News

18-Jan-2018

YBS
တစ်နှစ်သား YBS သူဘာတွေ ကျော်ဖြတ်ဖို့ ကျန်နေသေးသလဲ
၂၀၁၇ ခုနှစ် နှစ်ဆန်းကာလ ဇန်နဝါရီလ ၁၆ ရက်နေ့ကစခဲ့တဲ့ YBS ရဲ့ သက်တမ်းဟာ ဇန်နဝါရီလ ၁၅ ရက်နေ့မှာတော့ တစ်နှစ်တာကာလ ပြည့်မြောက်လာခဲ့ပြီပဲ ဖြစ်ပါတယ်။ သူ့အနေနဲ့ ယခင်မော်တော်ယာဉ်လိုင်းပေါင်းစုံ စည်းကမ်းထိန်းသိမ်းရေးကော်မတီ(မထသ) ကနေ ရန်ကုန်မြို့တွင်း အများပြည်သူ သယ်ယူပို့ဆောင်ရေးစနစ်သစ် YBS (Yangon Bus Service) လို့ အမည်ပြောင်းပြီး ယာဉ်လမ်းကြောင်းအသစ်တွေနဲ့ အကောင်အထည်ဖော်ခဲ့တာကို အားလုံးသိပြီးဖြစ်ကြမှာပါ။ YBS စနစ် စတင်ခဲ့တာ တစ်နှစ်တာခရီးကို ကျော်ဖြတ်ခဲ့ပြီဖြစ်ပေမယ့်လည်း သူတို့အနေနဲ့ တစ်ချိန်တည်း တစ်ပြိုင်တည်းမှာ အရာအားလုံးကို ပြောင်းလဲပြီး အောင်အောင်မြင်မြင်နဲ့ ခရီးဆက်နေတာမျိုးတော့ မဟုတ်ခဲ့ပါဘူး။ လက်ရှိအချိန်အထိ ပြုပြင်ပြောင်းလဲရေး လုပ်ငန်းတွေ၊ ဖြစ်ပေါ်လာတဲ့ စိန်ခေါ်မှုတွေကို တစ်ဆင့်ပြီးတစ်ဆင့်သာ ဖြေရှင်းရင်း၊ ဝေဖန်ထောက်ပြမှုတွေကို ကြံ့ကြံ့ခံနေရင်းနဲ့သာ ခရီးဆက်နေကြရတဲ့ အခြေအနေပါ။

YBS စနစ်ကိုအောင်မြင်ဖို့ YRTA (Yangon Region Transport Authority) လို့ခေါ်တဲ့ ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှုအာဏာပိုင်အဖွဲ့က အကောင်အထည်ဖော်နေတာဖြစ်ပြီး ဒီတစ်နှစ်တာအတွင်းမှာ သူတို့ရဲ့ဆောင်ရွက်မှုတွေအပေါ် ဝေဖန်ထောက်ပြမှုတွေ၊ အကြံပေးမှုတွေ များစွာဖြစ်ပေါ်ခဲ့ပါတယ်။ သူတို့အနေနဲ့လည်း အခုအချိန်အထိတော့ သူတို့ရည်မှန်းချက်ကို ပေါက်မြောက်အောင် အကောင်အထည်မဖော်နိုင်သေးတာကိုလည်း တွေ့နေရပါတယ်။

