News

ရွေးကောက်ပွဲ အလွန် တစ်နှစ်အကြာ ဒေါ်အောင်ဆန်းစုကြည်၏ အရှိန်အဝါ လျော့ပါးလာသလား

Bertil Lintner ရေးသား၍ NLM ဘာသာပြန်ဆိုသည်။ 

လွန်ခဲ့သော တစ်နှစ်က ရန်ကုန်မြို့တော် လမ်းများပေါ်တွင် ပြည်သူများ ပျော်မြူးစွာ ကခုန်ခဲ့ကြသည်။ နိုဝင်ဘာလ ၈ ရက် ရွေးကောက်ပွဲမှ မဲများကို ရေတွက်ရာတွင် NLD ပါတီ သောင်ပြိုကမ်းပြို အနိုင်ရကြောင်း ထင်ရှားလာသောကြောင့် ဖြစ်သည်။ ယခုကာလသည် NLD ပါတီ အနိုင်ရသော်လည်း ရလဒ်ကို တပ်မတော် ခေါင်းဆောင်များက လျစ်လျူရှုခဲ့သည့် ၁၉၉၀ နှင့် မတူတော့ဘဲ ပြောင်းလဲ သွားခဲ့ပြီ။ ယခုတစ်ကြိမ်တွင်မူ နိုင်ငံတကာ ရွေးကောက်ပွဲ အကဲခတ် စောင့်ကြည့်သူများလည်း ရောက်ရှိနေခဲ့ပြီး တိုင်းပြည်ကလည်း အနောက်ကမ္ဘာ၏ အသိအမှတ်ပြုမှုကို လက်ကမ်း ကြိုဆိုနေသောကြောင့် ယခင်ကဲ့သို့ ကလိမ်ကကျစ် အပြုအမူများအတွက် နေရာ မရှိတော့ပေ။

ယခင် တပ်မတော် အကြီးအကဲဟောင်း လက်ထက်က ရေးဆွဲခဲ့ပြီး ၂၀ဝ၈ ခုနှစ်က အမည်ခံ ဆန္ဒ ခံယူပွဲဖြင့် အတည်ပြုခဲ့သော အခြေခံ ဥပဒေအရ မိသားစုအတွင်း ပြည်ပနိုင်ငံသား ခံယူထားသူ ရှိပါက သမ္မတ ရာထူးအတွက် အရည်အချင်း ပြည့်မီခြင်း မရှိဟူသော စည်းကမ်းချက်ကို ပြဋ္ဌာန်းထားသောကြောင့် ဒေါ်အောင်ဆန်းစုကြည် သမ္မတ ဖြစ်မလာနိုင်ကြောင်းကို လူတိုင်းက သိရှိထားကြသည်။

သို့ရာတွင် သူမအတွက် သီးသန့် ဖန်တီးပေးလိုက်သော နိုင်ငံတော် အတိုင်ပင်ခံ ရာထူးကြောင့် ဒေါ်အောင်ဆန်းစုကြည်သည် ဧပြီလက အာဏာ ရလာသော အစိုးရသစ်၏ တကယ့် ခေါင်းဆောင်စစ်စစ် ဖြစ်လာခဲ့သည်။

ယခုအခါ တိုင်းပြည်အတွင်း အထူးသဖြင့် နိုင်ငံ လူဦးရေ၏ ၃၀၊ ၄၀ ရာခိုင်နှုန်းခန့် ရှိသော တိုင်းရင်းသား ပြည်သူ အများစု အကြားတွင် စိတ်ပျက်လက်ပျက် ဖြစ်နေကြသည်။ ၎င်းတို့သည်လည်း ဒေါ်အောင်ဆန်းစုကြည်နှင့် သူမ၏ NLD ပါတီကို ထောက်ခံသောကြောင့် ထောက်ခံမဲ ပေးခဲ့ကြခြင်းဖြစ်သည်။ ဗမာလူမျိုး အများစု ကဲ့သို့ပင် ၎င်းတို့အတွက်လည်း ၂၀၁၅ ရွေးကောက်ပွဲသည် အထွေထွေ ရွေးကောက်ပွဲ ပုံစံထက် ပိုသော ဆန္ဒခံ ယူပွဲအဖြစ် ပိုမို ထင်ဟပ်ခဲ့သည်။

