News

POST TYPE

TRAVEL LOG

ဇိုဂျိုးဂျိဘုရားကျောင်း (Zojoji Temple) လေ့လာရေး
21-Jan-2020



တိုကျိုတွင် ၁၀ ညအိပ်ခရီးစဉ် ရောက်ရှိနေစဉ်အတွင်း သွားရောက်လည်ပတ်ဖြစ်ခဲ့သော ဗုဒ္ဓဘာသာဘုရားကျောင်းနှစ်ခုမှာ ဇိုဂျိုးဂျိဘုရားကျောင်းနှင့် ဆန်ဆိုးဂျိဘုရားကျောင်းတို့ ဖြစ်ပါတယ်။ဗုဒ္ဓဘာသာဘုရားကျောင်းများစွာအနက်မှ ဇိုဂျိုးဂျိနဲ့ ဆန်ဆိုးဂျိသို့ လည်ပတ်ရန် ရွေးချယ်ရသည့်အကြောင်းမှာ ဇိုဂျိုးဂျိသည် ဂျပန်နိုင်ငံသမိုင်းတွင် အရေးအပါဆုံး ဆာမူရိုင်းစစ်ဘုရင်တစ်ပါး၏ မျိုးဆက်မိသားစုဂူဗိမာန်များ တည်ရှိရာနေရာဖြစ်ပြီး ဆန်ဆိုးဂျိမှာမူ တိုကျို၏ အလှပဆုံး နှင့် ဆွဲဆောင်မှုအရှိဆုံး ဘုရားကျောင်းများစာရင်းတွင် ပါဝင်တာကြောင့်ဖြစ်ပါတယ်။ ဒီဘုရားကျောင်းနှစ်ခုစလုံးဟာ တိုကျိုကိုရောက်ရင် မဖြစ်မနေသွားသင့်တဲ့ ဘုရားကျောင်းများအဖြစ် နိုင်ငံတကာခရီးသွား ဝက်ဘ်ဆိုက်များမှာ ထည့်သွင်းဖော်ပြတာကိုလည်း သတိပြုမိပါတယ်။သို့သော် ဒီဆောင်းပါးမှာ စာမျက်နှာအခက်အခဲကြောင့် ဇိုဂျိုးဂျိဘုရားကျောင်းအကြောင်းကိုသာ သီးသန့်တင်ပြသွားပါမယ်။ 


ဇိုဂျိုးဂျိဘုရားကျောင်း (Zojoji Temple)

ဇိုဂျိုးဂျိ ဗုဒ္ဓဘာသာဘုရားကျောင်းဟာ အဲဒို ခေတ်ကာလ (Edo Era) (၁၆၀၃-၁၈၆၇) ပထမဆုံး ဂျပန်စစ်ဘုရင်တစ်ဦးဖြစ်ခဲ့တဲ့ တိုကူဂါဝါ အိယဲယဆု(Tokugawa Ieyasu) (၁၅၄၂-၁၆၁၆) နှင့် နက်ရှိုင်းစွာ ဆက်နွှယ်ပတ်သက်နေပါတယ်။တိုကူဂါဝါ အိယဲယဆု ဟာ ဂျပန်နိုင်ငံသမိုင်းမှာ အထူးထင်ရှားခဲ့တဲ့ ဆာမူရိုင်းစစ်ခေါင်းဆောင်တစ်ဦးဖြစ်ပြီး သူ့မျိုးဆက်များဟာ အဲဒိုခေတ်ကာလတစ်လျှောက် ၁၈၆၇ တိုင်အောင် ဂျပန်နိုင်ငံကို အုပ်ချုပ်ရေးအာဏာများ လွှမ်းမိုးချုပ်ကိုင်ခဲ့ကြပါတယ်။အဲဒီလို တိုကူဂါဝါမျိုးဆက် စစ်ဘုရင်များ လွှမ်းမိုးအုပ်ချုပ်တဲ့ အုပ်ချုပ်ရေးအဖွဲ့ကို တိုကူဂါဝါမြေရှင်ပဒေသရာဇ်စစ်အစိုးရ (Tokugawa shogunate/ Tokugawa Bakufu)လို့ ခေါ်ဝေါ်သုံးနှုန်းပါတယ်။ 

