News

POST TAGGED AS

ဥက္ကဋ္ဌ

နိုင်ငံတော်သမ္မတနှင့် ပြည်သူ့လွှတ်တော်ဥက္ကဋ္ဌ တစ်ပြိုင်တည်း ရာထူးမှ နုတ်ထွက်

ရန်ကုန်၊ မတ် ၂၁

နိုင်ငံတော် သမ္မတ ဦးထင်ကျော် သမ္မတရာထူးမှ နုတ်ထွက်လိုက်ပြီဟု နိုင်ငံတော်သမ္မတရုံးက မတ်လ ၂၁ ရက်နေ့ နံနက်က ကြေညာခဲ့သလို ပြည်သူ့လွှတ်တော်တွင်လည်း လွှတ်တော်ဥက္ကဋ္ဌ ဦးဝင်းမြင့် ရာထူးမှနုတ်ထွက်ကြောင်း ကြေညာခဲ့သည်။

ဦးထင်ကျော်သည် လက်ရှိ အလုပ်တာဝန်များမှ အနားယူလိုသောကြောင့် နုတ်ထွက်ရခြင်းဖြစ်ကြောင်း သမ္မတရုံး၏ကြေညာချက်တွင် ဖော်ပြထားသည်။

ဦးထင်ကျော် နိုင်ငံတော်သမ္မတ ရာထူးမှနုတ်ထွက်ကြောင်း ကြေညာအပြီး နာရီပိုင်းအကြာတွင် ပြည်သူ့လွှတ်တော် အစည်းအဝေး၌ ဦးဝင်းမြင့် လွှတ်တော်ဥက္ကဋ္ဌရာထူးမှ နုတ်ထွက်ကြောင်း လွှတ်တော် ဒုဥက္ကဋ္ဌ ဦးတီခွန်မြတ်က ကြေညာလိုက်ခြင်းဖြစ်သည်။

တစ်ပြိုင်တည်းတွင် ဦးဝင်းမြင့်ကို နိုင်ငံတော်သမ္မတအဖြစ် လျာထားကြောင်း သတင်းများလည်း ပိုမိုထွက်ပေါ်လာသည်။ ဦးဝင်းမြင့်မှာ လက်ရှိပြည်သူ့လွှတ်တော်ကို အကောင်းဆုံး ထိန်းကျောင်းနိုင်၍ ဥပဒေပြုရေးအပိုင်းကို ပိုင်နိုင်ကျွမ်းကျင်သူအဖြစ်လည်း နာမည်ကောင်းထွက်နေသူဖြစ်သည်။

သမ္မတရုံး၏ ထုတ်ပြန်ချက်တွင် လစ်လပ်သွားသည့် သမ္မတရာထူးကို ဖွဲ့စည်းပုံအခြေခံဥပဒေ ပုဒ်မ (၇၃) ပုဒ်မခွဲ (ခ) နှင့်အညီ အလုပ်လုပ်ရက် ခုနှစ်အတွင်း ဖြည့်စွက်နိုင်ရေးအတွက် ဆက်လက် ဆောင်ရွက်သွားမည်ဖြစ်ကြောင်း သတင်းထုတ်ပြန်ခဲ့သည်။

မြန်မာနိုင်ငံသမိုင်းတွင် လွှတ်တော်ဥက္ကဋ္ဌနှင့် နိုင်ငံတော်သမ္မတ တစ်ရက်တည်း နုတ်ထွက်ခြင်းမှာ ယခုအကြိမ် ပထမဆုံးဖြစ်ပြီး ၂၀၀၈ ဖွဲ့စည်းပုံအခြေခံဥပဒေအရ ပေါ်ပေါက်လာသော အစိုးရများအနေနှင့်လည်း ပထမဆုံး နုတ်ထွက်သည့်သမ္မတနှင့် ပြည်သူ့လွှတ်တော် ဥက္ကဋ္ဌလည်းဖြစ်လာသည်။

သမ္မတဦးထင်ကျော်သည် မြန်မာနိုင်ငံ လွတ်လပ်ရေး ရပြီးနောက် တင်မြှောက်ခံရသော သမ္မတများတွင် ကိုးဦးမြောက် နိုင်ငံတော်သမ္မတတစ်ဦးလည်းဖြစ်ပြီး ယခုလစ်လပ်သမ္မတနေရာတွင် ထပ်မံ တင်မြှောက်မည့်သူမှာ မြန်မာနိုင်ငံ၏ ၁၀ ယောက်မြောက် သမ္မတဖြစ်လာမည်ဖြစ်သည်။

လက်ရှိတွင် နုတ်ထွက်သွားသည့် ဦးထင်ကျော်နေရာတွင် ဖွဲ့စည်းပုံ အခြေခံဥပဒေအရ ဒုတိယ သမ္မတ (၁) ဦးမြင့်ဆွေကို ယာယီသမ္မတအဖြစ် တာဝန်ပေးအပ်ထားကြောင်း ပြည်ထောင်စုအစိုးရအဖွဲ့ ပြောရေးဆိုခွင့်ရှိသူ ဦးဇော်ဌေးက ပြောကြားသည်။

