News

27-Feb-2018

Soccer Champions League UEFA VAR System
ဗီဒီယိုလက်ထောက်ဒိုင်လူကြီးစနစ်ကို လာမည့်ဘောလုံးရာသီတွင် ချန်ပီယံလိဂ်၌ ထည့်သွင်းအသုံးပြုဦးမည် မဟုတ်သေး

ဇူးရစ်ခ်ျ၊ ဖေဖော်ဝါရီ ၂၇

ဥရောပဘောလုံးအဖွဲ့ချုပ်(ယူအီးအက်ဖ်အေ)သည် ဗီဒီယိုလက်ထောက်ဒိုင်လူကြီး(VAR)ထားရှိသည့်စနစ်ကို လာမည့် ၂၀၁၈-၁၉ ဘောလုံးရာသီ ချန်ပီယံလိဂ်ပြိုင်ပွဲ၌ ထည့်သွင်းအသုံးပြုဦးမည် မဟုတ်ဟု အတည်ပြုဆုံးဖြတ်လိုက်ပြီဖြစ်ကြောင်း Daily Mail က ဖော်ပြထားသည်။

ကမ္ဘာ့ဘောလုံးအဖွဲ့ချုပ်(ဖီဖာ)သည် လာမည့် ၂၀၁၈ ခုနှစ် ကမ္ဘာ့ဖလားပြိုင်ပွဲတွင် ဗီဒီယိုလက်ထောက်ဒိုင်လူကြီး(VAR)ထားရှိသည့်စနစ်ကို ထည့်သွင်းအသုံးပြုမည်၊ မပြုမည်ဆိုခြင်းအား လာမည့်တနင်္ဂနွေနေ့တွင်ကျင်းပမည့် အလုပ်အမှုဆောင်အစည်းအဝေးတွင် အပြီးသတ်ဆုံးဖြတ်ချက် ချမှတ်လိမ့်မည်ဖြစ်ပြီး ချန်ပီယံလိဂ်ပြိုင်ပွဲတွင် ဗီဒီယိုလက်ထောက်ဒိုင်လူကြီး(VAR)ထားရှိသည့်စနစ်ကို အသုံးမပြုလိုခြင်းမှာ ယင်းစနစ်၏အားသာချက်၊ အားနည်းချက်များကို အချိန်ယူ၍ အကဲဖြတ်သွားလိုခြင်းကြောင့်ဖြစ်ကြောင်း ယူအီးအက်ဖ်အေဥက္ကဋ္ဌ ဆီဖီရင်က အသိပေးသွားခဲ့သည်။

အပြည်ပြည်ဆိုင်ရာဘောလုံးအားကစားနည်းအစည်းအရုံးသည် ဗီဒီယိုလက်ထောက်ဒိုင်လူကြီး(VAR)ထားရှိသည့်စနစ်ကို ဘောလုံးပွဲများတွင် နည်းလမ်းတကျ အသုံးပြုနိုင်စေရန် ဥပဒေတစ်ရပ် ရေးဆွဲနေပြီး လာမည့်ဇွန်လတွင်  ယင်းဥပဒေမှာ တရားဝင် အသက်ဝင်လာဖွယ်ရှိကြောင်း ဆက်စပ်သတင်းများလည်း ထွက်ပေါ်နေသည်။

ယူအီးအက်ဖ်အေသည် ချန်ပီယံလိဂ်နှင့် ယူရိုပါလိဂ်တို့၌ ဂိုးလိုင်းနည်းပညာကိုပင် အသုံးမပြုဘဲ ထားရှိဆဲဖြစ်ကာ ယင်းပြိုင်ပွဲများတွင် ဂိုးဝင်၊ မ၀င်ကို ဆုံးဖြတ်ရန်အတွက် ဂိုးနံဘေးတွင် အပိုဒိုင်လူကြီးများ ထားရှိသည့်စနစ်ကိုသာ ယူအီးအက်ဖ်အေက အသုံးပြုနေဆဲဖြစ်သည်။

အင်္ဂလန်ဘောလုံးအဖွဲ့ချုပ်(အက်ဖ်အေ)သည် ဗီဒီယိုလက်ထောက်ဒိုင်လူကြီး(VAR)ထားရှိသည့်စနစ်ကို လက်ရှိတွင် ပွဲစဉ်အချို့၌ စမ်းသပ်အသုံးပြုနေပြီဖြစ်ပြီး လာမည့် ၂၀၁၈-၁၉ ဘောလုံးရာသီတွင် ပရီးမီးယားလိဂ်၌ ယင်းစနစ်ကို ထားရှိသွားရန်အတွက်လည်း အင်္ဂလန်ဘောလုံးအဖွဲ့ချုပ်နှင့် ပရီးမီးယားလိဂ်ပြိုင်ပွဲကျင်းပရေးကော်မတီတို့က ဆွေးနွေးညှိနှိုင်းနေကြပြီဖြစ်သည်။




FOLLOW US