YBS နဲ့ပတ်သက်လို့ ယာဉ်လမ်းကြောင်းများကို ပြန်လည်သုံးသပ်ပြင်ဆင်ပြီး အမြန်ဆုံးပြောင်းလဲကာ အတည်ပြုထုတ်ပြန်ပေးဖို့၊ YBS စနစ်ပြောင်းလဲမှု အောင်မြင်မှု/မအောင်မြင်မှုအပေါ် ပြည်သူလုထုကို ကောင်းမွန်တဲ့ သယ်ယူပို့ဆောင်ရေးဝန်ဆောင်မှု ဘယ်လောက်ပေးနိုင်သလဲဆိုတဲ့ ညွှန်ကိန်း (Indicator) ဖြင့်သာ တိုင်းတာကြဖို့၊ ယခင်အစက ပြောထားခဲ့သလို သုံးလတစ်ကြိမ် သုတေသနပြုပြီး ရလဒ် (Result) ကို ပြည်သူလူထုထံချပြပေးဖို့၊ သတင်းအချက်အလက်များ အချိန်နှင့်တစ်ပြေးညီ ပေးနိုင်ရေးအတွက် သတင်းမီဒီယာ၊ ဝက်ဘ်ဆိုက်၊ ဖေ့စ်ဘွတ်ခ်တို့ကို ထိရောက်စွာ အသုံးပြုကြဖို့၊ YRTA လက်အောက်မှာ သတင်းအချက်အလက်စင်တာ (Information Center)၊ တိုင်ကြားမှုများ လက်ခံဖြေရှင်းရေးစင်တာ (Complaint Center) တို့ကို စနစ်တကျထားရှိကြဖို့၊ တိကျသေချာသော စည်းမျဉ်းစည်းကမ်းများ ချမှတ်ပြီး မလိုက်နာသူများကို ထိရောက်သော အရေးယူဆောင်ရွက်မှုများ ပြုလုပ်သင့်ကြဖို့နဲ့ ဂိတ်ရင်းဂိတ်ဖျားများမှာ ယာဉ်ရပ်နားကွင်းများ စနစ်တကျဖော်ဆောင်သင့်ဖို့ စတာတွေအပြင် ယာဉ်ရပ်နားရုံသာမက ယာဉ်မောင်း၊ ယာဉ်နောက်လိုက်များအတွက် နားနေဆောင်များပါ ထည့်သွင်းဖော်ဆောင်သင့်ကြဖို့ ရန်ကုန်တိုင်းလွှတ်တော်အထဲမှာ လွှတ်တော်ကိုယ်စားလှယ်တွေက အပြုသဘော ထောက်ပြအကြံပြုခဲ့ကြတာကိုလည်း တွေ့ရှိခဲ့ပါတယ်။

ဒါ့အပြင် ယာဉ်မောင်း၊ ယာဉ်နောက်လိုက်များကို ဂုဏ်သိက္ခာရှိစွာ အလုပ်လုပ်နိုင်ရေးအတွက် လိုအပ်တဲ့ အခြေခံအဆောက်အဦများ၊ ခံစားခွင့်များ၊ အရည်အသွေးမြှင့်သင်တန်းများ လုပ်ကိုင်ဆောင်ရွက်ပေးသင့်ပြီး ဆုပေးဒဏ်ပေးစနစ်ကို ကျင့်သုံးသင့်ကြောင်း၊ ကတ်စနစ်ကို အမြန်ဆုံး အကောင်အထည်ဖော်သင့်သော်လည်း အလောတကြီးမလုပ်ဘဲ အသိပညာပေးမှု၊ စမ်းသပ်သုံးစွဲမှုများကို အချိန်ကာလတစ်ခုပေးပြီးမှ ဆောင်ရွက်သင့်ကြောင်းနဲ့ YBS စနစ်အပြောင်းအလဲမှာပါဝင်တဲ့ ငွေရေးကြေးရေးနှင့် သက်ဆိုင်တဲ့ကိစ္စရပ်များ၊ ပြည်ပမှ ယာဉ်များမှာယူသုံးစွဲမှုများ၊ ရှယ်ယာခေါ်ယူမှုများကို ပွင့်လင်းမြင်သာမှုရှိစွာ ချပြသင့်ကြောင်း စတဲ့အချက်တွေကိုလည်း အကြံပြုထားကြတာကို မြင်ခဲ့ရပါတယ်။ ဒါတွေနဲ့ပတ်သက်လို့ ဘယ်အချက်တွေက ဒီတစ်နှစ်အတွင်းမှာ ဘယ်လိုအထမြောက်အောင် အကောင်အထည်ဖော်ပေးခဲ့ပြီး ဘာတွေကျန်နေသေးလဲ ဆိုတာတော့ အားလုံးလည်း ကြားသိကြရမှာပါပဲ။

