News

POST TAGGED AS

ပြည်သူ့လွှတ်တော်

သမ္မတသစ်နှင့် ဂတိကဝတ်များ
ရွေးကောက်ပွဲတွင် NLD ပါတီအနိုင်ရပြီးနောက် အစိုးရတစ်ရပ် ဖွဲ့နိုင်ခဲ့သည်။ ၅ နှစ်သက်တမ်းအတွင်း ၂ နှစ်တာကာလတွင် သမ္မတအပြောင်းအလဲဖြစ်ခဲ့သည်။ ယင်းသမ္မတနှစ်ဦးစလုံးမှာ နိုင်ငံတော်အတိုင်ပင်ခံပုဂ္ဂိုလ်၏ အားကိုးအားထားပြုထိုက်သူများဖြစ်ကာ ဖြတ်သန်းလာခဲ့ရသည့် နိုင်ငံရေးခရီးကြမ်းအတွင်း များစွာအနစ်နာခံ ဆောင်ရွက်ခဲ့ကြသူများလည်း ဖြစ်သည်။

မတ်လ ၃၀ ရက်နေ့တွင် နိုင်ငံတော်သမ္မတအနေနှင့် လွှတ်တော်တွင် ကတိသစ္စာပြုကာ နိုင်ငံသူနိုင်ငံသားများသို့ သမ္မတသစ်၏ ပထမဆုံး မိန့်ခွန်းမြွက်ကြားခဲ့သည်။ သမ္မတသစ်၏ မိန့်ခွန်းနှင့်ပတ်သက်၍ လူထုလူတန်းစားအလွှာအသီးသီးမှ ကောင်းချီးဩဘာပေးခဲ့ကြသည်။ အများစုမှာ အပေါင်းလက္ခဏာဆောင်သည့် အကောင်းမြင်ရှုထောင့်မှ အပြုသဘော ချဉ်းကပ်မှုများ တွေ့ရသည်။

စင်စစ် သမ္မတသစ်တစ်ဦးအနေနှင့် တရားဝင် လွှဲပြောင်းရယူရသည့်အချိန်တွင် နိုင်ငံတော်၏ ပစ္စက္ခအခြေအနေမှာ ဘက်ပေါင်းစုံမှ လိုအပ်ချက်များ၊ ချွတ်ယွင်းအားနည်းမှုများ၊ ရင်ဆိုင်ဖြေရှင်းနေရမှုများနှင့် ကြုံဆုံနေရသည့်အချိန်ဖြစ်သည်။ ယခင်သမ္မတဟောင်း ဦးထင်ကျော် လက်ထက်တွင် သမ္မတတစ်ဦး၏ လုပ်ပိုင်ခွင့်ဘောင်အတွင်းမှပင် ထင်ထင်ရှားရှား လုပ်နိုင်ခွင့်မရခဲ့သည်ကို တွေ့ခဲ့ကြရသည်။ အစိုးရ၏ တာဝန်ထမ်းဆောင်ချိန် ၂ နှစ် တာကာလအတွင်း သမ္မတကြီးရှိမှန်းပင် မသိနိုင်လောက်အောင် တိတ်ဆိတ်ခဲ့၍ ပြည်သူတို့ရင်တွင် ပြည်သူချစ်သော ပြည်သူ့သမ္မတကြီးအပေါ် အပြစ်မမြင် ကရုဏာဒေါသော ဖြစ်ခဲ့ကြရသည်သာ ရှိခဲ့သည်။

ယခုအခါ ပြည်သူ့သမ္မတအဖြစ် လွှတ်တော်ဥက္ကဋ္ဌဟောင်း ဦးဝင်းမြင့်အား သမ္မတသစ်အဖြစ် ကတိသစ္စာပြုအပြီးတွင် သမ္မတသစ်နှင့် ပတ်သက်၍ “သမ္မတသစ်ဟာ NLD ပါတီမှာလည်း ကျရာတာဝန်ထမ်းခဲ့တယ်။ လွှတ်တော်မှာလည်း ဥက္ကဋ္ဌတာဝန်ထမ်းဆောင်ခဲ့တယ်။ တရားဥပဒေစိုးမိုးရေးမှာလည်း ဒေါ်အောင်ဆန်းစုကြည်က ဥက္ကဋ္ဌ၊ ဦးဝင်းမြင့်က ဒုဥက္ကဋ္ဌလုပ်ခဲ့တယ်။ လွှတ်တော်ဥက္ကဋ္ဌတာဝန် ၂ နှစ်ထမ်းဆောင်ရာမှာလည်း အရည်အချင်းရှိတယ်ပေါ့။ သူကိုယ်တိုင်ကလည်း အနစ်နာခံခဲ့တာတွေရှိတယ်။ သူနဲ့ သမ္မတတာဝန်က ထိုက်တန်တယ်လို့ ယူဆတယ်။ မုဒိတာနဲ့ ဝမ်းသာတယ်ပေါ့။ တရားဥပဒေစိုးမိုးရေး၊ ငြိမ်းချမ်းရေးတို့ကို ပိုပြီးလုပ်နိုင်မယ်လို့ ယုံကြည်ကြောင်း လုပ်ပိုင်ခွင့်အာဏာ အရင်သမ္မတထက်ပိုရတာတို့ ဘာတို့ ခေါင်းထဲမရှိဘူး၊ ကိုယ့်အလုပ် ကိုယ်လုပ်နေကြတာပဲ”ဟု ဦးဝင်းထိန်က သုံးသပ်ပြောကြားခဲ့သည်ကို တွေ့ရသည်။

