News

(၂၁) ရာစု ပင်လုံညီလာခံတွင် ဒေါ်အောင်ဆန်းစုကြည် ပြောကြားသည့် ကျေးဇူးတင်စကား (အပြည့်အစုံ)
နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်း ဗဟိုဌာန (၂) ၌ ယနေ့ (စက်တင်ဘာ ၃ ရက်) က ကျင်းပသည့် ပြည်ထောင်စုငြိမ်းချမ်းရေး ညီလာခံ- ၂၁ ရာစု ပင်လုံ ပထမအစည်းအဝေး နောက်ဆုံးနေ့၌ ပြည်ထောင်စုငြိမ်းချမ်းရေး ညီလာခံ -(၂၁) ရာစု ပင်လုံကျင်းပရေး ဗဟိုကော်မတီ ဥက္ကဋ္ဌ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ကျေးဇူးတင်စကား ပြောကြားခဲ့သည်။

ဒေါ်အောင်ဆန်းစုကြည် ပြောကြားသည့် ကျေးဇူးတင်စကား အပြည့်အစုံမှာ -

ကျွန်မတို့ ဒီညီလာခံကြီးဟာ ငြိမ်းချမ်းရေးဖြစ်စဉ်ရဲ့ တစ်စိတ်တပိုင်း ဖြစ်ပါတယ်။ ဖြစ်စဉ်တစ်ခုဆိုတာ အစဉ်တစိုက် လုပ်နေဖို့အရာ ဖြစ်ပါတယ်။ ကျွန်မတို့ဟာ ဒီညီလာခံထဲမှာ ရောက်နေတဲ့ အချိန်မှာပဲ ငြိမ်းချမ်းရေးကိစ္စ စဉ်းစားဖို့ မဟုတ်ပါဘူး။ အစည်းအဝေးတွေ ကျင်းပနေချိန်မှသာ ငြိမ်းချမ်းရေးကို စဉ်းစားနေဖို့ မဟုတ်ပါဘူး။ တစ်ချိန်လုံး ကျွန်မတို့ဟာ ငြိမ်းချမ်းရေးကို ဘယ်လိုရအောင် ယူကြမလဲ ကျွန်မတို့ရဲ့ ပြည်ထောင်စုကြီး ခိုင်ခံ့အောင်၊ ချမ်းသာအောင်လို့ ဘယ်လိုလုပ်ကြမလဲ ဆိုတာ အစဉ်တစိုက် ကျွန်မတို့ စဉ်းစားနေကြရမယ့်ကိစ္စ ဖြစ်ပါတယ်။

အခု ဒီညီလာခံကြီး အတွင်းမှာ ဆွေးနွေးခဲ့တဲ့ အရာအားလုံးကို ပြည်သူလူထု သိနိုင်အောင်လို့ ကျမတို့ လွှင့်ပေးပါတယ်။ ဒီလိုလွှင့်ပေးခြင်းအားဖြင့် ပြည်သူလူထုဟာ ကျွန်မတို့ရဲ့ ငြိမ်းချမ်းရေး ညီလာခံထဲမှာ မဖြစ်မနေ ပါဝင်ရမယ့် ပုဂ္ဂိုလ်များဖြစ်တယ် ဆိုတာကို နားလည်စေချင်တယ်။ ပြည်သူများအနေနဲ့ ကျွန်မတို့ ငြိမ်းချမ်းရေးရဖို့ ဘယ်လိုအခက်အခဲတွေ ကျော်လွှားဖို့ လိုမလဲ ဆိုတာကို နားလည်စေချင်တယ်။ အခက်အခဲတွေရှိတယ် ဆိုတာ သိမှ ဒီအခက်အခဲတွေကို ဘယ်လိုကျော်လွှားရမလဲဆိုတဲ့ အဖြေကို ကျွန်မတို့ ရှာနိုင်မှာ ဖြစ်ပါတယ်။

