News

တရုတ်နှင့် ဆက်ဆံရေး ပိုအားကောင်းလာသည့် မြန်မာနိုင်ငံ

Larry Jagan ရေးသားပြီး ဆောင်းဦးကိုကို ဘာသာပြန်ဆိုသည်။

ကုန်လွန်ခဲ့သည့် သီတင်းပတ်များအတွင်း မြန်မာနိုင်ငံသည် အနောက်နိုင်ငံများနှင့် ဆက်ဆံရေးကို (အထူးသဖြင့် အမေရိကန်) ခိုင်ခံ့အားကောင်းအောင် ဆောင်ရွက်ခြင်းထက် ဘေဂျင်းအဝိုင်းအဝန်း၏ အစိတ်အပိုင်းအဖြစ် ရပ်တည်သွားမည်ဟု ပြသနေသည့် လက္ခဏာများ ထွက်ပေါ်လာခဲ့သည်။ 

ယင်းမှာ ဘေဂျင်း၏ သံတမန်ရေးရာ အားထုတ်ကြိုးပမ်းမှုများ၏ ရလဒ်တစ်စိတ်တစ်ပိုင်း ဖြစ်သည်။ သို့သော် ပို၍အရေးကြီးသည်မှာ ယင်းသည် မြန်မာနိုင်ငံက ၎င်း၏ တိုင်းရင်းသားရေးရာ မတည်ငြိမ်မှုနှင့် အကြမ်းဖက်မှုများကို ဖြေရှင်းရာတွင် တရုတ်နိုင်ငံအပေါ် မှီခိုနေခြင်းကို ထင်ဟပ်စေပါသည်။ 

ယခုလ အစောပိုင်းကာလတွင် တရုတ်စစ်သင်္ဘောများ အလည်အပတ် ရောက်ရှိခြင်းနှင့် ရေတပ်ပူးတွဲ စစ်ရေးလေ့ကျင့်မှုများက နှစ်နိုင်ငံ ဆက်ဆံရေးကို မြှင့်တင်နေသည့် လက္ခဏာများ ဖြစ်ပါသည်။ ၎င်းစစ်ဘက်ဆိုင်ရာ ဆောင်ရွက်မှုများက နှစ်နိုင်ငံအကြားရှိ နိုင်ငံရေး ယုံကြည်မှု မြင့်မားလာနေကြောင်းကို ထင်ဟပ်စေသည်ဟု တရုတ်သံတမန်များ၏ အဆိုအရ သိရသည်။

ယင်းနောက်တွင် အရေးကြီးသော သံတမန်ရေးရာ အလဲအလှယ်ပြုမှုများကို ဆောင်ရွက်ခဲ့ကြသည်။ အရေးအကြီးဆုံးတစ်ခုမှာ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် တရုတ်နိုင်ငံခေါင်းဆောင် ရှီကျင့်ဖျင်တို့သည် မေလအလယ်တွင် ဘေဂျင်းမြို့၌ ကျင်းပပြုလုပ်ခဲ့သည့် ‘ရပ်ဝန်းနှင့်လမ်း’ ညီလာခံတွင် တွေ့ဆုံခဲ့သည်။ တရုတ်နိုင်ငံသို့ သွားရောက်သည့် သူ၏ ဒုတိယအကြိမ် ခရီးစဉ်လည်း ဖြစ်သည်။ 

ယင်းမတိုင်ခင်က မြန်မာနိုင်ငံ၏ သမ္မတ ဦးထင်ကျော်သည် နှစ်နိုင်ငံအကြား ဆက်ဆံရေးအား ကောင်းခိုင်မာစေရန် တရုတ်နိုင်ငံသို့ ခြောက်ရက်ကြာ သွားရောက်လည်ပတ်ခဲ့သည်။ ယင်းသည် ဒေါ်အောင်ဆန်းစုကြည်၏ ခရီးစဉ်၌ အာရှနှင့် ဥရောပဈေးကွက်များကို ချိတ်ဆက်ရန် ရည်ရွယ်ထားသည့် ရပ်ဝန်းတစ်ခု၊ လမ်းကြောင်းတစ်ခု စီမံကိန်း၏ အစိတ်အပိုင်းတစ်ရပ် အဖြစ် စီးပွားရေး ပူးပေါင်းဆောင်ရွက်မှုဇုန်ကို ဖန်တီးရန် ဘေဂျင်း (တရုတ်အစိုးရ) နှင့် သဘောတူညီမှု ရရှိစေခဲ့သည်။ 

