News

POST TAGGED AS

အားကစားပညာ

21-Aug-2017

အားကစားပညာ
Video Game Industry, e-Sport နဲ့ ရေပြင်ကို တံလျှပ်ဟုထင်ခြင်း
ဗီဒီယိုဂိမ်းတွေ မြန်မာလူငယ်တွေအကြားမှာ ခေတ်စားနေခဲ့တာ ဆယ်စုနှစ် ၂ ခုနီးပါးလောက် ရှိလာခဲ့ပြီ ဖြစ်ပါတယ်။ လွန်ခဲ့တဲ့ ၉၀ ခုလွန်နှစ်တွေကနေစလို့ အခြေတည်လာခဲ့တဲ့ မြန်မာ့ဗီဒီယိုဂိမ်း လောကဟာ လက်ရှိအချိန်မှာ အတော်အတန် ဖွံ့ဖြိုးလာနေပြီဖြစ်ပါတယ်။ လက်ရှိမှာဆိုရင် ဂိမ်းဝါသနာရှင် အရေအတွက်ရော ဂိမ်းဖန်တီးထုတ်လုပ်တဲ့ ပညာရှင်အရေအတွက်ပါ တိုးပွားလာနေပါတယ်။

ဒီနေ့ခေတ်လိုမျိုး ပိုမိုဆန်းသစ်တဲ့ နည်းပညာတွေ၊ ထိပ်တန်းအဆင့် Graphic အနုပညာပိုင်း ဖန်တီးချက်တွေအပြင် အသေးစိတ် တွက်ချက်မှုတွေနဲ့ အံ့ဘနန်း ဖန်တီးထုတ်လုပ်မှုပါ ရှိလာနေချိန်မှာတောင်မှ ဗီဒီယိုဂိမ်းတွေနဲ့ ဂိမ်းကစားသူလူငယ်တွေအပေါ် ထားရှိတဲ့ လူကြီးမိဘတွေရဲ့ ထင်မြင်ယူဆချက်တွေကတော့ သိသိသာသာ ပြောင်းလဲလာခဲ့ခြင်း မရှိသေးပါဘူး။ လူကြီးတချို့ဟာ လွန်ခဲ့တဲ့ ဆယ်စုနှစ်တွေကတည်းက အတွေးအမြင်တွေအတိုင်း ဂိမ်းတွေဟာ အချိန်ကုန် ငွေကုန်တာကလွဲပြီး ဘာမျှ အကျိုးမထူးဆိုတဲ့ အယူအဆကို လက်ကိုင်ထားနေကြဆဲပါ။ လက်ရှိအချိန်မှာ နည်းပညာနဲ့ အတော်အတန် နီးစပ်တဲ့ မိဘအနည်းငယ်ကလွဲပြီး ကျန်လူအများစုက ဒီအတိုင်း ယူဆနေကြဆဲဖြစ်ပါတယ်။  

လွန်ခဲ့တဲ့ ဩဂုတ်လဆန်းပိုင်းတုန်းက ဗီဒီယိုဂိမ်းတွေဟာ လူငယ်မျိုးဆက်အတွက် ဆိုးကျိုးတွေသာ ဖြစ်စေတာကြောင့် ကာကွယ်ထိန်းသိမ်းသင့်တယ်ဆိုတဲ့ အဆိုကို အမျိုးသားလွှတ်တော်မှာတင်ခဲ့တာကို ကြားသိခဲ့ရပါတယ်။ ဒီအဆိုမှာတော့ အဲဒီအဆို တင်သွင်းဆွေးနွေးမှုမှာတော့ ဂိမ်းတွေဟာ အလွန်အမင်း စွဲလမ်းစေဖို့ ရည်ရွယ် ရေးဆွဲထားပြီးတော့ လက်တွေ့ဘဝနဲ့ ကင်းကွာစေဖို့ ဖန်တီးထားတယ်လို့ ဆိုပါတယ်။ ကွန်ပျူတာဂိမ်းတွေ၊ ဗီဒီယိုဂိမ်းတွေနဲ့ မိုဘိုင်းလ် ဖုန်းဂိမ်းတွေကို လောင်းကစားဂိမ်းတွေနဲ့ အသွင်တူသယောင် တစ်တန်းတစ်စားတည်း သတ်မှတ်ဖော်ပြခဲ့တာကိုလည်း မြင်တွေ့ခဲ့ရပါတယ်။ 

