆုံးရှုံးမှုတွေ မကြုံခဲ့ဖူးရင် သူတို့ရလဒ်တွေလည်း ကောင်းလာမှာ မဟုတ်ဘူး”ဆိုသည့် သူ၏စကားမှာ စဉ်းစားဆင်ခြင်စရာ ဖြစ်သည်။  

လူတွေ ဘာကို လိုချင်ကြသလဲ

“လူတွေ မမြင်ရသေးပေမယ့် ဘာတွေကို လိုချင်နေကြသလဲဆိုတာ သိဖို့လိုတယ်”

စတိဗ်ဂျော့သည် ခန့်မှန်းချက်ကို သိပ်မကြိုက်။ လက်တွေ့ လုပ်ပြနိုင်မှ ကြိုက်သည်။ သူကိုယ်တိုင် မသုံးချင်သည့်ပစ္စည်းကို သူမထွင်။ သူကိုယ်တိုင် လိုချင်သည့်ပစ္စည်းကိုသာ သူတီထွင်သည်။ 

၂၀၁၀ ပြည့်နှစ်ခန့်က Laptop နှင့် Smart-phone ပြီးလျှင် Tablet လမ်းကြောင်းကို လိုက်ကြသည်။ Apple ကုမ္ပဏီ အနေနှင့်လည်း iPad ဆိုသည့် တက်ဘလက်ကို တီထွင်လိုက်သေးသည်။ သန်းချီပြီး သုံးစွဲသူများ ရှိခဲ့သည်မှာ မှန်သည်။ မည်သည့်လမ်းကြောင်းက အကောင်းဆုံးဖြစ်မည်ကို သူကလမ်းကြောင်း ချပေးခဲ့ပြီးဖြစ်သည်။ Apple ကုမ္ပဏီအနေနှင့် iPhone ဆိုသည့်လမ်းကြောင်းဖြင့်သာ အခြားပြိုင်ဘက်များကို ကျော်လွှားနိုင်မည်ကို သူက သတ်မှတ်ပြီးသား ဖြစ်သည်။ 

ထို့ကြောင့်လည်း နောင်တစ်ချိန်တွင် မရှိမဖြစ် အရေးပါလာမည့် ဆော့ဖ်ဝဲလုပ်ငန်းကြီးဖြစ်သော Apple Store ကို ကြိုတင် ထူထောင်ထားသည်။ သူ့အမြင်က ရှင်းသည်။

“ကျုပ်တို့ ပြိုင်ဘက်တွေထက်သာတဲ့ ဆော့ဖ်ဝဲ စတိုးဆိုင်ကြီးတစ်ဆိုင်ကို ဘာကြောင့် မထူထောင်နိုင်မှာလဲ”ဟုဆိုကာ အွန်လိုင်းက အလွယ်တကူ ဝယ်ယူ အသုံးချနိုင်သည့် Apple Store ကို ထူထောင်ခဲ့သည်။ သူ့ဝါဒက ရှင်းသည်။

“ခင်ဗျားတို့ အကောင်းဆုံး မလုပ်နဲ့။ သူများနဲ့ မတူအောင် အကွဲပြားဆုံး ဖြစ်အောင်လုပ်”

ကိုယ့်ပတ်ဝန်းကျင်ကလူ

“ခင်ဗျား ပတ်ဝန်းကျင်မှာ ရှိနေတာတွေဟာ ခင်ဗျားနဲ့ ဘာမှ ကွဲပြားခြားနားခြင်းမရှိတဲ့ သူလိုကိုယ်လိုလူတွေ။ ခင်ဗျားထက် ပိုပြီးတော့ မကောင်းနိုင်ဘူး။ ခင်ဗျား ပြောင်းလဲလိုက်လို့ရတယ်။ သူတို့ကို လွှမ်းမိုးလိုက်လို့ရတယ်။ လူတွေ အသုံးပြုနိုင်ဖို့ ခင်ဗျားကိုယ်ပိုင် အတွေးနဲ့ ပြုလုပ်ပေးနိုင်တယ်”