“နုတ်ထွက်ရတဲ့ အကြောင်းရင်းကတော့ ကျွန်တော်တို့ ထုတ်ပြန်ထားတဲ့အတိုင်းပါပဲ။ လက်ရှိယာယီ သမ္မတက ဦးမြင့်ဆွေ၊ ဦးမြင့်ဆွေကနေမှ လွှတ်တော်ကို သဝဏ်လွှာပို့ပြီးတော့ လုပ်ဆောင်သွားမယ်”ဟု ၎င်းကဆိုသည်။

ယာယီသမ္မတအဖြစ် တာဝန်ယူရမည့် ဒုတိယသမ္မတ ဦးမြင့်ဆွေသည် မတ်လ ၁၅ရက်နေ့မှ ၂၀ ရက်နေ့အထိ မော်ရိုကို နိုင်ငံ၌ကျင်းပနေသည့် Crans  Montana Forum on Africa and South-South Cooperation အစည်းအဝေးကို တက်ရောက်နေပြီး မြန်မာနိုင်ငံ ပြန်ရောက်ခြင်း မရှိသေးပေ။

နိုင်ငံတော် ဖွဲ့စည်းပုံ အခြေခံဥပဒေ ပုဒ်မ ၇၃ တွင် နိုင်ငံတော်သမ္မတမှ ရာထူးသက်တမ်းမကုန်မီ နုတ်ထွက်ပါက လစ်လပ်သမ္မတ ရာထူးနှစ်နေရာတွင် သမ္မတရွေးချယ်စဉ်က ဒုတိယ မဲအများဆုံး ရရှိသည့် ဒုတိယ သမ္မတက ယာယီသမ္မတအဖြစ် ထမ်းဆောင်ရမည်ဖြစ်ကြောင်း ပြဋ္ဌာန်းထားပြီး အဆိုပါလစ်လပ်သွားသည့်အချိန်သည် ပြည်ထောင်စုလွှတ်တော် အစည်းအဝေး ကျင်းပနေချိန်ဖြစ်လျှင် လစ်လပ်သွားသည့် သမ္မတရာထူးကို ခုနစ်ရက်အတွင်း ဖြည့်စွက်နိုင်ရေးကို ယာယီသမ္မတက ပြည်ထောင်စုလွှတ်တော်သို့ အကြောင်းကြားရမည်ဟု ပြဋ္ဌာန်းထားသည်။

ယင်းသို့ အကြောင်းကြားပြီးနောက် သက်ဆိုင်ရာ လွှတ်တော်ကိုယ်စားလှယ်အစုအဖွဲ့က ဒုတိယသမ္မတတစ်ဦးကို ထပ်မံ ရွေးချယ်တင်မြှောက်ကာ ပြည်ထောင်စု လွှတ်တော်ကိုယ်စားလှယ် အားလုံးပါဝင်သည့် သမ္မတရွေးချယ်တင်မြှောက်ရေးအဖွဲ့က ဒုတိယသမ္မတ သုံးဦးအနက် နိုင်ငံတော်သမ္မတတစ်ဦးကို ရွေးချယ်တင်မြှောက်ရမည်ဖြစ်သည်။

ယင်းကြောင့် ဦးထင်ကျော်ကို ရွေးချယ်ခဲ့သည် ပြည်သူ့လွှတ်တော် အစုအဖွဲ့ကပင် ဒုတိယသမ္မတတစ်ဦးကို ထပ်မံရွေးချယ်တင်သွင်းရမည်ဖြစ်ပြီး သမ္မတရွေးချယ်တင်မြှောက်ရေးအဖွဲ့က ဒုတိယသမ္မတ သုံးဦးအနက် နိုင်ငံတော်သမ္မတကို ပြန်လည် ရွေးချယ်တင်မြှောက်ရမည်ဖြစ်သည်။

သမ္မတ ဦးထင်ကျော်သည် နိုင်ငံတော် သမ္မတရာထူးကို ပြီးခဲ့သည့် ၂၀၁၆ မတ်လ ၃၁ ရက်နေ့က ရယူခဲ့ခြင်းဖြစ်ပြီး သမ္မတ သက်တမ်းနှစ်နှစ်အကြာတွင် ယင်းသို့ သမ္မတရာထူးက နုတ်ထွက်သွားခဲ့ခြင်းဖြစ်သည်။

ဦးထင်ကျော်သည် ၂၀၁၀ ရွေးကောက်ပွဲအပြီး နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နေအိမ် အကျယ်ချုပ်က လွတ်မြောက်ချိန်တွင် လူထုနှင့် ပထမဦးဆုံး မိန့်ခွန်းပြောချိန် ဒေါ်အောင်ဆန်းစုကြည်ဘေး ရှိနေခဲ့သူဖြစ်ပြီး ဒေါ်အောင်ဆန်းစုကြည်၏ ကာလရှည်ကြာ ယုံကြည်စိတ်ချခဲ့သူလည်းဖြစ်သည်။

ဦးထင်ကျော်၏ ဖခင်ဖြစ်သူသည် ခေတ်စမ်းစာပေ ဦးဆောင်ခဲ့သူ စာရေးဆရာ၊ ကဗျာဆရာ မင်းသုဝဏ်ဖြစ်ပြီး ဦးထင်ကျော်ကိုယ်တိုင်လည်း စာပေသမားတစ်ဦးဖြစ်ကာ ဒလဘန်းကလောင်ဖြင့် စာပေများ ရေးသားခဲ့သည်။

J-08



FOLLOW US