News

POST TYPE

TEACHER'S VOICE

ဆရာများ၏ ရင်ဖွင့်သံ (သင်ရိုးသစ်နှင့် စာမေးပွဲ)
29-Mar-2018
ပြီးခဲ့သည့်နှစ်က ပထမတန်းသင်ရိုးသစ်တွင် စာမေးပွဲမစစ်ဆေးရန် အခြေခံပညာဦးစီးဌာနက ညွှန်ကြားခဲ့သော်လည်း ကျောင်းအုပ်အချို့က စာမေးပွဲစစ်ရန် စေခိုင်းသည်များ ရှိခဲ့သည်။ ထိုသို့ စာမေးပွဲ စစ်ဆေးမှုကြောင့် လက်တွေ့သင်ကြားသည့် ဆရာများအတွက် သင်ကြား၊ သင်ယူမှု အခက်အခဲများ ရှိခဲ့သည့်အပြင် မိဘများအနေနှင့် ကလေးများကို ကျူရှင်ထားရန် တွန်းအားပေးသကဲ့သို့ ဖြစ်သွားသည်ဟု ပညာရေး အသိုင်းအဝိုင်းက သုံးသပ်ကြသည်။ ထိုအခြေအနေအပေါ် ဆရာ၊ ဆရာမများ၏ သဘောထားအမြင်များကို ယခုတစ်ပတ် ဆရာများ၏ ရင်ဖွင့်သံကဏ္ဍမှတစ်ဆင့် The Voice က စုစည်းဖော်ပြလိုက်ပါသည်။ 

“စနစ်သစ်ရည်မှန်းချက်က အဆုံးသတ်မှာ လှလှပပ ဇာတ်သိမ်းရမယ့်အစား သောကတွေနဲ့ အဆုံးသတ်ခဲ့ရပါတယ်”
ဒေါ်စုစု (မူလတန်းပြ၊ အမက၂၁၊ သင်္ဃန်းကျွန်း၊ ရန်ကုန်)

စနစ်ဟောင်းအတိုင်း စာမေးပွဲစစ်ဆေးခြင်းက စနစ်သစ်အတွက် အကြီးမားဆုံး အနှောင့်အယှက် အဟန့်အတား ဖြစ်ပါတယ်။ စနစ်သစ်ရဲ့ ပထမတန်း ၁၀ ဘာသာ သင်ကြားတဲ့အခါ ဆရာနဲ့ကလေး ပူးပေါင်း ဆောင်ရွက်မှု၊ တီထွင်ကြံဆမှု၊ ကိုယ်ပိုင်တွေးတော ဆင်ခြင်မှုတွေနဲ့ အုပ်စုလိုက် လုပ်ဆောင်တာ၊ အသင်းအဖွဲ့လိုက် လုပ်ဆောင်တာနဲ့ စုပေါင်းအဖြေရှာ သင်ကြားနည်းတွေကို သုံးထားရလို့ပါ။ ဒါတွေအားလုံးကို ဆရာက နေ့စဉ်၊ လစဉ် အကဲဖြတ်ပြီး ကောင်း၊ သင့်၊ ညံ့ ABC ကိုသာ ခွင့်ပြုထားတဲ့အတွက် စနစ်သစ်ပညာရေးရဲ့ ရည်မှန်းချက်ဟာ ကလေးများရဲ့ လက်တွေ့ အသုံးချ၊ အသုံးပြုတတ်စေဖို့ ပူးပေါင်း ဆောင်ရွက်တတ်ဖို့ အဓိက ထားပါတယ်။ 

