News

POST TYPE

TRAVEL LOG

မောလ်ဒိစ်ကျွန်းမှ လျှို့ဝှက်ချက်များ
17-Nov-2018
မောလ်ဒိစ် (Maldives) ကျွန်းသည် အပူပိုင်းဇုန်အတွင်း ကျရောက်နေသည့် ကျွန်းတစ်ကျွန်းဖြစ်သည်။ မျက်စိတစ်ဆုံး အပြာရောင် ရေပြင်ကျယ်ကြီးများကို တွေ့မြင်နိုင်ပြီး သဲသောင်ပြင် ဖြူဖြူများ၊ သန္တာကျောက်တန်းများအပြင် လှပသည့် ရှုခင်းများကို တဝကြီးခံစားနိုင်မည့် နေရာတစ်ခုဖြစ်သည်။ 

အိန္ဒိယသမုဒ္ဒရာအလယ်တွင်ရှိသော ကျွန်းတစ်ကျွန်းဖြစ်ပြီး စတုရန်းမိုင် ၃၅၀၀၀ အတွင်း သန္တာ ကျောက်တန်း ကျွန်းပေါင်း ၁၁၉၀ ခန့်ရှိသည်။ မောလ်ဒိစ်နိုင်ငံ၏ ၉၉ ရာခိုင်နှုန်းသည် ရေပြင်ဖြစ်သည်ဟု ပြောနိုင်ပြီး လွန်ခဲ့သော နှစ်ပေါင်း ၃၀၀၀ ကျော်က ယဉ်ကျေးမှု လက်ရာအမွေအနှစ်များကြောင့်လည်း ထင်ရှားပြီး ကမ္ဘာလှည့်ခရီးသည်တွေ အများဆုံးသွားလာနေသည့် နေရာဖြစ်နေသည်။ မောလ်ဒိစ်နိုင်ငံ၏ ထူးခြားချက်များကို ကြည့်မည်ဆိုလျှင် -

အုန်းသီးကို ရွေးကောက်ပွဲအတွက် အသုံးပြုခြင်း



မောလ်ဒိစ်နိုင်ငံသားတို့သည် သဘာဝလွန် ယုံကြည်ကိုးကွယ် စွဲလမ်းစိတ်များ အလွန်အမင်း ရှိကြသည်။ မှော်ပညာအနေနှင့် အထက်လမ်း၊ အောက်လမ်းကို ယုံကြည်ကြသည်။ ၂၀၁၃ ခုနှစ် စက်တင်ဘာလက အုန်းသီးတစ်လုံးကို ရဲတွေက ဖမ်းဆီးထိန်းသိမ်းမှုတစ်ခုဖြစ်ပွားခဲ့သည်။ သမ္မတရွေးကောက်ပွဲတွင် အုန်းသီးတစ်လုံးကို ထူးဆန်းစွာ အစီအရင်လုပ်ထားခြင်းကြောင့် ဖြစ်သည်။ 

မဲရုံတစ်ရုံရှေ့တွင် အစီအရင်လုပ်ထားသော အုန်းသီးတစ်လုံးကို တွေ့ကြသည်။ ထူးဆန်းစွာဖြင့် ရွေးကောက်ပွဲကို စောင့်ကြည့်ပြီး ဖျက်လိုဖျက်ဆီး လုပ် သည်ဆိုကာ ရဲတွေက ဖမ်းဆီးထိန်းသိမ်းသွားခဲ့သည်။ 

မောလ်ဒိစ်တွင် အုန်းသီးကို အောက်လမ်းနည်း အစီအရင်ဖြင့် အသုံးပြုကြသည်ကများသည်။ အုန်းသီး ဖြင့် ကျိန်စာတိုက်ထားနိုင်သည်။ အုန်းသီးက ဂါထာတွေရွတ်ပြီး ဖျက်ဆီးနိုင်သည်ဟူ၍လည်း ယုံကြည်ကြသည်။ ရဲတွေက အထက်လမ်းဆရာတွေကိုခေါ်ပြီး ဖမ်းလာသည့် အုန်းသီးကို ကျိန်စာပြန်ပျက်စေရန် စီရင်ခဲ့ရသည်။ အုန်းသီးကို အပြစ်မရှိကြောင်း တရားရုံးက အမိန့်ချသည်။ အုန်းသီးနှင့် ပတ်သက်ပြီး မည်သူ့ကိုမှ ဖမ်းဆီး အရေးယူခြင်း မရှိပေ။ ရွေးကောက်ပွဲပြီး သည့်အခါတွင် ပြန်လွှတ်ပေးလိုက်သည်။

