News

POST TYPE

TRAVEL LOG

ထိုင်ဝမ်သို့ သွားမည်ဆိုလျှင်
24-Nov-2018
ထိုင်ဝမ်သို့ သွားမည်ဆိုလျှင်

ထိုင်ဝမ်ကို “တရုတ်တစ်နိုင်ငံ”ဟုခေါ်ကြသည်။ ယနေ့ အများအသုံးပြုနေသည့် အီလက်ထရွန်နစ်ပစ္စည်းများသည် ထိုင်ဝမ်နှင့်မကင်းဟု ဆိုနိုင်သည်။ ထိုင်ဝမ်သည် တရုတ်နိုင်ငံနှင့် ဆက်စပ်နေသည်ဆိုသော်လည်း သူ့နည်း သူ့ဟန်နှင့် တရုတ်နိုင်ငံလေးတစ်ခုဟု ဆိုနိုင်သည်။

ထိုင်ဝမ်သည် ခေတ်ဟောင်းနှင့် ခေတ်သစ် လွန်ဆွဲနေသည့် နိုင်ငံတစ်နိုင်ငံဖြစ်သည်။ ထို့ကြောင့် ကမ္ဘာလှည့်ခရီးသည်တို့ကို ဆွဲဆောင်နိုင်သည့် နေရာတစ်နေရာလည်း ဖြစ်နေသည်။ ထိုင်ဝမ်သည် ကြီးမားကျယ်ပြန့်သည့် ဒေသတစ်ခု မဟုတ်သော်လည်း ၁၆ ရာစုခေတ်က ပေါ်တူဂီတို့နှင့် ဆက်စက်နေသည့် အမွေအနှစ်များကလည်း စိတ်ဝင်စားစရာအဖြစ် ကျန်နေသေးသည်။ 

ထိုင်ဝမ်သည် တက်စ်မေးနီးယားနိုင်ငံ၏ ထက်ဝက်ခန့် အရွယ်အစားသာရှိသည်။ ဩစတြေးလျနိုင်ငံ လူဦးရေနှင့် အတူတူလောက်ပင်ဖြစ်ကာ ၂၃ သန်းခန့်ရှိသည်။ တိုင်ပေတွင် လူဦးရေ သုံးသန်းခန့်နေသည်။ အာရှရှိ မြို့တော်ကြီးများထဲတွင် စံချိန်တင်လောက်အောင် လူဦးရေများသည်။ သို့သော် သန့်ရှင်းစိမ်းလန်းပြီး နေချင့်စဖွယ်ကောင်းသည့် ဒေသဖြစ်သည်။ မြို့ပြတွင် ဗုဒ္ဓ၊ တာအိုနှင့် ကွန်ဖြူးရှပ် စသည့် ကိုးကွယ်မှုဆိုင်ရာ ဘုရားကျောင်းများ၊ ရုပ်တုများရှိသည်။

Taipei 101 အဆောက်အအုံကြီးသည် ထိုင်ဝမ်၏ အထင်ကရ ခေတ်သစ် အမြင့်ဆုံးစာရင်းကို ၂၀၁၀ အထိ ဝင်ခဲ့သည်။ ၂၀၁၀ တွင် ဒူဘိုင်း၌ စံချိန်ချိုးနိုင်သည့် အဆောက်အအုံပေါ်လာသောကြောင့် စံချိန်ကျသွားသည်။ အထပ် ၈၉ ထပ်နှင့် ၉၁ ထပ်များမှ တစ်မြို့လုံးကို မိုးကြည့်နိုင်သည်။ ထိုအဆောက်အအုံရှိ ဓာတ်လှေကားက တစ်နာရီ ၆၃ ကီလိုမီတာနှုန်းဖြင့် ခုတ်မောင်းပေးသည်။ အောက်ဆုံးထပ်တွင် ကြီးမားသော ကုန်တိုက်ကြီးကို ဖွင့်လှစ်ထားသည်။

