News

POST TAGGED AS

ဧရာဝတီတိုင်း

ဂေါ်ရန်ဂျီကျွန်းဒေသ လူထုအခြေပြု ခရီးသွားလုပ်ငန်း ဖော်ဆောင်ရန် စီစဉ်

ပုသိမ်၊ အောက်တိုဘာ ၃၀

ဧရာဝတီတိုင်းဒေသကြီး၊ ပုသိမ်ခရိုင်၊ ငပုတောမြို့နယ်၊ ငရုတ်ကောင်းကမ်းခြေမြို့ရှိ ဂေါ်ရန်ဂျီကျွန်းဒေသတွင် လူထုအခြေပြု ခရီးသွားလုပ်ငန်း အကောင်အထည်ဖော်ရန် အဆိုပြုလွှာကို ငရုတ်ကောင်း အနောက်ဘက် ကမ်းခြေဒေသခံများက ဧရာဝတီ တိုင်းဒေသကြီး အစိုးရအဖွဲ့သို့ တင်ပြထားကြောင်း ဧရာဝတီ တိုင်းဒေသကြီး၊ ဟိုတယ်နှင့် ခရီးသွား ညွှန်ကြားမှု ဦးစီးဌာနထံမှ စုံစမ်းသိရှိရသည်။ 

ငရုတ်ကောင်း (အနောက်ဘက် ကမ်းခြေ) ဒေသခံများနှင့် Another Development (AD) အဖွဲ့တို့ ပူးပေါင်း ရေးဆွဲထားသော ဂေါ်ရန်ဂျီကျွန်းဒေသ လူထုအခြေပြု ခရီးသွားလုပ်ငန်း အဆိုပြုလွှာနှင့် ဂေါ်ရန်ဂျီကျွန်းဒေသ သုတေသန စာတမ်းလေ့လာ ဆန်းစစ်ချက်ကို တင်ပြထားခြင်းဖြစ်ကြောင်း အဆိုပါဌာန ဒုတိယ ညွှန်ကြားရေးမှူး ဦးဇော်လင်းထွန်းက ပြောကြားသည်။

ယင်းသို့ တင်ပြထားရာတွင် တိုင်းအစိုးရအဖွဲ့၏ သဘောတူညီချက် ရရှိပါက ပြည်ထောင်စု ဝန်ကြီးဌာနသို့ ဆက်လက်တင်ပြမည်ဖြစ်ကာ ပြီးဆုံးပါက အဆိုပါဒေသတွင်း လိုအပ်သည့်သင်တန်းများနှင့် အသိပညာပေး လုပ်ငန်းများကို ဆောင်ရွက်မည်ဖြစ်ကြောင်း ၎င်းက ပြောဆိုသည်။

“လမ်းတွေ မကောင်းဘူးဆိုပေမယ့် တရားဝင်ဖြစ်သွားပြီဆိုရင် လမ်းကိစ္စ၊ မီးပိုင်းဆိုင်ရာတွေ၊ ကျန်းမာရေးဆိုင်ရာ ဆေးပေးခန်းတွေ ဖြစ်လာမှာပါ။ အခုလည်း ဧည့်သည်တွေ လာနေပါတယ်။ စနစ်တကျဖြစ်ဖို့ပဲ လိုအပ်တာပါ။ ဒါကလည်း တရားဝင်ဖြစ်တာနဲ့ တစ်နှစ်အတွင်း ဆောင်ရွက်သွားမှာပါ”ဟု ၎င်းက ရှင်းပြသည်။

