News

POST TYPE

TRAVEL LOG

ကမ္ဘာကျော် ကြောက်စရာတံတားများ
29-Dec-2018


ကော်လိုရာဒိုက တော်ဝင်ဂျော့တံတား

The Royal Gorge Bridge ဟု ခေါ်သည့် တံတားကြီးကို ကမ္ဘာ့အမြင့်ဆုံးတံတားဟု ၂၀၀၁ ခုနှစ်အထိ သတ်မှတ်ခဲ့ကြသည်။ ဂျော့တံတားကို ၁၉၂၉ ခုနှစ်တွင် တည်ဆောက်ခဲ့ပြီး ဒေါ်လာ ၃၅၀,၀၀၀ သာ ကုန်ကျခဲ့သည်ဆို၏။ ထိုတံတားသည် အရှည် ၁၂၆၀ ပေရှိပြီး ကော်လိုရာဒို၏ ထင်ရှားသော Royal Gorge  ချောက်ကြီးကို ဖြတ်ဖောက်ကာ တည်ဆောက်ထားသည့် တံတားလည်းဖြစ်သည်။ ထိုချောက်ကြီး၏ အောက်ခြေတွင် အရှည် ၉၅၅ ပေ အာကင်းဆပ်မြစ်ကြီးက ဆူညံစွာစီးဆင်းလျက်ရှိသည်။ 

ဂျော့တံတားကိုတည်ဆောက်ရန် ၆ လ အချိန် ယူခဲ့ရသည်။ အဓိကကျသော ဆိုင်းကြိုးကြီး နှစ်ချောင်း၏ အလေးချိန်ကပင် တစ်ချောင်းလျှင် တန်ချိန် ၂၀၀ ခန့်ရှိသည်။ ကြိုးကြီးတစ်ချောင်းဖြစ်လာရန်အတွက် ကြိုးငယ်ပေါင်း ၁၂၉၂ ချောင်းဖြင့် ပူးပေါင်းကျစ်လိမ်ထားရသည်။ တံတားဟိုဘက်သည်ဘက် မြေပြင်မှ ထောက်ကန်ပေးထားပြီး တံတားကြီးကို ထိန်းပေးထားသည်။ 

ကြိုးဆိုင်းထားသည့် တံတားကြီးပေါ်က ပေ ၁၀၀၀ ကျော်နက်သည့် ချောက်ထဲမှ မြစ်ကိုကြည့်ရန်နှင့် တံတားကြီး၏ လှုပ်ခါနေသော ရင်ဖိုဖွယ်အတွေ့အကြုံများကို ခံစားနိုင်ရန် ကော်လိုရာဒိုရောက်သူတိုင်း သွားရောက်ကြည့်ရှု လေ့လာကြသည်။ တစ်နည်းပြောရလျှင် တံတားပေါ်ရောက်နေသည်မှာ မီးပုံးပျံကြီး တစ်လုံးပေါ် ရောက်နေသလို ခံစားရမည်ဟု ဆိုသည်။



နီပေါကကြိုးတံတား

နီပေါနိုင်ငံ ဂါဆာ (Ghasa) အရပ်တွင် ကြိုးတံတား ကြီးတစ်ခုကလည်း စိတ်ဝင်စားစရာကောင်းလှသည်။ ဂါဆာလွှဲတံတား (Swinging Bridge of Ghasa) ဟု ခေါ်သည်။ မြင့်မားသောချောက်ကမ်းပါးနှစ်ဖက်ကို ဆက်စပ်ထားသည့် ထိုကြိုးတံတားကြီးမှာ ဒေသခံများက လူ၊ မြည်း၊ လားနှင့် ကုန်စည်များ ဖြတ်သန်းနိုင်ရန် တည်ဆောက်ထားသည့် တံတားတစ်ခုလည်း ဖြစ်သည်။ လေတိုက်တိုင်း လှုပ်ရမ်းနေသည့် ကြိုးတံတားပေါ်တွင် ဒေသခံများက မထူးသော်လည်း ဧည့်သည်များကို အသည်းတယားယားနှင့် ဖြတ်သန်းကြရမည် ဖြစ်သည်။