တိုင်ပေရှိ အမျိုးသားပြတိုက် (National Palace Museum) တွင် ကမ္ဘာ့အရှားပါးဆုံး တရုတ် အနုပညာလက်ရာများ၊ ရှေးဟောင်းပစ္စည်းများကို လေ့လာနိုင်သည်။ ရှေးတရုတ်မင်းဆက်တို့၏ ရှားပါးသော ယဉ်ကျေးမှုလက်ရာပစ္စည်းများကို လေ့လာနိုင်သည်။ ချန်ကေရှိတ်လက်ထက်က တရုတ်နိုင်ငံမှ သိမ်းပိုက်လာခဲ့သော လက်ရာတွေကို ပြတိုက်အတွင်း များစွာ တွေ့နိုင်သည်။

ထိုင်ဝမ်တွင် အာရှ၏ အစားအစာအားလုံးကို အရသာခံစားနိုင်သည်။ ဂျပန်စာ ဆူရှီမှသည် ဆာရှီမီ၊ တမ်ပူရာ၊ တက်ပန်ရာကီ စသည့် အစားအစာများအထိ စားသောက်နိုင်သည်။ ၁၈၉၅ မှ ၁၉၄၅ ခုနှစ်အထိ ဂျပန်တွေ စိုးမိုးအုပ်ချုပ်သွားသည့် အငွေ့အသက်များဖြစ်သည်။ ထို့ပြင် တရုတ် ဘေဂျင်းစတိုင် ဈေးတွေ၊ စားသောက်တန်းတွေလည်းရှိသည်။ နေ့ဈေး ညဈေးမပြတ် ကြိုက်သည့်အချိန် အပြင်ထွက်ပြီး စားသောက်နိုင်သည်။ ကိုယ်တတ်နိုင်သလောက် အနေအထားဖြင့် လမ်းဘေးမှသည် ဟိုတယ်တက်ပြီးလည်း စားနိုင်သည်။

ရှီလင်းသည် တိုင်ပေတွင် လူဦးရေ အများဆုံး အရှုပ်ထွေးဆုံးဖြစ်သည်။ အဝတ်တန်း၊ စားသောက်တန်း၊ အီလက်ထရွန်နစ်ပစ္စည်းတန်း၊ အမှတ်တရ လက်ဆောင်တန်း၊ ဝက်ခေါက်ကင်၊ ဘဲကင်၊ ပင်လယ်စာ၊ ကြက်ကြော် စသည်ဖြင့် ဆူညံရှုပ်ထွေးသည့် ဈေးတန်းကို ပျော်ရွှင်စွာတိုးပြီး ကြိုက်ရာကို ဝယ်နိုင်၊ စားနိုင်သည်။ တစ်ပွဲမှ ၁ ဒသမ ၆၀ ဒေါ်လာမှသည် အများဆုံး ၃ ဒသမ ၂၀ ဒေါ်လာခန့်သာ ရှိသည်။ ထို့ကြောင့် လမ်းဘေးဈေးတန်းကို နိုင်ငံခြားဧည့်သည်တွေ သဘောကျကြသည်။ 

ထိုင်ဝမ်ရောက်လျှင် သတိထားရမည့် အချက်များမှာ -

၁။ တိုင်ပေတွင် ရောင်းသည့် EasyCard ကို ဝယ်သုံးသင့်သည်။ ကြိုတင်ငွေပေးချေထားသည့်ကတ်ဖြစ်ပြီး ထိုင်ဝမ်အတွင်း လှည့်လည်ရာတွင် ရထားစီး၊ ကားစီးရန်အတွက်လည်း အဆင်ပြေသည်။ ကတ်ကိုဆောင်ထားခြင်းဖြင့် ငွေလိုက်လဲနေသည့် ဒုက္ခကင်းဝေးသည်။ ကတ်ပြပြီး ကူးတို့သင်္ဘောများကို စီးနိုင်သဖြင့် သင်္ဘောလက်မှတ်ကို တန်းစီဝယ်ရသည့် ဒုက္ခက လည်းကင်းဝေးမည်။