အခုဆိုရင် အစုအဖွဲ့ အသီးသီး ပုဂ္ဂိုလ်များအရ၊ အစုအဖွဲ့များအရ ပြောသွားတဲ့နေရာမှာ ဘယ်သူတွေဟာ အတိတ်ကို ပိုပြီးလှည့်ကြည့်တဲ့နေရာမှာ အားသန်သလဲ ဘယ်သူတွေဟာ အနာဂတ်ကို မျက်နှာမူတဲ့ နေရာမှာ အားသန်သလဲ ဆိုတာလည်း ပေါ်လာပါလိမ့်မယ်။ ဒါပေမယ့်လည်း ဒါတွေက ထာဝရ မဟုတ်ပါဘူး။ အခုချိန်မှာ အတိတ်ကို လှည့်ကြည့်နေတဲ့ ပုဂ္ဂိုလ်များဟာ နောင်တချိန်မှာ အနာဂတ်ဘက်ကို လှည့်သွားတာလဲ ဖြစ်နိုင်ပါတယ်။ ဖြစ်ဖို့လည်း ကျွန်မတို့ မျှော်လင့်ပါတယ်။ အတိတ်ရဲ့ ချည်နှောင်မှုကို ကျွန်မတို့က ခံနေမှာလား။ အနာဂတ်ကို သတ္တိရှိရှိနဲ့ ရင်ဆိုင်ပြီးတော့ တည်ဆောက်သွားမှာလား ဆိုတာကို ကျွန်မတို့ တစ်ဦးချင်း တစ်ဦးချင်း ဆုံးဖြတ်ရမယ့်ကိစ္စ ဖြစ်ပါတယ်။

ဒီဆုံးဖြတ်ချက်ဟာ အစုအဖွဲ့တစ်ခု အတွက်လည်း မဟုတ်ပါဘူး။ ပုဂ္ဂိုလ်တစ်ဦးတစ်ယောက်တည်း အတွက်လည်း မဟုတ်ပါဘူး။ တိုင်းရင်းသားလူမျိုးစုတစ်ခု အတွက်လည်းမဟုတ်ပါဘူး ကျွန်မတို့ ပြည်ထောင်စုကြီးအတွက် ဖြစ်တယ် ဆိုတာကို ကျွန်မတို့ သဘောပေါက်ဖို့ လိုပါတယ်။ ပြည်ထောင်စုကြီး ငြိမ်းချမ်းရေးဆိုတာ ကမ္ဘာ့ငြိမ်းချမ်းရေးနဲ့လည်း သက်ဆိုင်နေပါတယ်။ ဒါကြောင့်မို့ ဒီခန်းမထဲက ဖြစ်စဉ်ကို တစ်ကမ္ဘာလုံးကလည်း စိတ်ဝင်စားကြပါတယ်။ ဒီလိုငြိမ်းချမ်းရေး ရယူဖို့ဆိုတာ အင်မတန်မှ ခက်ခဲတဲ့ကိစ္စပါ။ အခြားနိုင်ငံတွေမှာလဲ အခက်အခဲတွေ ကျော်လွှားပြီး ငြိမ်းချမ်းရေး ရယူကြတယ်။ အဲလိုရယူတဲ့ အချိန်မှာဆိုရင် မုဒိတာပွားကြတယ်။ စိတ်ချမ်းသာကြတယ်။ ဘာဖြစ်လို့လဲဆိုတော့ လူသားတွေထဲမှာဆိုရင် အချင်းချင်း ဆက်နွယ်မှုဆိုတာ ရှိတယ်။ တစ်နေရာမှာ ငြိမ်းချမ်းရေး ရသွားပြီဆိုရင် ကျွန်မတို့ နိုင်ငံအတွက် မျှော်လင့်ချက် ရသလို ကျွန်မတို့နိုင်ငံမှာ ငြိမ်းချမ်းရေး အောင်မြင်မယ်ဆိုရင် တခြားနိုင်ငံတွေအတွက်လဲ မျှော်လင့်ချက်ပေးရာ ရောက်ပါတယ်။