သို့သော် မြန်မာနိုင်ငံက ဘေဂျင်းနှင့် မဟာဗျူဟာမြောက် ဆက်ဆံရေး တည်ဆောက်ရခြင်း၏ အဓိက အကြောင်းအရင်းမှာ ငြိမ်းချမ်းရေးဖြစ်စဉ် ဖြစ်သည်။ ငြိမ်းချမ်းရေးဖြစ်စဉ်သည် လွန်ခဲ့သည့် တစ်နှစ်ကျော်ကတည်းက အာဏာရလာသည့် မြန်မာအစိုးရ၏ အဓိက ဦးစားပေး မူဝါဒများထဲက တစ်ခုဖြစ်သည်။ မူလအားဖြင့် ဒေါ်အောင်ဆန်းစုကြည်သည် ယခင်သမ္မတ ဦးသိန်းစိန် ဆောင်ရွက်ခဲ့သော တစ်နိုင်ငံလုံးဆိုင်ရာ ပစ်ခတ်တိုက်ခိုက်မှုရပ်စဲရေး သဘောတူညီချက် (NCA) ကို ဆက်လက်ကြိုးစား အကောင်အထည်ဖော် ဆောင်ရွက်ခဲ့သည်။ NCA ကို ရရှိအောင် နှစ်အနည်းငယ်ကြာ ညှိနှိုင်းဆွေးနွေးခဲ့ကြရပြီး တိုင်းရင်းသား လက်နက်ကိုင် ၈ ဖွဲ့သာ ၂၀၁၅ အောက်တိုဘာလ၌ ယင်းစာချုပ်တွင် လက်မှတ်ရေးထိုးခဲ့ကြသည်။ 

ယင်းအချိန်ကတည်းက ဆွေးနွေးပွဲများနှင့် တွေ့ဆုံညှိနှိုင်းမှုများ များစွာဆောင်ရွက်ခဲ့သည်။ အဓိကအားဖြင့် လက်မှတ်ရေးထိုးရန် ကျန်ရှိသည့် တိုင်းရင်းသား လက်နက်ကိုင်အဖွဲ့များက NCA တွင် လက်မှတ်ရေးထိုးရန်နှင့် ဖက်ဒရယ်ပြည်ထောင်စု ဖြစ်လာစေရန်အတွက် ကျင်းပပြုလုပ်မည်ဟု ကတိကဝတ် ပေးထားသည့် နိုင်ငံရေး ဆွေးနွေးပွဲများကို စတင်ဆောင်ရွက်ရန် ဖြစ်သည်။ ယင်းသို့ဆောင်ရွက်နိုင်ခြင်း မရှိခဲ့သလို ငြိမ်းချမ်းရေး ဖြစ်စဉ်မှာလည်း ရပ်တန့်သွားခဲ့သည်။ ပြီးခဲ့သည့်အပတ်က ကျင်းပပြုလုပ်ပြီးစီးခဲ့သည့် ဒုတိယအကြိမ် ၂၁ ရာစု ပင်လုံညီလာခံက ယင်းအချက်ကို ရှင်းရှင်းလင်းလင်း ဖော်ပြနေသည်။ အဓိက တိုင်းရင်းသား လက်နက်ကိုင်အဖွဲ့များက ညီလာခံကို သပိတ်မှောက်ခဲ့ကြသည်။ အစိုးရက NCA လက်မှတ်မရေးထိုးသည့် အဖွဲ့များကို ညီလာခံတွင် ပြည့်ပြည့်ဝဝ ပါဝင်ခွင့်မပေးဘဲ လေ့လာသူများအဖြစ်နှင့်သာ တက်ရောက်ရန် တောင်းဆိုသောကြောင့် ဖြစ်သည်။ 

