News

POST TYPE

TEACHER'S VOICE

ဆရာများ၏ ရင်ဖွင့်သံ (ရာထူးတိုးမူ ပြောင်းလဲမှု)
14-Mar-2019

သက်ဆိုင်ရာ ကောလိပ်ဆရာ၊ ဆရာမများ၊ ဆရာသမဂ္ဂများ၊ ဝန်ကြီးဌာနတာဝန်ရှိသူများ အားလုံး သဘောတူချမှတ်ထားသည့် ရာထူးတိုးမူဝါဒအတိုင်းမဟုတ်ဘဲ အသိပေးခြင်းမရှိ၊ ပြောင်းလဲထားသောမူအရ ရာထူးတိုးသတ်မှတ်ရာတွင် ကောလိပ်မှ ဆရာ၊ ဆရာမအများစု ရာထူးတိုးကျန်နေခဲ့သည်။ ယင်းကိစ္စနှင့်ပတ်သက်၍ ၎င်းတို့ကြုံတွေ့ရသည့် အခြေအနေများအကြောင်း ယခုတစ်ပတ်ဆရာများ၏ ရင်ဖွင့်သံကဏ္ဍမှတစ်ဆင့် စုစည်းဖော်ပြလိုက်ပါသည်။

“တရားမျှတမှုကိုဆိုတာကို အယုံအကြည် မရှိတော့ပါဘူး”
ဒေါ်ခင်ခင်ဌေး (နည်းပြ၊ စာပေ- ဘောဂဗေဒ၊ မော်လမြိုင်ပညာရေးကောလိပ်)

ဆရာ၊ ဆရာမတွေအနေနဲ့ ရာထူးမတိုးတာထက် ပညာရေးကောလိပ်မှာရှိတဲ့ ဆရာသမဂ္ဂတွေ အပါအဝင် ပညာရေးဌာနက ပြည်ထောင်စုဝန်ကြီး၊ ဒုဝန်ကြီး၊ ညွှန်ချုပ်၊ ဒုတိယညွှန်ချုပ်တွေက ဇူလိုင် ၁ ရက်၊ ၂၀၁၈ခုနှစ်မှာပါဝင်ရေးဆွဲ အတည်ပြုထားတဲ့ ပညာရေးကောလိပ်အတွက် ရေးဆွဲထားတဲ့မူ အမှတ် ၆၅ မှာပါတဲ့ ပညာရေး ပညာရေးဘွဲ့ရရှိသူဖြစ်ရမည် ဆိုတာရယ်၊ အမှတ်စဉ် ၆၆ မှာပါတဲ့ ဖွံ့ဖြိုးရေးဆိုင်ရာ ဘွဲ့ သို့မဟုတ် သက်ဆိုင်ရာဘာသာရပ်အတွက် ဒီပလိုမာလက်မှတ်ရရှိသူ (သို့မဟုတ်) ပညာရေးဘွဲ့ ရရှိသူဖြစ်ရမည်ဆိုတာတွေကို ချိုးဖောက်ပြီး Master တန်းက ဆရာ၊ ဆရာမတွေကို ရာထူးတိုးခန့်အပ်ထားတာတွေကြောင့် သူတို့သတ်မှတ်ထားတဲ့အချက်တွေနဲ့ ကိုက်ညီတဲ့ ပညာရေးကောလိပ်မှာရှိတဲ့ ဆရာ၊ ဆရာမတွေက ရာထူးတိုးတဲ့အခါ ကျန်နေခဲ့တယ်။

ဒါ့အပြင် ပညာရေးဝန်ကြီးဌာနရဲ့ ရာထူးတိုးမူဝါဒတွေ မတည်ငြိမ်တာတွေ အမျိုးမျိုး ပြောင်းလဲနေတာတွေကြောင့် ရာထူးတိုးတဲ့နေရာမှာ ကျွန်မတို့က ကျန်နေတာပါ။ အဓိက,က ရာထူးတိုးတဲ့စနစ်က ပွင့်လင်းမြင်သာမှုမရှိဘူး။ မျှတမှုလည်းမရှိတာတွေကြောင့် ဖြစ်နေတာပါ။ ဒါ့အပြင် ၂၀၁၈ ခုနှစ် ဇူလိုင်လ ၁ ရက်နေ့မှာ တရားဝင် ထုတ်ပြန်ထားတဲ့ရာထူးတိုးမူကို တရားဝင် ပယ်ဖျက်တာမျိုး မရှိတဲ့အပြင် Question Sheet ရေးဆွဲရာမှာ အဲဒီရာထူးတိုးမူတွေနဲ့ကွဲလွဲပြီး ရေးဆွဲဆုံးဖြတ်ထားတာတွေကြောင့် အခုလိုတွေဖြစ်နေတာပါ။

