POST TAGGED AS

နိုင်ငံရေး

08-Jan-2017

နိုင်ငံရေး
အဓိကနှင့် သာမည ကွဲရမည့် ၂၀၁၇ (Daily, Vol-4/No-234)
ကျွန်ုပ်တို့၏ နေ့စဉ်ဘ၀များတွင် ပြုဖွယ်ကိစ္စများစွာ ရှိသည့်အနက် ယေဘုယျအားဖြင့် အရေးအကြီးဆုံး၊ အဓိကအကျဆုံး ကိစ္စရပ်များကို ဦးစားပေး ဆောင်ရွက်ရလေ့ရှိပြီး အရေးမကြီးဆုံး၊ သာမည ကိစ္စရပ်များကို အစဉ်အလိုက် နောက်ဆုံးမှ လုပ်ကိုင်လေ့ ရှိတတ်သည်။

 နယ်ပယ်တစ်ရပ်ရပ်တွင် အောင်မြင်မှု ရရှိသွားသူ အများစု၏ ဘ၀များကို လေ့လာကြည့်သည့် အခါတွင်လည်း နေ့စဉ်ပြုဖွယ် ကိစ္စရှိသည်တို့အပြင် ဘ၀အတွက် ဆောင်ရွက်စရာ ကိစ္စရပ်များကိုလည်း အဓိကနှင့် သာမည ခွဲခြားကာ ဦးစားပေး အဆင့်များ သတ်မှတ်၍ ဆောင်ရွက်သွားကြသည်က များပေသည်။

 ဆန့်ကျင်ဘက်အားဖြင့် ထိုသို့ အဓိကနှင့် သာမည ခွဲခြားမသိသူ အများစုမှာမူ နေ့စဉ်ဘ၀တွင်ဖြစ်စေ၊ ဘ၀တစ်လျှောက်လုံး ကြုံရသမျှ အလုပ်ခွင်၊ နယ်ပယ် အသီးသီးတွင် ရှုံးနိမ့်မှု သို့မဟုတ် သာမန်အနေအထားဖြင့်သာ ကုန်ဆုံးသွားတတ်ကြသည်။ 

နိုင်ငံတစ်ခုကို စီမံအုပ်ချုပ်ခြင်း၊ လွှတ်တော်တစ်ရပ်ကို စီမံခန့်ခွဲခြင်းသည်လည်း ထိုသို့ပင်။ အစိုးရတစ်ရပ်သည် အခြေခံအားဖြင့် သာမန်အသင်းအပင်း တစ်ခုနှင့် တူညီသော်လည်း တာဝန်ယူမှု၊ တာဝန်ပေးအပ်မှု၊ တာဝန်ခံမှု၊ စီမံခန့်ခွဲမှု၊ အကောင်အထည်ဖော်မှု အပိုင်းတို့တွင်မူ များစွာခြားနားလှသည်။

ထို့အတူ ဥပဒေပြု လွှတ်တော်တို့သည်လည်း လူမှုရေးဖောင်ဒေးရှင်း တစ်ခု၏ စည်းကမ်းရေးဆွဲ၊ ထိန်းသိမ်း၊ ကြီးကြပ်သည့် အဖွဲ့တစ်ခုနှင့် အခြေခံ အလားသဏ္ဌာန် တူညီသော်ငြား ကြည့်ရမည့် ရှုထောင့်အကျယ်အ၀န်း၊ စီမံခန့်ခွဲမှုပုံစံ၊ လုပ်ငန်းစဉ်အဆင့်ဆင့်နှင့် တာဝန်ယူ၊ တာဝန်ခံရသည့် အပိုင်းများတွင် များစွာ ကွဲပြားလှသည်။ 

နိုင်ငံတော်နှင့် နိုင်ငံသားများအကျိုးအလို့ငှာ လိုအပ်သည့် ဥပဒေ၊ စည်းမျဉ်း၊ စည်းကမ်းများရေးဆွဲ၊ အတည်ပြုရာတွင် လည်းကောင်း၊ နိုင်ငံကို စီမံခန့်ခွဲ အုပ်ချုပ်ရာတွင် လည်းကောင်း အဆောတလျင် ပြုရမည့် ကိစ္စနှင့် အချိန်ယူ ဆောင်ရွက်ရမည့် အလုပ်ကို ခွဲခြားသိမြင်ရမည်ကို အများနားလည်ထားပြီး ဖြစ်သည်။

မြန်မာနိုင်ငံတွင် ယနေ့ ရင်ဆိုင်နေရသော မြားမြောင်လှစွာသော ပြဿနာများကို လေ့လာကြည့်လျှင် ရင်းမြစ်အကြောင်းအရင်း သို့မဟုတ် အဓိက ပြဿနာ အနည်းငယ်ခန့်မှ စိတ်ဖြာသွားသော အဖျားအနား သို့မဟုတ် သာမည ပြဿနာ အများစု ဖြစ်နေပေသည်။

