News

POST TYPE

YOUTH

ခေတ်လူငယ်တို့ ရင်ဆိုင်နေကြရသည့် ပြဿနာများ
24-Sep-2017

ယနေ့ မျိုးဆက်သစ်လူငယ်များ ရှင်သန်လှုပ်ရှားနေရသည့်ခေတ်တွင် ပြဿနာပေါင်းစုံ ရှိနေသည့် အချိန်ကာလဖြစ်သည်။ အမေရိကန် ပြည်ထောင်စုတွင် (The Bobcat View) ဆိုသည့် စစ်တမ်းတစ်ခုကို ကောက်ယူခဲ့ပါသည်။ ကျောင်းသား ကျောင်းသူ အများစုကို ကောက်ယူခဲ့သည့် စစ်တမ်းတွင် လူငယ်တွေ ယနေ့ ရင်ဆိုင်နေရသည့် ပြဿနာ ၁၀ ခုကို အကျဉ်းချုပ်အားဖြင့် သွားတွေ့ရသည်။

တစ်ဦးတည်းမိဘက ထိန်းကျောင်းမှုကို ခံနေရခြင်း

၁၉၅၀ ပြည့်နှစ်လောက်ကတည်းက အမေရိကန် ပြည်ထောင်စုတွင် မိမစုံ ဖကွဲ အိမ်ထောင်စုတွေ များလာသည်။ ထို့ကြောင့် အဖေ သို့မဟုတ် အမေတစ်ဦးတည်းက ထိန်းကျောင်းပြီး ကျွေးမွေးပြုစုရသောကြောင့် မေတ္တာမစုံသည့် အိမ်ထောင်စုတွေက များလာသည်။ ယနေ့ဆိုလျှင် တစ်ဦးတည်းမိဘအဖြစ် ခံယူကာ ထိန်းသိမ်းစောင့်ရှောက်နေကြရသည့် အိမ်ထောင်စုပေါင်း ၁၄ သန်းခန့်ရှိသည်။ ပျမ်းမျှ ကလေးပေါင်း ၂၈ သန်းခန့် မိဘတစ်ဦးတည်း၏ မေတ္တာဖြင့်သာ ရပ်တည်ခွင့်ရခဲ့ကြသည်။ ကလေးတစ်ဦးတည်း မေတ္တာငတ်ကာ ကြီးပြင်းလာခဲ့ရသဖြင့် သူတို့ဘဝတွေကလည်း ခက်ခဲလှသည်။ စီးပွားရေး အခက်အခဲတွေကြောင့် အိမ်ထောင်တွေ ရပ်တည်နိုင်ရန် ခက်ခဲလာသည်။ ကိုယ်လွတ်ရုန်းချင်သူတွေကြောင့် သားသမီးတွေ ထင်သလောက် မဖွံ့ဖြိုး မတိုးတက်နိုင်အောင် ဖြစ်နေကြရသည်။ ရပ်တည်နိုင်မည့် အချိန်လေး တစ်ချိန်တိုင်အောင် သူတို့မိဘတွေက မရပ်တည်ပေးနိုင်ခဲ့သဖြင့် လေလွင့်နေကြရသူတွေ ပိုများလာသည်။

မူးယစ်ဆေးနှင့် အရက် သောက်သုံးကြခြင်း

ယနေ့ခေတ် ရုပ်ရှင်ဗီဒီယိုများထဲတွင် လူငယ်တွေ သဘောကျသည့် သရုပ်ဆောင်တွေက စီးကရက်ကို လက်ကြားကမချ သောက်ပြနေကြသည်။ စီးကရက် သောက်ရခြင်းအား စတိုင်ကျသလိုလို၊ အားကျစရာလိုလို လုပ်ပြနေကြသည်။ အလားတူပင် အရက်လေး သောက်ပြလိုက်၊ မူးပြလိုက်၊ ရမ်းပြလိုက်တွေကလည်း နေရာမလွတ်လောက်အောင် ဖြစ်လာသည်။ အတုယူ မှားစရာတွေကို အတုယူစရာ ကောင်းအောင် လုပ်ပြနေကြခြင်းအား ခွင့်ပြုထားကြသည်။ ယနေ့ အထက်တန်းကျောင်းသား ၂၁ ရာခိုင်နှုန်းခန့်သည် မူးယစ်ဆေးနှင့် မကင်းနိုင်ပေ။ ၄၁ ရာခိုင်နှုန်းလောက်က အရက် သောက်ဖူးနေသည်။ စိုးရိမ်ထိတ်လန့်စရာပင်။