ထိုစကားကို စတိဗ်ဂျော့က ၁၉၉၅ ခုနှစ်တွင် အင်တာဗျူးတစ်ခု၌ ပြောသွားခြင်းဖြစ်သည်။ သူက ဘဝမှာ လူဖြစ်လာပြီး ဘာတစ်ခုမှ ပြောင်းလဲ မပေးနိုင်လျှင် အကန့်အသတ်ဘောင်ထဲ ရောက်နေရသည့်ဘဝ ဖြစ်နေမည်။ ဘဝဆိုသည်မှာ တွေးမြင်ယူဆထားသည်ထက် အများကြီး ကျယ်ဝန်းသည်။ ကိုယ့်ပတ်ဝန်းကျင်တွင် ရှိနေသောသူများကို ကြောက်သောကြောင့်၊ မယှဉ်နိုင်ဟု ထင်သောကြောင့် မဝံ့မရဲဖြင့် ဘာတစ်ခုမှ မလုပ်ရဲလျှင် သေနေသည့်ဘဝသာ ဖြစ်မည်။ ကိုယ့်ပတ်ဝန်းကျင်တွင် ရှိနေသူများသည် သူလို ကိုယ်လို သူများသာ ဖြစ်သည်။ သူပြောသည်ကလည်း ရှင်းသည်။

“ဘဝနဲ့ ရေစုံမျောလိုက်မနေနဲ့။ ဘဝကို တည်ဆောက်ပြီး တစ်ခုခုဖြစ်အောင် လုပ်ကြည့်လိုက်”

အိပ်မက်လာရင် အကောင်အထည်ဖော်ကြည့်

“လုပ်သင့် မလုပ်သင့် စဉ်းစားနေတာထက် ကောက်လုပ်လိုက်”

စတိဗ်ဂျော့သည် အိပ်မက်ကို အကြီးကြီး မက်တတ်သူဖြစ်သည်။ ၁၉၇၀ ပြည့်နှစ်လောက်ကတည်းက သူသည် ပါစင်နယ် ကွန်ပျူတာများကို တီထွင်ပြီး ဈေးကွက်ရောက်အောင် ပို့နိုင်ခဲ့သူဖြစ်သည်။ သူ့အယူအဆမှာ “ကွန်ပျူတာကို လူတိုင်း လက်ထဲထည့်နိုင်ရမည်”ဖြစ်သည်။ 

သူက Xerox ကုမ္ပဏီသည် ကွန်ပျူတာ လောကကို စိုးမိုးသွားနိုင်ခြင်းမှာ ကွန်ပျူတာပေါ်တွင် ဂရပ်ဖစ် အရုပ်လေးများကို မောက်စ်သုံးပြီး အလွယ်အသုံးပြုနိုင်စေရန် တီထွင်နိုင်ခြင်းကြောင့် ဖြစ်သည်။ Xerox ကျဆုံးခဲ့ရခြင်းမှာ သူတို့က တီထွင်ထားသော ကွန်ပျူတာများကို အများသူငါလက်ထဲကို ပေါပေါများများ ရောက်အောင် မဖန်တီးလိုခြင်း ဖြစ်သည်။ စတိဗ်ဂျော့က ပြောင်းပြန်ဖြစ်သည်။ အားလုံးလက်ထဲ ကွန်ပျူတာတွေပို့ပြီး ဈေးကွက်ကြီးကို အကြီးကြီးဖြစ်အောင် လုပ်လိုက်ခြင်းပင် ဖြစ်သည်။

လူ့ခွစာကို အထင်မသေးနှင့်

“ပြောရရင် ရူးတယ်ထင်မယ်။ လူ့ခွစာတွေဆိုတာ ရှိတယ်။ သူတို့ဟာ သူပုန်တွေပဲ။ ပြဿနာလည်း ရှာတယ်။ အဝိုင်းနဲ့ လေးထောင့်လို ဘယ်နေရာမှာမှ အံဝင်ခွင်ကျ မဖြစ်နိုင်တဲ့သူတွေ။ ဒါပေမဲ့ သူတို့မှာ မတူကွဲပြားတဲ့အမြင် အတွေးတွေ ရှိတတ်တယ်။ သူတို့က လူ့ဘောင်ကြီးကို ရှေ့ရောက်အောင် တွန်းခဲ့တဲ့ အထောက်အထားတွေရှိတယ်။ လူအများက သူတို့ကို အရူးတွေလို့ မြင်ပေမယ့် ကျွန်တော်တို့က ပါရမီရှင်ကြီးတွေလို့ မြင်ဖို့လိုတယ်”