တပ်မတော် နောက်ခံ ပြည်ခိုင်ဖြိုး ပါတီသည် နိုင်ငံရေး ကဏ္ဍ အပါအဝင် ပြုပြင်ပြောင်းလဲမှု အချို့ကို လုပ်ဆောင်ခဲ့သည့်တိုင်အောင် ယခင် အာဏာရှင် အစိုးရကို ကိုယ်စားပြုထားသောကြောင့် NLD ပါတီက လမ်းကြောင်းသစ်ကို ကိုယ်စားပြု ရပ်တည်ခဲ့သည်။ ၎င်း၏ ကြွေးကြော်သံမှာ ပြောင်းလဲဖို့အတွက် မဲပေးကြရန်ဖြစ်ပြီး ထိုအပြောင်းအလဲသည် အစိုးရသစ်ထံမှ ပြည်သူများ မျှော်လင့်ထားသော အရာဖြစ်သည်။

သို့သော် မြင်နေရသော အရာများမှာ ယခင်အတိုင်း ထူးမခြားနားသာ ဖြစ်နေသည်။ ကချင်၊ ရှမ်းနှင့် အခြား တိုင်းရင်းသား လက်နက်ကိုင်များကို တိုက်ခိုက်နေသော မြောက်ပိုင်းမှ စစ်ပွဲသည် ထိန်းမနိုင် သိမ်းမရ ဆက်လက် ဖြစ်ပွားနေသည်။ ထိုဒေသတွင် ဂျက်လေယာဉ်၊ ရဟတ် ယာဉ်၊ လက်နက်ကြီးများဖြင့် အားဖြည့်ထားသော တပ်မတော်၏ ထိုးစစ်ကြောင့် လူပေါင်း ၁၀ဝ,ဝ၀ဝ ကျော် ထွက်ပြေး တိမ်းရှောင်နေရသည်။ ဩဂုတ်လက နေပြည်တော်တွင် ကျင်းပခဲ့သော ငြိမ်းချမ်းရေး ညီလာခံသည်လည်း ရလဒ် အနည်းငယ်သာ ထွက်ပေါ်ခဲ့သည်။ ဒေါ်အောင်ဆန်းစုကြည်က ထောက်ခံထားပြီး အစိုးရက တောင်းဆိုထားသော အပစ်အခတ် ရပ်စဲရေး သဘော တူညီချက်သည် လက်နက်ကိုင် အုပ်စုများအား လက်နက် ချခိုင်းသော စာချုပ်ဖြစ်ပြီး တာဝန်ရှိသူများ ပြောသကဲ့သို့ တိုင်းပြည် အနာဂတ်အတွက် နိုင်ငံရေး တွေ့ဆုံ ဆွေးနွေးရန် စတင်မှု မဟုတ်ဟု တိုင်းရင်းသားများက ယူဆထားကြသည်။ တပ်မတော်နှင့် အစ္စလာမ် စစ်သွေးကြွများအကြား သွေးထွက်သံယို ပဋိပက္ခ ဖြစ်ပွား နေသော ရခိုင်ပြည်နယ်တွင်လည်း တင်းမာမှု မြင့်တက် နေသည်။ 