ဥပမာ နိုင်ငံရေး ပြဿနာဟု ဆိုလိုက်သည်နှင့် ၂၀၀၈ ခုနှစ် ဖွဲ့စည်းပုံ အခြေခံဥပဒေနှင့် စစ်ဘက်၊ အရပ်ဘက် ဆက်ဆံရေးက အဓိက အကြောင်းအရင်း ဖြစ်ပြီး စီးပွားရေး ပြဿနာဟု ဆိုလိုက်သည်နှင့် အခြေခံအဆောက်အဦနှင့် ရေရာတိကျ ပြတ်သားသော စီးပွားရေးမူဝါဒဟု ပြောနိုင်ကာ လူမှုရေး ပြဿနာများဟု နာမည်တပ်လိုက်သည်နှင့် တရားဥပဒေစိုးမိုးရေးဟု အဓိက အချက်များကို တန်းပြောနိုင်သည်။ 

ထို့အတူ နိုင်ငံကို စီမံခန့်ခွဲအုပ်ချုပ်ရာတွင် သင့်တော်အပ်စပ်သူ၊ ကျွမ်းကျင်ပညာရှင်များကို လူမှန်၊ နေရာမှန် ခန့်ထား၊ တာဝန်ပေး၊ စေခိုင်းတတ်ခြင်းမှာလည်း အဓိက ခေါင်းဆောင်မှု အတတ်ပညာ ဖြစ်သည့်အပြင် နိုင်ငံတော် ဖွံ့ဖြိုးတိုးတက်စေရေး အတွက်လည်း အဓိက အရင်းခံ အကြောင်းတရား ဖြစ်သည်။

မိမိအဖွဲ့အစည်း အောင်မြင်မှု ရရှိရေးအတွက် မိုးထဲရေထဲတွင် ရုန်းကန်လှုပ်ရှားခဲ့စဉ်က စွန့်လွှတ်အနစ်နာခံခဲ့သူများ သို့မဟုတ် မိမိလက်အောက်တွင် နီးကပ်စွာ တာဝန်ထမ်း အလုပ်အကျွေး ပြုခဲ့သော တပည့်တပန်းများကို တိုင်းရင်းသားပြည်သူ တစ်ရပ်လုံးနှင့် သက်ဆိုင်သော နိုင်ငံတော်၏ ပရော်ဖက်ရှင်နယ် လုပ်ငန်းများ၊ နိုင်ငံရေးတာဝန်များနှင့် သီးခြားစဉ်းစားကာ ချီးမြှင့်မြှောက်စား၊ ဆုလာဘ်ပေးသနားခြင်းသည်လည်း အဓိကနှင့် သာမည ခွဲခြားသိမြင်ခြင်းမည်ပေသည်။

အာဏာရှင်ခေတ်နှင့် အာဏာရှင် တစ်ပိုင်းခေတ်တို့တွင် ထိုကဲ့သို့ အဓိကနှင့် သာမည ခွဲခြားနိုင်ခြင်း မရှိဘဲ နီးစပ်ပတ်သက်ရာများ၊ တပည့်တပန်းများကိုသာ မြှောက်စား၊ ဆုပေးသည့် အနေနှင့် မဆီမလျော် တာဝန်များပေးခဲ့ခြင်း၏ အကျိုးဆက် သို့မဟုတ် အမွေဆိုးကို ယနေ့ မြန်မာပြည်သူလူထု တစ်ရပ်လုံး ခံစားနေရခြင်းဖြစ်သည်။

၂၀၁၆ ခုနှစ်သည် အိမ်စာအားနည်းခဲ့သော အစိုးရတစ်ရပ်အတွက် အားစမ်းစိန်ခေါ်မှုများ နဖူးတွေ့ ဒူးတွေ့ ကြုံရသည့်နှစ် သို့မဟုတ် ဆိုးမွေများဖြင့် နပန်းလုံးနေရသောနှစ်ဟု ဆိုနိုင်သော်ငြား အတိုင်းအတာတစ်ခုအထိ အပြောင်းအလဲများ မြင်တွေ့ခဲ့ရပေရာ ယင်းအခြေအနေများကို သင်ခန်းစာယူကာ လာမည့် ၂၀၁၇ ခုနှစ်တွင် အနိမ့်ဆုံးအဆင့် အဓိကနှင့် သာမည ခွဲခြားသိမြင်နိုင်လျှင်ပင် ကျွန်ုပ်တို့၏ နိုင်ငံတော်နှင့် နိုင်ငံသားများကို နောက်တစ်ဆင့်ထပ်၍ တင်ပေးနိုင်ကြောင်း အကြံပြုလိုရင်း ဖြစ်သည်။

အယ်ဒီတာ (၈-၁-၂၀၁၇) 



FOLLOW US