မြန်မာအစိုးရ ခေါင်းဆောင်ပိုင်းနှင့် နီးစပ်သော အရင်းအမြစ်များ၏ အဆိုအရ NCA သည် ငြိမ်းချမ်းရေးဖြစ်စဉ်ကို စတင်ရန် အဓိကအရာ မဟုတ်ကြောင်းကို ဒေါ်အောင်ဆန်းစုကြည် စတင် သဘောပေါက် နားလည်လာပြီ ဖြစ်ကြောင်းနှင့် ချဉ်းကပ်မှုအသစ် လိုအပ်နေပြီ ဖြစ်သည်ဟု သိရသည်။ ယင်းအတွက် သူသည် တရုတ်နိုင်ငံ၏ ထောက်ခံမှုကို ရရှိအောင် ကြိုးစားခဲ့သည်။ အထူးသဖြင့် မြန်မာတပ်မတော်နှင့် ဆက်လက်တိုက်ပွဲဝင်နေဆဲ ဖြစ်သော မြောက်ပိုင်းမဟာမိတ်များကို ငြိမ်းချမ်းရေးဖြစ်စဉ်တွင် ပါဝင်လာရန် တရုတ်နိုင်ငံက ဆွဲဆောင်စည်းရုံးပေးဖို့ ဖြစ်သည်။ 

နိုင်ငံတော်အတိုင်ပင်ခံပုဂ္ဂိုလ်နှင့် မြောက်ပိုင်းမဟာမိတ်အဖွဲ့များသည် ညီလာခံကျင်းပနေစဉ် အတွင်း သီးခြားတွေ့ဆုံဆွေးနွေးမှုများကို ပြုလုပ်ခဲ့သည်။ တရုတ်နိုင်ငံနှင့် နီးစပ်သည့် အဓိက တိုင်းရင်းသားအဖွဲ့ ဖြစ်သော ‘ဝ’ ၏ ဦးဆောင်မှုဖြင့် မြောက်ပိုင်းမဟာမိတ်အဖွဲ့များသည် ငြိမ်းချမ်းရေးဖြစ်စဉ်ကို အခြားသောလမ်းကြောင်း တစ်ခုဖြင့် ချဉ်းကပ်ရန် အဆိုပြုခဲ့သည်။ ဖြစ်ရပ်များ၏ နောက်ကွယ်တွင် တရုတ်နိုင်ငံက ယင်းအဖွဲ့များနှင့် ၎င်းတို့၏ အစီအစဉ်များကို အထောက်အပံ့ပေးနေသည်။ 

ယခုအခါတွင်  ဒေါ်အောင်ဆန်းစုကြည် အတွက်တော့ တရုတ်နိုင်ငံမှာ ရှုပ်ထွေးလှသည့် ငြိမ်းချမ်းရေး ဖြစ်စဉ်ကို ဖြေရှင်းရာ၌ အဓိကအရာ ဖြစ်လာသည်။ ငြိမ်းချမ်းရေးဖြစ်စဉ် အောင်မြင်စွာ အဆုံးသတ်ရန် အတွက် တရုတ်နိုင်ငံကို သူလိုအပ်သည်ဟု ယုံကြည်နေကြောင်းကို ဒေါ်အောင်ဆန်းစုကြည်နှင့် နီးစပ်သည့် အရင်းအမြစ်အဆိုအရ သိရသည်။ ရလဒ်အားဖြင့် ဘေဂျင်းအပေါ် ကျေးဇူးရှိသည်ဟု သူခံစားနေရပြီး သြဇာလွှမ်းမိုးနိုင်မှု တိုက်ပွဲတွင် အသာစီးရအောင် လုပ်ဆောင်ပေးလိမ့်မည်ဟု ယုံကြည်နေသည်။ 

အနောက်နိုင်ငံနှင့် တစ်ကြိမ်တစ်ခါက အလွန်းသင့်ခဲ့သော အထူးသဖြင့် အမေရိကန်နိုင်ငံက မူဝါဒ ချမှတ်သူများက ဒေါ်အောင်ဆန်းစုကြည်၏ တရုတ်နိုင်ငံနှင့် နီးစပ်သွားမှုအပေါ်မှာ စိုးရိမ်မှု ရှိနေသည်။ သို့သော် အမျိုးသားပြန်လည်ရင်ကြားစေ့ရေး အောင်မြင်ရန် မြန်မာနိုင်ငံက လိုအပ်သည့် အကူအညီများအပြင် ဘေဂျင်းနှင့် ရင်းနှီးသော ဆက်ဆံရေး ရရှိထားခြင်းသည် နိုင်ငံတော်အတိုင်ပင်ခံပုဂ္ဂိုလ် အတွက် များစွာသော အကျိုးကျေးဇူးများ ရှိပါသည်။ အရေးအကြီးဆုံးမှာ စစ်ဘက်ဆိုင်ရာ ကိစ္စရပ်များ ဖြစ်ပါသည်။ 