ဒါကြောင့် ကျွန်မတို့အားလုံး ကိုယ့်တာဝန်ဟာ ဘယ်လောက်ကြီးမားတယ်။ ဒီတာဝန်ကို ကျေကျေပွန်ပွန် ထမ်းဆောင်နိုင်ဖို့ အခွင့်အရေးဟာ ဘယ်လောက် ဂုဏ်သိက္ခာရှိတယ် ဆိုတာ မေ့လို့ မဖြစ်ပါဘူး။ အခုဆိုလို့ရှိရင် ဒီညီလာခံဟာ ညီလာခံရဲ့ နိဒါန်းပဲဖြစ်ပါတယ်။ ပထမ အစည်းအဝေးပါ။ ပထမ အစည်းအဝေးပြီးရင် နောက်လည်း အစည်းအဝေးတွေလည်း လာဦးမှာပါ။ ကြားထဲမှာ လုပ်စရာတွေ အများကြီး ရှိပါတယ်။ အမျိုးသားအဆင့် ဆွေးနွေးပွဲများလုပ်ဖို့ ဆိုတာဟာ ဒီညီလာခံ ပြီးတာနဲ့ အစည်းအဝေး ပြီးတာနဲ့ စတင်ပြီး ပြင်ဆင်ရတော့မှာ ဖြစ်ပါတယ်။ ကျွန်မတို့ရဲ့ CSO ဖိုရမ်တွေ ဖြစ်မြောက်ဖို့ စတင်ပြင်ဆင်ရတော့မှာ ဖြစ်ပါတယ်။ လုပ်စရာ အလုပ်တွေက အများကြီးပါပဲ။ ဒါပေမယ့် လုပ်ရကျိုးနပ်ပါတယ်။ ဘာဖြစ်လို့လဲဆိုတော့ ကျွန်မတို့ လုပ်နေတာက နိုင်ငံရဲ့ အနာဂတ်အတွက် လုပ်နေတာ ဖြစ်ပါတယ်။ နိုင်ငံရဲ့ အနာဂတ် ဆိုတာဟာ အင်မတန်မှ ကြာရှည်တဲ့ ကာလကြီးပါ။ နိုင်ငံရဲ့ အနာဂတ်မှာ ဒီနိုင်ငံရဲ့ အရိပ်ကို ခိုလုံသွားရမယ့် ပြည်သူပြည်သားများ ဆိုတာလည်း မရေမတွက်နိုင်အောင် ရှိပါလိမ့်မယ်။ ဒီကမ္ဘာကြီး ဘယ်လောက်ကြာကြာခံနိုင်မလဲ ဆိုတာက ကျွန်မတို့ တစ်ယောက်မှ မသိပါဘူး။ ကမ္ဘာ့တည်သရွေ့ ကျွန်မတို့ မှီတင်းနေထိုင်သူများ အားလုံး လုံခြုံဖို့အတွက် ကိုယ်စိတ်နှစ်ဖြာ ချမ်းသာဖို့အတွက် ကျွန်မတို့ လုပ်နိုင်မယ်ဆိုလို့ ရှိရင် ဒါဟာ ကျွန်မတို့ လူဖြစ်ရကျိုးနပ်ပြီလို့ အားလုံးက ပြောနိုင်ပြီ ဖြစ်ပါတယ်။

ဒါကြောင့်မို့ ကျွန်မတို့ ညီလာခံကို တတ်ရောက်လာတဲ့ ကိုယ်စားလှယ်များ အားလုံး ဒီညီလာခံရဲ့ အောင်မြင်မှုမှာ ပါဝင်ရမယ့် ကိုယ်စားလှယ် အားလုံးဟာ လူဖြစ်ရကျိုးနပ်အောင် ကြိုးစားကြပါလို့ ကျွန်မ တိုက်တွန်းချင်ပါတယ်။ ကျွန်မတို့ဟာ ဒီလောကကြီးထဲကို လာသွားရတာဟာ တစ်ခဏလေးပါ။ ကျွန်မတို့ အသက်ဘယ်လောက်ရှည်နိုင်မလဲ။ ကျွန်မသိသလောက် ကမ္ဘာ့အသက်အရှည်ဆုံး ပုဂ္ဂိုလ်ဟာ ၁၂၀ လောက် ဖြစ်ပါတယ်။ ၁၂၀ ဆိုတာ ဘာမှ မဟုတ်ပါဘူး။ နိုင်ငံတစ်နိုင်ငံရဲ့ သက်တမ်းနဲ့စာလို့ရှိရင်၊ ကမ္ဘာကြီးရဲ့ သက်တမ်းနဲ့စာလို့ရှိရင် ၁၂၀ ဆိုတာ ဘာမှမဟုတ်ပါဘူး။ ကျွန်မတို့တွေ ကံကောင်းလို့ ကျန်းမာရေးကောင်းလို့ ၁၂၀ အထိ နေနိုင်တယ်ပဲ ဆိုပါဦးစို့ ဒီ ၁၂၀ ဆိုတာ တစ်ခဏလေးပါပဲ။ ကျွန်မတို့လို အသက်ရောက်နေတဲ့သူတွေဆိုရင် ၁၂၀ ထိနေဖို့ဆိုတာ သိပ်တော့မကျန်တော့ပါဘူး။ ဒီတော့ ကျွန်မတို့ဟာ ကိုယ်ရှိတဲ့ အချိန်လေးကို တန်ဖိုးရှိအောင် သုံးကြပါစို့၊ ကိုယ်ရှိတဲ့ အချိန်လေးကို အရင်တုန်းက ဖြစ်ခဲ့တဲ့ ကိစ္စတွေကို ပြန်လှည့်ကြည့်ပြီး အာယာတတွေ ပွားနေမယ့်အစား တစ်ဦးပေါ်တစ်ဦး သံသယတွေ ပွားနေမယ့်အစား ကျန်တဲ့အချိန် အတွင်းမှာ ဘယ်လို အာဃာတတွေပျောက်အောင် လုပ်မလဲ။ ဘယ်လိုဒီသံသယတွေ ကင်းစင်အောင် လုပ်မလဲ။ ဘယ်လိုကောင်းမွန်တဲ့ အမွေအနှစ်တစ်ခုကို ချန်ထားခဲ့မလဲ ဆိုတာကို စဉ်းစားကြပါစို့လို့ ကျွန်မက နေပြီးတော့ တိုက်တွန်းချင်ပါတယ်။ အခု ကျွန်မတို့ ညီလာခံအတွင်းမှာ တစ်ခါတလေ အထစ်အငေါ့လေးတွေ ဖြစ်တယ်။ မပြေလည်တဲ့ ကိစ္စတွေ ရှိပေမယ်။ ဒီညီလာခံ ဖြစ်မြောက်အောင်လို့ လုပ်ပေးတဲ့ ပုဂ္ဂိုလ်တွေ အားလုံးကို ကျွန်မ လှိုလိူက်လှဲလှဲ ကျေးဇူးတင်ပါတယ်။

