News

POST TAGGED AS

ဘေးအန္တရာယ်

ဂျပန်သဘာဝဘေးအန္တရာယ်ကြီးကြောင့် သေဆုံးသူ ၂၀၀ နီးပါးရောက်၊ ရာနှင့်ချီ၍ ပျောက်ဆုံးနေသူများရှိဟု ခန့်မှန်း


တိုကျို၊ ဇူလိုင် ၁၂

ဂျပန်နိုင်ငံအနောက်ဘက်ဒေသတွင် နှစ်ပေါင်း ၃၆ နှစ်အတွင်း အဆိုးရွားဆုံးအနေအထားဖြင့် ဖြစ်ပေါ်ခဲ့သော မိုးသည်းထန်စွာရွာပြီး ရေလွှမ်းမိုးမှုကြီးကြောင့် သေဆုံးသူဦးရေ ၂၀၀ နီးပါးခန့်ရှိသွားပြီဖြစ်ပြီး ယခုအခါ ယင်းဒေသများတွင် အပူချိန်မြင့်တက်မှုနှင့် သောက်သုံးရေပြတ်လပ်မှုတို့ကြောင့် ကူးစက်ရောဂါများ ပျံ့နှံ့ဖြစ်ပွားမည့်အနေအထားသို့ ရောက်ရှိနေကြောင်း Reuters သတင်းဌာနက ရေးသားဖော်ပြသည်။ 

ပြီးခဲ့သည့် စနေ၊ တနင်္ဂနွေမှစတင်ကာ ပြင်းထန်စွာရွာသွန်းခဲ့သည့် မိုးကြောင့် ရေလွှမ်းမိုးမှုနှင့် မြေပြိုမှုများ ဂျပန်နိုင်ငံ အနောက်ဘက်ဒေသတွင် ဖြစ်ပွားခဲ့သည်။ ယင်းဖြစ်ရပ်ကြောင့် တောင်ကုန်းနှင့် ဆင်ခြေလျှောဒေသတွင် တည်ဆောက်ထားသော လူနေအိမ်နှင့်အခြားအဆောက်အအုံများ ပျက်စီးသွားခဲ့ရသလို လူထောင်ပေါင်းများစွာ ရွှေ့ပြောင်းထွက်ပြေးခဲ့ကြရသည်။ 

ဂျပန်အာဏာပိုင်များ၏ ခန့်မှန်းချက်အရ သေဆုံးသူ ၂၀၀ နီးပါးခန့်ရှိပြီး ပျောက်ဆုံးနေသူများကိုလည်း ရှာဖွေလျက်ရှိသည်ဟု ဆိုသည်။ တရားဝင်ရေတွက်ချက်များအရ သေဆုံးသူဦးရေမှာ ၁၉၅ ဦးဟု ထုတ်ပြန်ထားသည်။ သို့သော် လူပေါင်းဒါဇင်နှင့်ချီ၍ ပျောက်ဆုံးနေဆဲဖြစ်သည်။ 

စာသင်ကျောင်းများနှင့် အခြားနေရာများတွင် ဖွင့်လှစ်ထားသော ကယ်ဆယ်ရေးစင်တာများ၌ ဂျပန်ရေဘေးဒုက္ခသည်များမှာ အပူချိန်မြင့်တက်မှုနှင့် သောက်သုံးရေပြတ်လပ်မှုများနှင့် ရင်ဆိုင်နေရသည်။ ယင်းစင်တာများတွင် သယ်ရလွယ်သော ပန်ကာအနည်းငယ်သာရှိသောကြောင့် ရေဘေးဒုက္ခသည်များမှာ အပူဒဏ်ကိုပိုမို ခံစားနေကြရသည်။ အချို့မှာမူစာရွက်များကို ယပ်တောင်အဖြစ် အသုံးပြုလျက်ရှိသည်ကို တွေ့ရသည်။ 

သောက်သုံးရေကို အကန့်အသတ်ဖြင့်သာ ရရှိခြင်းကြောင့် အပူလျှပ်ခံရမည့် ဘေးအန္တရာယ်နှင့် ကြုံတွေ့နေကြရကြောင်း အာဏာပိုင်များက ပြောကြားသည်။ ထို့ပြင် လက်ဆေးကြောခြင်းနှင့် တစ်ကိုယ်ရေသန့်ရှင်းရေးအတွက် ရေကောင်းရေသန့် မရရှိခြင်းကြောင့် ကူးစက်ရောဂါများ ဖြစ်ပွားမည်ကိုလည်း ၎င်းတို့က စိုးရိမ်လျက်ရှိသည်။ 

“ရေမှာမရှိဘဲ ကျွန်တော်တို့ ဘာသန့်ရှင်းရေးမှလုပ်လို့မရပါဘူး။ ဘာမှလည်း လျှော်ဖွပ်လို့မရဘူး”ဟု ရေဘေးဒုက္ခသည် တစ်ဦးက NHK သို့ ပြောကြားသည်။ 

ဂျပန်အစိုးရကမူ သဘာဝဘေးအန္တရာယ်သင့်သည့် နေရာများသို့ ရေသယ်ဆောင်သည့် ထရပ်ကားများစေလွှတ်လျက်ရှိသော်လည်း ရေရရှိမှုမှာအနည်းငယ်မျှသာ သို့မဟုတ် အကန့်အသတ်ဖြင့်သာဖြစ်သည်။ 

ရုပ်သံမီဒီယာများ၏ ထုတ်လွှင့်မှုတွင် အင်အားအလုံးအရင်းဖြင့်ဝင်ရောက်လာသော ရေလှိုင်းလုံးကြီးများကြောင့် အဆောက်အအုံများနှင့် မော်တော်ကားများ မျောပါသွားပုံများကို တွေ့မြင်ရသည်။ 

လက်ရှိအနေအထားတွင် စစ်ဘက်၊ ရဲဘက်နှင့် မီးသတ်ဌာနမှ အမှုထမ်း ၇၀၀၀၀ ကျော်ခန့်က ပြိုကျပျက်စီးနေသော အဆောက်အအုံများအောက်တွင် ပိတ်မိနေနိုင်သူများနှင့် ပျောက်ဆုံးသူများကို ရှာဖွေလျက်ရှိသည်။ 

အချို့သောမြို့ငယ် သို့မဟုတ် ကျေးရွာများတွင် နေအိမ်အများစုမှာ ရွှံ့ဗွက်များအောက်သို့ နစ်ဝင်သွားခြင်းကြောင့် ရှာဖွေမှုလုပ်ငန်းများ လုပ်ဆောင်ရာတွင် အခက်အခဲများစွာရှိကြောင်း အာဏာပိုင်များက ပြောကြားသည်။  

F-01



FOLLOW US