ဒါကြောင့် စာတစ်လုံး၊ စာတစ်ကြောင်း၊ စာတစ်ပိုဒ်ကိုသာ ကိုယ်စားပြု၊ အမှတ်ပေးစည်းမျဉ်းက အသက်ဖြစ်တဲ့ စာမေးပွဲကို ယခုစနစ်သစ်  ပညာရေး ပထမတန်းမှာ စစ်ဆေးစေမယ်ဆိုရင် ဆရာ၊ မိဘ၊ ကလေး သုံးဦးသုံးဖလှယ် ရှေ့ဆက်ဖို့အတွက် အကြီးမားဆုံး အနှောင့်အယှက် အဟန့်အတားတစ်ခုအဖြစ် တင်ပြလိုပါတယ်။ လက်တွေ့ ၂၀၁၇-၂၀၁၈ ပညာသင်နှစ်မှာ ကျွန်မက ပထမတန်း စနစ်သစ် ပညာရေး ရည်မှန်းချက်ကို ထိရောက်ဖို့ အကောင်အထည်ဖော်ပါတယ်။ လက်တွေ့သင်ကြားသူ ကျွန်မရဲ့ အကြံပြုတာ၊ တားမြစ်တာတွေကိုလက်မခံဘဲ စနစ်ဟောင်းအတိုင်း ၃၅ မိနစ် အပြီး ရေးဖြေ၊ နှုတ်ဖြေ မြန်မာ၊ အင်္ဂလိပ်၊ သင်္ချာ၊ အထွေထွေ ဘာသာပေါင်း ၄ ဘာသာကို ဇွတ်အတင်း စစ်ဆေးတဲ့ ကျောင်းအုပ်ကြောင့် ပထမတန်းစနစ်သစ် ဆက်အောင်မြင်ဖို့ အဟန့်အတားဖြစ်ခဲ့ရပါတယ်။

ကျွန်မ လူကြီးတွေကိုသွားပြီး အသိပေးတယ်။ ကျောင်းကို ဆင်းပြီး မစစ်ဆေးပါဘူး။ ကျောင်းအုပ်စကားပဲ ယုံပါတယ်။ ကျွန်မနဲ့ ကျောင်းသားမိဘတွေ စာနဲ့ရေးပြီး အသိပေးခဲ့ပေမယ့် အရေးမကြီးသလို လုပ်ထားလိုက်ပါတယ်။ အလုပ်မဟုတ်တာကို အလုပ်ရှာ ဖုန်ထနေတယ်သဘော ပြန်ပြောတာမျိုး ခံရပါတယ်။ အထက်ကို ဆက်အသိမပေးဖို့လည်း တားထားပါတယ်။ ဒီလိုဆိုရင် နောက်နှစ်စာမေးပွဲ ဆက်လုပ်မှာ သေချာနေပါတယ်။ ဒါဟာ အောက်ခြေမှာ ကျောင်းအုပ် လုပ်ပိုင်ခွင့်အောက် စနစ်သစ်ပညာရေးကို ဖျက်ဆီးလိုက်တာ၊ အစိုးရသစ်ကို မပူးပေါင်းတာလို့ ခံစားရပါတယ်။ 

သိပ်ပြီး စိတ်ပျက်ခဲ့ရပါတယ်။ စိတ်ဓာတ်လည်း ကျခဲ့ရပါတယ်။ ပြဿနာတွေနဲ့လည်း ရင်ဆိုင်ရပါတယ်။ သင်ကြား၊ သင်ယူမှု တစ်နှစ်လုံး ဟန်ချက်ညီညီ လက်တွဲလာခဲ့ကြတဲ့ ကျောင်းသား၊ မိဘ၊ ဆရာ ပူးပေါင်း အကောင်အထည်ဖော်ခဲ့တဲ့ ပထမတန်း စနစ်သစ် ရည်မှန်းချက်က အဆုံးသတ်မှာ လှလှပပ ဇာတ်သိမ်းရမယ့်အစား သောကတွေနဲ့ အဆုံးသတ်ခဲ့ရပါတယ်။ အခုလို စနစ်ဟောင်းအတိုင်း စာမေးပွဲစစ်လိုက်တာဟာ အစိုးရသစ်ရဲ့ ပြည်သူတွေကိုပေးချင်တဲ့ ပညာရေး စနစ်သစ် ရည်မှန်းချက်ကို ရိုက်ချိုးပစ်လိုက်သလို ခံစားနေရတယ်ဆိုရင် နိုင်ငံသစ်၊ အစိုးရသစ်ကို တန်ဖိုး၊ စနစ်သစ်ပညာရေးကို ထဲထဲဝင်ဝင် လေ့လာတန်ဖိုးထား တတ်သူတွေ နားလည်နိုင်မယ် ထင်ပါတယ်ရှင့်။

“ပုံစံကျစာမေးပွဲတွေနဲ့ စစ်ဆေးနေခြင်းဟာ အနာဂတ် သတ်ဖြတ်ပွဲတွေ လုပ်နေတယ်လို့ ဆိုချင်ပါတယ်”
ဒေါ်နီလာဝင်း (အထက ၃၅၊ ချမ်းမြသာစည်၊ မန္တလေး)

