News

POST TAGGED AS

မြောက်ဦး

မြောက်ဦးပြဿနာ ဥပဒေနှင့်အညီ ဖြစ်စေချင် (Daily, Vol-5/No-242)
ရခိုင်ပြည်နယ်၊ မြောက်ဦးမြို့တွင် ဖြစ်ပေါ်ခဲ့သော ရုန်းရင်းဆန်ခတ်မှုနှင့် ပစ်ခတ်နှိမ်နင်းမှုများအပြီး ရခိုင်အမျိုးသားပါတီ ဥက္ကဋ္ဌအဖြစ်မှ နုတ်ထွက်စာ တင်ထားသူ ဒေါက်တာအေးမောင်ကို နိုင်ငံတော် အကြည်ညိုပျက်စေမှု ပုဒ်မ ၅၀၅(ခ)ဖြင့် ဖမ်းဆီးလိုက်ခြင်းသည် ပြဿနာ ဖြေရှင်းနိုင်မည့်နည်းလမ်းလောဟု မေးခွန်းထုတ်စရာ ရှိပေသည်။

ရခိုင်ပြည်နယ် စစ်တွေမြို့အခြေစိုက် အစိုးရအဖွဲ့အတွင်းရေးမှူးနှင့် ပြည်နယ် ရဲတပ်ဖွဲ့မှူးတို့ကမူ ဆန္ဒပြလူအုပ်က မြောက်ဦးမြို့ရှိ ခရိုင်အုပ်ချုပ် ရေးမှူးရုံးကို ဝင်ရောက်ဖျက်ဆီးခြင်း၊ အလံဖြုတ်ချလဲလှယ်ခြင်း၊ ရုံးနှင့် အိမ်များကို ဖျက်ဆီးခြင်းနှင့် ရဲတပ်ဖွဲ့ဝင်များ၏ သေနတ်များကို ဝင်လုခြင်းတို့ကြောင့် မလွှဲမရှောင်သာဘဲ ပစ်ခတ်နှိမ်နင်းရခြင်းဖြစ်ကြောင်း ပြောဆိုထားသည်။

သို့သော် အဆိုပါဖြစ်ရပ်ကို လက်တွေ့ကြုံတွေ့ခဲ့ရသည့် မြောက်ဦးမြို့ပေါ်မှ ခရိုင်အုပ်ချုပ်ရေးမှူးရုံးနှင့် မြို့နယ် ရဲတပ်ဖွဲ့မှူးရုံးတို့မှ တာဝန်ရှိသူများက တစ်စုံတစ်ရာ ပြောဆိုထားခြင်း မရှိပေ။

ဆိုလိုသည်မှာ ရုန်းရင်းဆန်ခတ် ဖြစ်ပေါ်ခြင်းနှင့် ပစ်ခတ်နှိမ်နင်းခြင်းတို့ကို မျက်မြင်၊ လက်တွေ့ အမိန့်ပေး၊ စီမံခန့်ခွဲခဲ့သူများက ထုတ်ဖော်ပြောဆိုခြင်းမရှိဘဲ စစ်တွေမြို့မှ ပြည်နယ်အဆင့် တာဝန်ရှိသူများက ဖြစ်စဉ်များနှင့်ပတ်သက်၍ ရှင်းလင်း ပြောဆိုနေခြင်းကို ဆိုလိုသည်။ 

ယင်းဖြစ်ရပ်နှင့်ပတ်သက်၍ ဖော်ပြထုတ်လွှင့်သော မီဒီယာအများစုတွင်လည်း ဖြစ်စဉ်နှင့်ပတ်သက်၍ အသေးစိတ် ဖော်ပြနိုင်ခြင်းမရှိဘဲ အခမ်းအနားတွင် တည်ဆဲဥပဒေနှင့် ငြိစွန်းသော ဟောပြောမှုများကြောင့် အခမ်းအနား ရပ်ဆိုင်းစေခြင်း၊ ဆန္ဒပြခြင်း၊ သေနတ်နှင့် ပစ်ခတ်နှိမ်နင်းသောကြောင့် လူအသေအပျောက်ရှိခြင်းတို့ကိုသာ တွေ့ရသည်။ 