သမ္မတသစ်၏ မိန့်ခွန်းနှင့်ပတ်သက်၍ လိုရင်းတိုရှင်းပြောဆိုသွားခြင်းကြောင့် ကျေနပ်မှုရှိကြသည်။ အထူးသဖြင့် ပြည်ထောင်စုအစိုးရအဖွဲ့၏ ဦးစားပေးရည်မှန်းချက် ပန်းတိုင်အဖြစ် -

၁။ တရားဥပဒေစိုးမိုးရေးနှင့် ပြည်သူများ၏ လူမှုစီးပွားဘဝ တိုးတက်မြင့်မားရေး

၂။ အမျိုးသားပြန်လည်သင့်မြတ်ရေးနှင့် ပြည်တွင်းငြိမ်းချမ်းရေး

၃။ ဒီမိုကရေစီဖက်ဒရယ်ပြည်ထောင်စုကြီး တည်ဆောက်ရေးအတွက် အခြေခံအုတ်မြစ်ဖြစ်သည့် ဖွဲ့စည်းပုံအခြေခံဥပဒေပြင်ဆင်ရေးတို့ကို ဦးတည်ကြိုးပမ်းဆောင်ရွက်သွားမည်ဖြစ်ကြောင်း ပြောခဲ့သည်။

လက်ရှိအချိန်ကာလသည် မြန်မာနိုင်ငံ၏ ဒီမိုကရေစီအသွင် ကူးပြောင်းရေးကာလအစပင် ရှိသေးသည်။ ပြည်သူလူထုတစ်ရပ်လုံး၏ နိုင်ငံရေးရေချိန်မြင့်မားလာစေမှုနှင့်အတူ -

- ပြည်သူပြည်သားများနှင့်အတူ နိုင်ငံ့ဝန်ထမ်း၊ ပြည်သူ့ဝန်ထမ်းအားလုံး၏ ပုံစံကျနေသည့် အတွေးအမြင်များ၊ ပုံသေကားချပ်အလေ့အထများ ပြုပြင်ပြောင်းလဲရန်

