News

18-Jun-2018

ရေဘေး Disaster
ရေဘေးသင့် မွန်ပြည်နယ်ကို အလေးထား ကူညီပါ (Daily, Vol-6/No-59)
ရေဘေးသင့်နေခြင်းသည် ကမ္ဘာပေါ်တွင် သဘာဝ ဘေးအန္တရာယ် ကျရောက်နိုင်ခြေ အများဆုံး နိုင်ငံစာရင်းဝင် မြန်မာနိုင်ငံအတွက် ထပ်မံ၍ အသံကျယ်ကျယ် ထိုးလိုက်သော သတိပေးခေါင်းလောင်းဖြစ်သည်။

ကမ္ဘာကြီး ပူနွေးလာခြင်းနှင့်အတူ ဆင်းရဲသောနိုင်ငံများ ကြုံတွေ့ရလေ့ရှိသည့် သဘာဝ ပတ်ဝန်းကျင် မပျက်စီးစေမည့် သစ်ထုတ်ယူမှု နည်းစဉ်များ မကျင့်သုံးခြင်း တစ်နည်းအားဖြင့် ဥပဒေစိုးမိုးမှု မရှိခြင်း၊ လိုသည်ထက်ပို၍ တစ်တောလုံး အပြောင်းရှင်း အလွန်အကျွံ ခုတ်ယူခြင်း၊ မြေပေါ်၊ မြေအောက် သယံဇာတ ပစ္စည်းများအပေါ် လုံးလုံးမှီခိုနေရခြင်းတို့ကြောင့် လွန်ခဲ့သော အနှစ်သုံးဆယ်ခန့်ထက်စာလျှင် သဘာဝဘေးအန္တရာယ် ခြိမ်းခြောက်မှု ပိုကြီးလာခြင်း ဖြစ်သည်။

စင်စစ်အားဖြင့် Global Warming ကမ္ဘာကြီးပူနွေးလာခြင်းသည် လူသားတို့၏ အတ္တ၊ လောဘများ လောင်မြိုက်မှုကြောင့် လိုအင်ဆန္ဒ လောဘမီးများ ပူလောင်ပြင်းပြလာခြင်းက အဓိက လက်သည်တရားခံဖြစ်သည်။ တစ်နည်းအားဖြင့် Internal Warming အတွင်းအဇ္ဈတ္တများ ပူလောင်လာခြင်းကြောင့်ဟု ဆိုနိုင်သည်။

မြန်မာနိုင်ငံတွင်မူ သာမန် ရာသီဥတု ဖောက်ပြန်မှုကြောင့် ကြုံတွေ့ရမည့် ဘေးဒုက္ခများအပြင် ထင်ရာစိုင်း၊ အတ္တကြီး အာဏာရှင် အစိုးရများ၏ တစ်ရေးနိုး အကြံပေါ်၍ တည်ဆောက်ထားသော အခြေခံ အဆောက်အဦများ၏ အရည်အသွေး ညံ့ဖျင်းခြင်းတို့ကြောင့် နောက်ဆက်တွဲ ထိခိုက်မှု အန္တရာယ်များကိုလည်း ရင်ဆိုင်ရမည်ဖြစ်သည်။

ထို့အပြင် ဘေးအန္တရာယ် ကျရောက်သည့်အခါ အချိန်မဆိုင်း မြန်ဆန်စွာ ဆောင်ရွက်ရမည့် အရေးပေါ်ကယ်ဆယ်၊ ကူညီ၊ ထောက်ပံ့ရေး ကိစ္စရပ်များ စနစ်တကျ၊ ပိုင်ပိုင်နိုင်နိုင်၊ အချိန်ယူ၊ လေ့ကျင့်၊ ပြင်ဆင်ထားခြင်း မရှိခြင်းကြောင့် အချိန်နောက်ကျခြင်း၏ ဆိုးကျိုးများကိုလည်း ခံစားရနိုင်ဖွယ် ရှိသည်။