ဒါဟာ လူငယ်တွေအနေနဲ့ အင်တာနက်၊ လူမှုကွန်ရက်နဲ့ ဂိမ်းတွေမှာ အချိန် ကုန်နေကြတယ်လို့ ၂၀၁၆  နိုဗယ်မြန်မာစာပေပွဲတော် သဝဏ်လွှာမှာ နိုင်ငံတော် အတိုင်ပင်ခံပုဂ္ဂိုလ်က ထည့်သွင်း မှတ်ချက်ပြုခဲ့ပြီးနောက်မှာ တိုင်းရေးပြည်ရာ တာဝန်ရှိသူတစ်ဦးက ဒုတိယအကြိမ်မြောက် သိသာထင်ရှားစွာ နားလည်မှုလွဲနေတဲ့ ပြောဆိုဆွေးနွေးချက် ဖြစ်လာပါတယ်။ ဒါတွေကို ကြည့်ခြင်းအားဖြင့် မြန်မာ့လူ့အဖွဲ့အစည်းထဲက ဦးဆောင်သူ ထိပ်ပိုင်းမျိုးဆက်တွေအထိပါ ဗီဒီယိုဂိမ်းတွေအပေါ်ရှုမြင်ပုံက အနုတ်လက္ခဏာ ဆောင်နေတယ်လို့ ယူဆရပါတယ်။ ဒါဟာ တစ်ဖက်သတ်ဆန်တဲ့ ရှုမြင်မှုမျိုးဖြစ်ပြီးတော့ ဗီဒီယိုဂိမ်းတွေကို ပိတ်ပင်တာ အပြစ်မြင်တာဟာ ဆက်လက်ဖွံ့ဖြိုးလာမယ့် e-Sport Industry ကြီးတစ်ခုလုံးကို တားဆီးလိုက်တာလည်း ဖြစ်ပါတယ်။

ဂိမ်းဆော့တာဟာ အချိန်ဖြုန်းတာဆိုတဲ့ လူကြီးအများစုရဲ့ အယူအဆအပေါ် ၁၀ဝ ရာခိုင်နှုန်း အတိုက်အခံ လုပ်ပြီး အငြင်းပွားဖို့ ခက်ပါတယ်။ အကြောင်းအရင်းက တစ်စိတ်တစ်ပိုင်းအားဖြင့် မှန်ကန်နေလို့ပါ။ အလွန်အကျွံ ဂိမ်းကစားခြင်းက လူငယ်တွေအပေါ် ဘေးထွက်ဆိုးကျိုးတွေ သက်ရောက်စေပါတယ်။ ဒါဟာ လက်ခံနိုင်စရာ အကြောင်းပြချက် ဖြစ်ပါတယ်။ ဂိမ်းကစားနေတဲ့ လူငယ်တွေကိုယ်တိုင် လက်ခံကြတဲ့ အချက်လည်းဖြစ်ပါတယ်။ 

ဒါပေမဲ့လည်း တိကျသေချာတဲ့ သုတေသန ရလဒ်တွေအရတော့ ဒီလို မဟုတ်ပါဘူး။ ဥရောပတစ်လွှားက သိပ္ပံနဲ့ ဆေးပညာရှင်တွေရဲ့ သုတေသနပြုချက်တွေအရ ဗီဒီယိုဂိမ်းတွေဟာ ဦးနှောက်ဖွံ့ဖြိုးမှု၊ ဖြတ်ထိုးဉာဏ် အသုံးချနိုင်စွမ်းနဲ့ ပင်ကို အရည်အသွေးကို အာရုံစိုက်နိုင်စွမ်းတွေ ပိုတိုးတက်လာစေဖို့ အထောက်အကူပြုတယ်လို့ ဆိုထားပြီးတော့ အကြမ်းဖက်လိုစိတ်နဲ့ ကျန်းမာရေး အန္တရာယ်တွေဟာ ဗီဒီယိုဂိမ်းတွေနဲ့ တိုက်ရိုက် မသက်ဆိုင်ဘဲ မိသားစုနောက်ကြောင်း အခြေအနေနဲ့သာ ပိုမိုသက်ဆိုင်တယ်လို့လည်း ဆိုထားပါတယ်။