ဘာသာရေးအယူသီးသဖြင့် သတိထားရန်



မောလ်ဒိစ်နိုင်ငံတွင် ဘာသာရေးအယူသီးသူများဖြစ်သဖြင့် သွားရောက်လည်ပတ်သူများ သတိထားကြရသည်။ မွတ်ဆလင်အများစုနေထိုင်ရာဒေသဖြစ်သောကြောင့် သူတို့၏ ဘာသာရေးဆိုင်ရာ ထုံးတမ်းဓလေ့များကို မစော်ကားမိရန် အရေးကြီးသည်။ ဘာသာရေးကိစ္စနှင့် ပြဿနာပေါ်လျှင် ထောင်ဒဏ် အပြစ်ပေးခံရမည်သာဖြစ်သည်။ အခြားဘာသာရေးဆိုင်ရာ ရုပ်တုများ၊ ကျမ်းစာများ ယူဆောင်လာခြင်း၊ မတော်မလျော်ပုံများ ယူဆောင်လာခြင်း၊ အရက်သေစာယူဆောင်လာပြီး သောက်စားခြင်းများကို အပြင်းအထန် တားမြစ်ထားသည်။ နောက်ပိုင်းတွင် မိမိတို့ သက်ဆိုင်ရာ ဘာသာရေးကျမ်းစာများကို ယူဆောင်ခွင့်ပြုလာပြီ ဆိုသော်လည်း ပုဂ္ဂလိက တစ်ဦးချင်းအနေနှင့်သာ အသုံးပြု ခွင့်ရှိသည်။

အခြားနိုင်ငံများမှ သာသနာပြုများလာပြီး ဘာသာရေးဆိုင်ရာ လှုပ်ရှားဟောပြောမှုများကို လုံးဝ ခွင့်မပြုထားပေ။ မူးယစ်ဆေးဝါးတွေ့လျှင် ဖမ်းပြီး ထောင်ဒဏ် တစ်သက်ချမှတ်ခြင်းခံရမည်ဖြစ်သည်။ လိင်တူဆက်ဆံခြင်းကိုလည်း လုံးဝခွင့်ပြုမထားပေ။ ကျူးလွန်ကြောင်းတွေ့လျှင် ထောင်ဒဏ်ဖြစ်သည်။

မောလ်ဒိစ် ဖွဲ့စည်းပုံအခြေခံဥပဒေကို ၁၉၉၇ ခုနှစ်တွင် ပြဋ္ဌာန်းထားသည်။ နိုင်ငံသားမှန်သမျှ မွတ်ဆလင်ဖြစ်ရမည်ဟုဆိုထားသည်။ အခြားဘာသာ များကို ပိတ်ပင်ချုပ်ချယ်တားမြစ်ထားသည့် သဘောရှိသည်။ အခြားဘာသာကို ပြောင်းလျှင် နိုင်ငံသားအဖြစ်ကို ဆုံးရှုံးမည်သာဖြစ်သည်။ အစ္စလာမ်ဘာသာ ဆိုင်ရာလမ်းညွှန်ချက်၊ သမိုင်း၊ လက်တွေ့ ကိုးကွယ်မှုများကို ပြုလုပ်ကျင့်ကြံယုံကြည်ပြီး နေထိုင်ကြရသည်။ ကျောင်းများတွင်လည်း ဘာသာရေးလမ်းညွှန်ချက်များကို အဓိကထားပြီး သင်ကြားပေးသည်။

လွတ်လပ်စွာပြောဆိုခွင့်ကို ထိန်းချုပ်ထားသည်၊ အစ္စလာမ်ဘာသာကို ဆန့်ကျင်ပြောဆိုခွင့်မရှိ။ ဆန့်ကျင်ပြောဆိုလျှင် ဖမ်းဆီးပြီးထောင်ချသည်။ လွန်ကျူးလျှင် သေဒဏ်စီရင်သည်။ ဘာသာရေးချုပ်ချယ်မှု များလှသောကြောင့် မောလ်ဒိစ်နိုင်ငံကိုသွားပြီး အလုပ် လုပ်မည့်သူများ၊ အပျော်ခရီးသွားမည်သူများ သတိထားရန်လိုသည်။ 

လူမြင်ကွင်းတွင် ကြိမ်ဒဏ်ပေးတတ်သည်



မောလ်ဒိစ်နိုင်ငံ၏ ဥပဒေအရ လူသားတိုင်း တန်းတူညီမျှ အခွင့်အရေးရှိသည်၊ အကာအကွယ် ပေးရမည်ဟု ဆိုထားသော်လည်း ဘာသာရေးဆိုင်ရာ ကိစ္စများတွင် ဘာသာရေးခေါင်းဆောင်များ၏ ပြင်းထန်စွာ စီရင် အပြစ်ပေးနေခြင်းများကို လွန်ဆန်နိုင်ခြင်းမရှိ ကြောင်းတွေ့ရသည်။ အရွယ်ရောက်သူတိုင်း ဘာသာရေးဆိုင်ရာ သတ်မှတ်ထားသည့် ပြစ်မှုတစ်ခုခုကို ကျူးလွန်ပါက အများပြည်သူ လူမြင်ကွင်း၌ ကြိမ်ဒဏ် အပြစ်ပေးခြင်းမှာ အဆိုးဆုံးဖြစ်သည်။