ဒါ့အပြင် ယခင် ၈ လလောက်တုန်းက YBS အတွက် လိုအပ်တဲ့ ဘတ်စ်ကားတွေအတွက် ရန်ကုန်တိုင်းဒေသကြီး အစိုးရအဖွဲ့နဲ့ စက်မှုဝန်ကြီးဌာနတို့ ပူးပေါင်းပြီး ထုတ်လုပ်ဖို့စီစဉ်ခဲ့ကြကြောင်း UMFCCI မှာ ပြုလုပ်တဲ့ အစိုးရအဖွဲ့နဲ့ ပုဂ္ဂလိကလုပ်ငန်းရှင်တွေ ပုံမှန်တွေ့ဆုံပွဲမှာ စက်မှုဝန်ကြီးဌာန ပြည်ထောင်စုဝန်ကြီး ဦးခင်မောင်ချိုက ပြောခဲ့ပါသေးတယ်။ ဒါပေမဲ့ မြေပြင်မှာ ဒါတွေဟာ အမှန်တကယ်ဖြစ်ခဲ့လား၊ မဖြစ်ခဲ့လားဆိုတာတော့ ယခုလက်ရှိအခြေအနေတွေက သက်သေခံနေခဲ့ပါတယ်။ YBS စနစ်ကို အကောင်အထည်ဖော်တဲ့နေရာမှာ အဓိကတာဝန်ယူ လုပ်ဆောင်နေတဲ့ YRTA အနေနဲ့ နောက်တစ်ခုဖြစ်တဲ့ YSB (Yangon School Bus) စနစ်နဲ့ Water Taxi စနစ်နှစ်ခုကိုလည်း အကောင်အထည်ဖော်ဖို့ ကြိုးစားခဲ့ကြပါတယ်။ ဒါပေမဲ့လည်း ယနေ့လက်ရှိ ဆောင်ရွက်နေတဲ့ မြေပြင်ကအခြေအနေတွေကို ကြည့်ပြီးတော့ပဲ အောင်မြင်ခဲ့သလား၊ မအောင်မြင်ခဲ့သလားဆိုတဲ့ အဖြေတစ်ရပ်ကိုတော့ ပြည်သူတွေကပဲ ဆန်းစစ်ထုတ်ယူကြရမှာပါ။

School Bus အစီးရေ ၂၀၀ ဝယ်ယူထားရှိပြီး ယနေ့တိုင်ထိ မပြေးဆွဲနိုင်သေးဘဲ ဖြစ်နေသေးတာ၊ Water Taxi ဆိုတာကလည်း မရှိဆင်းရဲသား အခြေခံလူတန်းစားတွေအတွက် အမှန်တကယ် အားကိုးရမယ့် သယ်ယူပို့ဆောင်ရေး ဖြစ်လာရမယ့်အစား ယနေ့အချိန်မှာတော့ အပန်းဖြေစီးနင်းရုံသက်သက်သဘော ဖြစ်နေသေးတာတွေကိုလည်း YRTA အနေနဲ့ အမှန်အတိုင်းဆန်းစစ်ပြီး ယခုလာမယ့်နှစ်မှာ အောင်မြင်အောင် ဆက်လက်ဆောင်ရွက်ရမယ့် ကိစ္စတစ်ခုပါ။

နှစ်ပေါင်း ၅၀ လောက်အခြေကျပြီး အမြစ်တွယ်လာနေတဲ့ မထသစနစ်ကနေ YBS အဖြစ် အသွင်ပြောင်းလဲခဲ့တဲ့နေရာမှာ ယခုတစ်နှစ်တာအတွင်းမှာ သူ့အနေနဲ့ အခက်အခဲပေါင်းစုံကြုံတွေ့ခဲ့ရတာကို အများက လက်ခံနိုင်တယ်ဆိုပေမယ့်လည်း အချိန်အကန့်အသတ်တစ်ခုအတွင်းမှာပဲ သူတို့ရဲ့နားလည်မှုဟာ ရှိနေနိုင်မယ်ထင်ပါတယ်။

