News

POST TAGGED AS

အမေရိကန်

အရေးယူပိတ်ဆို့မှုများ ဖြုတ်သိမ်းရေး အမေရိကန်ခရီး
အရေးယူ ပိတ်ဆို့မှုများ ဖြုတ်သိမ်းအောင် တွန်းအားပေးရေးသည် ဒေါ်အောင်ဆန်းစုကြည်၏ အမေရိက ခရီးစဉ်တွင် အဓိက မူဝါဒ ရည်မှန်းချက် ဖြစ်စေချင်ပါသည်။ စီးပွားရေး၏ အခြားနေရာများတွင် ပျော့ကွက်များစွာ ရှိသော မြန်မာတို့အတွက် အရေးယူ ပိတ်ဆို့မှုများသည် နူရာဝဲစွဲ၊ လဲရာသူခိုးထောင်း၊ မြန်မာ့စီးပွားရေးကို ပျံချင်တိုင်း မပျံနုိုင်အောင် အတောင်ညှပ်ထားသည့်နှယ်။ နိုင်ငံ့စီးပွားရေးသည် အစိုးရသစ် တက်ကတည်းက ထုံထိုင်းအုံ့မှိုင်းနေရာ အရေးယူပိတ်ဆို့မှုများ ရုပ်သိမ်းအောင် အောင်မြင်စွာ တွန်းအားပေးနိုင်လျှင် စီးပွားရေး ပြန်တက်ကြွလာနိုင်သည်။ စီးပွားရေးပိုင်းတွင် တရုတ်ကို မှီခိုရမှုကိုလည်း လျှော့ချနိုင်မည်။

အရေးကြီးသည်မှာ အိုဘားမားသက်တမ်း မကုန်ခင် အရေးယူပိတ်ဆို့မှုများ ဖြုတ်ပစ်ရမည်။ မဖြုတ်နိုင်လျှင် နောက်အစိုးရ အသားကျသည်အထိ စောင့်ရမည်။ ထိုအတောအတွင်း မြန်မာ့စီးပွားရေးမှာ နာနေဦးမည်။

အရေးယူပိတ်ဆို့မှုများ ထပ်မံလျှော့ချခြင်းကို အမေရိကန်ပြည်ထောင်စု ခရီးစဉ်အတွင်း ကြေညာမည်ဟု သဘောပေါက်သော်လည်း အပြီးအပိုင် ရုပ်သိမ်းခြင်းကို တွန်းနိုင်ရန် လိုသည်။ သို့မဟုတ်လျှင် အရေးယူပိတ်ဆို့မှုများသည် နိုင်ငံကို လက်တွေ့ခေါင်းဆောင်နေသော ဒေါ်အောင်ဆန်းစုကြည် စီးပွားရေး တိုးတက်အောင် မလုပ်နိုင်စေရန် သူ့ကို ရည်ရွယ်ချမှတ်ထားသလို ဖြစ်နေသည်။ Targeted sanctions at Daw Aung San Suu Kyi။ 

မြန်မာနိုင်ငံအပေါ် အရေးယူ ပိတ်ဆို့မှုများကို ဒေါ်အောင်ဆန်းစုကြည်ကသာ ဖြုတ်ပေးရန် ပြောလျှင် လွှတ်တော်နှင့် အစိုးရ အပါအဝင် အမေရိကန် ခေါင်းဆောင်များက ငြင်းရန်ခက်ပါသည်။ ဒေါ်အောင်ဆန်းစုကြည်သည် မြန်မာ့စီးပွားရေးကို တိုးတက်စေလိုသော ပုဂ္ဂိုလ်ဖြစ်သော်လည်း အရေးယူပိတ်ဆို့မှုများကြောင့် မြန်မာ့စီးပွားရေး အထိနာစေကြောင်း သဘောပေါက်မှသာ  အားသွန်ခွန်စိုက်တွန်းမည် ဖြစ်သည်။ ဒေါ်အောင်ဆန်းစုကြည်ကို ဗဟိုပြုပြီး  တိုင်းပြည်လည်ပတ်နေသည့်အတွက် သူသည် အလုပ်များလှပြီး အရေးယူပိတ်ဆို့မှုများ ကိစ္စ အချိန်ယူ စဉ်းစားနိုင်မည် မဟုတ်။ ထို့ကြောင့် ဒေါ်အောင်ဆန်းစုကြည်ကို စီးပွားရေးတွင် အကြံပေးနေသော ပုဂ္ဂိုလ်များ၏ အခန်းကဏ္ဍသည် အခရာကျသည်။