ဇိုဂျိုးဂျိဘုရားကျောင်းသမိုင်းဆီ ပြန်ဆက်ရရင် ဘုရားကျောင်းကို ၁၃၉၃ တွင် ကန်တိုဒေသ (အရှေ့ ဂျပန်)တွင် စတင်တည်ထောင်ခဲ့ပြီး ၁၅၉၈ မှာ ယခုလက်ရှိနေရာသို့ ပြောင်းရွှေ့ခဲ့ပါတယ်။ ဒီပြောင်းရွှေ့မှုဟာ ဂျပန်နိုင်ငံကို နှစ်ပေါင်း ၂၀ဝ ကျော် လွှမ်းမိုးချုပ်ကိုင်ခဲ့တဲ့ တိုကူဂါဝါမျိုးဆက်မြေရှင်ပဒေသရာဇ် စစ်အစိုးရကို အစကနဦး ထူထောင်ခဲ့သူဖြစ်တဲ့ တိုကူဂါဝါ အိယဲယဆုက သူ့စစ်အစိုးရအဖွဲ့ကို ၁၅၉၀ မှာ အဲဒို (ယခု တိုကျို)သို့ ပြောင်းရွှေ့အခြေစိုက်ခဲ့ပြီးနောက်ပိုင်း ဖြစ်တည်ခဲ့တာဖြစ်ပါတယ်။အဲဒီနောက်မှာတော့ ဇိုဂျိုးဂျိဘုရားကျောင်းဟာ တိုကူဂါဝါ အိယဲယဆု မိသားစုကိုးကွယ်ဆည်းကပ်တဲ့ ဘုရားကျောင်းဖြစ်လာခဲ့ပါတယ်။ဒါ့အပြင် ဇိုဂျိုးဂျိဟာ ဂျပန်ဗုဒ္ဓဘာသာဂိုဏ်းတစ်ခုဖြစ်တဲ့ Jodo shu ရဲ့ အဓိကအုပ်ချုပ်ရေးဌာနလည်း ဖြစ်ခဲ့ပါတယ်။ ဇိုဂျိုးဂျိခေတ်ကောင်းခဲ့စဉ်ကာလကဆို ဘုရားကျောင်းနယ်နိမိတ်ဟာ ၈၂၆,ဝ၀ဝ စကွဲယားမီတာ ကျယ်ဝန်းခဲ့ပြီး အင်မတန်ကြီးကျယ်ခမ်းနားတဲ့ ပင်မ  ဘုရားကျောင်းဆောင်ကြီးအပြင် ဘုရားကျောင်းအသေး ၄၈ ကျောင်းနဲ့ ဘာသာရေးစာသင်ကျောင်း ၁၅၀ ခန့် မှာ ဘုန်းတော်ကြီးများနဲ့ ရှင်သာမဏပေါင်း ၃၀ဝ၀ နီးပါး မှီတင်းသီတင်းသုံး နေထိုင်ခဲ့ကြတယ်လို့ သမိုင်းမှတ်တမ်းများမှာ ဖော်ပြပါတယ်။
  