ကျွန်မတို့က အစိုးရတည်ဆောက်နေတဲ့ ဒီမိုကရေစီနိုင်ငံပေါ်မှာ တရားမျှတမှုကိုဆိုတာကို အယုံအကြည် မရှိတော့ပါဘူး။ ဘယ်လောက်ပဲ ကျောင်းအတွက် အနစ်နာခံပေးဆပ်ခဲ့ပေမယ့် ကြိုးစားပြီး ပေးဆပ်ခဲ့သမျှက အရာမထင်၊ အသိအမှတ်ပြုမခံရပါဘူး။ ကိုယ့်ကိုယ်ကျိုးစီးပွားအတွက် ကျောင်းဆက်တက်ပြီး ဘွဲ့၊ ဒီဂရီတွေ ထပ်ယူနေတဲ့သူတွေကျ ရာထူးတိုးသွားပြီး အဲလိုလူတွေကိုယ်စား တာဝန်ယူဆောင်ရွက်သူတွေ မိမိသာသာရပ်အပြင် တခြားဘာသာရပ်တွေကိုပါ ကူညီသင်ကြားပေးနေတဲ့သူတွေအတွက် အများကြီး ဆုံးရှုံးနေပါတယ်။

အခုလိုတွေ ခွဲခြားဆက်ဆံခံနေရတော့ ဆရာ၊ ဆရာမတွေက ကျောင်းအတွက် အများအကျိုးအတွက် မစဉ်းစားဘဲ မိမိကိုယ်ကျိုးအတွက် ကျောင်းတက် ဘွဲ့ယူရာထူးတိုးဖို့အတွက်ပဲ ကြိုးစားကျတော့မှာပါ။ ကျွန်မအနေနဲ့ကတော့ တရားမျှတမှုအတွက် ကိုယ်စွမ်း၊ ဉာဏ်စွမ်းရှိသရွေ့ ကြိုးစားအကောင်အထည်ဖော်သွားမှာပါ။ ကျွန်မအနေနဲ့ပြောချင်တာက ၁-၇-၂၀၁၈ ခုနှစ်က ရေးဆွဲအတည်ပြုထားတဲ့ ပညာရေး ကောလိပ်တွေရဲ့ ရာထူးတိုးမူတွေအတိုင်း ပညာရေး ကောလိပ်က ရာထူးမတိုးသေးတဲ့ ဆရာ၊ ဆရာမတွေကို အမြန်ဆုံး ရာထူးတိုးမြှင့်ပေးစေချင်ပါတယ်။

“ပြင်ဆင်ပြောင်းလဲမှုတွေကို ပွင့်လင်းမြင်သာမှုရှိအောင် ချမပြခဲ့ဘူး”
ဒေါ်ခက်ခက်မြင့် (ဖွံ့ဖြိုးရေးရာဌာန၊ လှည်းကူးပညာရေးကောလိပ်)

လက်ရှိမှာ ပညာရေးကောလိပ်ကဆရာ၊ ဆရာမတွေမှာ ဆရာ၊ ဆရာမချင်းအတူတူ အလုပ်ဝင်တဲ့ ရက်၊ လ၊ နှစ်တွေတူပေမယ့် ရာထူးတိုးရေးကိစ္စတွေမှာဆိုရင် ဆိုးဆိုးရွားရွား ခွဲခြားဆက်ဆံခံနေရတာတွေရှိပါတယ်။ လက်ရှိမှာ ကျွန်မတို့ကို ရာထူးတိုး မရတာက ကျွန်မတို့ သင်ကြားနေရတဲ့ဘာသာရပ်နဲ့ ဘွဲ့တိုးမြှင့်သတ်မှတ်တာမျိုးမရှိတာတွေ ကိုယ်နဲ့ မသက်ဆိုင်တဲ့ ဘွဲ့၊ ဒီဂရီတွေနဲ့ အာဏာရှင်ဆန်ဆန် ဆုံးဖြတ်သွားတာတွေကြောင့် ကျွန်မတို့က ရာထူးတိုးတဲ့အထဲမှာ မပါတာပါ။

