POST TYPE

TEACHER'S VOICE

ခရိုင်နှင့် တိုင်းစစ်စာမေးပွဲ
23-Feb-2017 tagged as ပညာရေး

အခြေခံပညာအဆင့် စတုတ္ထတန်း ခရိုင်စစ်နှင့် အဋ္ဌမတန်း တိုင်းစစ်စာမေးပွဲကို ယနေ့ (ဖေဖော်ဝါရီလ ၂၂ ရက်) တွင် တစ်နိုင်ငံလုံး တစ်ပြိုင်တည်း မြန်မာစာကို စတင်စစ်ဆေးခဲ့သည်။ စာမေးပွဲစင်တာ တစ်ခု အသုံးစရိတ်ကို ကျောင်းသားဦးရေအလိုက် မူတည်၍ မြန်မာနိုင်ငံ စာစစ်ဦးစီးဌာနက ထုတ်ပေးသည်။ ကျောင်းသားတစ်ဦးလျှင် ကျပ်ငါးဆယ်နှုန်း (ဥပမာ- ကျောင်းသား ၁၀၀ ရှိရင် စာမေးပွဲ အသုံးစရိတ် ကျပ်ငါးထောင်) ထုတ်ပေးခြင်း ဖြစ်သည်။ သို့သော် ယင်းအသုံးစရိတ်ငွေ မလုံလောက်ပေ။ ထို့ကြောင့် လိုအပ်သည့် ငွေကြေးအသုံးစရိတ်ကို ကျောင်းထောက်ပံ့ကြေးငွေ ရှိနေသေးလျှင် ယင်းအသုံးစရိတ်မှ ယင်းအသုံးစရိတ် မရှိလျှင် မိဘ၊ ဆရာအသင်း ကျောင်းအကျိုးတော်ဆောင်အဖွဲ့နှင့် ညှိနှိုင်းတိုင်ပင်၍ ငွေကြေးအခက်အခဲကို ဖြေရှင်းကြရသည်။ ဆရာများက အကုန်အကျခံရသည့် အခြေအနေများလည်း ရှိသည်။ ယင်းအခြေအနေများနှင့် ပတ်သက်၍ ဆရာများ၏ ပြောကြားချက်၊ ဆွေးနွေးချက်များကို ယခုတစ်ပတ် ဆရာများ၏ ရင်ဖွင့်သံကဏ္ဍမှ တစ်ဆင့် The Voice က စုစည်းဖော်ပြလိုက်ပါသည်။ 

“မိတ္တူဆွဲခတင် လေးသောင်းကျပ်ဖိုးလောက် ကျတယ်”
ဒေါ်ခင်ကျော့ကျော့ခိုင် (ပုသိမ်မြို့၊ အ.ထ.က (၆) စာစစ်ဌာန အဋ္ဌမတန်း စာမေးပွဲ ကြီးကြပ်ရေးမှူး)

အရင်တုန်းက အလယ်တန်းစစ်ကို အစိုးရစစ်အဖြစ် သတ်မှတ်ချိန် ကတည်းက ပေးပါတယ်။ ကျောင်းသားတစ်ဦးကို ကျပ် ၅၀ နှုန်းပါ။ ဘယ်အချိန်မှပေးလဲ ဆိုတော့ စာမေးပွဲ ပြီးတော့မှ ဘတ်ဂျက်ရေးဆွဲ တင်ပြပြီးတဲ့နောက်မှ ကျောင်းအုပ်ကြီးရဲ့လက်ထဲ ရောက်ပါတယ်။ ဒီနှစ်မှာတော့ စတုတ္ထတန်းနဲ့ အဋ္ဌမတန်းကို ဒသမတန်းလိုပဲ ကုန်ကျစရိတ်ကို သီးခြားအသေးစိတ် တွက်ချက်တင်ပြပေးရမယ်လို့ ညွှန်ကြားထားပါတယ်။ ငါးဆယ်ကျပ်နှုန်းဆိုတဲ့ ကန့်သတ်ချက်လိုမျိုးတော့ ထွက်မလာသေးပါဘူး။ 

