News

POST TAGGED AS

မြန်မာ့တပ်မတော်

ဗိုလ်ချုပ်သားသမီးများ ရှိသင့်၊ ရှိအပ်သည့် စိတ်ဓာတ် (Daily, Vol-5/No-84)
အာဇာနည်နေ့ နှစ်ပေါင်း ၇၀ ပြည့် အထိမ်းအမှတ်နှင့်ပတ်သက်၍ ပုံနှိပ် မီဒီယာ အသီးသီးတွင်သာမက လူမှုကွန်ရက်များပေါ်တွင်ပါ သတင်းများ သာမက ဂုဏ်ပြုဆောင်းပါးမျိုးစုံ အာဇာနည်နေ့ မတိုင်မီ ရက်ပိုင်းကတည်းက ပြည့်ပြည့်စုံစုံ ဖော်ပြလျက် ရှိကြသည်ဖြစ်ရာ အာဇာနည် ခေါင်းဆောင်ကြီးများနှင့် သူတို့၏ သမိုင်းကြောင်းကို အထူးအထွေ ပြောစရာ လိုတော့မည်မဟုတ်ဟု ထင်ပါသည်။ လွန်ခဲ့သည့် ၆ နှစ်မတိုင်မီ ကာလများကဆိုလျှင် စာပေစိစစ်ရေးဌာနရှိ အထပ်ထပ် စိစစ်သည့် စားပွဲများပေါ်တွင် မင်နီထိကာ ဖော်ပြခွင့်မရသော အာဇာနည်နေ့ဆိုင်ရာ သတင်းနှင့်ဆောင်းပါးများ မရေမတွက်နိုင်အောင် ရှိခဲ့သည်မဟုတ်ပါလော။ ယနေ့၊ အာဇာနည်နေ့ ရုံးပိတ်ရက်တွင် ရွှေတိဂုံစေတီတော် အနီးရှိ အာဇာနည်ကုန်းနှင့် နတ်မောက်လမ်းရှိ ဗိုလ်ချုပ်ပြတိုက် အပါအဝင် ဗိုလ်ချုပ်နှင့် ပတ်သက်သော နေရာမှန်သမျှ၌ ဗိုလ်ချုပ်ကို ဂါရဝပြုလိုသူများနှင့် စည်ကားနေမည်ဖြစ်သလို ယနေ့ထွက်သမျှ သတင်းစာများတွင်လည်း ဗိုလ်ချုပ်တို့နှင့်ပတ်သက်သမျှ အကြောင်းအရာများ ပြည့်နှက်နေမည်သာ ပင်ဖြစ်ပေသည်။ 

ဗိုလ်ချုပ်နှင့် ပတ်သက်သမျှကို စဉ်းစားဆင်ခြင်ကြည့်မည်ဆိုလျှင် ပဲပြုတ်၊ နံပြားနှင့် ပိုက်ဆံ မရှိသောကြောင့် အထူးတန်း ရုပ်ရှင်လက်မှတ်ပင် ပိုက်ဆံမရှိ၍ မဝယ်နိုင်ခဲ့သည့်ဖြစ်ရပ်ကအစ အမှတ်ရစရာ မြောက်မြားစွာ ရှိပါလိမ့်မည်။ ခပ်ပြတ်ပြတ် ပြောတတ်၊ လွဲမှားမှုများ တွေ့လျှင် တည့်တိုး အော်ငေါက် ဆဲဆိုတတ်သည့် အကျင့်သည်ပင် အမှတ်ရစရာများ ဖြစ်နေပါလိမ့်သည်။ သို့သော် ဗိုလ်ချုပ်နှင့်ပတ်သက်ပြီး ယနေ့အချိန်အထိ သက်ဝင်လှုပ်ရှား အရေးပါလျက် ရှိသူများကိုပြပါဟုဆိုလျှင် သူကိုယ်တိုင် အုတ်မြစ်ချ တည်ထောင်ခဲ့သော မြန်မာ့တပ်မတော်နှင့် လက်ရှိ နိုင်ငံတော် အတိုင်ပင်ခံပုဂ္ဂိုလ်(သမီးဖြစ်သူ ဒေါ်အောင်ဆန်းစုကြည်)တို့ကိုသာ ထိပ်ဆုံးမှ ပြသကြရမည်သာပင်ဖြစ်သည်။ 

