News

POST TYPE

TRAVEL LOG

ကမ္ဘာ့လူသိအနည်းဆုံးနှင့် အလှပဆုံးနေရာများ
13-Oct-2018


ကီဘုန်းတော်ကြီးကျောင်း

Ki သို့မဟုတ် Key Gompa ဘုန်းတော်ကြီးကျောင်းသည် တိဘက်နိုင်ငံရှိ ဗုဒ္ဓဘာသာဘုန်းတော်ကြီးကျောင်းတစ်ကျောင်း ဖြစ်သည်။ အိန္ဒိယရွာလေးတစ်ရွာဖြစ်သည့် ကီဘာ (Kibar) တောင်ပေါ်တွင် တည်ထားသော ကျောင်းကြီးတစ်ကျောင်းဖြစ်သည်။ ထိုဘုန်းကြီးကျောင်းသည် ပင်လယ်ရေမျက်နှာပြင်အထက် ပေပေါင်း ၁၃၆၆၈ တွင်ရှိပြီး အိန္ဒိယနိုင်ငံ၏ အမြင့်ဆုံးရွာလေးတစ်ရွာ၌ တည်ရှိသည့် ဘုန်းကြီးကျောင်းလည်းဖြစ်သည်။

ထိုကျောင်းကို ၁၁ ရာစုကတည်းက တည်ဆောက်ခဲ့ပြီး Ki ကျောင်းတော်သမိုင်းသည် အေးချမ်းစွာ ရပ်တည်နိုင်ခဲ့သည်တော့ မဟုတ်ပေ။ ထိုဘုန်းကြီးကျောင်းသည် နှစ်ပေါင်းများစွာကတည်းက အကြိမ်ကြိမ်လာရောက် တိုက်ခိုက်ဖျက်ဆီးခြင်းကို ခံခဲ့ရသည်။ မွန်ဂိုတို့၏ အကြိမ်ကြိမ်ဖျက်ဆီးမှုကြောင့်လည်းကောင်း၊ ငလျင်ဒဏ်ကြောင့်လည်းကောင်း ပျက်စီးခဲ့ရသော်လည်း ပြန်လည်တည်ဆောက် မွမ်းမံမှုများကြောင့် ယနေ့တိုင် ကျောင်းတော်သည် လှပစွာတည်ရှိနေခြင်း ဖြစ်သည်။



နတ်တို့ပျော်ရာ ရေအိုင်သာ

နတ်ဘုံသို့ရောက်နေသည့်အလား ကြည့်ရှုခံစားရမည့် ရေတံခွန်နှင့် ရေအိုင်ကြီးကို ခရိုအေးရှားနိုင်ငံတွင် တွေ့ရမည်ဖြစ်သည်။ Plitvice Lakes ဟုခေါ်သည့်ရေတံခွန်ကြီးသည် နိုင်ငံတော်၏ အမျိုးသားဥယျာဉ်ကြီးအဖြစ် သတ်မှတ်ထားသော နေရာလည်း ဖြစ်သည်။ ပြာစိမ်းကြည်လဲ့နေသည့် ဘုံအဆင့်ဆင့် ကန်နှင့် ရေတံခွန်များကို သတ်မှတ်သည့် နှုန်းထားများဖြင့် လက်မှတ်များဝယ်ပြီး ဝင်ရောက်ကြည့်ရှုကြရသည်။ ဆောင်းရာသီတွင် သွားရောက်လေ့လာရန် မကောင်းပေ။ 

သဘာဝကို ချစ်မြတ်နိုးသူတို့အတွက် နေရာကောင်းတစ်ခုဖြစ်သည်။ ၁၉၄၉ ခုနှစ် ဧပြီလ ၈ ရက် နေ့ကတည်းက ဖွင့်လှစ်ထားပြီး ခရိုအေးရှား၏ ပထမဆုံး အမျိုးသားဥယျာဉ်အဖြစ် ကြေညာနိုင်ခဲ့သောနေရာအဖြစ်လည်း ဂုဏ်ယူစွာတည်ရှိနေသည်။ ယခင်က ကန့်သတ်ပိတ်ပင်ချက်များကြောင့် သွားလာရန်မလွယ်သည့်နေရာကို ၁၉၇၉ ခုနှစ် အောက်တိုဘာ ၂၆ ရက်နေ့မှ အများပြည်သူအတွက် ပြန်လည်ဖွင့်လှစ်ပေးနိုင်ခဲ့သည်။ UNESCO ကလည်း ကမ္ဘာ့အမွေအနှစ် World Heritage List တွင်ထည့်သွင်းပြီး အသိအမှတ်ပြုပေးထားသည်။