တိုကူဂါဝါမျိုးဆက် စစ်အုပ်ချုပ်ရေးခေတ်ကုန်ဆုံးတဲ့ ၁၈၆၇ ကစပြီး နောက်ပိုင်း မဲဂျီခေတ်ဂျပန် ခေတ်သစ်ပြုပြင်ပြောင်းလဲရေးကာလများမှာ ဗုဒ္ဓဘာသာရဲ့အခန်းကဏ္ဍဟာ မှေးမှိန်လာခဲ့ပါတယ်။ဒုတိယကမ္ဘာစစ်ကာလမှာတော့ ဇိုဂျိုးဂျိဘုရားကျောင်းဟာ လေကြောင်းတိုက်ခိုက်မှုများကြောင့် ဗုံးဒဏ်အကြီးအကျယ်ခံစားခဲ့ရပြီး တိုကူဂါဝါ မိသားစု ဂူဗိမာန်များအပါအဝင် ဘုရားကျောင်းနေရာအများစုဟာ မီးလောင်ပြာကျခဲ့ပါတယ်။ဒီနေ့မြင်တွေ့နေရတဲ့ ပင်မဘုရားကျောင်းဆောင်ကြီးနဲ့ ဝန်းကျင်အဆောင်အများအပြားဟာ စစ်ပြီးကာလနဂိုမူလလက်ရာအတိုင်း ပြန်လည် တည်ဆောက်ထားတာ ဖြစ်ပါတယ်။ယနေ့ကာလမှာ ဇိုဂျိုးဂျိဟာ Jodo shu ဗုဒ္ဓဘာသာ ဂုဏ်းရဲ့ ဌာနချုပ်အဖြစ် တည်ရှိပြီး ဘုန်းတော်ကြီးများနဲ့ ရဟန်းသာမဏေများ ပညာသင်ကြားလေ့လာဆည်းပူးရာ အဓိကနေရာဖြစ်ပါတယ်။ 


ကိုယ်တွေ့ ဇိုဂျိုးဂျိဘုရားကျောင်း

စာရေးသူ ဇိုဂျိုးဂျိဘုရားကျောင်းဆီ သွားရောက်လည်ပတ်တော့ ကျောင်းဝင်းအတွင်းမဝင်မီ ၁၆၂၂ မှာ တည်ဆောက်ခဲ့တဲ့ အမြင့် ၂၁ မီတာ (၆၉ ပေ)၊ အကျယ်၂၉ မီတာ (၉၅ ပေ) ရှိ ကြီးမားခံ့ညားလှတဲ့ အနီရောင်သစ်သားမုခ်ဦးကြီး (Sangedatsumon)ကို လမ်းရဲ့ တစ်ဖက်တစ်ချက်မှာ တွေ့ပါတယ်။ ဒီပင်မမုခ်ဦးကြီးနဲ့ အနီးအနားမှာ စာသားအားလုံးက ဂျပန်လိုရေးထားတာဖြစ်တော့ ဂျပန်ဘာသာနားလည်မှုအားနည်းတဲ့ စာရေးသူပထမတော့ ဒီမုခ်ဦးကြီးက ဘာမှန်းသေချာမသိပါဘူး။ဒါပေမဲ့ လမ်းညွှန်မြေပုံအရ ကိုယ်က ဒီဇိုဂျိုးဂျိဘုရားကျောင်းအနီးကို ရောက်နေပြီဖြစ်တာကြောင့် ဒါ ဇိုဂျိုးဂျိပဲ ဖြစ်မယ်ဆိုပြီး အတွင်းကိုဝင်ခဲ့ပါတယ်။အတွင်းကို ဝင်တယ်ဆိုရင် ရင်ပြင်ကျယ်ကြီးကို တွေ့ရမှာဖြစ်ပြီး ရင်ပြင်အဆုံးမှာ တိုကျိုတာဝါနောက်ခံနဲ့ ကြီးမားလှတဲ့ ပင်မဘုရားကျောင်းဆောင်ကြီးကို လှမ်းမြင်နေရပါတယ်။ဘုရားကျောင်းဆောင်အပေါ် အပြင်ဝရန်တာပတ်လည်မှာ များပြားလှတဲ့ ဘုန်းတော်ကြီးတွေ၊ ရဟန်းသာမဏေတွေ ကျောင်းဆောင်ကြီးကို ဝရန်တာ တစ်ပတ်ပတ်ပြီး ရွတ်ဆိုပူဇော်နေတာတွေ့ရပါတယ်။ နောက်တန်းစီပြီး တစ်ပါးချင်းအတွင်းကျောင်းဆောင်ကြီးထဲ ပြန်လည်ဝင်ရောက်သွားကြပါတယ်။စာရေးသူလည်း အနီးတိုးကပ်သွားပြီး ဓာတ်ပုံ၊ ဗီဒီယိုမှတ်တမ်းများ ရိုက်ယူနေခဲ့ပါတယ်။ 