ကျွန်မတို့ ပညာရေးဝန်ထမ်းတွေ ပေးဆပ်ခဲ့ရတဲ့ လုပ်သက်နှစ်တွေ အကြာကြီး ကြိုးစားအားထုတ်ခဲ့ရသမျှက သဲထဲရေသွန်လိုက်သလိုပဲ။ ဘာမှကို အရာမထင်ဘူး။ အဲဒီလိုတွေကြောင့် ကျွန်မတို့အနေနဲ့ ကိုယ်၊ စိတ်နှစ်ပါးလုံး ရိုက်ချိုးဖျက်ဆီးလိုက်သလို ခံစားရတယ်။ အဲလိုတွေ ခွဲခြားဆက်ဆံခံရတာတွေကြောင့် ကျွန်မအနေနဲ့ လောလောဆယ်တော့ အလုပ်ထွက်ဖို့အထိ စဉ်းစားနေတယ်။

လက်ရှိမှာ ကျွန်မတို့နိုင်ငံရဲ့ ရာထူးတိုးမြှင့်မှုစနစ်က လုပ်ငန်းအတွေ့အကြုံ၊ ပင်ကိုအရည်အချင်း၊ ကျွမ်းကျင်မှုနဲ့ ကိုယ်ကျိုးမဖက် စွန့်လွှတ်အနစ်နာခံ ကြိုးစားထားတာတွေကို အသိအမှတ်မပြုဘဲ ဘွဲ့၊ ဒီဂရီတွေကိုသာ ဦးစားပေး ရွေးချယ်ဆုံးဖြတ်တဲ့ စနစ်ဖြစ်နေတယ်။ သတ်မှတ်ထားတဲ့ဘွဲ့ရခဲ့ရင် ခင်ဗျားအနေနဲ့ အလုပ်ကြိုးစားဖို့မလိုဘူး။ အချိန်တန်ရင် ခင်ဗျား ရာထူးတိုးသွားမှာပါ။ နောက်ပြီး ဝန်ကြီးဌာနတစ်ခုအနေနဲ့ မူဝါဒကိုချမှတ်ပြီး ပြောင်းလဲပြင်ဆင်မှုလုပ်ရင် သက်ဆိုင်ရာဝန်ထမ်းတွေကို ပွင့်လင်းမြင်သာမှုရှိရှိ ချပြရမှာဖြစ်ပါတယ်။ ဒါပေမဲ့ ပညာရေးဝန်ကြီးဌာနတစ်ခုအနေနဲ့ ရာထူးတိုးတင်ထားတဲ့ ဆရာ၊ ဆရာမတွေကို လပိုင်းအတွင်း ပြင်ဆင်ပြောင်းလဲထားတာတွေကို ပွင့်လင်းမြင်သာမှုရှိအောင်ချပြရမှာ ဖြစ်ပါတယ်။ ဒါပေမဲ့ ပညာရေးဝန်ကြီးဌာနအနေနဲ့ ရာထူးတိုးတင်ထားတဲ့ ဆရာ၊ ဆရာမတွေကို လပိုင်းအချိန်အတွင်း ပြင်ဆင်ပြောင်းလဲမှုတွေကို ပွင့်လင်းမြင်သာမှုရှိအောင် ချမပြခဲ့ဘူး။ ရာထူတိုးပြီး အမိန့်စာထုတ်ပြန်ပြီးမှသာ ပြောင်းလဲသွားတဲ့ မူဝါဒအသစ်ကိုသိခဲ့ရတယ်။

“အလုပ်လုပ်ချင်တဲ့စိတ်၊ ကြိုးစားချင်တဲ့စိတ်တွေ ရိုက်ချိုးခံခဲ့ရတယ်”
ဦးဟိန်းဇော် (ကွန်ပျူတာဌာန၊ ဟားခါးပညာရေးကောလိပ်)

လက်ရှိမှာ ကျွန်တော်တို့ ရာထူးတိုးတဲ့အထဲမှာ မပါဘူးဆိုတာ ဟုတ်ပါတယ်။ ကျွန်တော်တို့ ၁.၇.၂၀၁၈ နေ့မှာ ဝန်ကြီး၊ ဒုဝန်ကြီး၊ ညွှန်ချုပ်၊ ဒုညွှန်ချုပ်တွေနဲ့ ပညာရေး ကောလိပ်အသီးသီးမှာ ဆရာ၊ ဆရာမများ သမဂ္ဂကိုယ်စားလှယ်တွေ ပါဝင်ရေးဆွဲ အတည်ပြုထားတဲ့မူတွေကို ချိုးဖောက်ပြီး ရာထူးတိုးခန့်ထားမှုမှာ ကျန်ခဲ့တာပါ။ ကျွန်တော်တို့ ရာထူးမတိုးတာက ပညာရေးဝန်ကြီးဌာနရဲ့ မူဝါဒမတည်ငြိမ်မှုတွေ၊ ပွင့်လင်းမြင်သာမှု မရှိတာတွေကြောင့်ပါ။