အရွယ်ရောက် မြန်လွန်းခြင်း

ကလေးတွေ ကလေးဘဝ ပျောက်ဆုံးနေခဲ့သည်မှာကြာပြီ။ ယနေ့ ခေတ်ပျိုသားသမီးတွေ အားလုံး သူတို့မိဘတွေ အရွယ်မတိုင်မီ အချိန်ကထက် အားလုံး သိ၊ အားလုံးတတ်၊ အားလုံးတွင် အတွေ့အကြုံတွေ ကောင်းကောင်းရှိနေကြသည်။ သူတို့တွင် သတင်းအချက်အလက်တွေ ရယူနိုင်စရာ နေရာတွေက များလှသည်။ ကလေးဘဝ အရွယ်မတိုင်မီ လူကြီးကိစ္စတွေ သိနေသလို၊ အရွယ်မတိုင်မီ စီးပွားရေး ဦးဆောင်နေကြရသည့် ဘဝတွေလည်း ရှိလာသည်။ ကိုယ့်ဒူးကိုယ်ချွန်၊ ကိုယ့် ဘဝကိုယ်ကျောင်းနေကြရသူတွေကလည်း များလာသည်။ 

ကျောင်းတွင် အကြမ်းဖက်မှု များလာခြင်း

ကျောင်းဆိုသည်မှာ ကလေးများအတွက် မဖြစ်မနေ ဖြတ်သန်းရမည့် နေရာတစ်နေရာ ဖြစ်နေပါသေးသည်။ ထို့ကြောင့် လုံခြုံစိတ်ချ၊ ဘေးကင်းပြီး ပျော်ရွှင်စွာ ပညာရှာရမည့် နေရာတစ်နေရာ ဖြစ်ရမည့်အစား အကြမ်းဖက်တိုက်ခိုက် အနိုင်ကျင့်မှုတွေ ပေါများလာသည်။ ကျောင်းဆိုသည်မှာ စစ်ပွဲကြီးတစ်ခုဖြစ်နေသည့် နေရာအသွင်ဆောင်လာသောကြောင့် ကျောင်းမသွားချင်သူတွေ များလာသည်။ အကြမ်းဖက် တိုက်ခိုက်ခြင်း ခံရမှုကြောင့် ရာနှင့်ချီပြီး သေဆုံးရမှုတွေ ရှိလာသည်။ သေနတ်နှင့်ပစ်ခြင်း၊ ဓားနှင့်ထိုးခြင်း၊ လက်သီးနှင့် ထိုးခြင်းများအပြင် ကိုယ့်ကိုယ်ကိုယ် စိတ်ဓာတ်ကျပြီး သတ်သေနှုန်းတွေကလည်း ပိုများလာသည်။

စိတ်ဖိစီးမှု များလာခြင်း

လူငယ်တိုင်းတွင် ဖိစီးနေသည်မှာ ပညာ၊ အလုပ်၊ အောင်မြင်မှုများ ဖြစ်သည်။ ပညာတတ်အောင် သင်ချင်သော်လည်း ဘဝပေး အခြေအနေတွေကြောင့် အခက်အခဲတွေ အများကြီး ရှိနေသည်။ အခြေခံဖြစ်သည့်ပညာကို မရယူနိုင်သည့်အခါ အလုပ်ရော အောင်မြင်ရေးအတွက်ပါ သူတို့ စိတ်ဖိစီးမှုတွေ ဖြစ်လာကြရသည်။ သူတို့ အောင်မြင်လိုသော်လည်း အောင်မြင်ရန်အတွက် ကိုယ့်ကိုယ်ကိုယ် မည်သို့ စီမံခန့်ခွဲရမည်ကိုပါ သူတို့နားမလည်နိုင်အောင် ဖြစ်နေကြသည်။ စီမံခန့်ခွဲမှု ကောင်းလျှင်လည်း ဘဝတစ်ခု ပြောင်းလဲသွားနိုင်သည်ကို သူတို့ မသိသောကြောင့် စိတ်သောကတွေ ရောက်နေကြရသည်။

နိုင်ငံရေးနှင့် လူမှုရေး သောကရောက်ခြင်း

လူငယ်တွေ သတိမူသည်ဖြစ်စေ၊ သတိမမူသည်ဖြစ်စေ သူတို့ကို နိုင်ငံရေး၊ စီးပွားရေး၊ လူမှုရေးဂယက်တွေက ရိုက်ခတ်နေမည်သာဖြစ်သည်။ သူတို့ခေတ်သည် ဆိုရှယ်မီဒီယာခေတ် ဖြစ်နေသည်။ ကောင်းခြင်း ဆိုးခြင်း အားလုံးကို နေ့တိုင်း သူတို့ ရင်ဆိုင်နေကြရသည်။ ခံစားနေကြရသည်။ တုံ့ပြန်နေကြသည်။ ဘယ်လမ်းကိုလျှောက်ပြီး ဘယ်သူ့နောက် လိုက်ရမှန်းမသိ ဖြစ်နေခြင်းကလည်း သူတို့ပြဿနာ တစ်ခုဖြစ်သည်။