အဲဒီကျောင်းဝင်းကြီးက အင်မတန်ကျယ်ဝန်းလှတယ် မဟုတ်ပေမယ့် လေ့လာကြည့်ရှုစရာတွေ အင်မတန်များပြားလှပါတယ်။စာရေးသူ အဓိကရှာဖွေတာကတော့ ဆာမူရိုင်းစစ်ဘုရင်တိုကူဂါဝါ အိယဲယဆုနဲ့ ဆက်နွှယ်တဲ့ မိသားစုဂူဗိမာန်များပဲ ဖြစ်ပါတယ်။နောက်အဲဒီမှာ လေ့လာရင်း ဂျပန်ဗုဒ္ဓဘာသာသမိုင်းမှာ အထူးထင်ရှားတဲ့ ဂျပန်ဘုန်းတော်ကြီးတစ်ပါးဖြစ်တဲ့ Honen Shonin (၁၁၃၃-၁၂၁၂) ကို ရည်စူးတဲ့ ဘုရားကျောင်းဆောင်ငယ် (Enkodaishido Temple) တစ်ခုလည်း တွေ့ပါတယ်။Honen Shonin ဟာ ပထမဆုံးဂျပန်ပုံစံ ဗုဒ္ဓ ဘာသာ (Japanese Pure Land tradition, the nembutsu/ the grace of Amida Buddha)ကို တည်ထောင်အသက်သွင်းသူ ဘုန်းတော်ကြီးများအနက်မှ အထင်ရှားဆုံးတစ်ဦးအဖြစ် ဖော်ပြထားတာကို လေ့လာတွေ့ရှိရပါတယ်။ 

ပင်မကျောင်းဆောင်ကြီးဘေးမှာ အဆောက်အအုံငယ်လေး (Ankokuden) တွေ့ရပြီး ဝင်ရောက်လေ့လာတော့ အတွင်းမှာ စစ်ဘုရင် တိုကူဂါဝါအိယဲယဆု ကိုယ်တိုင်ယုံကြည်စွာ ကိုးကွယ်ဆည်းကပ်ခဲ့တဲ့ အမည်းရောင်ဗုဒ္ဓ္ဓဆင်းတုတော် (Black Image of Amida Buddha) တစ်ဆူကိန်းဝပ်စံပယ်နေတာ ဖူးတွေ့ရပါတယ်။ ဒီရုပ်ပွားဆင်းတုတော်ဟာ အန္တရာယ်များကို ကာကွယ်တယ်၊ အောင်ပွဲများကို ဆောင်ကြဉ်းတယ်လို့ တိုကူဂါဝါအိယဲယဆုနဲ့ အစဉ်အဆက်သူ့မျိုးဆက်များက ယုံကြည်ကြပါတယ်။အမည်းရောင် ရုပ်ပွားတော်ဘေး ဘယ်၊ ညာ တစ်ဖက်တစ်ချက်မှာလည်း တိုကူဂါဝါ မိသားစုအစဉ်အဆက် ကိုးကွယ်ဆည်းကပ်ခဲ့တဲ့ ရုပ်ပွားဆင်းတုတော်များ၊ ဘာသာရေးအသုံးအဆောင်များကို သီးခြားအကန့်ခွဲပြီး ထားရှိပါတယ်။စာရေးသူ ရောက်ရှိနေစဉ်အတွင်း ဆင်းတုတော်ဆီ လာရောက်ကြ တဲ့ ဂျပန်လူမျိုးများဟာ အနီးရှိကောင်တာမှာ ဂျပန်ရိုးရာ ပူဇော်ပစ္စည်းများဝယ်ယူပြီး ဘုရားကို ရည်စူးပူဇော်နေတာတွေ့ရပါတယ်။ စာရေးသူကတော့ ဂျပန်လိုလည်း သိပ်မရတော့ ဘယ်ဘုရားရယ်မှ မဟုတ်ပါဘူး။ ဗုဒ္ဓဘာသာဝင်တစ်ယောက်အနေနဲ့ ရောက်တဲ့နေရာ ဘုရားကျောင်းမှာ အခံပုံးထဲအလှုငွေ အကြွေစေ့ထည့်ပြီး လက်အုပ်ချီ ဦးညွှတ်ဂါရဝပြုလိုက်တာပါပဲ။ ဂျပန်မှာ ဘုရားကျောင်းအတော်များများက အတွင်းမှာဓာတ်ပုံ၊ ဗီဒီယိုမှတ်တမ်းတင်ခြင်း ခွင့်မပြုပါဘူး။ ဒီနေရာမှာတော့ ဒါတွေကို တားမြစ်ထားခြင်းမရှိလို့ စာရေးသူလည်း ဓာတ်ပုံ၊ ဗီဒီယိုမှတ်တမ်းအချို့ယူပြီး အဓိကကျောင်းဆောင်ကြီးဆီ သွားဖို့ ပြန်ထွက်လာခဲ့ပါတယ်။

