News

မြစ်ကြီးနားနှင့် မိုးကောင်းရှိ တပ်စခန်းများနှင့် တပ်ရင်းဌာနချုပ် တိုက်ခိုက်ခံရ
မြစ်ကြီးနား၊ ဖေဖော်ဝါရီ ၃

ကချင်ပြည်နယ် မြစ်ကြီးနားနှင့် မိုးကောင်းမြို့နယ်ရှိ တပ်မတော်စခန်း ၃ ခုနှင့် တပ်ရင်းဌာနချုပ်ကို ကချင် တိုင်းရင်းသား လက်နက်ကိုင်တပ်ဖွဲ့ KIA က ဖေဖော်ဝါရီလ ၃ ရက်နေ့ နံနက် အစောပိုင်း ၃ နာရီခန့်က လက်နက်ကြီး၊ လက်နက်ငယ်များဖြင့် လာရောက်တိုက်ခိုက်ခဲ့ကြောင်း တပ်မတော်ကာကွယ်ရေး ဦးစီးချုပ်ရုံးက သတင်းထုတ်ပြန်သည်။

မိုးကောင်းမြို့ရှိ ခလရ ၇၄ တပ်ရင်း ဌာနချုပ်ကို KIA အဖွဲ့မှ အင်အား ၁၅ ဦးခန့်က တပ်ရင်းဌာနချုပ်၏ အရှေ့မြောက်ဘက် မီတာ ၅၀၀၀ အကွာမှ လက်နက်ကြီးများဖြင့် လာရောက်ပစ်ခတ်ခဲ့ရာ တပ်ရင်း ဌာနချုပ်၏ တောင်ဘက် မီတာ ၁၀၀၀ ခန့်အကွာနေရာ၌ ကျည်ကျရောက် ပေါက်ကွဲခဲ့ကြောင်း ပစ်ခတ်မှုကြောင့် လူနှင့် အဆောက်အအုံများ ထိခိုက်ပျက်စီးမှု မရှိခဲ့ကြောင်း ယင်းထုတ်ပြန်ချက်တွင် ဖော်ပြထားသည်။

“ဒီမနက်အစောကြီး အသံကြားတယ်။ မိုးကောင်းမှာရှိတဲ့ ခလရ ၇၄ ကို ပစ်တာ။ တပ်ရဲ့အဝန်းမှာတော့ မထိပါဘူး။ ကျန်တာတော့ ဘာမှမဖြစ်ဘူး”ဟု မိုးကောင်းမြို့တွင်း နေထိုင်သူတစ်ဦးက ပြောသည်။

ထို့ပြင် မိုးကောင်းမြို့နယ်၊ လွယ်လိ ယန်ကျေးရွာ အုပ်စု၊ မရန်ကထောင်ကျေးရွာရှိ နယ်မြေလုံခြုံရေး ဆောင်ရွက်နေသည့် တပ်စခန်းအား KIA အဖွဲ့မှ အင်အား ၆၀ ဦးခန့်က စခန်း၏ အရှေ့ဘက်မီတာ ၁၀၀ ခန့်အကွာမှ လက်နက်ကြီး၊ လက်နက်ငယ်များဖြင့်လည်းကောင်း၊ မြစ်ကြီးနားမြို့နယ်၊ နန်ကျင်ကျေးရွာရှိ တပ်စခန်းအားလည်း KIA အဖွဲ့မှ အင်အား ၅၀ ဦးခန့်က စခန်း၏ အနောက်ဘက်၊ အနောက်မြောက်ဘက်နှင့် အရှေ့မြောက်ဘက်တို့မှ လက်နက်ကြီး၊ လက်နက်ငယ်များဖြင့် လာရောက်ပစ်ခတ်တိုက်ခိုက်ခဲကြောင်း တပ်ချူပ်ရုံးက သတင်းထုတ်ပြန်သည်။

“အခုဖြစ်တဲ့နေရာက ကချင်ရပ်ကွက်မှာလို့ သိရတယ်။ ရဲမေအချို့ ထိခိုက်မှုရှိတယ်လို့လည်း ကျွန်တော်တို့ ကြားနေရတယ်။ အလစ် ဝင်တိုက်သွားတဲ့သဘောပါ”ဟု ကချင်ပြည်နယ်တွင် တာဝန်ကျနေသည့် တပ်မတော်အရာရှိတစ်ဦးကဆိုသည်။

မြစ်ကြီးနားမြို့အဝင် မန္တလေး-မြစ်ကြီးနား ကားလမ်းအနီးတွင် တိုက်ပွဲပြင်းထန်ခဲ့ပြီး တပ်မတော်ဘက်မှ ထိခိုက်ဒဏ်ရာရရှိမှု ရှိခဲ့ပြီး အကျအဆုံးရှိသည်ဟုလည်း ကြားသိရကြောင်း ဒေသခံများထံမှ သိရသည်။

ယင်းကိစ္စနှင့်ပတ်သတ်၍ KIA  သတင်းနှင့် ပြန်ကြားရေးဌာနထံ ဆက်သွယ်မေးမြန်းရာ တိုက်ပွဲဖြစ်ပွားနေသည်ဟု ကြားသိရသော်လည်း သတင်းအတည် မပြုနိုင်သေးဟု ပြန်လည် ဖြေကြားသည်။

လက်ရှိ ကချင်ပြည်နယ် တနိုင်းမြို့နယ်အတွင်းတွင်လည်း တပ်မတော်နှင့် ကချင်လက်နက်ကိုင် တပ်ဖွဲ့တို့ကြား တိုက်ပွဲဖြစ်နေမှုကြောင့် မှော်လုပ်သား တစ်ထောင်ကျော်မှာလည်း နေရပ်ပြန်မရဘဲ ပိတ်မိလျက်ရှိသည်။

J-08 /R-06



FOLLOW US