များစွာ မျှော်လင့်ထားကြသော စီးပွားရေး ကဏ္ဍ တိုးတက်ရေးမှာလည်း သိသာ ထင်ရှားသော ဖြစ်ပေါ်မှု မရှိသေးပေ။ စက်တင်ဘာလက ဒေါ်အောင်ဆန်းစုကြည်၏ ဝါရှင်တန် ခရီးစဉ်တွင် အမေရိကန်၏ အရေးယူ ပိတ်ဆို့မှုများကို ဖယ်ရှားပေးလိုက်ပြီဖြစ်ပြီး  ယခုလအတွင်း ဂျပန်ခရီးစဉ်တွင်လည်း ငါးနှစ်အတွင်း  ဒေါ်လာ ၇ ဒသမ ၇၃ ဘီလီယံ ကူညီ ထောက်ပံ့ရန် ဂျပန် အစိုးရက ကတိပြုခဲ့သည်။ သို့ရာတွင် မြန်မာနိုင်ငံ တွင် ရင်းနှီးမြှုပ်နှံရေးကို အလော သုံးဆယ် မရှိကြခြင်းအတွက် ရှင်းလင်းသော အကြောင်းရင်းများ ရှိနေသည်။

နိုင်ငံတကာ ဖွံ့ဖြိုးရေး ကျွမ်းကျင်သော ဂျာမန် ကုမ္ပဏီ Deutsche Gesellschaft für Internationale Zusammenarbeit က ၂၀၁၅ ဖေဖော်ဝါရီ ရက်စွဲဖြင့် ထုတ်ပြန်သော အစီရင်ခံစာတွင် တိုးတက်မှု အချို့ကို အသိအမှတ် ပြုထားသော်လည်း “လက်ရှိ တိုးတက်မှုအချို့ ရှိသော်လည်း ဘဏ်လုပ်ငန်း၏ ငွေကြေးဆိုင်ရာ အခြေခံ အဆောက်အဦပိုင်း အပါအဝင် ဥပဒေပိုင်း မူဘောင်သည် နိုင်ငံတကာ စံနှုန်းများ၏ နောက်တွင် ပြတ်ကျန်နေခဲ့သည့်အပြင် ဘဏ်စနစ်သည်လည်း အရှေ့တောင်အာရှ နိုင်ငံ အားလုံးထဲတွင် တိုးတက်မှု အနည်းဆုံး ဖြစ်နေဆဲဖြစ်ပြီး ငွေကြေးဆိုင်ရာ ကြားခံ နိုင်ငံအဖြစ် ပါဝင်ရန် လုံလောက်သော ပြည့်မီမှု မရှိသေး”ဟု သုံးသပ်ထားသည်။

ထို့အပြင် အမြဲတမ်း ပြတ်တောက်နေသော လျှပ်စစ် ဓာတ်အား၊ ညံ့ဖျင်းသော သယ်ယူ ပို့ဆောင်ရေး၊ ခေါင်ခိုက်နေသော အိမ်၊ ခြံ၊ မြေ ဈေးနှုန်းများကလည်း တိုင်းပြည်တွင် များစွာ လိုအပ်နေသော တိုးတက် ဖွံ့ဖြိုးရေးကို အနှောင့်အယှက် ပေးလျက် ရှိသည်။

NLD ၏ ၂၀၁၅ အောင်ပွဲအပြီး များစွာ မျှော်လင့်ထားခြင်းသည် သဘာဝ မကျဟု စောဒက တက်နိုင်ပါသည်။ ၂၀ဝ၈ အခြေခံ ဥပဒေသည် ဒီမိုကရေစီ စနစ်သစ် တစ်ခုကို မိတ်ဆက်ပေးခြင်း မဟုတ်ဘဲ တပ်အာဏာ တည်မြဲရေးကို အာမခံချက် ရှိစေရန် ရေးဆွဲထားခြင်း ဖြစ်သည်။ ၎င်းအခြေခံ ဥပဒေအရ တပ်မတော်က အမျိုးသား နိုင်ငံရေး ဦးဆောင် ကဏ္ဍကို ရယူထားသည်။ အရေးပါသော ကာကွယ်ရေး၊ ပြည်ထဲရေးနှင့် နယ်စပ်ရေးရာ ဝန်ကြီး နေရာများကို တပ်မတော်က ခန့်အပ်သည့်အပြင် လွှတ်တော် အရပ်ရပ်တွင်လည်း တပ်မတော်သား ကိုယ်စားလှယ် လေးပုံ တစ်ပုံကို ထည့်သွင်းထားသောကြောင့် မြန်မာ့နိုင်ငံရေး နယ်ပယ်တွင် အစိတ်သားဟူသော ဝေါဟာရအသစ် တိုးလာခဲ့သည်။