လက်ရှိ မြန်မာ့ဒီမိုကရေစီ ဖော်ဆောင်ရေးနှင့် ပြည်တွင်း ထာဝရ ငြိမ်းချမ်းရေး ပေါ်ထွန်းရေးတို့အတွက် အဓိက အခရာကျသူများဟုလည်း ဆို၍ရသည်။ နိုင်ငံတော် အတိုင်ပင်ခံပုဂ္ဂိုလ်က ဗိုလ်ချုပ်၏ သမီးဆိုလျှင် တပ်မတော်နှင့် တပ်မတော်မှ စစ်ဘက်ခေါင်းဆောင်များက ဗိုလ်ချုပ်၏သားများဟု ဆိုရပေမည်။ နိုင်ငံတော် အတိုင်ပင်ခံပုဂ္ဂိုလ်မှာ ဗိုလ်ချုပ်၏ သမီးရင်းချာဖြစ်သလို ဗိုလ်ချုပ် ဦးစီးလုပ်ကိုင်ခဲ့သည့် နိုင်ငံပြုလုပ်ရပ်မျိုးကိုလည်း အမွေဆက်ခံ လုပ်ကိုင်နေသူလည်းဖြစ်သည်။ တပ်မတော်မှ စစ်ဘက်ခေါင်းဆောင်များမှာလည်း ဗိုလ်ချုပ် လုပ်ကိုင်ခဲ့သည့် နိုင်ငံပြုကိစ္စရော၊ ကာကွယ်ရေးကိစ္စများကိုပါ ဆက်လက်အမွေခံ လုပ်ကိုင်နေသူများ ဖြစ်ပေသည်။ သို့သော် ဤခေါင်းကြီးပိုင်းတွင်မူ ဗိုလ်ချုပ်၏ နိုင်ငံတည်ဆောက်ရေးနှင့် နိုင်ငံကာကွယ်ရေးကို လုပ်ဆောင်နေသူ၊ တစ်မျိုး ဆိုပါက ကိုယ်ကျိုးထက် နိုင်ငံအကျိုးကို ရှေးရှုသူမည်သူမဆို ဗိုလ်ချုပ်၏ သားသမီးများဟု သတ်မှတ်ဖော်ပြလိုပါသည်။

ဗိုလ်ချုပ်နှင့်ပတ်သက်သည့် ကိစ္စမှန်သမျှကိုကြည့်လျှင် နိုင်ငံနှင့် ပြည်သူအပေါ် ရိုးသားဖြောင့်မတ်မှုနှင့် သစ္စာရှိမှုက ထိပ်ဆုံးမှာရှိသည်။ ဗိုလ်ချုပ်နှင့် ထိုခေတ်က သူ၏ လုပ်ဖော်ကိုင်ဖက်များ ကိုယ်ကျိုးစီးပွား မရှာသလို သားသမီးနှင့် ဆွေမျိုး ကောင်းစားရေးကိုလည်း မလုပ်ခဲ့ပေ။ နိုင်ငံပိုင် ပြည်သူပိုင် ဘဏ္ဍာကို မျက်စောင်း မထိုးခဲ့သလို တိုင်းရင်းသား မိဘပြည်သူအပေါ် မောက်မာစွာ ဆက်ဆံမှု မပြုခဲ့ပေ။ သို့အတွက်ကြောင့် ဗိုလ်ချုပ်၏ သားသမီးအဖြစ် သတ်မှတ်ခံလို သူများလည်း ဒီမိုကရေစီ တည်ဆောက်ရေးတွင် နိုင်ငံနှင့် တိုင်းရင်းသားမိဘ ပြည်သူအပေါ် ရိုးသားဖြောင့်မတ်မှုနှင့် သစ္စာစောင့်သိမှုကို ခါးဝတ်ပုဆိုးကဲ့သို့ မြဲမြံထားရမည်ဖြစ်သလို အဂတိတရားများကို အလျှင်း ရှောင်ရပေမည်။ မိမိချွေးနှဲစာ စစ်မှန်သည်ဆိုပါက ပီဇာနှင့် ဆူရှီကိုပင် စိတ်ကြိုက် စားအပ်သော်လည်း ပြည်သူ့အခွန်ဘဏ္ဍာဆိုပါက ပဲပြုတ်၊ နံပြားကိုပင် စိတ်ကူးထဲ၌ မထည့် စကောင်းဟု ဆိုရပါမည်။ နှစ်ပေါင်း ၇၀ ကျော် ကြာသွားပြီဖြစ်ပြီး ခေတ်ကာလများလည်း ပြောင်းသွားပြီဖြစ်ပါသည်။ ဗိုလ်ချုပ်နှင့် ပတ်သက်သူ၊ ဗိုလ်ချုပ်၏ သားသမီးအဖြစ် ခံယူလိုသူတိုင်း အာဇာနည် သူရဲကောင်းများ ဖြစ်ကြရမည်ဟု ဆိုလိုခြင်း မဟုတ်ပေ။ နှစ်လရာသီနှင့် ခေတ်စနစ်များ မည်သို့ပင် ပြောင်းစေကာမူ ဗိုလ်ချုပ်၏ သားသမီးများအနေနှင့် နိုင်ငံနှင့် ပြည်သူအပေါ် ထားရှိအပ်သော ရိုးသားဖြောင့်မတ်မှုနှင့် သစ္စာစောင့်သိမှုတို့ အရောင်မပြောင်းသွားရန်သာ အရေးကြီးကြောင်း ဖော်ပြလိုရင်း ဖြစ်ပေသည်။

အယ်ဒီတာ (၁၈-၇-၂၀၁၇)



FOLLOW US