News

POST TAGGED AS

အိန္ဒိယ

31-Mar-2018

ပညာရေး အိန္ဒိယ
တစ်နာရီတစ်ယောက် သတ်သေနေသည့် အိန္ဒိယပညာရေး


ပညာရေးဆိုသည်မှာ လူ့ဘောင်အဖွဲ့အစည်း တစ်ခုတွင် တာဝန်ယူမှု တာဝန်ခံမှု အပြည့်အဝရှိရမည့် နေရာတစ်နေရာဖြစ်ပါသည်။ ပညာရေးဆိုသည့် အဖွဲ့အစည်းများ ထူထောင်ထားသည့်နေရာ သို့မဟုတ် ကျောင်းများသည် ကျောင်းသားများကို ပညာပေးရသည့်နေရာ၊ အတွေ့အကြုံ ဗဟုသုတများကို ပေးရသည့်နေရာများလည်း ဖြစ်သည်။ လူ့ဘောင်ဘဝတွင် ရင်ဆိုင်ရမည့် အခက်အခဲများကို ကိုယ်စွမ်း ဉာဏ်စွမ်းရှိသမျှ ဖြေရှင်းပေးနိုင်ရန်အတွက် လေ့ကျင့်ပေးလိုက်ရမည့် နေရာတစ်နေရာလည်းဖြစ်သည်။ ကလေးများကို ပြုစုပျိုးထောင်ရာတွင် ကာယ၊ ဉာဏ၊ စာရိတ္တ၊ မိတ္တ၊ ဘောဂဗလဆိုသည့် ဗလငါးတန်ပြည့်စုံအောင် ဆရာများက တာဝန်ယူကြရမည်ဖြစ်သည်။ 

ပညာရေးတွင် ကလေးများအတွက် စိတ်ပိုင်းဆိုင်ရာ ရင့်ကျက်စေရန် ပျိုးထောင်ပေးရန် ဆရာများတွင် တာဝန်ရှိသည်။ အဘယ်ကြောင့်ဆိုသော် ကလေးများသည် စိတ်ပိုင်းဆိုင်ရာ မရင့်ကျက်သဖြင့် သတ်သေမှုများ ရှိနေကြသောကြောင့်ဖြစ်သည်။ 

အိန္ဒိယနိုင်ငံတွင် အသက် ၄ နှစ်မှ ၁၆ နှစ်အတွင်း ကျောင်းသားများ၏ ၁၂ ရာခိုင်နှုန်းခန့်သည် စိတ်ဝေဒနာများ ခံစားနေကြရကာ တစ်နာရီလျှင် ကျောင်းသားတစ်ဦးနှုန်း သတ်သေနေကြရကြောင်း Economic Times သတင်းတွင် ဖော်ပြထားသည်။ 

ကလေးအများစု၏ ပြဿနာမှာ မိဘများ၏ စီးပွားရေး အဆင်မပြေမှုများနှင့် ဆက်စပ်နေပြီး ဆင်းရဲပြီး လူတန်းစေ့မဝင်နိုင်သည့် ကလေးများမှာ ပညာရေးတွင် စိတ်ဓာတ်ကျခြင်း၊ စိုးရိမ်သောကများ ဖိစီးခြင်း၊ စိတ်ကစဥ့်ကလျားဖြစ်ခြင်းများကိုပါ ရင်ဆိုင်နေကြရပြီး သတ်သေရခြင်း၏ အဓိကကျသည့် အကြောင်းရင်းများလည်း ဖြစ်နေရသည်။ 

စိတ်ဓာတ်ကျခြင်းနှင့် စိတ်ကစဥ့်ကလျားဖြစ်ခြင်း မျိုးရိုးနှင့်လည်း သက်ဆိုင်သည်ဟု ပြောကြသော်လည်း ကလေးများကိုယ်တိုင်က ပတ်ဝန်းကျင်၏ ရိုက်ခတ်မှုကြောင့် သိမ်ငယ်စိတ်များဝင်လာခြင်းကိုမူ မည်သို့မှတားဆီးနိုင်ခြင်းမရှိပေ။ 

ပတ်ဝန်းကျင်၏ စိန်ခေါ်မှုကြောင့် ကလေးများတွင် စိတ်ဓာတ်ကျခြင်းများ ဖြစ်လာနိုင်ပါသည်။ လိင်ခွဲခြားခြင်း၊ လူမျိုးခွဲခြားခြင်း၊ ဘာသာခွဲခြားခြင်း၊ ဇာတ်အနိမ့်အမြင့် ခွဲခြားခြင်း၊ မိသားစု ချမ်းသာမှုအလိုက် အဆင့်အတန်းခွဲခြားခြင်း၊ အသားအရောင်၊ ရုပ်ဆင်းအနေအထား၊ ကိုယ်ခန္ဓာသန်စွမ်းမှုမရှိခြင်း စသည့်ကွာခြားမှုများကြောင့် ဖိနှိပ်ခြင်းများကလည်း ကျောင်းသားများ သတ်သေမှုများအား ဖြစ်ပေါ်စေခဲ့သည်။