ဒီထောက်ပံ့စရိတ်ဆိုတာ စာစစ်ဌာန စောင့်ကြပ်သူတွေအတွက် မဟုတ်ပါဘူး။ ဖြေဆိုသူ ကျောင်းသားတစ်ဦးကို ငါးဆယ်ကျပ်နှုန်းနဲ့ စာစစ်ဌာနမှာ အသုံးပြုတဲ့ စာရွက်စာတမ်း စတဲ့ အသေးသုံး ကုန်ကျစရိတ်ကို ပေးတာပါ။ စာစစ်ဌာနတစ်ခုနဲ့တစ်ခု ကုန်ကျစရိတ် မတူနိုင်ပါဘူး။ ကျောင်းသားများရင် ကုန်ကျစရိတ် များပါတယ်။ ဒီထောက်ပံ့စရိတ်ကိုတော့ စာမေးပွဲ လက်ခံကျင်းပပေးတဲ့ စာစစ်ဌာနကျောင်းက ရပါတယ်။ 

(ကျောင်းသားတစ်ဦးကို ကျပ်ငါးဆယ်နှုန်းနဲ့ ထောက်ပံ့စရိတ်) က အသေးသုံး အတွက်ပဲ ဆိုရင်တော့ လောက်ငမှု ရှိပါတယ်။ ဒါပေမဲ့ ကျောင်းပေါ် မူတည်ပါတယ်။ ဥပမာ- ဒီလိုကျောင်းမျိုးဆိုရင် ကွန်ပျူတာရှိတယ်။ လက်ခံစာရွက်တွေ ရှိတယ်။ ဆိုတော့ အခက်အခဲ နည်းတယ်။ တချို့ကျောင်းတွေဆို ဒါမျိုးတွေမရှိတော့ အပြင်မှာ ကွန်ပျူတာ စာစီတာရယ်၊ မိတ္တူဆွဲတာတွေ လုပ်ရတယ်။ ကျွန်မနယ်က ကျောင်းတစ်ကျောင်းမှာ တာဝန်ကျတုန်းကဆိုရင် မိတ္တူဆွဲခတင် လေးသောင်းကျပ်ဖိုးလောက် ကျတယ်။ မြို့တက်ပြီးတော့ လုပ်ရတယ်။ ဆိုင်ကယ်တက္ကစီ ကုန်တယ်ပေါ့။ ဒီတော့ ရလာတဲ့ ထောက်ပံ့မှုနဲ့က လောက်ငမှု မရှိခဲ့ပါဘူး။ ဒီ ငါးဆယ်ဆိုတာ ကုန်ကျမှုရဲ့ အစွန်းထွက်တောင် မရှိဘူး ဖြစ်ရပါတယ်။ ဒီလိုမြို့ကြီးမှာရှိတဲ့ ကျောင်းမျိုးဆိုရင်တော့ လောက်ငမယ် ထင်ပါတယ်။ ဘာဖြစ်လို့လဲဆိုတော့ ကွန်ပျူတာ၊ မိတ္တူစက်၊ စာရွက်စာတမ်းကအစ ရှိနေတယ်။ ပြီးတော့ ဒီစက်တွေနဲ့ ပတ်သက်ပြီး ကျွမ်းကျင်တဲ့ ဝန်ထမ်းကလည်း ရှိတယ်။ နယ်ကျောင်းတွေ အနေနဲ့ကတော့ ဘယ်လိုမှ မလောက်ငနိုင်ပါဘူး။ 

မလောက်ငမှုကို ဘယ်လိုဖြေရှင်းသလဲ ဆိုရင်တော့ ပထမဦးဆုံး အားထားရတာက ကျောင်းထောက်ပံ့ကြေးပေါ့။ ကျောင်းထောက်ပံ့ကြေးမှာ နှစ်ကုန်ပြီဆိုတဲ့ အခါမှကျတော့ ရုံးသုံးလုပ်ငန်း ဘယ်လောက်ကျန်နေသလဲ။ ကျန်တဲ့ငွေကြေးအပေါ်မှာ အားပြုတယ်။ ဒီလိုမဖြစ်တော့ရင် ဒုတိယအနေနဲ့ကတော့ ရပ်ရွာကျောင်းအကျိုးတော်ဆောင်အဖွဲ့ မိဘ၊ ဆရာအသင်းတို့ကို ချပြပြီး သူတို့အကူအညီတွေနဲ့ အခက်အခဲတွေကို ဖြေရှင်းဖြတ်ကျော်ခဲ့ကြပါတယ်။ ဒီနှစ်မှာတော့ ကုန်ကျစရိတ်တွေက တစ်ကျောင်းနဲ့တစ်ကျောင်း မတူညီနိုင်တဲ့အတွက် သီးခြားဘတ်ဂျက်ဆွဲ တင်ပေးဖို့ ညွှန်ကြားထားပါတယ်။ 

