News

POST TAGGED AS

ဧရာဝတီတိုင်း

31-Dec-2017

အစိုးရ စပိန်
ကတ်တလန်လွှတ်တော်ကို ဇန်နဝါရီ ၁၇ ရက်တွင် ခေါ်ယူဖွဲ့စည်းရန် စပိန်ဝန်ကြီးချုပ် တောင်းဆို

မက်ဒရစ်၊ ဒီဇင်ဘာ ၃၀ 

ကတ်တလန် လွှတ်တော်သစ်၏ ပထမဆုံးအစည်းအဝေးကို ဇန်နဝါရီ ၁၇ ရက်တွင် ခေါ်ယူရန် စပိန်ဝန်ကြီးချုပ်က သောကြာနေ့တွင် ပြောကြားလိုက်ရာ တရားမဝင် လွတ်လပ်ရေးကြေညာမှုကြောင့် ဒေသန္တရအစိုးရဟောင်းကို ဖျက်သိမ်းပြီးနောက်တွင် ပေါ်ထွက်လာမည့် အစိုးရသစ်ကို ထပ်မံသတိပေးလိုက်ခြင်း ဖြစ်သည်ဟု Reuters သတင်းတွင် ဖော်ပြထားသည်။

အစိုးရသစ်ထွက်ပေါ်လာရန် လအတန်ကြာ အချိန်ယူရဦးမည်ဖြစ်သော်လည်း ပါလီမန် ဖွဲ့စည်းပြီးသည်နှင့်တစ်ပြိုင်နက် အစိုးရသစ်အတွက် အလားအလာရှိသည့် ခေါင်းဆောင်များက ယုံကြည်စိတ်ချရမှု မဲပေးပွဲအတွက် ကိုယ်တိုင် အမည်တင်သွင်းကြရမည် ဖြစ်သည်။

ဝန်ကြီးချုပ်ရာဟွိုင်းက နှစ်ဟောင်းကုန် မိန့်ခွန်းပြောကြားရာတွင် “ကတ်တလန်တစ်ဝက်မဟုတ်ဘဲ အကုန်လုံးကို ကိုယ်စားပြုပြီး ဆွေးနွေးနိုင်မယ့် ကတ်တလန်အစိုးရသစ်ကို မကြာမီအတွင်း ရရှိနိုင်မယ်လို့ မျှော်လင့်ပါတယ်”ဟု ပြောဆိုသည်။

ကတ်တလန် လွတ်လပ်ရေးလှုပ်ရှားမှုကို ထိန်းချုပ်ကာ စပိန်၏ နောက်ဆုံးနှင့်  အဆိုးဆုံးနိုင်ငံရေးပဋိပက္ခကို ဖြေရှင်းနိုင်ရန် မျှော်လင့်ထားသည့် ဒီဇင်ဘာလ ရွေးကောက်ပွဲများအပြီးတွင် ဝန်ကြီးချုပ်ရာဟွိုင်း၏ မှတ်ချက်စကားများ ပေါ်ထွက်လာခြင်းဖြစ်သည်။

ခွဲထွက်ရေးလိုလားသော ပါတီများအစုသည် ရွေးကောက်ပွဲတွင် ခပ်ပါးပါး အသာစီးရထားသော်လည်း ခေါင်းဆောင် ပူဒီမောင့်မှာ ဘရပ်ဆဲလ်တွင် တိမ်းရှောင်နေရပြီးနောက် ခေါင်းဆောင်တစ်ဦးဖြစ်သူ အိုရီယော်ဂျန်ကွာရပ်စ်မှာလည်း အချုပ်ထဲတွင် ထိန်းသိမ်းခံနေရသောကြောင့် အစိုးရဖွဲ့နိုင်ရေးကို ရုန်းကန်ရဖွယ် အနေအထားရှိနေသည်။

ပိတ်ပင်ထားသော ဆန္ဒခံယူပွဲအပြီး လွတ်လပ်ရေးကြေညာခဲ့သောကြောင့်  ၎င်းတို့နှစ်ဦးကို ဝန်ကြီးချုပ်ရာဟွိုင်းက ဖမ်းဆီးခဲ့ခြင်းဖြစ်သည်။

ကတ်တလန်ရွေးကောက်ပွဲတွင် ၎င်း၏ ပါတီအခြေမလှသူ ဝန်ကြီးချုပ်ရာဟွိုင်းက “စပိန်စီးပွားရေးအပေါ်မှာ ရှိနေတဲ့ တစ်ခုတည်းသော လောင်းရိပ်က ကတ်တလန် နိုင်ငံရေးပြဿနာပါပဲ”ဟု မက်ဒရစ်စံအိမ်မှ မိန့်ခွန်းခြွေသည်။

စပိန်စီးပွားရေး၏ ငါးပုံတစ်ပုံရှိသော ကတ်တလိုးနီးယားဒေသ၏ နိုင်ငံရေး မတည်ငြိမ်မှုသည် ခရီးသွားဧည့်သည်များကိုပါ လျော့ကျသွားစေပြီး ကုမ္ပဏီပေါင်း ၃၀၀၀ ကျော်ကို အကျပ်ရိုက်စေခဲ့သည်။ ဒေသတွင်း အကြီးဆုံးဘဏ်နှစ်ခုမှာလည်း ကတ်တလန်မှ ရုံးချုပ်များကို နေရာရွှေ့ခဲ့ရသည်။

စပိန်နှင့် ဆက်လက်ပေါင်းစည်းရေးကို လိုလားသော အင်းနက်စ်အေရီမာဒတ်စ်၏ ဆစ်ဒါဒါနော့စ်ပါတီမှာ အမတ်နေရာ အများဆုံးအနိုင်ရခဲ့သော်လည်း အစိုးရဖွဲ့နိုင်လောက်သည့် ရာခိုင်နှုန်းကို မရခဲ့ပေ။ ထို့ကြောင့် ဘရပ်ဆယ်ရောက် ပူဒီမောင့်  အာဏာပြန်ရနိုင်သလားဆိုသော မေးခွန်းများ ထွက်ပေါ်လာစေသည်။

F-04



FOLLOW US