မြန်မာနိုင်ငံ၏ ကာကွယ်ရေးဦးစီးချုပ်က ငြိမ်းချမ်းရေးဖြစ်စဉ်တွင် ‘ဝ’ အဖွဲ့သည် အရေးကြီးသည်ဟု ယခင်ကတည်းက သိနေခဲ့သည်။ တပ်မတော်က ‘ဝ’ အဖွဲ့အပေါ် စစ်ရေးအရ အရေးယူဆောင်ရွက်မှု ပြုလုပ်ဖို့ ရည်ရွယ်ချက်များ မရှိပါ။ ဗိုလ်ချုပ်များက ‘ဝ’ အဖွဲ့သည် အိမ်နီးချင်း တရုတ်၊ ထိုင်းနိုင်ငံတို့နှင့် နယ်နိမိတ်ချင်း ထိစပ်နေသော မြောက်ပိုင်းနယ်စပ်တစ်လျှောက်တွင် ၎င်းတို့၏ သြဇာအာဏာ သက်ရောက်ရန် ကြိုးပမ်းလာမည်ကို စိုးရိမ်နေသည်။ မနှစ်က တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် သြဇာအာဏာပျံ့နှံ့ရန် ဆောင်ရွက်နေသည့် ‘ဝ’ အဖွဲ့ကို ဘေဂျင်းက မထောက်ပံ့ဖို့ ကြိုးစားအားထုတ်သည့် အနေနှင့် ကြေညာခြင်း မရှိဘဲ တရုတ်နိုင်ငံသို့ အလျင်အမြန် ထွက်ခွာသွားခဲ့သည်။ 

တရုတ်နိုင်ငံ ကျောထောက်နောက်ခံ ‘ဝ’ အဖွဲ့ ပါဝင်နေသော မည်သည့်ငြိမ်းချမ်းရေး အစီအစဉ်မျိုးကိုမဆို မြန်မာတပ်မတော် ခေါင်းဆောင်များက အပြည့်အဝ အတည်ပြု ထောက်ခံမည်သာ ဖြစ်သည်။ သို့သော် ပို၍ အရေးကြီးသည်မှာ ဒေါ်အောင်ဆန်းစုကြည်က ဝါရှင်တန်ထက် ဘေဂျင်းနှင့် ပို၍ နီးစပ်လာမှုသည်လည်း တပ်မတော် ခေါင်းဆောင်များနှင့် တစ်သဘောတည်း ဖြစ်နေသည်။ တပ်မတော်သည် စစ်ရေးလေ့ကျင့်မှုနှင့် စစ်ဘက်ဆိုင်ရာ ပစ္စည်းများ ရရှိရေး အပါအဝင် အမေရိကန်နိုင်ငံနှင့် ဆက်ဆံရေးကို လက်သင့်ခံလိုသော်လည်း ဝါရှင်တန်အပေါ် လုံးဝယုံကြည်မှု မရှိပါ။ ယင်းအစား ဘေဂျင်းကသာ ပိုမိုအားထားရသော မဟာမိတ် ဖြစ်သည်ဟု ယုံကြည်နေသည်။ 

