News

POST TAGGED AS

ပြည်

ပေါင်းတည်မှ အသက်ငါးနှစ်ကျော် ကလေးငယ်ထံ လာရောက်ဆေးကုသသူများပြား

ပြည်၊ စက်တင်ဘာ ၃၀

ရောဂါဝေဒနာများ သက်သာပျောက် ကင်းသည်ဟုဆိုကာ ပေါင်းတည်မြို့နယ်၊ နွယ်ချို ၁ ရပ်ကွက်၊ ရွှေတည် ၂ ကွက်သစ်ရှိ ငါးနှစ်ကျော်အရွယ် ကလေးငယ်ထံတွင် အနယ်နယ် အရပ်ရပ်မှ လာရောက်ဆေးကုသသူများ ယခုအခါ များပြားလျက်ရှိကြောင်း ကလေးငယ်၏ဦးလေးတော်စပ်သူ ဦးဝင်းထွဋ်က ပြောကြားသည်။

လွန်ခဲ့သော နှစ်လခန့်မှစတင်ကာ လက်ဖြင့် သပ်ပေးပါက ရောဂါဝေဒနာများ သက်သာသည်ဟုဆိုကာ ပျောက်ကင်းသူ များပြားလာပြီး လာရောက် ကုသသူများ ပြားလာသည့်အတွက် အဆိုပါ ကလေးငယ် အနားရစေရန် မူလနေထိုင်ရာ ကြာနီကန်ကျေးရွာအုပ်စု၊ ရှားပေါင်းကျေးရွာမှ ပေါင်းတည်မြို့နယ် ရွှေတည်ကွက်သစ်သို့ လာရောက်နေခြင်း ဖြစ်သော်လည်း ရပ်ဝေး ရပ်နီးမှ ရောဂါဝေဒနာရှင်များမှာ လာရောက်နေသည့်အတွက် ကုသပေးနေရခြင်းဖြစ်ကြောင်း ၎င်း၏ မိသားစုဝင်များထံမှ စုံစမ်းသိရှိရသည်။

“အဆုပ်နည်းနည်း အအေးပတ်သလို ဖြစ်နေလို့ ဆေးခန်းပြထားတယ်။ ဒီမှာက လာရှောင်တယ်။ ကုရတဲ့လူ များလွန်းတော့ ကလေးပင်ပန်းမှာစိုးလို့ သူ့ အတိတ်ကံကြောင့် ကလေးက ကုပေးနိုင်တာ ပျောက်တဲ့သူလည်း ချက်ချင်း ပျောက်တယ်။ တချို့လည်း သုံးလေးရက်လောက်မှ ပျောက်တယ်”ဟု ဦးဝင်းထွဋ်က ပြောဆိုသည်။

ငါးနှစ်သားလောက်မှ စတင်ကာ ကျေးရွာအတွင်းရှိ လူများကို အမှတ်မထင် ကုသပေးရာမှ ကျေးရွာ အ.ထ.က ကျောင်းမှ ကျောင်းအုပ် ဆရာမကြီးကို ကုသပျောက်ကင်းပြီးနောက် လူမှုကွန်ရက်မှတစ်ဆင့် ၎င်းအကြောင်းမှာ ပျံ့နှံ့လာခဲ့ခြင်းဖြစ်ကြောင်း ၎င်းက ရှင်းပြသည်။ 

“ကျွန်မအစ်ကိုဝမ်းကွဲ မျက်နှာ အမ်းတယ်။ အသက်ရှူကျပ် အမောဖောက်တာလာကုတာ နှစ်ရက်ပဲ ကြာတယ်။ ပျောက်သွားတယ်ပေါ့။ အဲဒါကြောင့်လည်း အခုလို ကုဖို့လာတာပါ။ ပျောက်မယ်လို့လည်း ယုံကြည်တယ်”ဟု ကြို့ပင်ကောက်မြို့နယ် တောင်ရိုးကွင်းကျေးရွာမှ လာရောက် ဆေးကုသသူ ဒေါ်သန်းသန်းမော်က ပြောကြားသည်။

အဆိုပါ ငါးနှစ်ကျော် ကလေးထံသို့ နေ့စဉ် လူနှစ်ကျော် လာရောက် ကုသမှုခံယူနေပြီး အဖိတ်နေ့ ဥပုသ်နေ့များတွင် လူငါးရာကျော်ရှိကြောင်း၊ ငွေကြေး သတ်မှတ်ကောက်ခံခြင်း မရှိဘဲ အလှူခံထားရှိထားပြီး အလှူငွေ ထည့်သွင်းပေးရကြောင်း၊ အဆိုပါကလေးငယ် မောင်ထွန်းတေဇအောင် တောင်းဆိုသည့်အတိုင်း လမ်းများ၊ ဘုန်းကြီးကျောင်းနှင့် ဘိုးဘွားရိပ်သာများသို့ ရသည့်အလှူငွေထဲမှ ထည့်ဝင်လှူဒါန်းပေးရကြောင်း ၎င်း၏မိသားစုဝင်များထံမှ စုံစမ်း သိရှိရသည်။

M-06



FOLLOW US