စနစ်သစ်သင်ရိုးကို သင်ကြားရာမှာ အခက်အခဲဆုံး ပြဿနာက မိဘတွေပူးပေါင်းပါဝင်မှု အားနည်းခြင်းပါ။ မိဘတွေကို ဒီစနစ်သစ် သင်ရိုးအကြောင်း ချပြရှင်းပြတဲ့လုပ်ဆောင်မှုက အရမ်း အားနည်းနေပါတယ်။ ကျွန်မတို့ လက်တွေ့ သင်ကြားနေရတဲ့ ဆရာ၊ ဆရာမတွေရဲ့ အားတစ်ခုအပေါ်မှာပဲ ရှိနေတယ်လို့ ခံစားရတယ်။ မိဘတွေမပါဝင်ရင် သင်ကြားသင်ယူမှုမှာ အရမ်းခက်ပါတယ်။ စာသင်ပေးပြီး စာရနိုင်အောင် လုပ်ပေးရုံ တစ်မျိုးတည်း မဟုတ်ဘဲ ဗလငါးတန် ပြည့်စုံဖို့ အလေ့အကျင့်ကောင်းလေတွေ ပျိုးထောင်ရတာမို့ပါ။ အိမ်မှာပါ ဒီအလေ့အကျင့်ကောင်းတွေရှိနိုင်ဖို့ မိဘပါဝင်မှ အောင်မြင်မှာပါ။ စနစ်သစ်ပညာရေးက ၂၁ ရာစု လူ့အဖွဲ့ အစည်းရဲ့ စိန်ခေါ်မှုတွေကို ဗလငါးတန်ပြည့်စုံစွာနဲ့ ရင်ဆိုင်ရပ်တည်နိုင်ဖို့ပါ။ KG သင်ရိုးမှာ နယ်ပယ် ၆ခု ကိုအခြေခံထားပြီး G 1 ပထမတန်းမှာ သင်ယူနိုင်ဖို့ ပြင်ဆင်ပေးဖို့နဲ့ ကျောင်းကိုပျော်ရွှင်လိုလားစွာ တက်လိုစိတ်ရှိဖို့ အဓိကထားပါတယ်။ ပထမတန်း G 1 သင်ရိုးမှာ နယ်ပယ် ၉ ခုနဲ့ ဘာသာရပ် ၁၀ ခုပါဝင်ပါတယ်။ အဲဒီသင်ရိုးထဲကနေ ကလေးလေးတွေရဲ့ စူးစမ်းလေ့လာမှုကိုအခြေခံပြီး၊ အသိပညာ တတ်ကျွမ်းမှုစွမ်းရည်၊ အတွေးအခေါ်နဲ့ သဘောထားတွေ တိုးတက်ပြောင်းလဲလာမယ့် ရလဒ်ကောင်းတွေ ရချင်တာပါ။ အပြုအမူကောင်းတွေ အလေ့အကျင့်ကောင်းတွေ ကျင့်ဝတ်လိုက်နာမှုတွေ ရှိလာအောင် လေ့ကျင့်ပျိုးထောင်ပေးတဲ့ သင်နည်းတွေနဲ့သင်ရတာပါ။ 