ဒီညီလာခံလုပ်ဖို့ အချိန်လည်း သိပ်ရှိခဲ့တာ မဟုတ်ဘူး။ ဒါဆို အချို့ကမေးမယ် ဘာလို့မြန်မြန်လုပ်လဲ။ ဘာလို့ မစောင့်လဲဆိုရင် ဒါက စောင့်ရမယ့် ကိစ္စလည်း မဟုတ်ဘူး ကျွန်မတို့မှာ ရှိတဲ့အချိန်ကို လုပြီး လုပ်နေရတာပါ။ ရှိတဲ့အချိန်ကလုပြီး လုပ်တယ် ဆိုတာက ကျွန်မတို့ အတွက်လည်း မဟုတ်ဘူး။ ကျွန်မတို့ အစိုးရ အတွက်လည်း မဟုတ်ဘူး။ ကျွန်မတို့ အစိုးရဖြစ်ဖြစ်၊ ဘယ်အဖွဲ့အစည်းဖြစ်ဖြစ် ပြည်သူလူထုရဲ့ ထောက်ခံမှုမရှိရင် ဘယ်ကိစ္စကိုမှ အောင်မြင်အောင် လုပ်နိုင်မှာ မဟုတ်ပါဘူး။ ဒါကြောင့် ကျွန်မတို့က ပြည်သူလူထုရဲ့ ယုံကြည်မှု၊ ထောက်ခံမှု၊ ပြည်သူလူထုရဲ့ လေးစားမှု ရအောင်လို့ ညီလာခံကြီး ဖြစ်မြောက်အောင် အားလုံး ကြိုးစားဝိုင်းလုပ်ဖို့ လိုပါတယ်။ ပြည်သူတွေက ကြည့်နေကြပါတယ်။ ပြည်သူတွေက နားထောင်နေကြပါတယ်။ ပြည်သူတွေက မျှော်လင့်နေကြပါတယ်။ ပြည်သူတွေက သုံးသပ်နေကြပါတယ်။ ဘယ်သူတွေဟာ ဘယ်လိုစိတ်ထား ရှိတယ်။ ဘယ်လိုပြဿနာတွေ ကျွန်မတို့တွေ အားလုံး ကျော်လွှားရမယ်။ ဘယ်သူတွေက ကျွန်မတို့ နိုင်ငံအတွက် အဓိက စေတနာထားပြီး ကြိုးစားမယ် ဆိုတာကို ပြည်သူတွေက ဆုံးဖြတ်မှာပါ။ ကျွန်မတို့ ဆုံးဖြတ်လို့ ရတာမဟုတ်ဘူး။