အခြေခံ ဥပဒေ၏ အရေးပါသော စာပုဒ်များကို ပြင်ဆင်ရန်အတွက် လွှတ်တော်ကိုယ်စားလှယ် လေးပုံ သုံးပုံ၏ ထောက်ခံမှုကို လိုအပ်သော အချက်သည် လက်ရှိ အနေအထားကို ဒီမိုကရေစီနည်းကျ ပြင်ဆင်ရန် ကြိုးစားမှု မှန်သမျှအပေါ် တားဆီးရန် ဗီတိုအာဏာကို တပ်မတော်အား ပေးအပ်ထားခြင်းပင် ဖြစ်သည်။ အရေးကြီးဆုံး အချက်မှာ တပ်မတော်သည် ကိုယ်ပိုင် စီမံခန့်ခွဲခွင့် အာဏာ ရှိနေဆဲဖြစ်ပြီး ကာကွယ်ရေး ဦးစီးချုပ်မှလွဲ၍ အစိုးရ အပါအဝင် ရွေးကောက်ခံ အဖွဲ့အစည်းများထံမှ အမိန့်ကို လက်ခံခြင်း မရှိပေ။

ဒေါ်အောင်ဆန်းစုကြည်သည် အပြောင်းအလဲကို မျှော်လင့်နေသော ပြည်သူများနှင့် အာဏာကို ကျစ်ကျစ်ပါအောင် ဆုပ်ကိုင်ထားသော တပ်မတော်တို့အကြား အလွန် ဂရုတစိုက် ဟန်ချက် ထိန်းရသော ဂိမ်းကို စိတ်ရှည် လက်ရှည် ထိန်းကျောင်းနေရသည်။ မြန်မာ့လူထု ခေါင်းဆောင်သည် သူမ၏ဖခင် ထူထောင်ခဲ့သော တပ်မတော်ကို သူမ မည်မျှ သံယောဇဉ်ရှိကြောင်း ပြောကြားခြင်းဖြင့် စစ်ဗိုလ်ချုပ်များအား နှစ်သိမ့်ရင်း သူမ၏လမ်းစဉ်မှ ချော်လာခဲ့ပြီ ဖြစ်သည်။

မြန်မာ့တပ်မတော်ကို သူမ၏ဖခင် လွတ်လပ်ရေး ဗိသုကာ ဗိုလ်ချုပ်အောင်ဆန်းက စတင် ထူထောင်ခဲ့ခြင်း ဖြစ်သော်လည်း ယခုအခါ လွတ်လပ်ရေး ကြိုးပမ်းမှု ကာလကဲ့သို့ မဟုတ်ဘဲ လုံးဝ ကွဲပြားခြားနားသော အာဏာနှင့် ငွေကြေးတို့ ရောယှက်နေသည့် ပြည်တွင်းစစ် ကာလအတွင်း လူလားမြောက်လာသော လက်ရှိ တပ်မတော်သည် ယခင်ကနှင့် လုံးဝ တူညီမှု မရှိတော့ပေ။

ယခုအခါ ဒေါ်အောင်ဆန်းစုကြည်သည် တပ်မတော်ကို နှစ်သိမ့်ရင်း လမ်းချော်လွန်းသွားပြီဟု တိုင်းရင်းသား အုပ်စုများအကြား သတ်မှတ် ယူဆလာကြသည်။ ဗုဒ္ဓဘာသာ လွှမ်းမိုးသော နိုင်ငံတွင် ခရစ်ယာန် ဘာသာ ကိုးကွယ်သော ကချင် တိုင်းရင်းသားများထဲမှ လူငယ်တက်ကြွလှုပ်ရှားသူ နော်စတယ်လာက “ဒေါ်အောင်ဆန်းစုကြည်ကို ဝေဖန်ရတာ ကျွန်မတော့ မောလာပြီ”ဟု ပြောကြားသည်။