ဒါကြောင့် အုပ်စုလိုက် လုပ်ဆောင်နိုင်မှုတွေ၊ တက်ကြွပျော်ရွှင်စွာ သင်ယူနိုင်မှုတွေ၊ ပြန်လည် တင်ပြနိုင်မှုတွေကို သင်ခန်းစာ တတ်ကျွမ်းမှုနဲ့အတူ ဖော်ထုတ်ပေးရတာပါ။ သူတို့ရဲ့ တတ်မြောက်မှုကို စစ်ဆေးတဲ့အခါ ဒီသင်ရိုးညွှန်းတမ်းနဲ့ လိုက်လျောညီတဲ့ စစ်ဆေးခြင်း ပြုလုပ်ရပါတယ်။ သင်ယူစဉ် အကဲဖြတ်ခြင်း၊ လုပ်ဆောင်မှုကို စစ်ဆေး အကဲဖြတ်ခြင်း၊ ပြန်လည် သုံးသပ်ခြင်းနဲ့ လိုအပ်တဲ့ အကြံပြုချက်ပေးခြင်း စတာတွေ လုပ်ဆောင်ရမယ်လို့ သင်ရိုးပို့ချရေးအဖွဲ့က လမ်းညွှန် မှာကြားထားပြီးသားပါ။ ဒါကို ကျောင်းအုပ်အချို့က ပုံစံကျစာမေးပွဲတွေနဲ့ နှစ်ဆုံးစာမေးပွဲတွေ လုပ်လာတာမျိုးတွေ ရှိလာပါတယ်။ ကိုယ့်ကလေး စာမေးပွဲ ဖြေရမယ်ဆိုတော့ မိဘတွေ စိုးရိမ်တကြီး ဖြစ်လာတာနဲ့အမျှ ကလေးတွေကို ဖိအားတွေ ပေးပါတော့တယ်။ ဆိုလိုတာက မိဘတွေဟာ ကလေးကို စာတွေကျက်မှတ် အလွတ်ရေး စတာတွေ လုပ်စေပါတော့တယ်။ စာမေးပွဲရလဒ်က ရမှတ်တွေနဲ့အတူ အဆင့်တွေ အောင်မှတ်တွေအတွက် အဓိကထားလာပါတော့တယ်။ 

ကျွန်မတို့ ဒီသင်ရိုးရဲ့မျှော်မှန်းရလဒ်တွေကို ဖော်ထုတ်မှတ်တမ်းတင်တာထက် အဆင့်ကောင်းဖို့ အောင်မှတ်ရဖို့အတွက် အဓိက ဦးတည်သွားတာကိုပါ။ ကျွန်မတို့က မိဘတွေကို စဉ်းစားတွေခေါ်မှု အားကောင်းစေမယ့် သင်ခန်းစာ ချဉ်းကပ်မှုတွေအတွက် စာတွေကြို မသင်ဖို့ ကျူရှင်တွေမထားဖို့ မနည်းစည်းရုံးထားရတာ။ နှစ်ဆုံး စာမေးပွဲတွေကြောင့် မိဘတွေက သင်ရိုး၊ သင်ကြားနည်းနဲ့ သင်ကြားသူဆရာ ဆရာမတွေအပေါ် ယုံကြည်မှု လျော့ကျသွားကြရော။ ကလေးအတွက် စာရဖို့ အဓိကထားပြီး ကြိုသင်တာတွေ ကျူရှင်မှာ သင်စေတာတွေ ဖြစ်လာရော။ အဲ့ဒီအခါ အုပ်စုလိုက် ညှိနှိုင်းလုပ်ဆောင်မှုတွေ၊ အတန်းရှေ့တင်ပြနိုင်မှုတွေ၊ ကိုယ်တိုင်အဖြေရှာနိုင်မှုတွေမှာ အားနည်းလာရော။ ဗလငါးတန် မရနိုင်တော့ဘူး။ ဒါကြောင့်မို့ စီမံခန့်ခွဲမှု အလွဲတွေကြောင့် ကလေးတွေဆီမှာ ရလဒ်ကောင်းတွေ လွဲချော်ရပြီလေ။ စနစ်သစ်အပေါ် ယုံကြည်မှုနည်း လာကြပြီး အပြောင်းအလဲအတွက် အဟန့်အတား ဖြစ်နေပါတယ်။ ဒီစနစ်သစ်သင်ရိုးကို သင်နေရတဲ့အတန်း တွေမှာ ပုံစံကျစာမေးပွဲတွေနဲ့ စစ်ဆေးနေခြင်းဟာ အနာဂတ်သတ်ဖြတ်ပွဲတွေ လုပ်နေတယ်လို့ ဆိုချင်ပါ တယ်။ ကျွန်မတို့ကလေးတွေဟာ ပြောင်းလဲနေတဲ့ စနစ်သစ်နဲ့အတူ သူရဲ့အနာဂတ်ကို ရှင်သန်စေချင်ပါတယ်။ ကျွန်မတို့ကို အစိုးရရဲ့ ပံ့ပိုးမှုတွေနဲ့အတူ အဆင့်ဆင့် ညွှန်ကြားသူတွေ၊ မိဘနဲ့အတူ နားလည်စွာနဲ့ စိတ်ချမ်းချမ်းသာသာ ကြိုးစားအကောင်အထည်ဖော်ချင်ပါတယ်။

နေဇာကျော်