လူတစ်ဦးရဲ့ တန်ဖိုးဆိုတာ တစ်နေ့တစ်နေ့ ပြောင်းနေပါတယ်။ ဘာလို့လဲဆိုတော့ နေ့တိုင်း နေ့တိုင်းက အခွင့်အရေးသစ်ပါ။ တစ်နေ့တစ်နေ့ မိုးလင်းလာတာနဲ့ ကိုယ့်မှာ အခွင့်အရေးသစ်တွေ ရလာတာပါ။ ဒီအခွင့်အရေးသစ်တွေကို ထိုက်ထိုက်တန်တန် သုံးကြပါလို့ တိုက်တွန်းချင်ပါတယ်။ ဒီအခွင့်အရေးသစ်တွေကို ထိုက်ထိုက်တန်တန် သုံးခြင်းအားဖြင့် ကျွန်မတို့ လိုချင်တဲ့ ပန်းတိုင်ကို ရောက်မှာပါ။ အခုပြောသွားတဲ့ ပွင့်ပွင့်လင်းလင်း ဝေဖန်တာတို့ တိုက်ခိုက်တာတို့လည်း ပါသွားပါတယ်။ ဒီကိုယ်စားလှယ်တွေထဲမှာ ကျွန်မကလည်း ဒီလိုဖြစ်တာဟာ ဘာမှကြောက်စရာ မရှိဘူးလို့ ကျွန်မ ဒီလိုပဲ ယုံကြည်ပါတယ်။ စိုးရိမ်စရာ မရှိဘူး။ ပြဿနာကို စိုးရိမ်စရာ မရှိပါဘူး။ ပြဿနာ မရှိချင်ယောင် ဆောင်နေရတာဟာ ဒါကသာ စိုးရိမ်စရာ ဖြစ်ပါတယ်။ ပြဿနာ မရှိချင်ယောင် ဆောင်နေရင် ပြဿနာတွေ ဖြေရှင်းနိုင်မှာ မဟုတ်ပါဘူး။

ဒါကြောင့် သတ္တိရှိရှိနဲ့ ဒီပြဿနာတွေကို ရင်ဆိုင်မယ်။ ဖြေရှင်းနိုင်တဲ့ အရည်အချင်းတွေ မွေးထုတ်မယ်။ တစ်ဦးကိုတစ်ဦး ကူညီမယ်။ ဖေးမမယ်။ တစ်ဦးရဲ့အမြင် တစ်ဦးက လေးစားမယ်။ နားထောင်မယ်။သဘောထားချင်း မတိုက်ဆိုင်ရင်တောင် ဘာကြောင့် မတိုက်ဆိုင်တဲ့ သဘောထားတွေရှိနေလဲ ဆိုတာ စဉ်းစားရမယ်။ ဒါမှ ကျွန်မတို့အားလုံး ညီညီညွတ်ညွတ်နဲ့ လိုချင်တဲ့ ငြိမ်းချမ်းရေးပန်းတိုင်ကို ရောက်နိုင်မှာ ဖြစ်ပါတယ်။

ကျွန်မ ဒီညီလာခံကြီးကို နေ့တိုင်းမတတ်ဖြစ်ဘူး။ ဒါပေမယ့် ကျွန်မ ဒီဖြစ်စဉ်ကြီးကို အင်မတန်မှ အလေးထားပါတယ်။ ကျွန်မတို့ အစိုးရက အဓိက အင်အားက ပြည်သူတွေလက်ထဲမှာ ရှိတယ်ဆိုတဲ့ မူကို အလေးထားပါတယ်။ အစိုးရအဖွဲ့ဆိုတာ ပြည်သူတွေရဲ့ သဘောထားတွေကို လိုက်နာဖို့၊ အလေးထားဖို့ အရေးကြီးပါတယ်။

ကျွန်မတို့ဟာ အစိုးရကောင်းတစ်ခု ဖြစ်အောင် ကြိုးစားနေပါတယ်။ ၂၁ ပင်လုံဟာ ၁၉၄၇ ခုနှစ်က ကျင်းပခဲ့တဲ့ ပင်လုံလိုပဲ ကျွန်မတို့နိုင်ငံ သမိုင်းမှာ ဂုဏ်ယူစရာ၊ ဝင့်ကြွားစရာ၊ အားတတ်စရာ အခမ်းအနားကြီး၊ အခင်းအကျင်းကြီးတစ်ခု၊ ဖြစ်စဉ်ကြီးတစ်ခု ဖြစ်ဖို့ ဝိုင်းဝန်းကြိုးစားကြပါလို့ ပြောရင်းနိဂုံးချုပ်ပါတယ်။



FOLLOW US