POST TAGGED AS

အိုဘားမား

Wall Street Journal နှင့် အထူးသီးသန့် အင်တာဗျူး
အငြင်းပွားဖွယ်ရာ မူဝါဒများ ကိုင်စွဲထားခြင်းကြောင့် ရီပတ်ဘလစ်ကန် သမ္မတလောင်း ဒေါ်နယ်ထရမ့်သာ သမ္မတ ဖြစ်လာခဲ့ပါက အမေရိကန်၏ ပြည်တွင်းပြည်ပရေးရာ မူဝါဒ အပြောင်းအလဲနှင့်အတူ ကမ္ဘာကြီး မငြိမ်မသက် ဖြစ်လာမည်၊ စီးပွားရေးစစ်ပွဲများ ဖြစ်လာမည်၊ တင်းမာမှုများမှသည် ပဋိပက္ခများဆီသို့ ဦးတည်လာမည်ကို စိုးရိမ်မှုများ ရှိနေကြသည်။

သို့သော်လည်း ရွေးကောက်ပွဲ အနိုင်ရကြောင်း သေချာသွားပြီး နောက်ပိုင်း အောင်ပွဲခံမိန့်ခွန်းမှစပြီး ထရမ့်၏ လေသံ ပြောင်းလာခဲ့ကာ ညီညွတ်ရေးကို ဦးစားပေးလာခဲ့ပြီး အမေရိကန်၏ အစဉ်အလာ မူဝါဒများ သိသိသာသာ ပြောင်းလဲမည် မဟုတ်သည့် အရိပ်အယောင်များ မြင်တွေ့လာခဲ့ရသည်။ Wall Street Journal နှင့် အင်တာဗျူးတွင်လည်း ထရမ့်၏ ယခင်ကထက် ပိုမိုလက်တွေ့ကျပြီး ပျော့ပျောင်းသည့် သဘောထားအမြင်များကို မြင်တွေ့ရမည် ဖြစ်ပါသည်။

သမ္မတအဖြစ် ရွေးကောက်တင်မြှောက် ခံထားရသူ ဒေါ်နယ်ထရမ့်က Obama Care ဟု ထင်ရှားသည့် ၂၀၁၀ ပြည့်နှစ်က ပြဋ္ဌာန်းခဲ့သော ကျန်းမာရေး စောင့်ရှောက်မှု ဥပဒေ Affordable Care Act မှ အချို့အပိုင်းများကို ဆက်လက်ထားရှိရန် စဉ်းစားနေကြောင်း The Wall Street Journal နှင့် အင်တာဗျူးတွင် ပြောကြားသွားခဲ့သည်။

ရွေးကောက်ပွဲနိုင်ပြီး နောက်ပိုင်း ပထမဆုံး အင်တာဗျူးတွင် ထရမ့်က သူ့ဦးစားပေး အစီအစဉ်တစ်ရပ်မှာ အလုပ်မဖြစ်ဘဲ၊ ဈေးနှုန်းကြီးမြင့်နေသည့် အိုဘာမား၏ ကျန်းမာရေး စောင့်ရှောက်မှု အစီအစဉ်ကို ပြုပြင်ပြောင်းလဲရန် ဖြစ်သည်ဟု ပြောကြားခဲ့သည်။

သို့သော်လည်း ယင်းဥပဒေကို ပယ်ဖျက်မည့် ကိစ္စကို ပြန်လည်စဉ်းစားစေလိုကြောင်း နိုဝင်ဘာ ၁၀ ရက်နေ့ အိမ်ဖြူတော်တွင် တွေ့ဆုံစဉ် အိုဘားမားက ထရမ့်အား တိုက်တွန်းခဲ့ပြီးနောက် ယင်းဥပဒေမှ အနည်းဆုံး အချက်နှစ်ချက်ကို ဆက်လက်ထိန်းသိမ်းထားလိုသည်ဟု ထရမ့်က ပြောကြားခဲ့ခြင်း ဖြစ်သည်။

လူနာ၏ လက်ရှိအခြေအနေကြောင့် အာမခံ လုပ်ငန်းများက အာမခံပေးရန် ငြင်းဆိုမှုကို ပိတ်ပင်ခြင်း၊ မိဘများက သားသမီးများ၏ ကျန်းမာရေး အာမခံအတွက် ကာလ သက်တမ်းတိုးမှုကို ခွင့်ပြုခြင်း ဆိုသော အချက်များကို ဆက်ထားလိုသည်ဟု ထရမ့်က ပြောကြားခဲ့သည်။
“ဒါတွေကို ကျွန်တော် အရမ်းကြိုက်ပါတယ်” ဟု ထရမ့်က ဆိုသည်။