၂။ အဓိကကျပြီး ကျော်ကြားသည့် နေရာများကို အများသူငါ ရုံးပိတ်ရက်များတွင် သွားမလည်ပတ်သင့်ပါ။ ဥပမာ - Taroko Gorge နှင့် Sun Moon Lake လိုနေရာမျိုးတွေကိုဖြစ်သည်။ ဘတ်စ်ကားတွေ လူအလွန်ကျပ်တတ်သည်။ လူတိုးရသည်နှင့် ကောင်းကောင်း ကြည့်ရှုလေ့လာနိုင်မည်မဟုတ်ပါ။

၃။ အင်္ဂလိပ်-တရုတ် (မန်ဒရင်း) အဘိဓာန်ကို ဆောင်သွားသင့်ပါသည်။ မြို့ထဲတွင် ဆိုင်းဘုတ်များက အင်္ဂလိပ်လို ရေးထားသည်က များပါသည်။ လူငယ် အများစုကလည်း အင်္ဂလိပ်လို ပြောတတ်ကြသည်။ ကျေးလက်ဘက်သွားလျှင် ဆိုင်းဘုတ်လမ်းညွှန်တွေက တရုတ်တွေလိုဖြစ်သွားသည်။ အင်္ဂလိပ်လိုပြောသူ နည်းသဖြင့် အဘိဓာန်ကို ဆောင်သွားသင့်သည်။

၄။ တိုင်ပေ စံတော်ချိန်ကို သတိထားသင့်ပါသည်။ သူတို့ နောက်ဆုံးရသတင်းဆိုပြီး ထုတ်လွှင့်ချက်များတွင် အချိန်တွေပါတတ်သည်။ ထိုအချိန်အတိုင်း သွားလာနိုင်ရန် ကြိုးစားသင့်သည်။

၅။ ထိုင်ဝမ်တွင် Wi-Fi ကို အခမဲ့ သုံးစွဲနိုင်သည်။ အစိုးရက အထောက်အပံ့ ပေးထားသည်။ အွန်လိုင်းကတစ်ဆင့် မှတ်ပုံတင်ပြီး သုံးနိုင်သည်။ သို့မဟုတ် တိုင်ပေရှိ ခရီးသွားစုံစမ်းရေးဌာနကိုသွားပြီး နိုင်ငံကူးလက်မှတ်ပြလိုက်လျှင် Wi-Fi ကို အခမဲ့သုံးနိုင်သည်။ 

ထိုင်ဝမ်သည် ရထားလမ်း၊ ကားလမ်း ဝန်ဆောင်မှုကောင်းသည်။ အနောက်ပိုင်းတစ်လျှောက် လည်ပတ်ရန် အဆင်ပြေသည်။ အရှေ့ပိုင်းနှင့် တောင်ပိုင်းကမ်းရိုးတန်းများသို့ ဘတ်စ်ကားများ စီးရသည်မှာ ပြတ်တောက်သည်။ အကောင်းဆုံးကတော့ ကားငှားပြီး လည်ပတ်နိုင်လျှင်ပိုကောင်းသည်။ ငါးရက်ခရီးကို ပို့ဆောင်ပေးသည့် Edison Travel သယ်ယူပို့ဆောင်ရေးရှိသည်။ အဓိကကျသောနေရာများဖြစ်သည့် Sun Moon Lake, Fo Guang Shan Buddhist Monastery, Kenting National Park, Taroko Gorge နေရာများကို ပို့ပေးသည်။ လူတစ်ယောက်လျှင် ၅၉၉ ဒေါ်လာခန့်ယူသည်။ ထိုခရီးစဉ်အတွက် လေးညအိပ် ကြယ်ငါးပွင့်ဟိုတယ်ကြီးတွင် တည်းခိုနိုင်သည့် အစီအစဉ်လည်းပါသည်။

မိုးစက်
(Ref: Traveller)