တံတားကိုကြည့်လိုက်လျှင် ယိုင်နဲ့သလိုလို ဖြစ်ကာ မဖြတ်ရဲလောက်အောင်ဖြစ်နေသော်လည်း အလွန်ခိုင်ခံ့သည့် တံတားတစ်စင်းဖြစ်သည်။ ထူးခြားသည်မှာ အချို့သော တိရစ္ဆာန်များကို တံတားဖြတ်သန်းစဉ် စိုးရိမ်ကြောက်စိတ်များ ဝင်မည်ကို စိုးရိမ်သောကြောင့် မျက်စိများကို ပိတ်စည်းပြီးမှ ဖြတ်သန်းရန် ဆွဲခေါ်သွားကြသည်။ တံတားကရှည်လည်းရှည် လူတစ်ယောက်နှင့် မြည်း၊ လားတစ်ကောင်သွားစာလောက် သာရှိသော်လည်း လူတွေ၊ တိရစ္ဆာန်တွေကို မပိတ်ရလေအောင် ကိုယ့်နည်းကိုယ်ဟန်များနှင့် ဖြေရှင်းပြီး သွားလာနေကြသည့် ချစ်စရာကောင်းသော ဓလေ့များကို တွေ့မြင်ရမည်ဖြစ်သည်။ 


 
အီယာ ကာဇုရာဘာရှီတံတား

ဂျပန်နိုင်ငံရှိ အီယာ ကာဇုရာဘာရှီတံတားကို အီယာတောင်ကြားတွင် ကြိမ်ကြိုးတံတားတစ်ခုအနေနှင့် တည်ဆောက်ထားခြင်းဖြစ်သည်။ နွယ်ကြိမ်များနှင့် ပေါင်းစပ်ဆောက်ထားသည့် တံတားသည် ၁၄၈ ပေရှည်ပြီး အောက်တွင် အီယာဂါဝါမြစ်က ဖြတ်သန်း စီးဆင်းနေသည်။ နွယ်ကြိမ်များနှင့်ပေါင်းစပ်ထားသော တံတားက အီယာတောင်ကြားမှ ရေပူစမ်းဆီသို့ သွားရောက်ရန် တည်ဆောက်ပေးထားခြင်းဖြစ်သည်။

ဟာဒီ ကီဝီ ဆိုသည့်အပင်မှ နွယ်ကြိုးများကို တံတားတွင် အသုံးပြုထားသည်။ တံတားတစ်ခုကို ကြိမ်နွယ်များနှင့် တည်ဆောက်ရန်ဆိုသည်မှာ မလွယ်သော်လည်း အတော်လေးခိုင်ခံ့သည့် ဆွေးမြည့်ခြင်း မရှိ၊ နှစ်အတန်ကြာအောင်ထားနိုင်သည်။ သို့သော် အရည်အသွေးပြည့်မီသည့် တံတားမဟုတ်မှန်း သိသိနှင့် လူတွေ စိတ်ဝင်စားခြင်းကို ခံနေရသည်။

တံတားကို ကြိမ်နွယ်များဖြင့် အဘယ်ကြောင့် ဆောက်ခဲ့ရသနည်းဆိုလျှင် ရှေးကတည်းက ရန်သူတွေလာလျှင် အလွယ်တကူ ခုတ်ဖြတ်နိုင်ရန်ဟုဆိုသည်။ ကြိုးတံတားကို သုံးနှစ်တစ်ကြိမ် အသစ်ပြန်လဲသည်။ နွယ်ကြိမ်များကိုလည်း ထိုပတ်ဝန်းကျင် တောများထဲက သဘာဝပစ္စည်းများနှင့်သာ တည်ဆောက်ပါသည်။ 