သမ္မတဖြစ်ဖြစ်ချင်း အစောပိုင်း ကာလတွင် ဦးစားပေးလုပ်ရမည့် ကိစ္စများမှာ ဘဏ်များ ပြန်လည်ထုတ်ချေးနိုင်ရန် ဘဏ္ဍာရေး အဖွဲ့အစည်းများအတွက် စည်းမျဉ်းစည်းကမ်းများ လျှော့ပေါ့ပေးရေး၊ မူးယစ်ဆေးဝါးနှင့် တရားမဝင် ရွှေ့ပြောင်းအခြေချသူများ နယ်စပ်မှ ဝင်မလာစေရန် လုံခြုံအောင် ဆောင်ရွက်ရေးတို့ ဖြစ်ကြောင်း ထရမ့်က ပြောကြားခဲ့သည်။

နိုင်ငံတစ်ဝန်း အခြေခံအဆောက်အအုံ စီမံကိန်းများဖြင့် အလုပ်အကိုင်များ ဖန်တီးပေးမည် ဖြစ်သလို နိုင်ငံတကာနှင့် ကုန်သွယ်ရေး သဘောတူညီချက်များကိုလည်း မွမ်းမံပြင်ဆင်သွားမည်ဟု ဆိုသည်။ 

ပြည်ပတွင် ထုတ်လုပ်သည့် အမေရိကန် ကုမ္ပဏီများ၏ ထုတ်ကုန်များအပေါ် အခွန်စည်းကြပ်ခြင်းဖြင့် စက်ရုံများ ပြည်ပတွင် သွားရောက်အခြေစိုက်လိုစိတ် မရှိစေရန် ဖန်တီးပြီး အမေရိကန်သားတို့ အတွက် အလုပ်အကိုင် အခွင့်အလမ်းများ ပြန်လည်ရရှိစေရန် ဆောင်ရွက်သွားမည် ဖြစ်သည်ဟု သမ္မတသစ် ဖြစ်လာမည့် ထရမ့်က ဆိုသည်။

ပြင်းထန်ပြီး ရန်လိုသည့် လေသံကြောင့် ဝေဖန်ခံခဲ့ရသော ခါးသီးသည့် မဲဆွယ်ကာလအလွန်၊ မြို့ကြီးများတွင် ထရမ့်ဆန့်ကျင်ရေး ဆန္ဒပြပွဲများ ဖြစ်ပွားနေချိန်၌ နိုင်ငံညီညွတ်ရေးမှာ အထူးဦးစားပေးသည့် ကိစ္စဖြစ်သည်ဟု ထရမ့်က ပြောကြားသည်။
“အချင်းချင်း ချစ်ခင်ကြတဲ့ နိုင်ငံမျိုးကိုပဲ ကျွန်တော် လိုလားပါတယ်။ တင်းမာမှုတွေကို ဖြေလျှော့ပေးဖို့ အကောင်းဆုံး နည်းလမ်းကတော့ အလုပ်အကိုင်တွေ ဖန်တီးပေးတာပဲလို့ ကျွန်တော် ထင်ပါတယ်” ဟု ထရမ့်က ပြောကြားခဲ့သည်။

မဲဆွယ်ကာလအတွင်း သူ့ပြောဆိုသုံးနှုန်းမှုများမှာ အလွန်အကျူး ဖြစ်ခဲ့သည်ဟု ထင်မြင်ပါသလားဟု မေးမြန်းခဲ့ရာတွင် ထရမ့်က “မထင်ပါဘူး။ ကျွန်တော်နိုင်ပြီးပြီပဲ” ဟု တုံ့ပြန်ခဲ့သည်။

အောင်ပွဲခံ မိန့်ခွန်းတွင် ပြောခဲ့သလို၊ အိုဘားမားနှင့် အိမ်ဖြူတော်တွင် တွေ့ဆုံစဉ် ဆွေးနွေးခဲ့သလိုပင် ယခုအခါ မိမိဘက်မှ ပိုမိုအပြုသဘောဆောင်စွာ ဆောင်ရွက်သွားမည် ဖြစ်ပြီး  “အခုက မတူတော့ဘူးလေ” ဟု ထရမ့်က ပြောကြားခဲ့သည်။

ပြိုင်ဘက်ဖြစ်ခဲ့သော ဒီမိုကရက်တစ် သမ္မတလောင်း ဟီလာရီ ကလင်တန်ကို နိုင်ငံခြားရေးဝန်ကြီး ဘဝ ကိုယ်ပိုင် အီးမေးလ်ဆာဗာ သုံးစွဲခဲ့မှုနှင့် ပတ်သက်ပြီး ပြန်လည်စစ်ဆေးရန် အထူးစုံစမ်းရေးမှူး ခန့်မည်ဟု မဲဆွယ်ကာလက ပြောကြားခဲ့ခြင်းနှင့် ပတ်သက်၍ မေးမြန်းခဲ့ရာ၌မူ ထရမ့်က ရှောင်တိမ်းဖြေကြားသွားခဲ့သည်။ 