များသောအားဖြင့် လူမြင်ကွင်းတွင် ကြိမ်ဒဏ် စီရင်ခြင်းခံရသူများမှာ အမျိုးသမီးများဖြစ်နေကြောင်း တွေ့ရသည်။ ၂၀၀၆ ခုနှစ်ကတည်းက လိင်ဖောက်ပြန် သည်ဟု စွပ်စွဲခံရပြီး ကြိမ်ဒဏ်အပြစ်ပေးခြင်းခံရသော သူပေါင်း ၁၈၄ ဦးရှိသည်။ ထိုအထဲတွင် အမျိုးသား ၃၈ ဦးသာပါသည်။ အိမ်ထောင်ရေးဖောက်ပြန်သည် ဟု စွပ်စွဲခံလိုက်ရလျှင် ယောကျာ်းတွေက လွတ်သွားပြီး မိန်းမတွေက ကြိမ်ဒဏ်ကိုခံကြရသည်ကများသည်။ လူ့အခွင့်အရေးစောင့်ကြည့်အဖွဲ့က မည်မျှအော်အော် မိမိတို့နိုင်ငံ ဥပဒေအတိုင်း စီရင်သည်ဆိုကာ လုပ်ဆောင်ကြသည်။

၂၀၀၉ ခုနှစ်က အသက် ၁၈ နှစ်အရွယ် အမျိုး သမီးလေးတစ်ဦးကို ကြိမ်ဒဏ် အချက် ၁၀၀ စီရင်ခဲ့ သည်။ စီရင်ပြီး ဆေးရုံပို့ခဲ့ရသည်။ ကောင်မလေးက သူတို့စွပ်စွဲသလို ပြစ်မှုကို မကျူးလွန်ကြောင်း ငြင်းဆန်ခဲ့သည်။ သို့သော် ကိုယ်ဝန်အဘယ်ကြောင့်ရှိရသနည်းဆိုကာ အပြစ်ပေးသည်။ ကောင်မလေးကို ကိုယ်ဝန်ရှိအောင်လုပ်သည့် အမျိုးသားနှစ်ယောက်ကတော့ အပြစ်ကလွတ်သွားသည်။ 

ပြင်ပကမ်းခြေတွင် အရက်သောက်ခြင်း တားမြစ်သည်



နိုင်ငံတွင် အစ္စလာမ်ဘာသာရေးကြောင့် နိုင်ငံခြား ကရောက်လာသည့် ကမ္ဘာလှည့်ခရီးသည်များအနေနှင့် ထိုနိုင်ငံစည်းကမ်းများကို သတိထားရန် အရေးကြီးသည်။ ကျွန်းနေရာအနှံ့ မွတ်ဆလင်တို့ရှိနေပြီး ဘာသာရေး အယူသီးသူများကြားတွင် ရောက်နေသည်ကို သတိပြုရန်လိုသည်။ 

အရက်ကို ကမ်းခြေတွင် ဖွင့်လှစ်ထားသော ဟိုတယ်ကြီးများမှလွဲပြီး မည်သည့်နေရာတွင်မှ ရောင်းချခြင်း၊ သောက်စားခြင်း မပြုရန်တားမြစ်ထားသည်။ အပြင်ဘက် လူမြင်ကွင်းတွင် ယူသောက်ခွင့်မရှိပေ။ အရက်၊ ဝက်သား၊ ဝက်သားနှင့်ပတ်သက်သည့် မည်သည့် ပစ္စည်းကိုမှ နိုင်ငံခြားသားများ ယူဆောင်လာ ခွင့်လည်းမပြု၊ သုံးဆောင်ခြင်းလည်း ခွင့်ပြုမထားပေ။ 

ဥပုသ်လတွင် ကမ္ဘာလှည့်ခရီးသွားများသည် သူတို့ ဘာသာရေး ထုံးတမ်းများကို လိုက်နာကြရန် လိုသည်။ ဥပုသ်လတွင် လူမြင်ကွင်း၌ သတ်မှတ်ထားသည့် အချိန်တွင် စားသောက်ခြင်း၊ ဆေးလိပ်သောက်ခြင်းတို့ကို ရှောင်ကြဉ်ကြရန်လိုသည်။ များသောအားဖြင့် နေ့ခင်းအချိန်များတွင်ဖြစ်သည်။ အချို့သော နိုင်ငံခြားသားများအတွက် သီးခြားဖွင့်လှစ်ပေးထားသောဆိုင်များရှိသည်။ အတွင်း၌သာ စားသောက်ကြရသည်။

နိုင်ငံခြားကလာသော ကမ္ဘာလှည့်ခရီးသွားများ မိမိတို့ဘာသာအရ ကိုးကွယ်ဝတ်ပြုခွင့်များရှိပါ သည်။ သို့သော် ပေါ်ပေါ်ထင်ထင် မလုပ်ဆောင်မိရန် အရေးကြီးသည်။ ကမ်းခြေတွင် ဓာတ်ပုံရိုက်မည်ဆိုလျှင်လည်း အပေါ်ပိုင်းဗလာကျင်းပြီး ရိုက်ခြင်းမျိုးကို ရှောင်ရသည်။ ကျွန်းနိုင်ငံ ကမ်းခြေများ၌ လုံလုံခြုံခြုံဖြင့်သွားလျှင် ပိုကောင်းသည်။ 

မိုးစက်

(Ref: About the Maldives)