စီးပွားရေးကောင်းမှသာ လှည်းနေလှေအောင်း မြင်းဇောင်းမကျန် ပြည်သူအားလုံး ဘဝ တိုးတက်မည်ဖြစ်ရာ မြန်မာနိုင်ငံ တိုးတက်စေရန် မောင်းနှင်သူနေရာ Driver Seat ကို ဒေါ်အောင်ဆန်းစုကြည် ရအပြီးတွင် သူပေးနိုင်သည့် အကောင်းဆုံးအမွေမှာ စီးပွားရေး အခြေခံကောင်းများ ဖြစ်သည်။ ထိုရည်မှန်းချက်တွက် ကန့်လန့်ခံနေသော အရေးယူပိတ်ဆို့မှုများ အမြန်ဆုံး ဖြုတ်သိမ်းမှသာ စီးပွားရေး ပွင့်သွားနိုင်သည်။ Driver Seat ရောက်ရန် ရာစုနှစ် တစ်စိတ်ရုန်းခဲ့ရသည့် ဒေါ်အောင်ဆန်းစုကြည် လက်ထက်တွင် စီးပွားရေးလမ်းမှန်ပေါ် မရောက်လျှင် ထိုနှစ်အစိတ်သည် နှမြောစရာ။ 

အရေးယူ ပိတ်ဆို့မှုများသည် ပစ်မှတ်ထားသော လူအနည်းငယ်၊ အဖွဲ့အစည်း အနည်းငယ်ကိုသာ ထိခိုက်စေသည် ဆိုခြင်းမှာ မဟုတ်ပါ။ အရေးယူခံထားရလျှင် နိုင်ငံ နာမည်ပျက်သည်။ အရေးယူ ပိတ်ဆို့ထားခြင်း ဆိုသည်မှာ ခေါင်းပေါ်တွင် ဓားဝဲနေသည့် သဘော။ ထို့ကြောင့် အချိန်မရွေး ကိုယ့်ခေါင်းပေါ် ဓားပြုတ်ကျလာနိုင်သည့် နိုင်ငံသို့ ရင်းနှီးမြှုပ်နှံသူများ ဝင်ရန်မှာ အခြားသောမက်လုံးများ အဆမတန်ကြီးမှသာ ဖြစ်မည်။ 

အရေးယူ ပိတ်ဆို့မှုများ ရှိနေဆဲ ဖြစ်သဖြင့် နိုင်ငံခြားရင်းနှီးမြှုပ်နှံသူများ နိုင်ငံတစ်နိုင်ငံသို့ ဝင်ရောက်ရန်ကြံလျှင် ထည့်သွင်းတွက်ချက်သော Political Risk မြင့်ကာ ဝင်လိုသူများကို နှစ်ခါသုံးခါ စဉ်းစားသွားစေသည်။ အိမ်နီးချင်း နိုင်ငံများသည်လည်း ကျန် Factor များ အားလုံးပေါင်းတွင်တူလျှင် Sanctions ရှိနေသဖြင့် မြန်မာကို ကျော်သွားကြမည်။ စင်စစ် အမေရိကန်ပြည်ထောင်စုသည် ကမ္ဘာတွင် ဆရာကြီးဖြစ်ရာ ယင်းက စီးပွားရေး ပိတ်ဆို့ထားသည် ဆိုရုံဖြင့် မြန်မာသည် အခြားနိုင်ငံများနှင့်ယှဉ်လျှင် အောက်ကျနောက်ကျ ဖြစ်ရသည်။ လူပုဂ္ဂိုလ်အချို့၊ အဖွဲ့အစည်းအချို့ကိုသာ ပစ်မှတ်ထားသော Targeted Sanctions ဆိုသော်လည်း စီးပွားရေးစနစ်ကြီး တစ်ခုလုံး Ecosystem အတွင်း ယှက်နွယ်ပတ်သက်ချက်အရ ပစ်မှတ်မထားသော ပြည်သူများ၊ အဖွဲ့အစည်းများကိုပါ မလွှဲမရှောင်သာ ထိခိုက်စေသည်။ 