စင်စစ်အားဖြင့် ကြီးမားပြင်းထန် ရက်စက်လှသည့် နာဂစ် ဆိုင်ကလုန်း မုန်တိုင်းမျိုးကြောင့် လူသိန်းချီ သေကျေပျက်စီးခဲ့သည့်အချိန်မှစကာ အခြား အခြားသော သဘာဝ ဘေးအန္တရာယ်များ အချိန်မရွေး ကျရောက်လာနိုင်ကြောင်း သတိပေး ခေါင်းလောင်းထိုးနေသည့် ဖြစ်စဉ်၊ ဖြစ်ရပ်များ နှစ်တိုင်းနီးပါး ရှိနေလင့်ကစား ယနေ့အချိန်အထိ လုံလောက်သည့် အလေးထား စဉ်းစား၊ ပြင်ဆင်မှု မရှိခြင်း သို့မဟုတ် အားနည်းနေခြင်းမှာ နားမလည်နိုင်စရာ ပုစ္ဆာတစ်ပုဒ်ကဲ့သို့ ဖြစ်နေသည်။

ရွေးကောက်ပွဲ နီးလာချိန်မျိုးတွင်မှ ပြည်သူအများစုအပေါ် အာရုံစိုက်ကြောင်း အသည်းအသန် ပြသရန် ကြိုးစားလာကြသည့် ခေါက်ရိုးကျိုး ဒီမိုကရေစီ နိုင်ငံရေးစနစ်မျိုးနှင့် နှိုင်းယှဉ်လျှင်ပင် ကြားဖြတ်ရွေးကောက်ပွဲ နီးလာသော ယနေ့ကာလမျိုးတွင် အာဏာရပါတီနှင့် အစိုးရတို့အတွက် မွန်ပြည်နယ်တွင် ရေဘေးသင့်နေခြင်းမှာ အသုံးချတတ်လျှင် အခွင့်အလမ်းကောင်း တစ်ခုဟုလည်း ဆိုနိုင်သည်။

တံတားနာမည်ကဲ့သို့ အသေးအဖွဲ ကိစ္စလေးတစ်ခုကိုပင် ပြည်ထောင်စု လွှတ်တော်အထိ သယ်ဆောင်သွားကာ မိမိတို့ ခေါင်းဆောင်ကို အသုံးတော်ခံခဲ့ခြင်းကြောင့် ဒေသခံပြည်သူတို့၏ အထင်အမြင်လွဲမှားမှု ခံခဲ့ရသည့် လက်ရှိ အာဏာရပါတီအနေနှင့် လက်ရှိ ရေဘေးသင့်အခြေအနေကို မူတည်ကာ စိတ်ကောင်း စေတနာကောင်းများ၊ အလေးထားမှုများ ပြသကာ ယင်းအထင်အမြင်လွဲမှုကို ချေဖျက်ပြရန် လိုပေသည်။

မိမိတို့ အစိုးရတစ်ဖွဲ့တည်း မတတ်နိုင်လျှင်ပင် ကုလသမဂ္ဂ အပါအဝင် နိုင်ငံတကာ အဖွဲ့အစည်းများအား ယင်းဒေသအခြေအနေများကို ပြသကာ လူသားချင်း စာနာထောက်ထားသော အကူအညီများ၊ အရေးပေါ် ကယ်ဆယ်ရေးဆိုင်ရာ အထောက်အပံ့ပစ္စည်းများ ရယူနိုင်သည်။

သို့မဟုတ်ပါဘဲ လုံလောက်ထိရောက်သော ကူညီကယ်ဆယ်မှုများ အလျင်အမြန် မပေးနိုင်ခြင်း၊ အချိန်ဆိုင်း၊ တုံ့နှေးခြင်း၊ လေးလေးနက်နက် ထားသည့်သဘော သက်ရောက်စေမည့် အစိုးရအဖွဲ့ အရေးပေါ် အစည်းအဝေးခေါ်ယူကာ ကူညီကယ်ဆယ်ရေးလုပ်ငန်းများ ဆောင်ရွက်စီမံမှု မရှိခြင်းတို့ ရှိလာပါက အစိုးရအုပ်ချုပ်ရေးယန္တရား၏ ခေါက်ရိုးကျိုးနေသော ဖြစ်ရိုးဖြစ်စဉ်ဟုမမြင်ဘဲ အာဏာရပါတီကို အာခံဆန့်ကျင်သည့်ဒေသကို တမင်လျစ်လျူရှုထားသည်ဟု အမြင်စောင်းသွားနိုင်ကြောင်း အကြံပြုသတိပေးလိုပေသည်။

အယ်ဒီတာ (၁၈-၆-၂၀၁၈)



FOLLOW US