လျှို့ဝှက်ရေတွင်း

ပေါ်တူဂီနိုင်ငံ၊ ဆင်ထရာမြို့အနီးရှိ Quinta da Regaleira ဆိုသည့် ရဲတိုက်အနီး၌ရှိသော Initiation Well ရေတွင်းသည် အလွန်ထူးဆန်းလျှို့ဝှက်သော နေရာတစ်နေရာဖြစ်သည်။ ရေတွင်းတည်ဆောက်ပုံက ဆန်းကျယ်ပြီး လှေကားအဆင့်ဆင့်ဖြင့် အောက်ကို ဆင်းသွားရသည်။ အနက် ၈၈ ပေရှိသော ရေတွင်းအောက်ခြေအထိ ဆင်းသက်နိုင်သည့်အပြင် လေဝင်လေထွက်လည်း ကောင်းအောင်လုပ်ထားသည်။ 

ထိုရေတွင်းကို ရေအတွက် တည်ဆောက်ခဲ့ခြင်းမဟုတ်။ လျှို့ဝှက်သော အခမ်းအနားများနှင့် ပွဲများလုပ်ရန်အတွက် တည်ဆောက်ထားခြင်းဖြစ်သည်။ Quinta da Regaleira  ရဲတိုက်ပိုင်ရှင်သည် ချမ်းသာသော ပေါ်တူဂီလုပ်ငန်းရှင်တစ်ဦးဖြစ်ပြီး ဖရီးမေဆင် ဂိုဏ်းဝင်တစ်ဦးလည်းဖြစ်သည်။ ထိုရဲတိုက်နှင့် ရေတွင်းကြီးကို အီတလီဗိသုကာပညာရှင် လူဂီမာနီနီက တည်ဆောက်ပေးခဲ့ပြီး ရဲတိုက်ဝန်းကျင်တွင် ထူးဆန်းသော ပန်းခြံ၊ မြေအောက် လိုဏ်ခေါင်းများကိုလည်း တွေ့ရသည်။ ရဲတိုက်ရော ရေတွင်းကပါ ထူးဆန်းမှုများနှင့် ပြည့်နေသဖြင့် သွားရောက်လေ့လာသူ ပေါများသည်။



ထူးဆန်းသောဂူ

အမေရိကန်ပြည်ထောင်စု နယူးမက္ကဆီကို ပြည်နယ်တွင်ရှိသော ထူးဆန်းသည့် Lechuguilla Cave ဂူကြီးသည် ကမ္ဘာ့ ၇ ခုမြောက် အရှည်ဆုံးဂူကြီးလည်းဖြစ်သည်။ အရှည်စုစုပေါင်း ၁၃၄ ဒသမ ၆ မိုင် ရှိသည်။ ဂူထဲတွင် သလင်းကျောက်ပုံစံ ပန်းဆွဲများရှိပြီး ဘူမိဗေဒပညာရှင်များအတွက် တန်ဖိုးမဖြတ်နိုင်လောက်သော ကျောက်သား၊ ကျောက်စိုင်ကြီးပေါင်း များစွာအပြင် ကျောက်စက်ရေအိုင်ပေါင်းများစွာကိုလည်း တွေ့မြင်ရမည်ဖြစ်သည်။ 

ထူးဆန်းသော သက်ရှိမျိုးစိတ်များနှင့် အပင်များကိုလည်း ထိုဂူအတွင်းတွေ့ရသည်။ ထိုဂူကို သုတေသီများသုတေသနပြုရန်နှင့် စူးစမ်းရှာဖွေလိုသော သိပ္ပံပညာရှင်များအတွက်သာ ကန့်သတ်ပြီး ဖွင့်လှစ်ပေးထားသည်။ National Park Service အဖွဲ့၏ အစီအစဉ်ဖြင့်သာ ဝင်ရောက်ကြည့်ရှုနိုင်သည်။ ၁၉၈၆ ခုနှစ်ခန့်က လူသိများသေးဘဲ နေရာအနည်းငယ်ကိုသာ ဝင်ရောက်ကြည့်နိုင်သည့် အနေအထားတွင် ရှိခဲ့သည်။ ၂၀၁၂ ခုနှစ်ရောက်မှသာ ပေ ၄၁၀ ခန့် ပေါက်အောင် သွားနိုင်ခဲ့သည်။ သို့သော် ပညာရှင်များက ထိုဂူသည် မိုင်ပေါင်း ၁၃၄ ဒသမ ၆ မိုင်ခန့်ရှိကြောင်း တွက်ချက်ထားသည်။

မိုးစက်

(Ref: National Geographic)


  • VIA