သို့သော် ယနေ့အခါ လာရောက်လည်ပတ်သူများ စိတ်ချရန်အတွက် အတွင်း၌ သံမဏိ၊ စတီးကြိုးများထည့်ပြီး အပေါ်မှကြိမ်များပတ်ကာ တည်ဆောက်ထားသည်။ တံတားကိုဖြတ်ရန် သစ်သားချောင်းများကို ကျဲကျဲစီထားသဖြင့် မြစ်အောက်ကိုမြင်နေရသည်။ ရောက်လာသည့် ဧည့်သည်များက ဖြတ်လိုက်တိုင်း တံတားလှုပ်ပြီး အောက်ကိုကြည့်ရှုကာ ရင်ဖိုရသော အရသာကို ခံစားနိုင်ရန် လည်ပတ်ကြသည်။ 



ဟောင်ယာဂူတံတား

တံတားကို တည်ဆောက်သူသည် လူတွေကို တစ်ခုခု ခံစားစေလိုသဖြင့် ဒီဇိုင်းထွင်ကာ တည်ဆောက်ထားသလိုဖြစ်သည်။ တရုတ်နိုင်ငံ ဟာဘေးတွင် ရှိသည့် ထိုဟောင်ယာဂူတံတားကို ၂၀၁၇ ခုနှစ်ကမှ ဖွင့်လှစ်ထားခြင်းဖြစ်သည်။ အောက်ခြေတည့်တည့် အမြင့်ပေ ၁၆၀၁ အထက်တွင်ရှိနေသည့် ထိုတံတားကို တော်ရုံသတ္တိဖြင့် မဖြတ်ရဲဟုဆိုကြသည်။ 

တံတားအခင်းကို တည်ဆောက်သူက မအက်ကွဲနိုင်သည့် မှန်များဖြင့် ခင်းထားသည်ကပင် အောက်ကို ငုံ့ကြည့်လိုက်လျှင် အသည်းယားရင်ဖိုစရာဖြစ်သည်။ ဘေးနားမှ လက်တန်းများကို ကိုင်ဖြတ်ကာ ရင်ဖိုစွာ လျှောက်ကြည့်နေကြသူတွေများသည်။ တံတားက လှုပ်ယမ်းနေသည်မှာလည်း စိုးရိမ်စိတ်တွေကို ပိုပြီး ဖြစ်စေသည်။

တံတားတွင်ခင်းထားသည့် မှန်ချပ်အထူက ၁ ဒသမ ၆ လက်မရှိသည်။ ထိုအနေအထားက လုံခြုံသည်ဟု ယူဆရသော်လည်း ထိတ်လန့်စရာသာ ဖြစ်သည်။ တစ်ကြိမ်ဖြတ်သန်းလျှင် လူပေါင်း ၂၀၀၀ ဖြတ်သန်းနိုင်သည်။ သို့သော် လူ ၆၀၀ ခန့်သာ ဖြတ်သန်းခွင့်ပြုထားသည်။ 

တံတားကိုဖြတ်သန်းသူတိုင်း သတ်မှတ်ထားသော စွပ်ဖိနပ်များကိုသာ ဝတ်ဆင်သွားရသည်။ တံတားကို အစင်းအခြစ်များဘေးမှ ကာကွယ်ရန်ဖြစ်သည်။ တံတားကို စောင့်ရှောက်သည့် အစောင့်အရှောက် များရှိသည်။ ကြောက်တတ်သူများကို ပြန်လည်ခေါ်ယူရန်ဖြစ်သည်။ ပိုပြီး ထူးဆန်းသည်မှာ တစ်ခါတစ်ရံတွင် တံတားကြီးကို အသံများ ထူးဆန်းစွာဖြင့် ဖန်တီး ထည့်ထားပေးခြင်းဖြစ်သည်။ မှန်ကိုနင်းလိုက်လျှင် အက်ကွဲသံများ ပေါ်ထွက်လာစေရန် ဖန်တီးထားခြင်းကြောင့် အော်ဟစ်သံများဖြင့် ခံစားမှုအပြည့်အဝ ပေးသော တံတားတစ်စင်းလည်း ဖြစ်သည်။ 

မိုးစက်

(Ref: Terrifying Bridges)