Macintosh ဆိုသည့် ကွန်ပျူတာများ ခေတ်ကောင်းနေချိန်တွင် ဂျော့ပြောခဲ့သည့် စကားတစ်ခွန်း ဖြစ်သည်။ သူက သူ့လုပ်ငန်းအတွက် ရွေးချယ်ခန့်ထားသူများတွင် ဂီတပညာရှင်၊ ကဗျာဆရာ၊ ပန်းချီဆရာ၊ သတ္တဗေဒပညာရှင်၊ သမိုင်းပညာရှင်တွေလည်း ပါနေသည်။ သူ့အယူအဆမှာ လူတိုင်း ကွန်ပျူတာပညာရှင် ဖြစ်နိုင်သည်။ 

သူလိုချင်သည့် သူများသည် Team တစ်ခုအနေနှင့် ပါဝင်လာပြီး လုပ်ဆောင်လိုစိတ် ဖြစ်သည်။ ထို့ပြင် သူခန့်ထားသည့် လူတိုင်းမှာ တီထွင် ဖန်တီးလိုသည့် (Creative Mind) ရှိသူများ ဖြစ်နေသည်။ လူတစ်ဦးချင်းစီ၏ လုပ်ဆောင်ဖန်တီးလိုစိတ်များကို အဖွဲ့အသင်း တစ်ခုထဲတွင် ထည့်သွင်း ပေါင်းစည်းပေးလိုက်ပြီး ရလဒ် တစ်ခုကိုရအောင် ဖော်ထုတ်ခြင်းသည် စတိဗ်ဂျော့၏နည်း ဖြစ်သည်။ 

ယနေ့ လုပ်ငန်းခွင်များတွင် သူ့နည်းကို လူတိုင်း လိုက်နာကျင့်သုံးနေကြသည်သာ ဖြစ်သည်။ သူ့နည်းက သူများနှင့် ကွဲပြားအောင် တွေးရန်မဟုတ်။ ကွဲပြားစွာ တွေးတတ်သူများကို ငှားရမ်း ခေါ်ထားလိုက်ခြင်းသာ ဖြစ်သည်။ ပါရမီရှင် ဆိုသူများသည် သူများနှင့်မတူ ကွဲပြားအောင် တွေးခေါ်တတ်သူများ ဖြစ်သည်။ ထို့ကြောင့် ကိုယ်က ထိုင်ပြီး မလုပ်နိုင်လျှင် လုပ်နိုင်သူများကို နေရာပေးပြီး တွေးခိုင်းလိုက်ခြင်းက ရလဒ်ကောင်းများကို ရလာစေကြောင်း စတိဗ်ဂျော့က သက်သေပြသွားခဲ့သည်။

ကိုယ်တိုင်ဆုံးဖြတ်၊ လိုအပ်ချက်ကို နားထောင်

“ပြဿနာပေါ်လာရင် ဖြေရှင်းနိုင်စွမ်း ရှိရမယ်။ မှားနေရင် မှန်အောင် လုပ်နိုင်စွမ်း ရှိရမယ်”

စတိဗ်ဂျော့က သူတီထွင်လိုက်သမျှသော ပစ္စည်းတိုင်းသည် လူသားတို့ အဆင်ပြေ ချောမွေ့စွာဖြင့် ပြဿနာများကို ရှင်းပေးနိုင်လိမ့်မည်ဟု ယူဆထားသည်။ ၂၀ဝ၃ ခုနှစ်တွင် သူက iTune Music Store ကို ဖွင့်လှစ်လိုက်သည်။ သူက သီချင်းနားထောင်လိုသူများ ယင်းအွန်လိုင်းကတစ်ဆင့် အလွယ်တကူ ရယူနားဆင်နိုင်ရန် ဖြစ်သည်။ 