တရုတ်နိုင်ငံသည် မြန်မာနိုင်ငံကို အကူအညီပေးရန် အမြဲတမ်း ပြင်ဆင်ထားသည်ဟု စစ်ထောက်လှမ်းရေး အရာရှိဟောင်း ဗိုလ်မှူးလှမင်းက ယခင်တပ်မတော်အစိုးရ လက်ထက် လွန်ခဲ့သည့် နှစ် ၂၀ နီးပါးက ကျွန်တော့်အား ပြောခဲ့ဖူးသည်။ ၁၉၈၈ တွင် အမေရိကန်စစ်သင်္ဘောက ကပ္ပလီပင်လယ် အတွင်းသို့ ရောက်ရှိစဉ် ထောင်ပေါင်းများစွာသော တရုတ်နိုင်ငံတပ်ဖွဲ့ဝင်များသည် မြောက်ပိုင်းနယ်စပ်သို့ စုစည်းရောက်ရှိလာခဲ့ပြီး မြန်မာနိုင်ငံကို ကူညီရန် အဆင်သင့် ပြင်ဆင်ထားကြသည်ဟု သူက ရှင်းပြသည်။ 

တပ်မတော်က တရုတ်နိုင်ငံနှင့် ပိုမိုပွင့်လင်းသည့် ဆက်ဆံရေး ရှိသော်လည်း ၎င်းတို့အကြား ရေရှည်စွဲမြင်နေသည့် သံသယကိုတော့ ဖုံးကွယ်ထားလို့ မရပါ။ “ကျွန်တော်တို့က တရုတ်နိုင်ငံအပေါ် မယုံကြည်ပါဘူး။ ဒါပေမဲ့ သူတို့နဲ့ လက်တွဲအလုပ်လုပ်ရမယ် ဆိုတာတော့ ကျွန်တော်တို့သိတယ်” ဟု ယခင်တပ်မတော် အဆင့်မြင့်အရာရှိတစ်ဦးက ကျွန်တော့်အား မကြာခင် ကာလက ပြောသည်။

တခြားတစ်ဖက်တွင် ‘ဝ’ အဖွဲ့သည် ယခုအခါတွင် အစိုးရနှင့် လက်တွဲအလုပ်လုပ်ရန် ပြင်ဆင်ကောင်း ပြင်ဆင်နေမည် ဖြစ်သော်လည်း သူတို့သည် ဒေါ်အောင်ဆန်းစုကြည်နှင့် ပတ်သက်၍ (အထူးသဖြင့် သူ၏ သြဇာအာဏာ) နက်နက်ရှိုင်းရှိုင်း သဘောထားအမြင်ကို စိတ်ထဲတွင် ထားရှိထားသည်။ “ဒေါ်အောင်ဆန်းစုကြည် မြန်မာနိုင်ငံရဲ့ ခေါင်းဆောင်ဖြစ်လာရင် ကျွန်တော် သူနဲ့ ဘယ်တော့မှ အလုပ်မလုပ်ပါဘူး” ဟု ‘ဝ’ အဖွဲ့ ခေါင်းဆောင် Bao Yuxiang က ‘ဝ’ ပြည်၏ မြို့တော် ပန်ဆိုင်း၌ ကျွန်တော့်အား ပြောဖူးသည်။ အကြောင်းအရင်းမှာ သူ့တွင် တပ်မတော်မရှိ၍ ဖြစ်ပါသည်။ 

အခုအချိန်တွင် ဒေါ်အောင်ဆန်းစုကြည်က သူ့တွင် အခြားသော ရွေးချယ်စရာ မရှိဘဲ တရုတ်အပေါ် မှီခိုနေရသည်ဟု ခံစားနေရပြီး ငြိမ်းချမ်းရေးဖြစ်စဉ် အတွက် နှစ်နိုင်ငံအကြား ဆက်ဆံရေး အားကောင်းခိုင်မာရန် ဆောင်ရွက်သွားမည် ဖြစ်သည်။ သို့သော် ရေရှည်တွင် ဒေါ်အောင်ဆန်းစုကြည် ခေါင်းဆောင်မှု အောက်ရှိ မြန်မာနိုင်ငံသည် ပို၍ပျော့ပျောင်းသော နိုင်ငံခြားရေး မူဝါဒကို ကြိုးစားဆောင်ရွက်မည့်ပုံ ရသည်။ သို့သော် ယခုကာလတွင်တော့ တရုတ်နိုင်ငံသည် ဒေါ်အောင်ဆန်းစုကြည်အပေါ် ၎င်း၏ လွှမ်းမိုးမှု သက်ရောက်ရန် အဓိကနေရာတွင် ရှိနေပါသည်။ 

Ref: Myanmar and China strengthen their alliance by Larry Jagan



FOLLOW US