ဒီလိုအခြေအနေတွေနဲ့ ပတ်သက်ပြီး မြန်မာနိုင်ငံ စာစစ်ဦးစီးဌာနကို ကျွန်မအနေနဲ့ အကြံပြုရရင် စာစစ်ဌာနတွေမှာ နေရာအရပ်ဒေသအပေါ် မူတည်ပြီးတော့ စာရွက်စာတမ်းကစပြီး ရုံးလုပ်ငန်းသုံး ပစ္စည်းတွေတောင် မတူနိုင်ကြပါဘူး။ ဒါကြောင့် စာစစ်ဌာန အသုံးပြုတဲ့ ကျောင်းများကို လိုအပ်တဲ့ ကွန်ပျူတာ၊ ပရင်တာ၊ စာကူးမိတ္တူစက်၊ စာရွက်စာတမ်း အထောက်အပံ့နဲ့ အဲဒီလုပ်ငန်း ကျွမ်းကျင်သူ ဝန်ထမ်းတွေ ချထားပေးစေချင်ပါတယ်။ စင်တာကျတဲ့ ကျောင်းတွေမှာ အဲလိုချပေးတယ်ဆိုရင် အားလုံး ညီမျှလောက်ငနိုင်ပါတယ်။ ခရီးစရိတ်ကျတော့ ခရီးအကွာအဝေးကို မူတည်ပြီး သီးသန့်ဘတ်ဂျက် ဆွဲစေမယ်ဆိုရင် နိုင်ငံတော် အနေနဲ့လည်း ဘဏ္ဍာရေးကဏ္ဍမှာ ပိုခြင်း၊ လိုခြင်းအတွက် မှန်းခြေတိကျမှု ရရှိနိုင်မှာဖြစ်ပါတယ်။ ဆရာ၊ ဆရာမ ကျောင်းအုပ်ကြီးတွေ အနေနဲ့လည်း စီမံခန့်ခွဲမှုတွေမှာ လွယ်ကူပါလိမ့်မယ်။                                     

“ဆိုင်ကယ်ကယ်ရီခတောင် မရှိပါဘူး”
ဦးအောင်ကျော်သူ (ပဲခူးတိုင်းဒေသကြီး၊ ကဝမြို့နယ်၊ သက္ကလ အထက်တန်းကျောင်း)

မနှစ်တုန်းက ကျောင်းသားတစ်ဦးကို ငါးဆယ်ကျပ်နှုန်း ထောက်ပံ့ပေးတယ်လို့ ပြောပါတယ်။ ဒါပေမဲ့ ကျွန်တော်တို့ ဘက်မှာတော့ ရတောင်မရပါဘူး။ နောက်တစ်ခါ ဒီနှစ်မှာလည်း မြို့နယ်ပညာရေးမှူးတွေက အစည်းအဝေးတွေမှာ ငါးဆယ်ပေးမယ်လို့ ပြောတယ်လို့ ပြန်ကြားရပါတယ်။ ဒီကိစ္စက လုံးဝအဓိပ္ပာယ်မရှိဘူး။ ကျောင်းသားတစ်ယောက် ငါးဆယ်ဆိုရင် တချို့စင်တာတွေက ကျောင်းသားသုံးဆယ်လောက် ရှိပါတယ်။ လေးတန်းစင်တာတွေ ဆိုရင်။ တချို့စင်တာဆိုရင်လည်း ကျောင်းသားငါးဆယ်လောက် ရှိတယ်။ ကျွန်တော်တို့ စင်တာတောင်မှ တစ်ရာကျော်ရှိတာ ခင်ဗျာ။ ကျောင်းသားတစ်ယောက် ငါးဆယ်ဆိုတော့ ကျောင်းသားတစ်ရာ ရှိရင် ငါးထောင်ရမယ်။ စာမေးပွဲတစ်ခု ကျင်းပတာ ငါးထောင်နဲ့ဆိုတော့ စဉ်းစားကြည့်ပါ။ ဘယ်လိုလုပ် ဒီစာမေးပွဲကို ငါးထောင်နဲ့ သွားလုပ်လို့ရမှာပါလဲ။ စာရွက်စာတမ်းကြေးတွေရှိတယ်။ A4 တစ်ထုပ် ဝယ်ရင်တောင်ပဲ သုံးထောင်ကျော်နေပါပြီ။ နောက်ဆုံး ဘာမှမပြောနဲ့ဦး မေးခွန်းသွားထုတ်တာနဲ့ ပြန်ပို့တာနဲ့ပဲ ဒီ ငါးထောင် ဘယ်လိုမှ မဖြစ်နိုင်ပါဘူး။ အစစအရာရာပေါ့။ ဒါတော့ မဖြစ်သင့်ပါဘူး။ ကျောင်းသားငါးဆယ်ရှိလည်း စာမေးပွဲစင်တာ တစ်ခုပဲ။ ကျောင်းသားတစ်ရာ ရှိလည်း စင်တာတစ်ခုပဲ။ စင်တာတစ်ခုရဲ့ ကုန်ကျစရိတ်ကတော့ အနည်းဆုံး ကုန်ကျစရိတ် ဘယ်လောက်ရှိတယ် ဆိုတာ တွက်ချက်ကြည့်သင့်ပါတယ်။ လူဦးရေ များရင် အခန်းများရင် ပိုကုန်မယ်ခင်ဗျာ။ ကျောင်းသားငါးဆယ်အောက် စင်တာတွေဆိုရင် ဘယ်လောက်၊ ကျောင်းသားတစ်ရာ အထက် နှစ်ရာအထိ ဆိုရင် ဘယ်လောက်ပေါ့။ အဲဒီလို သတ်မှတ်သော်လည်း မလောက်သော်ငြားလည်းပဲ တစ်မျိုးပေါ့ဗျာ။ ကျောင်းသားဦးရေနဲ့ သတ်မှတ်တာတော့ သိပ်သဘာဝမကျပါဘူး။ ကျောင်းသားတစ်ရာရှိလို့ ငွေငါးထောင်ဆိုတာ တွက်ကြည့်ပါ။ ဆရာမတစ်ယောက် မြို့နယ်ကိုသွားရင် ဆိုင်ကယ်ကယ်ရီခတောင် မရှိပါဘူး။