သူက ယင်းအွန်လိုင်း Store ကို ထူထောင်ရခြင်းမှာ လူတွေထံမှ အသံမျိုးစုံကို နားထောင်ပြီး လိုအပ်ချက်အရ ထူထောင်ပေးလိုက်ခြင်းဖြစ်သည်။ ယင်းအွန်လိုင်းတွင် သီချင်းများကို အခမဲ့လည်း ရနိုင်သည်၊ ဝယ်ပြီးတော့လည်း နားထောင်နိုင်သည်။ သီချင်းတစ်ပုဒ်လျှင် ၉၉ ဆင့်ခန့်သာ ပေးရသည်။ မိမိတို့ ဖောက်သည်များထံမှ အသံကိုနားထောင်ပြီး အကောင်းဆုံး ဖြစ်အောင် ဖန်တီးပေးနိုင်ခြင်းသည် သူ့လမ်းစဉ်ဖြစ်သည်။

ခံစားချက်နှင့် မဆုံးဖြတ်ပါနှင့်

“အလုပ်ကို ခံစားချက်နဲ့ မဆုံးဖြတ်နဲ့။ အလုပ်ကို အလုပ်နဲ့ပဲ သက်သေပြ”

စတိဗ်ဂျော့က ခံစားချက်သည် အောင်မြင်မှုအတွက် ရန်သူဖြစ်သည်ဟု ယူဆထားသူဖြစ်သည်။ သူက စတန်းဖို့ဒ်တက္ကသိုလ် ဘွဲ့နှင်းသဘင်ပွဲကို တက်ရောက်မိန့်ခွန်း ပြောကြားခဲ့သည်။ 

“မင်းတို့ ကိုယ်ကြိုက်တဲ့အလုပ်ကို ကိုယ်ရှာပြီး လုပ်ကြတော့မယ်။ မင်းတို့လုပ်မယ့် အလုပ်က မင်းတို့ဘဝ ဖြစ်ကောင်း ဖြစ်နိုင်တယ်။ ကိုယ်ကြိုက်တဲ့အလုပ် ဆိုရင် မင်းတို့ ဆက်လုပ်မယ်။ မကြိုက်ရင် ပြောင်းမယ်ပေါ့။ ဒါပေမဲ့ တစ်ခုသိထားရမှာက အလုပ်ကို နှလုံးသား ခံစားချက်တွေနဲ့ မရှာနဲ့”

အကောင်းဆုံးလုပ်

“ဘဝမှာ မင်းတို့ တစ်ခုမကောင်း တစ်ခုပြောင်း အလုပ်တွေ အများကြီး လုပ်ခဲ့တာ ရှိကောင်းရှိမယ်။ ဘယ်မှာပဲလုပ်လုပ်၊ ဘာပဲလုပ်လုပ်၊ အကောင်းဆုံး ဖြစ်အောင်လုပ်”

စတိဗ်ဂျော့ ကိုယ်တိုင် Apple တွင် မြဲခဲ့သူမဟုတ်။ သူလည်း Apple က ထွက်ပြီး Pixar ဆိုသည့် ရုပ်ရှင်ကုမ္ပဏီကိုဝယ်ကာ သွားရောက် လုပ်ကိုင်ခဲ့သေးသည်။ သူက အထူးပြုလုပ်ချက် Animation ဇာတ်ကားတိုလေးများကို ဖန်တီးထုတ်လုပ်ခဲ့သည်။ ကွန်ပျူတာ အထူးပြုလုပ်ချက်ဖြင့် ဖန်တီးပြသည့် Tin Toy ဆိုသည့် ဇာတ်လမ်းတိုလေးသည် ပထမဆုံး အကယ်ဒမီဆုကို ဆွတ်ခူးနိုင်ခဲ့သည်။

Tin Toy နောက်ကွယ်တွင် Toy Story ဇာတ်ကားတွေကို အောင်မြင်စွာ ထုတ်နိုင်သည်။ ကာတွန်းရုပ်ရှင် လောကကို သူတစ်ခေတ် ပြောင်းနိုင်ခဲ့သည်။ နောက်ပိုင်းမှ Apple ကို သူပြန်ရောက်လာသည်။ သူသည် မည်သည့်နေရာ ရောက်သည်ဖြစ်စေ သူလုပ်ဆောင်ခဲ့သမျှ လုပ်ငန်းတိုင်းကို အကောင်းဆုံးနှင့် အအောင်မြင်ဆုံး လုပ်တတ်သည်။ ထို့ကြောင့်လည်း အောင်မြင်ခဲ့သူ ဖြစ်ခဲ့ရသည်။ 

မောင်ခေတ်
(Ref : What Steve Jobs Teach Us about Leadership, Forbes)

  • TAGS