အဓိက (ပင်မ) ကျောင်းဆောင်ကြီး Daiden (Hondo) အတွင်းဆီ ဝင်လိုက်တယ်ဆိုတာနဲ့ ကျယ်ဝန်းလှတဲ့ခန်းမကြီးအတွင်း မီးဆလိုက်နဲ့ အလင်းပေးပူဇော်ထားတဲ့ လှပတင့်တယ်တဲ့ သလွန်တော်အထက်မှာ ဂျပန်ပုံစံဘုရားကျောင်းဆောင်အတွင်း ရွှေရောင်အဆင်းနဲ့ ဗုဒ္ဓရုပ်ပွားတော်တစ်ဆူ (Image of Amida Buddha) ကို အမှောင်ထုအတွင်း အပေါ်မျက်နှာကြက်  မီးဆိုင်းကြီးများရဲ့မီးရောင် မှိန်ဖျော့ဖျော့အောက်၊ သန့်ရှင်း တောက်ပြောင်နေတဲ့ ကြွေသားသဖွယ် မဟော်ဂနီရောင် ကြမ်းခင်းအမြင့်မှာ အင်မတန်ကြည်ညိုဖွယ် ဖူးတွေ့ရပါတယ်။ဆင်းတုတော်နဲ့ အနီးဝန်းကျင်မှာ မည်သည့်အခြား လူရုပ်၊ နတ်ရုပ်၊ အသုံးအဆောင်မှ မတွေ့ရလို့ စာရေးသူရဲ့ ရန်ကုန်နေအိမ်က ဘုရားစင်ကို တွေ့မြင်ဖူးမျှော်ရသလို ခံစားကြည်နူးခဲ့ရပါတယ်။ အပေါ်မျက်နှာကြက် ထောင့်လေးထောင့်မှာ ရှည်လျား ကြီးမားတဲ့ မီးဆိုင်းကြီးလေးဆိုင်း ချိတ်ဆွဲထားပြီး အလယ်မှာ ပိုမိုကြီးမားတဲ့ မီးဆိုင်းကြီးတစ်ခုရှိပါတယ်။ဗုဒ္ဓ္ဓရုပ်ပွားတော်ဘေး ခပ်လှမ်းလှမ်း အတွင်းထောင့် ဘေး၊ ဘယ်ညာမှာတော့ အခြားရုပ်တုနှစ်ဆူရှိပါတယ်။ညာဘက်တစ်ဆူက ဂျပန်ဘုန်းတော်ကြီး Honen Shonin ရဲ့ တွေးခေါ်ယူဆချက်များအပေါ် လွှမ်းမိုးမှုရှိတဲ့ တရုတ်ပညာရှင်နဲ့ဘုန်းတော်ကြီး Shan-tao (Zendo) (၆၁၃-၆၈၁) ရဲ့ ရုပ်ပွားတော် (Image of Great Teacher Shan-tao) ဖြစ်ပြီး ဘေးဘက်တစ်ဆူက ဂျပန်ဘုန်းတော်ကြီး Honen Shonin (၁၁၃၃-၁၂၁၂) ရဲ့ ရုပ်ပွားတော်(Image of Honen Shonin) ဖြစ်ပါတယ်။ပင်မဘုရားကျောင်းဆောင်ကြီးအတွင်း ထိုင်ခုံတစ်ခုမှာ စာရေးသူအတော်ကြာ ထိုင်နေဖြစ်ခဲ့ပါတယ်။