ဒါ့အပြင် ဗီဒီယိုဂိမ်းတွေဟာ အလျင်မြန်ဆုံး ဖွံ့ဖြိုးလာနေတဲ့ အားကစားနွယ်ဝင် စီးပွားရေးလုပ်ငန်း နယ်ပယ်ကြီးဆိုတာကို မေ့ထားလို့လည်း မဖြစ်ပြန်ပါဘူး။ အမျိုးသားလွှတ်တော်မှာတင်ပြတဲ့ အဆိုမှာ ကွန်ပျူတာဂိမ်းလို့ ခြုံငုံပြောထားပေမယ့် ဆွေးနွေးချက်တွေမှာ အကြွေစေ့လောင်းကစားဂိမ်းတွေနဲ့ ဗီဒီယိုဂိမ်းတွေကို တူညီတယ်လို့ ရှုမြင်နေကြပုံရတာကို တွေ့ရပါတယ်။ တကယ်တမ်းအားဖြင့် Gambling နဲ့ Video game industry ဟာ သီးခြားစီသာ ဖြစ်ပါတယ်။ ရပ်တည်ပုံချင်း၊ အယူအဆချင်း၊ အခြေအနေချင်း လုံးဝ မတူညီပါဘူး။ ဗီဒီယိုဂိမ်းတွေဟာ ဦးနှောက်ဖွံ့ဖြိုးမှုကို ရည်ရွယ်ထားပြီးတော့ ဖျော်ဖြေမှုပေးဖို့ ဖန်တီးထားတာ ဖြစ်ပါတယ်။ Gambling မှာတော့ ကာစီနိုလို အရာမျိုးတွေ ပါဝင်ပြီးတော့ ဒီနိုင်ငံမှာ တရားမဝင် ဖွင့်လှစ်နေကြတဲ့ ပါချင်ကိုး လောင်းကစားဂိမ်းမျိုးတွေလည်း ပါဝင်ပါတယ်။

ဗီဒီယိုဂိမ်းတွေကို ယှဉ်ပြိုင်ရတဲ့ အားကစားနည်းကို e-Sports လို့ ခေါ်ဆိုပြီးတော့ ကမ္ဘာပေါ်မှာ e-Sports အားကစားသမားတွေ၊ ပြိုင်ပွဲဝင်တွေနဲ့ ဝါသနာရှင်တွေ အမြောက်အမြား ရှိနေပါတယ်။ e-Sports ဂိမ်းတွေကို ပုံမှန် စောင့်ကြည့်သူ အရေအတွက်ဟာ ဘောလုံးပွဲကြည့်ရှုသူ အရေအတွက် ၃.၅ ဘီလီယံကို မီနိုင်ဖို့ အတန်ငယ် အလှမ်းဝေးနေသေးပေမယ့် ပုံမှန် ကြည့်ရှုအားပေးသူ ၂၂၆ သန်းအထိ ရှိနေပါတယ်။ ဒီပမာဏဟာ ကမ္ဘာပေါ်မှာ လူကြိုက် အများဆုံး အားကစားနည်း အခု ၂၀ မှာ စာရင်း ပေါက်ပါတယ်။

ဒါ့အပြင် ဗီဒီယိုဂိမ်း လုပ်ငန်းနယ်ပယ်ရဲ့ လည်ပတ်ငွေကလည်း ၂၀၁၁ ခုနှစ်မှာ ဒေါ်လာ ၁၂.၃ ဘီလီယံသာ ရှိရာကနေ ၂၀၁၆ မှာ ဒေါ်လာ ၉၁ ဘီလီယံအထိ တိုးတက်လာပါတယ်။ e-Sports အားကစားကဏ္ဍကနေ ရတဲ့အမြတ်ငွေတင် ၂၀၁၇ မှာ လက်ရှိအချိန်အထိ ၆၉၆ သန်းအထိ ရှိနေပြီးတော့ ၂၀၂၀ မှာ ပျမ်းမျှနှစ်ပတ်လည် အမြတ်ငွေ ၁.၅ ဘီလီယံအထိ ရှိလာဖို့ မျှော်မှန်းထားကြပါတယ်။ ဒါအချက်အလက်တွေဟာ e-Sports အားကစားနည်းနဲ့ ဗီဒီယိုဂိမ်း ဈေးကွက်တို့ရဲ့ လျင်မြန်တဲ့ တိုးတက်မှုနှုန်းနဲ့ အလားအလာတွေကို ထင်ဟပ်ပြနေပါတယ်။