လူထုအခြေပြု ခရီးသွားလုပ်ငန်းသည် အသက်မွေးဝမ်းကျောင်း လုပ်ငန်းများ ရေရှည်တည်တံ့ရေး၊ ဓလေ့ထုံးတမ်းများ၊ အမွေအနှစ်နှင့် သဘာဝ အရင်းအမြစ်များကို အကာအကွယ်ပေးခြင်း စသည်တို့ကို ကူညီဆောင်ရွက်ပေးခြင်းဖြင့် ဒေသခံများ လူနေမှုဘဝ ဖွံ့ဖြိုးတိုးတက်ရေးကို အကျိုးပြုနိုင်သည့် ရပ်ရွာအဆင့်တွင် တည်ထောင်ထားရှိသော ဒေသခံများ ပိုင်ဆိုင်သော ကိုယ်တိုင် လည်ပတ်စီမံဆွေးနွေးနိုင်သည့် ခရီးသွားလုပ်ငန်း အမျိုးအစားဖြစ်ကြောင်း Another Development (AD) အဖွဲ့ထံမှ သိရသည်။

ယင်းဒေသသည် လမ်းပန်းဆက်သွယ်ရေး ကောင်းမွန်ရန်လိုအပ်ပြီး ငရုတ်ကောင်းကမ်းခြေမှာ မိုင်တစ်ရာခန့် ရှိနေသဖြင့် ငရုတ်ကောင်း ရဲစခန်းတစ်ခုတည်းသာရှိနေရာ နိုင်ငံခြားသား ခရီးသည်များအတွက် ရဲစခန်းရှိသည့်နေရာ၌သာ ညအိပ်ရသည့်အတွက် ဒေသခံများ၏ ပုံမှန်လုပ်ငန်း လူမှုဘဝ အခြေအနေကို လေ့လာလိုသည့် ဧည့်သည်များအနေနှင့် အဆင်မပြေမှုများရှိရာ နည်းလမ်းရှာရန် လိုအပ်ကြောင်း အနောက်ဘက်ကမ်းခြေလူထု အခြေပြုခရီးသွားလုပ်ငန်း တိုးတက်ရေး ဗဟိုကော်မတီဝင် ဦးဝင်းစိုးက ပြောကြားသည်။

“ဒေသတွင်း သဘာဝ အခြေအနေတွေ မပျက်စီးဘူး။ ဒေသခံတွေရဲ့ ယဉ်ကျေးမှုဓလေ့ လူမှုဘဝဖြစ်စဉ်တွေ၊ ထုတ်ကုန်တွေ ဖြန့်ဖြူးဖလှယ်နိုင်မယ်။ လုပ်ငန်းရှင်တွေသာ အကျိုးရှိနိုင်တဲ့ ခရီးသွားလုပ်ငန်းမျိုး မဟုတ်ဘဲ ဒေသခံတွေရဲ့ လူသား အရင်းအမြစ် ဖွံ့ဖြိုးလာမယ့် ခရီးသွားလုပ်ငန်းမျိုးမို့လို့ အမြန်အကောင်အထည် ဖော်စေချင်တယ်”ဟု ငရုတ်ကောင်းဒေသခံ ကျောင်းဆရာ ဦးထွန်းထွန်းက အကြံပြုသည်။

ဧရာဝတီ တိုင်းဒေသကြီးအတွင်း ပင်လယ်ကမ်းခြေ အပန်းဖြေ စခန်းများရှိသည့် ချောင်းသာ၊ ငွေဆောင်၊ ရွှေသောင်ယံ ကမ်းခြေမြို့များ ကဲ့သိုပင် ငရုတ်ကောင်းကမ်းခြေ ဂေါ်ရန်ဂျီကျွန်းဒေသသည်လည်း ဒေသတွင်း မပျက်စီးသေးသည့် သဘာဝ အခြေအနေများနှင့် လှပထူးဆန်းသော ကျောက်ဆောင် ကျွန်းစုငယ်များ တည်ရှိနေခြင်းကြောင့် လာရောက် လည်ပတ်သည့် ခရီးသည်များ နှစ်စဉ် တိုးလာလျက်ရှိကြောင်း ဒေသခံများ အပါအဝင် ဟိုတယ်နှင့် ခရီးသွားလာရေး ဝန်ကြီးဌာနထံမှ သိရသည်။

R-12



FOLLOW US