နောက်ပြန်ထွက်လာပြီး ပင်မကျောင်းဆောင်အနောက်ဘက် ဘုရားကျောင်းဝင်းအတွင်းက တိုကူဂါဝါ မိသားစုဂူဗိမာန်များ (သင်္ချိုင်း) (The mausoleum of the Tokugawa Shoguns) ဆီသွားဖို့ အပြင်ပြန်ထွက်လာခဲ့ပါတယ်။ဘုရားကျောင်း သတင်းအချက် အလက်များအရ ဒီသင်္ချိုင်းမှာ တိုကူဂါဝါမျိုးဆက်စစ်ဘုရင် ခြောက်ဦး၊ တိုကူဂါဝါမျိုးဆက် ၁၄ ဆက်မြောက် စစ်ဘုရင်တိုကူဂါဝါ အိုင်အိမိုချိ (Tokugawa Iemochi) ရဲ့ ကြင်ယာတော် ဂျပန်ဘုရင်သမီးတော် မင်းသမီး Princess Kazunomiya (၁၈၄၆-၁၈၇၇) နဲ့အခြား တိုကူဂါဝါမျိုးဆက် စစ်ဘုရင်များရဲ့ ဇနီးများ၊ သားသမီးများကို မြှုပ်နှံထားတယ်လို့ သိရပါတယ်။ ဒီဂူသင်္ချိုင်းတွေကို အများပြည်သူ ဝင်ရောက်ကြည့် ရှုဖို့ ဖွင့်လှစ်ပေးမထားပဲ နေ့ထူးနေ့မြတ်အချို့မှာသာ ြွခင်းချက်အနေနဲ့ ဖွင့်လှစ်ပေးပြီး ဝင်ရောက်လေ့လာ ခွင့်ပြုတယ်လို့ သိရပါတယ်။စာရေးသူ ဂူဗိမာန် (သင်္ချိုင်း) အဝ မည်းညစ်ညစ် တံခါးမကြီးနားအထိ ရောက်ပါတယ်။သင်္ချိုင်းတံခါးမကြီး အသွင်အပြင်က ရှေးမြန်မာဘုရင်ခေတ် တံခါးကြီးနဲ့တောင်တူတယ်လို့ စိတ်ထဲတွေးမိခဲ့ပါတယ်။ပတ်လည်ကာရံထားတဲ့ အုတ်နံရံများကို ကျော်ပြီး အတွင်းအုတ်ဂူအပေါ်ယံ အစိတ်အပိုင်းအချို့ ကို မြင်တွေ့ရပါတယ်။ဒီမှာပဲ စာရေးသူရဲ့ ဇိုဂျိုးဂျိဘုရားကျောင်းလေ့လာရေး ခရီးစဉ် ပြီးဆုံးပါတယ်။ပြီးဆုံးတယ်ဆိုတာ နောက်ထပ်သွားစရာ၊ လုပ်စရာတွေ ရှိနေလို့ ဖြစ်ပါတယ်။ဘုရားကျောင်းဝင်းအတွင်း နောက် ထပ်လေ့လာစရာ သမိုင်းဝင်ခေါင်းလောင်း (Daibonsho) ၊ မူရင်းဗုဒ္ဓကျမ်းစာ ထိန်းသိမ်းထားရှိရာနေရာ (Kyozo)၊ စာသင်စာပို့ချအဆောင် (Koshoden) ၊ ဘုရားကျောင်းသမိုင်းပြတိုက် (Zozoji Treasures Gallery) စသဖြင့် ကျန်ရှိပါသေးတယ်။ 