“စစ်တပ်က သူ့ကို ထိန်းချုပ်ထားလိုက်ပြီ။ ဗမာ လူမျိုးတွေနဲ့ တိုင်းရင်းသားတွေဆီက တစ်ချိန်က သူရခဲ့ဖူးတဲ့ ထောက်ခံမှုတွေလည်း ဆုံးရှုံးကုန်ပြီ”ဟု နော်စတယ်လာက မှတ်ချက်ပေးသည်။ 

ဗမာလူမျိုး အချို့က ဒေါ်အောင်ဆန်းစုကြည်ကို ဗိုလ်အောင်ဒင် ဇာတ်လမ်းထဲမှ မမြဝင်းနှင့် နှိုင်းယှဉ်ကြသည်။ ဇာတ်လမ်းထဲတွင် ပြန်ပေးဆွဲ ခံရသူ မမြဝင်းသည် သူမကို လာကယ်သော ပုလိပ်ဘက်သို့ မပါဘဲ ပြန်ပေးဆွဲသူ ဓားပြဗိုလ်ဘက်သို့ လိုက်ခဲ့ခြင်းဖြစ်သည်။

သူမသည် ယခုအခါ စစ်တပ် လွှမ်းမိုးသော ခေတ်ကို အဆုံးသတ်လိုသော ပြည်သူများထက် သူမကို ၁၅ နှစ်ခန့် အရှက်မဲ့စွာ ဖမ်းဆီးခဲ့ဖူးသော တပ်မတော်နှင့် ပိုမို နီးစပ်လျက်ရှိသည်။

ဒေါ်အောင်ဆန်းစုကြည် အနေနှင့် ခက်ခက်ခဲခဲ ဆုံးဖြတ်ကာ ထိုသို့ လုပ်ဆောင်ခဲ့ရခြင်း ဖြစ်သော်လည်း သူမ၏ အရှိန်အဝါမှာမူ တစ်စတစ်စ လျော့ပါးလာနေ ပြီဖြစ်သည်။ နော်စတယ်လာက “ဒေါ်အောင်ဆန်းစုကြည် လွတ်မြောက်ရေးဆိုတဲ့ လှုပ်ရှားမှု အသစ်ကို စတင်ရတော့မယ် ထင်တယ်”ဟု အပြောင်အပြက် မှတ်ချက်ပေးသည်။

ရန်ကုန် အပါအဝင် နိုင်ငံတစ်ဝန်း လမ်းများပေါ်တွင် NLD ပါတီ အောင်ပွဲခံခဲ့ပြီးနောက် တစ်နှစ် အကြာတွင် ခါးသီးသော အမှန်တရားသည် ပုံပေါ်လာခဲ့ပြီဖြစ်သည်။ ပြည်တွင်းစစ် အပါအဝင် နိုင်ငံရေး၊ စီးပွားရေး ခြစားခဲ့မှုများကြောင့် တစ်စစီ ဖွာဆန်ကြဲနေသော တိုင်းပြည်ကို အုပ်ချုပ်ရခြင်းထက် ဒီမိုကရေစီ သူရဲကောင်း ဖြစ်ရခြင်းက ပိုမို လွယ်ကူပါလိမ့်မည်။ ၁၉၆၀ ခုနှစ်များ နောက်ပိုင်း မြန်မာနိုင်ငံတွင် အရပ်သား အစိုးရစစ်စစ် ပထမဆုံးအကြိမ် ရှိလာပြီဖြစ်သော်လည်း အာဏာ မော်တော်ယာဉ်၏ ယာဉ်မောင်း ထိုင်ခုံတွင် တပ်မတော်က ဒရိုင်ဘာ နေရာကို ယူထားဆဲပင် ဖြစ်ပေသည်။ 



FOLLOW US