ဒါ့အပြင် ယာဉ်လိုင်းပေါင်း မူလက ၆၀ ကနေ ယခု ၁၀၀ ကျော်ရှိလာပြီး ယာဉ်အစီးရေ ၄၀၀၀ ကျော်နဲ့ သူ့စနစ်အောင်မြင်ဖို့ အကောင်အထည်ဖော်နေတယ်ဆိုပေမယ့်လည်း ယနေ့လက်ရှိ ကြုံတွေ့နေရဆဲဖြစ်တဲ့ အခက်အခဲတွေ၊ ယာဉ်မောင်းတွေရဲ့ မပြင်နိုင်သေးတဲ့ အကျင့်ဟောင်းတွေ၊ ပိုမိုပေါများ အတင့်ရဲလာတဲ့ ခါးပိုက်နှိုက်လိုလို၊ လူဆိုးဂိုဏ်းလိုလိုတွေ အကြောင်းတွေ၊ ယာဉ်နှစ်ဆင့် သုံးဆင့် စီးနေရဆဲဖြစ်နေတာတွေ၊ အချို့လိုင်းတွေမှာ ယာဉ်အစီးရေမလုံလောက်မှုကြောင့် ကြားကားတွေကို အားထားနေရဆဲ ဖြစ်နေတာတွေအပေါ်မှာတော့ အချိန်ကြာလာတာနဲ့အမျှ စိတ်ရှည်ရှည်ထား သည်းခံကျော်ဖြတ်ကြဖို့ ခက်ခဲလာကြမယ်ထင်ပါတယ်။ သူနဲ့ပတ်သက်လို့ ယခုရက်ပိုင်းမှာတောင် YBS လိုင်းကားပေါ်မှာ အမျိုးသမီးတစ်ဦးကို အခွင့်ကောင်းယူ၍ လိင်ပိုင်းဆိုင်ရာ စော်ကားမှုကျူးလွန်တဲ့ ဗီဒီယိုတစ်ခု ပျံ့နှံ့ခဲ့ပါသေးတယ်။

ဒါ့အပြင် ယာဉ်နောက်လိုက်တွေကိစ္စနဲ့ ယာဉ်စီးခနှုန်း ကောက်ခံမှုအစား ငွေထည့်ပုံး စီစဉ်ခဲ့တဲ့ကိစ္စတွေကလည်း ဒီကနေ့ထက်ထိ စင်းလုံးချော မအောင်မြင်သေးသလို ခေတ်မီကတ်စနစ်ကို ပြောင်းလဲသုံးစွဲဖို့ကိစ္စကလည်း လိပ်ခဲတည်းလည်း ဖြစ်နေတုန်းပါပဲ။ ဒါတွေကို အောင်အောင်မြင်မြင်နဲ့ ကျော်ဖြတ်သွားကြဖို့ဆိုရင် သူ့အနေနဲ့ ဒီစနစ် စတင်အကောင်အထည်ဖော်စတုန်းက ရန်ကုန်တိုင်းဒေသကြီး ဝန်ကြီးချုပ်ပြောခဲ့တဲ့ စကားတွေအတိုင်း သုံးလတစ်ကြိမ် ပြန်လည်စစ်ဆေးတာ၊ သုတေသနလုပ်တာ၊ မြေပြင်က အခြေအနေမှန်တွေကိုသိဖို့ ကွင်းဆင်းစစ်ဆေးတာ၊ ယာဉ်စည်းကမ်းလမ်းစည်းကမ်း ထိန်းသိမ်းဖို့အတွက် ထိန်းသိမ်းရေးစင်တာလုပ်ငန်းတွေကို အမြန်အကောင်အထည်ဖော် ဆောင်ရွက်တာတွေကို ယခု ၂၀၁၈ မှာ အရှိန်အဟုန်နဲ့ ပြန်လည်စတင်ကြရတော့မှာပါ။