“ဒီကိစ္စကို ကျွန်တော် အများကြီး တွေးမထားပါဘူး။ ဘာလို့လဲဆိုတော့ ကျန်းမာရေး စောင့်ရှောက်မှု၊ အလုပ်အကိုင်၊ နယ်စပ်ထိန်းချုပ်ရေး၊ အခွန်စနစ် ပြောင်းလဲရေးတွေကို ဦးစားပေး ဖြေရှင်းချင်ပါတယ်” ဟု ထရမ့်က စကားလမ်းကြောင်းလွှဲခဲ့သည်။

အိုဘားမားနှင့် တွေ့ဆုံစဉ် ကျန်းမာရေး စောင့်ရှောက်မှု အက်ဥပဒေနှင့် ပတ်သက်ပြီး ဆွေးနွေးခဲ့မှုများကို ပြန်ပြောပြရာတွင် “သူ့ထင်မြင်ချက်တွေကို ကျွန်တော် စဉ်းစားမယ်လို့ ပြောခဲ့ပါတယ်။ Obamacare ကို ဖြည့်စွက်သည်ဖြစ်စေ၊ ပယ်ဖျက်သည်ဖြစ်စေ၊ အစားထိုးသည် ဖြစ်စေ (သူ့အယူအဆတွေကို) တလေးတစားနဲ့ ကျွန်တော်လုပ်မှာပါ” ဟု ထရမ့်က ပြောကြားသည်။

တစ်ခုတည်းသော ပထမ ဦးစားပေး ကိစ္စကို ပြောပါဟု မေးမြန်းခဲ့ရာတွင်မူ ထရမ့်က “ပထမ ဦးစားပေးထားရမယ့် အရာတွေ အများကြီး ရှိပါတယ်” ဟု ဖြေကြားခဲ့သည်။

လွှတ်တော်အတွေ့အကြုံ သာမက ပြည်နယ်အုပ်ချုပ်ရေးမှူး အတွေ့အကြုံ ပါရှိသည့် ဒုတိယသမ္မတ အဖြစ် တင်မြှောက်ခံရထားရသူ မိုက်ခ်ပင့်စ်ကို အားကိုးသွားမည် ဖြစ်ကြောင်းလည်း ထရမ့်က ပြောကြားခဲ့သည်။ “မိုက်က အဓိကနေရာက ပါဝင်လာမှာပါ။ သူက တကယ်စွမ်းဆောင်နိုင်တဲ့သူပါ” ဟု ထရမ့်က သုံးသပ်သည်။

ပင့်စ်ကို “မူဝါဒရေးရာ နယ်ပယ်အများအပြားတွင်” ကိုင်တွယ်စေလိုပြီး ကျန်းမာရေး စောင့်ရှောက်မှု (ဥပဒေ) ကိစ္စတွင်လည်း ပါဝင်စေလိုသည်ဟု ဆိုသည်။ ပင့်စ်သည် အောက်လွှတ်တော် ဥက္ကဋ္ဌ ပေါလ်ရိုင်ယန်၏ မိတ်ဆွေဖြစ်သောကြောင့် လွှတ်တော်နှင့် သူ့အကြား ဆက်ဆံရေးအတွက် ညှိနှိုင်းပေးသူ အဖြစ်ပါ လုပ်ဆောင်ရမည် ဖြစ်သည်ဟု ထရမ့်က ပြောကြားခဲ့သည်။

နိုင်ငံခြားရေးနှင့် ပတ်သက်၍ ခေါင်းဆောင်အများစုနှင့် ပြောဆိုဖူးသော်လည်း တရုတ်သမ္မတ ရှီကျင့်ဖျင်နှင့် မပြောဖူးသေးဟု ဆိုသည်။ ရုရှားသမ္မတ ဗလာဒီမာပူတင်ထံမှ “နှစ်လိုဖွယ်” စာတစ်စောင်ရခဲ့သလို နှစ်ဦးကြား ဖုန်းဆက်သွယ်ပြောဆိုရန်လည်း စီစဉ်ထားသည်ဟု ဆိုသည်။