မိဘများအနေနှင့် ဖိအားအများဆုံး ပေးနိုင်သည့်ကိစ္စမှာ စာမေးပွဲဖြစ်သည်။ စာမေးပွဲနှင့် ခြိမ်းခြောက်ထားမှုများကြောင့် စာမေးပွဲမအောင်လျှင်၊ အမှတ်ကောင်းကောင်းမရလျှင်ဆိုသည့် ဖိစီးမှုများကလည်း ကလေးများကို အမြဲခြောက်လှန့်လျက်ရှိသည်။ ပိုဆိုးသည်မှာ ကျောင်းများတွင် ကလေးအချင်းချင်း အနိုင်ကျင့် ဗိုလ်ကျမှုများဖြစ်သည်။ ကျောင်းများတွင် ကလေးများ သင်ရခက်ခြင်း၊ ကျောင်းကို စိတ်မဝင်စားခြင်း၊ ဘာသာရပ်ကို စိတ်မဝင်စားခြင်းများသည် သူတို့အပေါ်တွင် ဖိစီးမှုများလွန်းနေသောကြောင့်လည်း ဖြစ်နိုင်သည်။ 

ကျောင်းသားအများတွင် စာမေးပွဲကျလျှင်ဆိုသည့် ဖိစီးမှုက လုပ်ဆောင်နိုင်စွမ်းများကို ကျဆင်းစေသည်။ ဆရာများသည် တပည့်များကို ပွင့်လင်းစွာ တိုင်ပင်ဆွေးနွေးခွင့် မပေးလျှင်လည်း ကြောက်လန့်ပြီး ထင်ရာလုပ်သွားတတ်သည်။ မိဘ၊ ဆရာ၊ ကျောင်းသား သုံးဦး ပေါင်းစည်းနိုင်မှ ကလေးပညာရေးကောင်းမည်ဆိုသည့် သဘောတရားများကို သူတို့မေ့နေကြသည်။ ပေါင်းဆိုသည်မှာ အလကားပေါင်းခိုင်းခြင်းမဟုတ် ကလေးတွေ၏ စိတ်ဓာတ်ရေးရာ ကောင်းမွန်စေရေးအတွက် ပေါင်းစည်းခိုင်းခြင်းဖြစ်သည်။ 

အိန္ဒိယနိုင်ငံတွင် ကလေးတစ်ယောက် စိတ်ဝေဒနာခံစာနေရကြောင်း ပြောလိုက်လျှင် မိဘတွေက လက်မခံချင်ကြပေ။ ဆရာဝန်ထံသွားပြလျှင်လည်း မိမိတို့ကလေးတွင် ဘာမှပြဿနာမရှိလေဟန်၊ ပျော်ရွှင်နေလေဟန် မိဘတွေက ပြောတတ်ကြသဖြင့် ဇာစ်မြစ်ကိုလိုက်ရန် ခက်ခဲလှသည်။

အရေးကြီးသည်မှာ ကျောင်းရှိဆရာများအနေနှင့် ကလေးများ စိတ်ဓာတ်ခိုင်မာစေရန်၊ အခက်အခဲများ ကျော်ဖြတ်နိုင်စေရန်၊ စိတ်သက်သာရစေရန်၊ အချင်းချင်း ဗိုလ်ကျအနှောင့်အယှက်မပေးရန်တို့ကို ထိန်းသိမ်း ညွှန်ပြ ဆိုဆုံးမရန်လည်း လိုအပ်နေသည်။ ကလေးတစ်ယောက်ကို ပြဿနာလုပ်လာသောကြောင့် ကိုယ့်ရှေ့ရောက်လာလျှင် အဘယ်ကြောင့် ထိုပြဿနာဖြစ်ရကြောင်း ရင်းမြစ်ကိုမစူးစမ်းပဲ အပြစ်ပေးခြင်းကို ရှောင်ကြဉ်ရန် အရေးကြီးသည်။ 

ပညာရေးဌာနတွင် တိုင်ပင်ဆွေးနွေး ဝေဖန်အကြံပြုသည့် အခန်းကဏ္ဍတစ်ခုကို ထည့်သွင်းပေးရန် လိုအပ်နေပြီဖြစ်သည်။ စိတ်ပညာသဘောတရားကို နားလည်သည့် အထူးဆရာများနှင့် ကျောင်းများတွင် Councelling ဆိုသည့် ပရိုဂရမ်တစ်ခုကို ထည့်သွင်းပေးရန် လိုအပ်နေပြီဖြစ်သည်။ 

ကလေးတွေက စာမှာစိတ်ရောက်နေရပြီး စာမေးပွဲအခြောက်ကို ခံနေကြရသည်။ မိဘတွေက နောက်က ဖိအားများသည်။ ဆရာတွေက တွန်းအားပေးသည်။ အချင်းချင်းထဲတွင် အပြိုင်အဆိုင်များ၊ ဗိုလ်ကျမှုများက ရှိနေသည်။ ထိုကလေးများအတွက် Councelling ဆိုသည့် သဘောတရားကို သူတို့ကြားတွင် အကောင်အထည်မဖော်ပေးနိုင်လျှင် တစ်မိနစ် တစ်ယောက်နှုန်း သတ်သေမှုများသည် မိနစ်တိုင်းတွင် ဆက်ဖြစ်နေမည်သာဖြစ်သည်။

ကျောင်းများတွင် ယခုအခါ စာမသင်မီ စိတ်သက်သာရာ ဖြေလျှော့ပေးနိုင်သည့် တရားထိုင်ခြင်း၊ ယောဂကျင့်စဉ်များ ကျင့်ခြင်းတို့ကို ပြုလုပ်နေခြင်းကလည်း ကောင်းမွန်သည့် အလေ့အထတစ်ခု ဖြစ်ပါသည်။ စာမေးပွဲနှင့် စာကျက်ဖြေနေရသည့် ပညာရေးစနစ်နှင့် ဖိအားများက ကလေးများကို ကယ်တင်ကြပြီး အခြားနည်းများကို ရှာရန်မှတစ်ပါး အဖြေမရှိပြီ။ 

E-01 
(Ref: Opinion: Help India  Education System, Economic Times)




FOLLOW US