- ပြုပြင်ပြောင်းလဲမှု နှောင့်နှေးတဲ့ ဌာနဆိုင်ရာအဖွဲ့အစည်းများကို ကြပ်မတ်ရန်

- ယိမ်းယိုင်နေသည့် တရားစီရင်ရေးကို တည့်မတ်ရန်

- အဂတိလိုက်စားမှုကို ပိုမိုတိုက်ဖျက်ရန်

- မူးယစ်ဆေးဝါးများကို ပိုမိုနှိမ်နင်းရန်

- ပြည်သူ့ဘဏ္ဍာငွေများ အလေအလွင့် ဆုံးရှုံးမှုမရှိစေရန် 

- ဥပဒေမဲ့ သိမ်းဆည်းခံခဲ့ရသည့် လယ်ယာမြေများ ပြန်လည်ရရှိရန်

- လျော်ကြေး၊ နစ်နာကြေးရရှိရေး ဥပဒေနှင့်အညီဆောင်ရွက်ရန်

- သတင်းမီဒီယာကဏ္ဍ အလေးအနက်ထားကြရန်

- ဝန်ထုပ်ဝန်ပိုးဖြစ်နေသည့် ကြိုးနီစနစ်များတိုက်ဖျက်ရန် စသည်တို့သည် သမ္မတသစ်၏ နိုင်ငံသူနိုင်ငံသားများကို ကြေညာမောင်းခတ်လိုက်သည့် ကတိကဝတ်များပင် ဖြစ်လေသည်။ ယေဘုယျသုံးသပ်ကြည့်ရလျှင်ပင် နိုင်ငံတော်သမ္မတသစ်အတွက် စိန်ခေါ်မှုများစွာကို ရင်ဆိုင်ကျော်လွှားရမည်ဖြစ်သည်။ သမ္မတသစ်ကိုယ်တိုင်ကပင် “ကျွန်တော်တို့နိုင်ငံနဲ့ ကျွန်တော်တို့ ပြည်သူတွေ ဒီကနေ့ကြုံတွေ့ရင်ဆိုင်နေရတဲ့ စိန်ခေါ်မှုတွေ၊ အခက်အခဲတွေကလည်း မနည်းဘူး၊ အရာရာတိုင်းကို လွယ်လင့်တကူ ဖြေရှင်းနိုင်မှာမဟုတ်ပေမယ့်လည်း ကျွန်တော့်အနေနဲ့ အစွမ်းကုန်ကြိုးပမ်းအားထုတ်ပြီး ဦးစားပေးကဏ္ဍအလိုက် ဖြေရှင်းဆောင်ရွက်သွားမှာဖြစ်ကြောင်း” ထည့်သွင်းပြောကြားခဲ့သည်ကို တွေ့ရလေသည်။

စင်စစ် သမ္မတသစ် ဦးဝင်းမြင့်နှင့်ပတ်သက်၍ အထူးပင်ပြောစရာ လိုမည်မထင်။ အကြောင်းမှာ ဦးဝင်းမြင့်အနေနှင့် ပြည်သူ့လွှတ်တော် ဥက္ကဋ္ဌတစ်ဦးအနေနှင့် ၂ နှစ်တာကာလ ဆောင်ရွက်ခဲ့သည်များကို ကြည့်ခြင်းဖြင့် သိနိုင်သည်။ ဦးဝင်းမြင့်သည် ဥပဒေပညာကို နားလည်တတ်ကျွမ်းသိမြင်ရုံမက လွှတ်တော်ကိုယ်စားလှယ်များ၏ မေးခွန်းများ၊ အဆိုများနှင့် ပတ်သက်၍သော်လည်းကောင်း၊ သက်ဆိုင်ရာဝန်ကြီးဌာနများ ပြန်လည်ဖြေကြားမှုများအပေါ်တွင်လည်းကောင်း တိကျပြတ်သားသည်၊ ရဲဝံ့စွာ ထောက်ပြပြောဆိုရဲသည်၊ တန်ဖိုးရှိလှသည့် လွှတ်တော်အချိန်ကာလများအတွင်း အချိန်ကို တန်ဖိုးရှိရှိ အသုံးချသွားသည်ကိုတွေ့ရသည်။ သို့ဖြစ်၍ သမ္မတသစ်တာဝန်ထမ်းဆောင်ချိန်တွင် မိမိလုပ်ပိုင်ခွင့်အတွင်း ကိုယ်စွမ်းဉာဏ်စွမ်းရှိသမျှ ထမ်းဆောင်သွားမည်မှာ ယုံမှားသံသယဝင်စရာ မရှိနိုင်ပေ။

သို့သော် တစ်နိုင်ငံလုံးအတိုင်းအတာဖြင့်ဆောင်ရွက်ရန် များစွာရှိနေရာ ဦးစားပေးကဏ္ဍအလိုက် ဆောင်ရွက်သွားမည်ဖြစ်၍ မည်သည်တို့သည် ဦးစားပေးကဏ္ဍတွင် ပါဝင်လေသနည်း။ နိုင်ငံတော်အတိုင်ပင်ခံ၏ မည်သည့်တာဝန်များကို လွှဲအပ်ပေးမည်နည်း။ မည်သည့်အတိုင်းအဆ ပမာဏအထိ လုပ်နိုင်ကိုင်နိုင်ခွင့် ရမည်နည်း။ ပြည်သူလူထုအပေါင်းတို့မှာ ကတိကဝတ်များစွာ ကြားခဲ့ရပြီးဖြစ်၏။ တစ်နေ့ပြည့်လာနိုးဖြင့် မျှော်လင့်ရင်း အိပ်မဝညများ တာရှည်ခဲ့၏။ ယုံကြည်အားကိုးမှုများ လျော့ကျနေ၏။ ယင်းသို့သောအချိန်တွင် ပြည်သူတွေ မြင်ချင်တွေ့ချင်တဲ့ အပြောင်းအလဲတွေကို မျက်ဝါးထင်ထင် တွေ့မြင်နိုင်အောင် ကျွန်တော့်ရဲ့ ပြည်သူများနဲ့အတူ မမှိတ်မသုန် ကြိုးပမ်းဆောင်ရွက်သွားမှာဖြစ်ကြောင်း အလေးအနက် ကတိပြုပြောကြားသွားမှုများ မည်ရွေ့မည်မျှအထိ ဖြစ်ထွန်းပေါ်ပေါက်လာမည်ကို ပြည်သူများနှင့်အတူ စောင့်ကြည့်ကြရမည်သာ ဖြစ်ပါကြောင်း ... ။

ခင်မောင်ဌေး (ပညာရေး)



FOLLOW US