ဆရာအလုပ်ဆိုတာက နှလုံးသားနဲ့ လုပ်ရတဲ့အလုပ်ဖြစ်ပါတယ်။ စိတ်နဲ့လုပ်ရတဲ့အလုပ်ဖြစ်ပါတယ်။ ကျွန်တော်တို့စိတ်တွေ ပျော်ရွှင်မှုမရှိဘူးဆိုရင် အလုပ်မှာ စိတ်ဓာတ်နိုးကြားတက်ကြွမှုနဲ့ အလုပ်လုပ်ချင်တဲ့ စိတ်ပိုင်းဆိုင်ရာရော၊ ရုပ်ပိုင်းဆိုင်ရာရော နှစ်ခုလုံး ဆုံးရှုံးခဲ့ရပါတယ်။ စိတ်ပိုင်းဆိုင်ရာဆိုရင် ကျွန်တော်တို့ ဂုဏ်သိက္ခာ ကျဆင်းရသလို ရုပ်ပိုင်းဆိုင်ရာဆိုရင်လည်း ဆရာတစ်ယောက်အနေနဲ့ ရသင့်ရထိုက်တဲ့ အခွင့်အရေးတွေ ဆုံးရှုံးနေတယ်။ အလုပ်လုပ်ချင်တဲ့ စိတ်၊ ကြိုးစားချင်တဲ့စိတ်တွေ ရိုက်ချိုးခံခဲ့ရတယ်။ အဲလိုနစ်နာမှုတွေ အများကြီးရှိပါတယ်။

ပညာရေးဝန်ကြီးဌာန ညွှန်ကြားရေးမှူးချုပ်တွေနဲ့ တွေ့ဆုံဆွေးနွေးခဲ့ပေမယ့် ရသင့်ရထိုက်တဲ့ တန်းတူအခွင့်အရေးတွေ မရရှိခဲ့တဲ့အပြင် စီမံခန့်ခွဲမှုအပိုင်း မှားယွင်းဆုံးဖြတ်ချက်တွေ၊ ဆရာ၊ ဆရာမတွေရဲ့ လိုအပ်ချက်အဖြစ် ပြောင်းလဲပြောဆိုခြင်း ခံခဲ့ရတာတွေကြောင့် ပြည်သူ့လွှတ်တော်၊ ပညာရေးမြှင့်တင်မှု ကော်မတီ၊ ပြည်သူ့လွှတ်တော် တိုင်ကြားစာ လက်ခံရေးဌာန၊ နိုင်ငံတော်သမ္မတရုံး၊ နိုင်ငံတော် အတိုင်ပင်ခံရုံးအထိ တရားမျှတမှု ရရှိသည်အထိ ဆက်လက်ဆောင်ရွက်သွားမှာဖြစ်ပါတယ်။

ဥပဒေနဲ့အညီတန်းတူ ၁-၇-၂၀၁၈ ခုနှစ်က အတည်ပြုရေးဆွဲခဲ့တဲ့ ပညာရေးကောလိပ်များ၊ ရာထူးတိုးမူအတိုင်းကျန်ရှိခဲ့တဲ့ ဆရာ၊ ဆရာမတွေကို အမြန်ဆုံး ရာထူးတိုးမြှင့်ပေးစေချင်ပါတယ်။ ဆရာအတတ်သင်ပညာကဏ္ဍကိုလည်း တတ်သိနားလည်တဲ့ တာဝန်ယူမှု၊ တာဝန်ခံမှုရှိတဲ့လူကြီးများကိုသာ ရွေးချယ်တာဝန်ပေးသင့်ပါတယ်။ ဒါမှသာ ဆရာ အတတ်သင်ပညာကဏ္ဍ အားကောင်းပြီး နိုင်ငံကို အကျိုးပြုတဲ့ ဆရာ၊ ဆရာမတွေပေါ်ထွန်းလာမှာ ဖြစ်ပါတယ်။

ခိုင်ချယ်ရီထွန်း