ရုပ်ဝတ္ထုပစ္စည်းနောက်လိုက်ခြင်း

ယနေ့ခေတ်သည် ခေတ်မီပစ္စည်း၊ အလှအပ ပစ္စည်းများ၏ ဝန်းရံထိန်းချုပ်ထားခြင်းကို ခံနေရသည့်ခေတ်ဖြစ်သည်။ နည်းပညာ ပစ္စည်းတွေကို မက်မောစွာ မှီခိုနေကြသည်။ နောက်ဆုံးပေါ် ဆန်းသစ်သည်များကို ဝယ်ယူ ကိုင်တွယ်လိုကြသည်။ လှပသည့် ပစ္စည်းများကို ဝယ်သုံးချင်ကြသည်။ ထို့ကြောင့် ဖြစ်သည့်နည်းနှင့် ငွေရှာလိုသည့် စိတ်ဓာတ်တွေ ဖြစ်လာသည်။ ရုပ်ဝတ္ထု ပစ္စည်းအပေါ် မက်မောလွန်းခြင်းကြောင့် အဆိုးဘက် ပြောင်းသွားနိုင်သည့် အနေအထားတွေက ပြည့်နေသည်။

အဝလွန်လာခြင်း

ယနေ့ခေတ်လူငယ်တို့တွင် ပိန်ပိန်ပါးပါးစတိုင်ကို သိပ်မတွေ့ရတော့ပေ။ အထူးသဖြင့် အမေရိကန် ပြည်ထောင်စုတွင် ဝတုတ်တုတ်လူငယ်တွေ ပိုများလာသည်။ အဘယ်ကြောင့်ဆိုသော် သူတို့ တီဗီနှင့် ကွန်ပျူတာရှေ့တွင် အချိန်ဖြုန်းချိန်တွေက ပိုများလာသည်။ လေ့ကျင့်ခန်း လုပ်ရမှန်းမသိ။ နေ့မအိပ် ညမနား စားလိုက်၊ ကွန်ပျူတာ ဂိမ်းကစားလိုက်နှင့် ထိုင်လျက်အချိန် ဖြုန်းနေသူ များလာသည်။ ထို့ကြောင့် အဝလွန် ဝေဒနာများ ခံစားလာကြရသည်။

ပညာရေး အဟောသိကံဖြစ်ခြင်း

ပညာရေးတွင် တန်းတူညီမျှ အခွင့်အရေးတွေ မရကြသောကြောင့် စိတ်ဓာတ်တွေကျပြီး ကျောင်းစော စောထွက် လမ်းပေါ်ကို ရောက်သူတွေ များလာသည်။ ငယ်စဉ်ကတည်း ပညာသင်ခွင့် မရနိုင်လောက်အောင် ဆင်းရဲမွဲတေခြင်း၊ စစ်ပွဲများဖြစ်နေခြင်း၊ ဒုက္ခသည်များဘဝ ရောက်နေရခြင်း စသည့် အခက်အခဲပေါင်းစုံကို ကလေးများသည် အရွယ်နှင့်မမျှအောင် ခံစားနေကြရသောကြောင့် ပညာရေး အဟောသိကံ ဖြစ်နေရသည်။ World Inequality Database on Education စာရင်းအရ ကမ္ဘာတစ်ဝန်းရှိ ၂၅ ရာခိုင်နှုန်းခန့်သော ကလေးများသည် မူလတန်း ပညာကိုပင် မသင်နိုင်လောက်အောင်ဖြစ်နေရကြောင်း သိရသည်။

စီးပွားရေး အရွေ့အပြောင်း များခြင်း

ယနေ့လူ့ဘောင်သည် တံခါးဖွင့် စီးပွားရေး၊ ဈေးကွက်စီးပွားရေးစနစ်များကို အကောင်အထည် ဖော်နေသော ခေတ်ဟုဆိုပါသည်။ လူဦးရေ ပေါက်ကွဲနေသဖြင့် လုပ်သားအင်အားကိုလည်း အပြည့်အဝ လိုအပ်နေချိန်ဖြစ်သည်။ မဖွံ့ဖြိုးသည့်နိုင်ငံများတွင် လူသားရင်းမြစ်တွေ အလျှံပယ်ဖြစ်နေသည်။ ထို့ကြောင့် လူငယ်တွေ အလုပ်တစ်ခုခုရရန်မှာ အလွန်ခက်ခဲသည့် အနေအထားတွင် ရှိနေသည်။ အလုပ်ဖြင့် ဘဝကိုတည်ဆောက်ရန် ဦးတည်နေကြသော လူငယ်များအနေနှင့် အလုပ်အကိုင် အခွင့်အလမ်းများ မရှိခြင်းက အကြီးမားဆုံးသော စိန်ခေါ်ထိုးနှက်ချက်ကြီး ဖြစ်နေသည်။ 

E-01
(Ref: Youth Time Magazine)


  • VIA