ဒါ့အပြင် ပြီးခဲ့တဲ့တစ်နှစ်တာအတွင်းမှာ ဆောင်ရွက်ခဲ့တဲ့ YBS, Water Taxi နဲ့ School Bus တွေနဲ့ဆိုင်တဲ့ လုပ်ငန်းမှန်သမျှကို အောင်မြင်တိုးတက်မှုရှိမရှိ အားနည်းချက် အားသာချက်တွေကို ပြန်လည်ဆန်းစစ်ဖော်ထုတ်တာတွေအပြင် ယခင်ထက် ပိုမိုကောင်းမွန်တဲ့ စီမံချက်တွေ ချမှတ်ပြီး အပြောထက် အလုပ်ပိုလုပ်ပြကာ သက်သေပြကြရတော့မှာပဲ ဖြစ်ပါတယ်။

ဒီအတွက် နိဂုံးချုပ်အနေနဲ့ အထက်မှာ ဖော်ပြခဲ့တဲ့အချက်တွေအပေါ် ကောက်ချက်ဆွဲထုတ်လိုက်ရင် ပြီးခဲ့တဲ့တစ်နှစ်တာအတွင်းမှာ ဖြစ်ပေါ်ခဲ့တဲ့ YBS စနစ်ပြောင်းလဲမှုရဲ့ နောက်ဆက်တွဲကိစ္စတွေ အောင်မြင်ဖို့ဆိုရင် ရန်ကုန်တိုင်းဒေသကြီးအစိုးရနဲ့ YRTA တို့ကပဲ ဆောင်ရွက်နေလို့မရဘဲ အများပြည်သူအတွက် ရေရှည်အကျိုးစီးပွားကို မျှော်တွေးပြီး ဆောင်ရွက်ကြရတာဖြစ်တဲ့အတွက် ပြည်သူများကပါ ဝိုင်းဝန်းထမ်းပိုး ပါဝင်ပူးပေါင်းကြရမှာ ဖြစ်ပါတယ်။ ဒါမှသာ ရန်ကုန်မြို့တော်ရဲ့ ဘက်စုံသယ်ယူပို့ဆောင်ရေးစနစ်ဟာ အချိန်တိုအတွင်းမှာ အခြားအိမ်နီးချင်းနိုင်ငံများနည်းတူ ရင်ပေါင်တန်းလာနိုင်မှာဖြစ်သလို မိမိတို့နေထိုင်ရာ ပတ်ဝန်းကျင်မှာလည်း ယာဉ်ကြောပိတ်ဆို့ထူထပ်တာတွေ ကင်းဝေးပြီး လေထုညစ်ညမ်းမှုအန္တရာယ်မှ လွန်မြောက်နိုင်မှာ အမှန်ပဲဖြစ်ပါတယ်။ ဒါ့အပြင် မိမိတို့နိုင်ငံကို လာရောက်လည်ပတ်ကြတဲ့ နိုင်ငံခြားသားများအတွက်ပါ စိတ်နှလုံးသာယာလျက် မိမိတို့အနေနှင့်လည်း မိမိတို့နိုင်ငံ၏ဂုဏ်ကို မြှင့်တင်နိုင်ကြမည်ဖြစ်သဖြင့် ရန်ကုန်မြို့တော်ရဲ့ ဘက်စုံသယ်ယူပို့ဆောင်ရေး စနစ်အောင်မြင်နိုင်ရေး အားလုံးက ပါဝင်ကူညီကြပါစေလိုကြောင်း တိုက်တွန်းရေးသား တင်ပြလိုက်ရပါတယ်။

အောင်ဇေယျ



FOLLOW US