“ပိုပြီးရမယ် ဆိုရင်တော့ လိုချင်တာပေါ့”
ဒေါ်တင်သက်ယု (တောင်ငူမြို့၊ အ.ထ.က ၂၊ စာမေးပွဲ ကြီးကြပ်ရေးမှူး)

ဒီနေ့ ရှစ်တန်းမှာ မြန်မာစာကို ကျောင်းသား ၄၃၄ ယောက် ဖြေပါတယ်။ ကျောင်းသားတစ်ယောက်ကို ငါးဆယ်နှုန်းနဲ့ စာမေးပွဲစရိတ် ထောက်ပံ့တာက ပေးမှာ။ ဒါပေမဲ့ မရသေးပါဘူး။ ငါးဆယ်နှုန်းနဲ့ ထောက်ပံ့တာ ကာမိရုံတော့ ရှိတယ်။ ဒါပေမဲ့ ပိုပြီးရမယ် ဆိုရင်တော့ လိုချင်တာပေါ့။                                                       

“စာမေးပွဲစရိတ်ဆိုတာ ကျွန်မတို့အတွက် ပထမဆုံး ကြုံဖူးကြားဖူးတာပါ”
ဒေါ်ဌေးဌေးကြည် (ဗန်းမော်မြို့၊ အမှတ် ၃ အခြေခံ ပညာအ ထက်တန်းကျောင်းခွဲ၊ စာစစ်စင်တာ ကြီးကြပ်ရေးမှူး) 

အခုလို စာမေးပွဲစရိတ်ဆိုတာ ကျွန်မတို့အတွက် ပထမဆုံး ကြုံဖူးကြားဖူးတာပါ။ ကချင်ပြည်နယ်မှာက အောက်ပိုင်းဒေသတွေလို မဟုတ်တော့ သွားရေးလာရေးကအစ ကုန်ဈေးနှုန်း ကြီးမြင့်တဲ့အတွက် ငါးဆယ်ကျပ် ဆိုတာလောက်နဲ့ မလောက်နိုင်ပါဘူး။ ဒါပေမဲ့ စာမေးပွဲစရိတ် ထောက်ပံ့ပေးတယ် ဆိုတာကိုပဲ ကျေးဇူးတင်မိပါတယ်။ ရှေ့ဆက်လက်ပြီး ဒီထက်မက အခွင့်အလမ်းတွေ ပွင့်လာမယ်လို့ မျှော်လင့်ပါတယ်။

The Voice သတင်းအဖွဲ့