သဘောထား ပျော့ပျောင်းသော ဆီးရီးယား အတိုက်အခံ အုပ်စုများကို ရှာဖွေထောက်ပံ့ပေးသည့် အိုဘားမား အစိုးရ၏ မူဝါဒကိုမူ ပြင်ဆင်လိုသည်ဟု ဆိုသည်။ “ဆီးရီးယားနဲ့ ပတ်သက်ရင် ဆန့်ကျင်ဘက် အမြင်ရှိတဲ့သူတွေ အများကြီး ရှိနေပါတယ်” ဟု ထရမ့်က ဆိုသည်။

ဆီးရီးယားတွင် သမ္မတ ဘာရှားအယ်လ်အာဆတ်ကို ဖယ်ရှားရေးထက် IS ကို တိုက်ခိုက်ရေးကို အဓိက အာရုံစိုက်သွားမည်ဟုလည်း ပြောကြားခဲ့သည်။ 

“ခင်ဗျားတို့က ဆီးရီးယားကို တိုက်နေတယ်၊ ဆီးရီးယားက IS ကို တိုက်နေတယ်။ IS ကို ဖယ်ရှားရမယ်လေ။ အခု ရုရှားက ဆီးရီးယားနဲ့ လုံးဝ မိတ်ဖက်လုပ်ထားပြီ။ အခု အီရန်ကလည်း ကျုပ်တို့ကြောင့် အားကောင်းလာပြီး ဆီးရီးယားနဲ့ ပေါင်းလာပြီ။ …။ အခု ကျွန်တော်တို့က ဆီးရီးယားအစိုးရကို ဆန့်ကျင်နေတဲ့ သူပုန်တွေကို ထောက်ခံပေးထားပေမယ့် အဲဒီလူတွေ ဘယ်သူလဲ ဆိုတာတောင် မသိဘူး ဖြစ်နေတယ်” ဟု ထရမ့်က ပြောကြားသည်။

အမေရိကန်ကသာ အာဆတ်ကို တိုက်မည်ဆိုပါက “ကျုပ်တို့ ရုရှားနဲ့လည်း တိုက်ရမယ်၊ ဆီးရီးယားနဲ့လည်း တိုက်ရမယ်” ဟု ထရမ့်က သုံးသပ်သည်။

အစ္စရေး-ပါလက်စတိုင်း အရေးနှင့်ပ တ်သက်၍မူ ထရမ့်က “ဘယ်တော့မှမဆုံးတဲ့ စစ်ပွဲ” ဟု သုံးသပ်ခဲ့ပြီး ၎င်းင်းတို့အကြား သဘောတူညီချက်တစ်ခု ရရှိရေးအတွက်မူ ကူညီပေးလိုသည်ဟု ပြောကြားခဲ့သည်။

ပြည်တွင်းရေးတွင် ၂၀၁၀ ဒေ့ါ-ဖရန့်ခ် ဘဏ္ဍာရေး မွမ်းမံမှု ဥပဒေကို အာရုံစိုက်ပြင်ဆင်လိုကြောင်း၊ ယင်းမှာ ဘဏ်များအတွက် ကြီးလေးသော ဝန်ထုပ်ဝန်ပိုး ဖြစ်နေကြောင်း သုံးသပ်ခဲ့သည်။ “ဒါကိုဖယ်ရှားပစ်ရမယ်၊ ဒါမှမဟုတ် သေးငယ်အောင် လုပ်ရမယ်။ …။ ဘဏ်တွေက ပိုက်ဆံမချေးနိုင်တော့ဘူး။ အဲဒီတော့ ကျုပ်တို့တိုင်းပြည်က ယှဉ်နိုင်စွမ်း မရှိတော့ဘူး။ ဒါကြောင့် ဖွံ့ဖြိုးမှုကို နှေးကွေးသွားစေတယ်” ဟု ထရမ့်က သုံးသပ်ခဲ့သည်။

ဘဏ္ဍာရေး စည်းကမ်းတင်းကျပ်မှုများသည် ပိုက်ဆံရှိသူများကို မထိခိုက်ဘဲ လုပ်ငန်းသစ်စရန်၊ တိုးချဲ့ရန် ငွေကြေး မလုံလောက်သူများကိုသာ ထိခိုက်စေသောကြောင့် ပြင်ဆင်လိုသည်ဟု ပြောကြားခဲ့သည်။ 

“ကျွန်တော်ဆို ပိုက်ဆံချေးလို့ ရတယ်လေ။ လူကောင်းတွေ ခမျာတော့ စီးပွားရေးလုပ်ငန်း တစ်ခု လုပ်ဖို့၊ တိုးချဲ့ဖို့ ပိုက်ဆံလိုပေမယ့် ဘဏ်တွေက ချေးလို့မရ ဖြစ်နေတယ်” ဟု ထရမ့်က သုံးသပ်ခဲ့သည်။ 



FOLLOW US