News

01-Mar-2018

ရန်ကုန် YBS
လုပ်ငန်းလိုင်စင်မရှိသည့် YBS ယာဉ် ၂၀၀၀ ကျော်ကို စီအန်ဂျီ ထုတ်ယူခွင့်ပိတ်မည်

ရန်ကုန်၊ မတ် ၁ 

ရန်ကုန်မြို့တွင်း လုပ်ငန်းလိုင်စင်မရှိဘဲ ခရီးသည်တင်ဆောင်မောင်းနှင်ပြေးဆွဲလျက်ရှိသော YBS ယာဉ် ၂၀၀၀ ကျော်ကို မတ်လ ၃၁ ရက်နောက်ပိုင်းမှစ၍ စီအန်ဂျီ ထုတ်ယူခွင့် ပိတ်မည်ဖြစ်ကြောင်း ရန်ကုန်တိုင်းဒေသကြီး သယ်ယူပို့ဆောင်ရေး အာဏာပိုင်အဖွဲ့ YRTA မှ တာဝန်ရှိသူက ပြောကြားသည်။

“လက်ရှိပြေးနေတဲ့ YBS ယာဉ်တွေ ခရီးသည်တင် လုပ်ငန်းလိုင်စင် လုပ်ထားခြင်း ရှိ၊ မရှိ စစ်ဆေးမယ်။ မလုပ်ရသေးတဲ့ယာဉ်တွေ မဖြစ်မနေ လုပ်ဖို့လိုတယ်”ဟု ၎င်းက ဆိုသည်။

ကုန်းလမ်းပို့ဆောင်ရေးညွှန်ကြားမှု ဦးစီးဌာန(လုပ်ငန်းလိုင်စင်ဌာန)တွင် “ခ” ခရီးသည်တင် လုပ်ငန်းလိုင်စင် မလုပ်သည့် YBS ယာဉ်များကို မတ်လ ၃၁ ရက် နောက်ပိုင်းမှစ၍ စီအန်ဂျီ ထုတ်ယူခွင့်ပိတ်မည်ဟု ဖေဖော်ဝါရီလ ၂၇ ရက်က တိုင်းအစိုးရအဖွဲ့နှင့် YBS တာဝန်ခံယာဉ်လိုင်း ကုမ္ပဏီများနှင့် တွေ့ဆုံပွဲတွင် တိုင်းအစိုးရအဖွဲ့က အသိပေးခဲ့ကြောင်း ယာဉ်လိုင်း တာဝန်ခံများက ပြောကြားသည်။

“ယာဉ်တွေက တခြားကုမ္ပဏီအောက်ကိုရောက်ရင် ကုမ္ပဏီက ဦးဆောင်ပြီး လုပ်ငန်းလိုင်စင် လုပ်ရတာ။ အခုက စာရင်းမငြိမ်သေးဘူး။ ပြည်ပက ဝင်တဲ့ယာဉ်အသစ်တော့ လုပ်ပြီးသားတွေပေါ့။ ယာဉ်အဟောင်းတွေ အများစု ကျန်နေတာ”ဟု ယာဉ်လိုင်း တာဝန်ခံတစ်ဦးက ဆိုသည်။

မြန်မာ့ရေနံနှင့် သဘာဝ ဓာတ်ငွေ့လုပ်ငန်း အနေနှင့် တစ်လလျှင် စီအန်ဂျီ ကုဗပေ သန်း ၂၀ ကျော် သုံးစွဲနေရပြီး ခရီးသည်တင်ယာဉ် တစ်စီးလျှင် ၂၀၀ လီတာ၊ ၃၀၀ လီတာ၊ ၄၀၀ လီတာ၊ ၅၀၀ လီတာ၊ ၆၀၀ လီတာအထိ ထည့်ဝင်သုံးစွဲမှုရှိကာ စီအန်ဂျီ သုံးဘတ်စ်ကား ၃၇၀၀ စီးကျော်ရှိကြောင်း အဆိုပါ လုပ်ငန်းထံမှ သိရသည်။

လက်ရှိ YBS ယာဉ်လိုင်း ၉၃ လိုင်းတွင် ယာဉ်စီးရေ ၅၆၀၀ စီးခန့်ရှိပြီး ခရီးသည်တင် လုပ်ငန်းလိုင်စင် ပြုလုပ်ထားသည့်ယာဉ် ၂၇၀၀ စီးကျော်သာ ရှိကြောင်း ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့ YRTA ထံမှ သိရသည်။

J-06



FOLLOW US