ထိုအရေးယူ ပိတ်ဆို့မှုများကို အပြီးအပြတ် ရုတ်သိမ်းရန် သို့မဟုတ် ထပ်မံလျှော့ချရန် ဒေါ်အောင်ဆန်းစုကြည်၏ အမေရိကန်ပြည်ထောင်စု ခရီးစဉ်အတွင်း တောင်းဆိုနိုင်ပါက မြန်မာနိုင်ငံအပေါ်၊ အထူးသဖြင့် မြန်မာ့စီးပွားရေး အပေါ်တွင် ကြီးမားစွာ အကျိုးသက်ရောက်လိမ့်မည်။ အရေးယူ ပိတ်ဆို့မှုများအပေါ် ဒေါ်အောင်ဆန်းစုကြည်၏ သဘောထားနှင့် အမေရိကန်တို့ကို စည်းရုံးဖျောင်းဖျနိုင်စွမ်းက မြန်မာနိုင်ငံအပေါ် ထားရှိသည့် အရေးယူပိတ်ဆို့မှုများ အပေါ် အဆုံးအဖြတ် ပေးလိမ့်မည်။

တရုတ်မကြောက်မင်း

အမေရိကန်တို့သည် မြန်မာတို့ တရုတ်ကို မှီခိုနေရခြင်းကို လျှော့ချရန် ကူညီမည်ဟု  ယူဆရသော်လည်း အရေးယူ ပိတ်ဆို့မှုများ ဆက်လက်ထားရှိနေခြင်းမှာ အံ့သြစရာ ဖြစ်သည်။ အရေးယူ ပိတ်ဆို့မှုများကြောင့် အမေရိကန်လုပ်ငန်းများ ဝင်ရန် နောက်တွန့်နေသေးလျှင် တရုတ်ဘက်သို့ လိုသည်ထက် ပိုအားကိုးရမည်သာ။ တရုတ်ကုမ္ပဏီများသည် အမေရိကန် ကုမ္ပဏီများကဲ့သို့ မဟုတ်၊ အရေးယူ ပိတ်ဆို့မှုများကို တရုတ်တို့မကြောက်။ ထို့ကြောင့် အရေးယူ ပိတ်ဆို့မှုများသည် တရုတ်ကို မျက်နှာသာပေးသလို ဖြစ်နေသည်။ တရုတ်ကြောက်မင်း မဟုတ်သည့် ဒေါ်အောင်ဆန်းစုကြည် လက်ထက်တွင် တရုတ်ကို မြန်မာသည် စီးပွားရေးအရ မှီခိုခြင်းကို အတိုင်းအတာတစ်ခုထိ လျှော့ချနိုင်အောင် ကြိုးစားမှသာ ဂုဏ်သတင်းနှင့် ညီလိမ့်မည်။

အရေးယူ ပိတ်ဆို့မှုများသည် ချမှတ်ရန် အချိန်ယူရသကဲ့သို့ ဖြုတ်သိမ်းရန်လည်း အချိန်ယူရသည့်အတွက် ဒေါ်အောင်ဆန်းစုကြည် ရှိနေစဉ်၊ အိုဘားမား ရှိနေစဉ်တွင် အရေးယူပိတ်ဆို့မှုများ မရုပ်သိမ်းနိုင်လျင် နောင်တွင်ဖြုတ်ရန် ပိုခက်မည်။ မြန်မာ့စီးပွားရေးလည်း ခံမြဲတိုင်း ခံနေရပေဦးမည်။

ဇေယျသူ



FOLLOW US