အခြားတစ်ဖက်တွင်လည်း အခမ်းအနား ကျင်းပမည့် နေရာနှင့်ပတ်သက်၍ သက်ဆိုင်ရာ တာဝန်ရှိသူများက အတတ်နိုင်ဆုံး ညှိနှိုင်းဖျောင်းဖျခဲ့သော်လည်း အခမ်းအနား စီစဉ်ကျင်းပသူများဘက်က လက်သင့်မခံခဲ့ခြင်းကြောင့် အမိန့်အာဏာဖြင့် ပိတ်ပင်ခဲ့ရခြင်းဖြစ်ကြောင်း ပြည်နယ်အစိုးရက ပြောဆိုထားပြန်သည်။

ဖြစ်စဉ်ကို ပြန်လည်သုံးသပ်ရာတွင် အုပ်ချုပ်ရေးနှင့် လုံခြုံရေးတာဝန် ရှိသူများဘက်က ဥပဒေနှင့်အညီ အဆင့်လိုက် ကိုင်တွယ်ရန် လိုအပ်ချက်များ ရှိနိုင်သလို ဆန္ဒပြသူလူအုပ်ဘက်တွင်လည်း ဥပဒေ၊ စည်းကမ်းချိုးဖောက်မှုများ ရှိနေနိုင်ပေသည်။

အခမ်းအနား စီစဉ်သူများနှင့် ဟောပြောသူများက ဒေသခံလူထုကို သွေးဆူစေရန် လှုံ့ဆော်ဟောပြောခြင်း၊ ဆန္ဒပြသူများဘက်က ခရိုင်အဆင့် အုပ်ချုပ်ရေးမှူးရုံးကို ဖျက်ဆီးခြင်း၊ အလံလဲလှယ် လွှင့်တင်ခြင်း၊ သေနတ်လုခြင်းတို့ အမှန်တကယ် ကျူးလွန်သည်ဆိုပါလျှင် ဥပဒေနှင့်အညီ အရေးယူခံရမည် ဖြစ်သည်။

လုံခြုံရေး တာဝန်ရှိသူများဘက်တွင်လည်း ဆန္ဒပြသူများကို ဥပဒေက ကန့်သတ်ခွင့်ပြုထားသည့်အတိုင်း သတိပေး၊ မီးသတ်ပိုက်ဖြင့်ပက်၊ ရော်ဘာစွပ်ထားသော နံပါတ်တုတ်ဖြင့် ရိုက်၊ မျက်ရည်ယိုဗုံးသုံး၊ ရော်ဘာကျည်ဆန်သုံး၊ စည်းသုံးစည်းတား၊ ကျည်အစစ်သုံး စသဖြင့် အဆင့်လိုက် စနစ်တကျ ကိုင်တွယ်၊ နှိမ်နင်းခြင်းမဟုတ်ဘဲ အဆင့်ကျော်လွန်ပစ်ခတ်ခဲ့ပါက ဥပဒေကျော်လွန်ခြင်းဖြစ်၍ ၎င်းတို့ကိုယ်တိုင်လည်း ဥပဒေနှင့်အညီ အရေးယူခံရမည်ဖြစ်သည်။
 
မည်သို့ပင်ဖြစ်စေ အမျိုးသားရေးဝါဒ ခေါင်းထောင်လာခြင်း၊ အဓိကရုဏ်းဖြစ်ပေါ်ခြင်း၊ သွေးထွက်သံယို နှိမ်နင်းခြင်းတို့မှာ ဒေသအတွင်း အာဏာ နိုင်ငံရေးကို အခြေပြုနေသည့်အတွက် လတ်တလောအားဖြင့် ဒေသအုပ်ချုပ်ရေးနှင့် ပြည်ထောင်စုအစိုးရတို့၏ စီမံခန့်ခွဲမှု အရည်အချင်းအပေါ် မူတည်ကာ နှစ်ဖက်စလုံးအတွက် ဥပဒေအရ မျှတသော အရေးယူမှုများဖြင့် ပြဿနာမီးပွား ပိုကြီးထွားမလာစေရန် ကြိုးစားသင့်ကြောင်း တိုက်တွန်း အကြံပြုအပ်ပေသည်။

အယ်ဒီတာ (၁၈-၁-၂၀၁၈)



FOLLOW US