ဆောင်းပါးအဆုံးမသတ်ခင် ရေးချင်တာလေးတစ်ခုက ဇိုဂျိုးဂျိဘုရားကျောင်းဝင်းဘေး အကာအရံမရှိ ဆက်စပ်နေတဲ့မြေနေရာလေးမှာ ကလေး နတ်ကွန်းလေး (Sentai Kosodate Jizō)တစ်ခု ရှိပါတယ်။ကလေးနတ်ကွန်းလို့ ပြောရတာ အဲဒီမှာ ဦးထုပ်အနီလေးတွေ ဆင်မြန်းထားတဲ့ ကလေးနတ်အရုပ် ရာပေါင်းများစွာ တညီတညာ တန်းစီတည်ရှိနေလို့ ဖြစ်ပါတယ်။ဒီနတ်ကွန်းကို အချို့ဝက်ဘ်ဆိုက်တွေမှာ ကလေးဥယျာဉ် (Unborn Children Garden) လို့ လည်းရေးကြပါတယ်။ဒါပေမဲ့ ဘုရားကျောင်းရဲ့ တရားဝင် ဝက်ဘ်ဆိုက်မှာတော့ အဲဒီကလေးနတ်ရုပ်တွေအကြောင်း ဖော်ပြထားတာမတွေ့ရပါဘူး။အခြားဝက်ဘ်ဆိုက်တစ်ခုမှာတော့ ဒီကလေးနတ်ကွန်းကို တကယ်ပိုင်ဆိုင်တာ ဇိုဂျိုးဂျိဘုရားကျောင်းမြေကို စောင့်ရှောက်နေတဲ့ ဇိုဂျိုးဂျိ ဘုရားကျောင်းအနီးက ယူဂ (Yuga Shrine)  နတ်ကွန်းဖြစ်တယ်လို့ ဖော်ပြထားတာ တွေ့ရပါတယ်။ ဒီကလေးနတ်ရုပ်တွေနဲ့ ဆက်စပ်တဲ့ နှစ်စဉ်ပွဲတော် (Jizohon Daihoyo) တစ်ခုလည်း ရှိတယ်လို့ သိရပါတယ်။ ဒီအကြောင်းဆက်ရေးရင် ဆောင်းပါးသိပ်ရှည်သွားပါလိမ့်မယ်။ 


ဇိုဂျိုးဂျိဘုရားကျောင်းဆီသွားမယ်ဆိုရင် ဘုရားကျောင်းဝင်ကြေးက အခမဲ့ဖြစ်ပါတယ်။ကျောင်းဝင်းအတွင်းက ပြတိုက်နဲ့ ဂူဗိမာန်ဆီ ဝင်ရောက်လေ့လာမယ်ဆိုရင်တော့ ဝင်ကြေးပေးရပါတယ်။ဇိုဂျိုးဂျိဘုရားကျောင်းရဲ့ လိပ်စာက 4-7-35 Shibakoen Minato-ku, Tokyo 105-0011 Japan ဖြစ်ပြီး ဘုရားကျောင်းဆီ အနီးဆုံးရောက်ရှိနိုင်တဲ့ ဘူတာရုံများကOnarimon Station (Mita Subway Line) Shibakoen Station ( Mita Subway Line) နဲ့ Daimon Station (Oedo Subway Line)တို့ပဲ ဖြစ်ကြပါတယ်။ဘုရားကျောင်းနဲ့ ပတ်သက်ပြီး ပိုမိုသိရှိလိုတယ်ဆိုရင် ttps://www.zojoji.or.jp/en/ မှာ သွားရောက်လေ့လာဖတ်ရှုနိုင်ပါတယ်။ 

ခင်မင်စွာဖြင့်
အောင်အောင် (IR)
ခေတ္တ တိုကျိုမြို့