News

POST TAGGED AS

ဦးဖြိုးမင်းသိန်း

ကျူးကျော်စာရင်း ပါသူများကို ကျူးကျော်အစစ်အမှန် ဟုတ်၊ မဟုတ် ပြန်လည်စိစစ်မည်ဟု ဝန်ကြီးချုပ်ဆို
ရန်ကုန်၊ ဇွန် ၁၀

ရန်ကုန်တိုင်းအတွင်း နေထိုင်လျက်ရှိသည့် ကျူးကျော်နေထိုင်သူစာရင်း ကောက်ယူရာတွင် မှန်းထားသည့် အရေအတွက်ထက် ကောက်ယူထားပြီး ဖြစ်သည့် စာရင်းမှာ ပိုမိုများပြားနေသဖြင့် အားလုံးကို ပြန်လည်စိစစ်မည် ဖြစ်ကြောင်း တိုင်းဝန်ကြီးချုပ် ဦးဖြိုးမင်းသိန်းက ပြောကြားသည်။

“မှန်းထားတဲ့ ကျူးကျော်စာရင်းက သုံးသိန်းကျော်လောက်ပဲ။ အခုစာရင်းကောက်ယူပြီးသားက လေးသိန်းကျော် ဖြစ်နေတယ်။ ဒါကို နိုင်ငံတကာ အဖွဲ့အစည်းနဲ့ ပူးပေါင်းပြီး ကျူးကျော်အစစ်အမှန် ဟုတ်၊ မဟုတ် ပြန်စစ်မယ်” ဟု ဦးဖြိုးမင်းသိန်းက ဆိုသည်။

ဇွန်လ ၉ ရက်၊ တိုင်းအစိုးရရုံး၌ အစိုးရအဖွဲ့၏ တစ်နှစ်တာ ဆောင်ရွက်မှု ရှင်းတမ်းပြုလုပ်သည့် စာနယ်ဇင်း တွေ့ဆုံပွဲတွင် တိုင်းဝန်ကြီးချုပ်က ပြောကြားခဲ့ခြင်း ဖြစ်သည်။

ယင်းကဲ့သို့ ဝန်ကြီးချုပ်က ပြောကြားလိုက်သော်လည်း လက်ရှိ စာရင်းကောက်ယူရေးနှင့် ပတ်သက်၍ ဆက်လက်ကောက်ခံနေဆဲဖြစ်ပြီး ကျူးကျော်စာရင်း ကောက်ခံရရှိထားမှု စာရင်းကို ပြန်လည်စိစစ်ရမည် ဆိုသည်ကို ထောက်ခံကြောင်း ဒဂုံမြို့သစ် (တောင်ပိုင်း) မဲဆန္ဒနယ် အမှတ် (၁) လွှတ်တော်ကိုယ်စားလှယ် ဦးညီညီက ပြောကြားသည်။

“အခုချိန်ထိလည်း ဆက်ကောက်နေတယ်။ ဝန်ကြီးချုပ် ပြောသွားတာက မြို့နယ်တိုင်းမှာလိုလို တကယ်ကို ကျူးအဖြစ် သတ်မှတ်တဲ့သူတွေ အများကြီး ရှိသလို တချို့မှာ ကျူးအဖြစ် သတ်မှတ်လို့ မရတာတွေကို စလစ်တွေ ပေးထားတာ တွေ့နေရတယ်။ ကျိန်းသေတာကတော့ ပြန်လည်စိစစ်ဖို့ မလွဲမသွေ လိုအပ်နေတယ်လို့ ပြောချင်တယ်” ဟု ၎င်းက ဆိုသည်။

မကြာသေးခင်က စမတ်ကတ်များကို ဝယ်ယူခြင်း၊ ပေါင်နှံခြင်းများ ဆောင်ရွက်ရန် ကြံဆောင်မှု အခြေအနေ ရှိခဲ့ပြီး ၎င်းတို့ထံသို့လည်း ရောင်းချခြင်း ရှိ၊ မရှိ မေးမြန်းမှုများ ရှိခဲ့ကာ လက်ရှိတွင် အဆိုပါကိစ္စများ ရပ်တန့်နေကြောင်း ၎င်းက ဆက်လက်ပြောကြားသည်။

ရန်ကုန်တိုင်းဒေသကြီး ဖွံ့ဖြိုးရေး သုတေသန စီမံကိန်းအရ ကျူးကျော်နေထိုင်သူများ ဖြစ်ကြောင်း အသိအမှတ်ပြု စမတ်ကတ်များ ထုတ်ပေးရာတွင် အဖွဲ့ပေါင်း ရှစ်ဖွဲ့ဖြင့် ထုတ်ပေးနေခြင်း ဖြစ်ကြောင်း ကျူးကျော်စာရင်း ကောက်ယူရေးအဖွဲ့ထံမှ သိရသည်။

ယခုလက်ရှိတွင် ၁၃ မြို့နယ်မှ ကျူးကျော်နေထိုင်သူများကို စမတ်ကတ် ထုတ်ပေးပြီး ဆက်လက်၍ တောင်ဥက္ကလာပ၊ ကော့မှူး၊ ထန်းတပင်၊ တိုက်ကြီး၊ လှည်းကူး မြို့နယ်များ အပါအဝင် ၁၄ မြို့နယ်တို့တွင် စမတ်ကတ် ထပ်မံထုတ်ပေးသွားရန် စီစဉ်နေခြင်း ဖြစ်ကြောင်း ကျူးကျော်စာရင်း ကောက်ယူရေးအဖွဲ့ထံမှ သိရသည်။

ကျူးကျော်စာရင်း ကောက်ယူမှုကို ကနဦးစီမံချက် (Pilot Project) အရ ၂၀၁၆ ခုနှစ် စက်တင်ဘာလမှ စတင်ကောက်ယူခဲ့ပြီး ရန်ကုန်တိုင်းဒေသကြီး ခရိုင်လေးခုအတွင်း တရားမဝင် နေထိုင်သည့် ကျူးကျော်အိမ်ခြေ ၁၀၅၄၄၉၊ အိမ်ထောင်စု ၁၆၇၇၃၈ စုရှိကာ ကျူးကျော်နေထိုင်သူဦးရေ ၄၃၁၀၅၀ ခန့် ရှိကြောင်း ရန်ကုန်တိုင်းဒေသကြီး အစိုးရအဖွဲ့ထံမှ သိရသည်။

ဓာတ်ပုံ - Phyo Min Thein (Facebook)

J-06




FOLLOW US