ဒါပေမဲ့ ဗီဒီယိုဂိမ်းတွေနဲ့ လောင်းကစားဂိမ်းတွေကို ရောချပြီး အပြစ်မြင်တာ၊ တားဆီးဖို့ ကြိုးစားတာဟာ အလားအလာရှိတဲ့ နယ်ပယ်တစ်ခုကို အညွှန့်ချိုးလိုက်တာနဲ့ ပိုတူပါလိမ့်မယ်။ အီလက်ထရွန်နစ် အားကစားနည်းနဲ့ မီးလုံးလေးတွေ ဆင်ထားတဲ့ ငါးမန်းဂိမ်းတို့ ပါချင်းကိုး ဂိမ်းတို့ကို မကွဲပြားတာ၊ ဂိမ်းဆော့ခြင်းကြောင့် ဦးနှောက်အသိဉာဏ် ထိခိုက်ထိုင်းမှိုင်းတယ်လို့ ထင်မြင်ယူဆတာတွေဟာ နိုင်ငံတကာ စံနှုန်းတွေနဲ့ကြည့်မယ်ဆိုရင် အတော်ကွဲလွဲတဲ့ အမြင်အယူအဆတွေ ဖြစ်နေပါတယ်။

ကဏ္ဍအသီးသီး နယ်ပယ်အသီးသီမှာ ဖွံ့ဖြိုးမှုစံနှုန်းအဖြစ် တိုင်းတာနေကြ ဂျပန်၊ ကိုရီးယား၊ စင်ကာပူ၊ တရုတ်တို့အပြင် တခြားအာဆီယံနဲ့ အိမ်နီးချင်းနိုင်ငံတွေဖြစ်တဲ့ ထိုင်း၊ မလေးရှား၊ ဖိလစ်ပိုင်၊ အိန္ဒိယတို့မှာ e-Sports နဲ့ Gaming Industry ကို အလျင်အမြန် ဖွံ့ဖြိုးလာစေဖို့ အင်တိုက်အားတိုက် ကြိုးပမ်းနေတာကိုလည်း လျစ်လျူရှုဖို့ မသင့်ပါဘူး။

အထူးသဖြင့် ဖွံ့ဖြိုးမှုလျင်မြန်လှတဲ့ e-Sport & Video Game Industry ဆီကနေ အကျိုးအမြတ်တွေ ရတန်သလောက် ခွဲဝေယူနိုင်ဖို့ နိုင်ငံတချို့ဟာ e-Sport ကဏ္ဍ ဖွံ့ဖြိုးရေးမှာ အစိုးရကိုယ်တိုင် တိုက်ရိုက် ပါဝင်ပတ်သက်နေချိန်မှာ မြန်မာပြည်မှာတော့ ဂိမ်းတွေကိုတားဆီးဖို့ လွှတ်တော်မှာ ဆွေးနွေးနေတာဟာ ကြီးမားတဲ့လွဲမှားမှုတစ်ခုလို့ မြင်မိပါတယ်။ 

နိုင်ငံ့ဂုဏ်ဆောင် အားကစားတစ်ခုအနေနဲ့ ကြည့်မယ်ဆိုရင်လည်း လာမယ့် ၂၀၂၂ အာရှအားကစားပြိုင်ပွဲမှာ e-Sport ဟာ ပြိုင်ပွဲဝင်အားကစားတစ်ခုအဖြစ် ပါဝင်လာမှာဖြစ်တယ်လို့ အာရှအားကစားပြိုင်ပွဲ ကျင်းပရေး ကော်မတီက ပြီးခဲ့တဲ့ ဧပြီလက ကြေညာထားသလို နောက် ၂ နှစ်အကြာမှာ ကျင်းပမယ့် ၂၀၂၄ ပါရီအိုလံပစ်မှာလည်း e-Sport ပါဝင်နိုင်ဖို့ နိုင်ငံတကာ အိုလံပစ်ကော်မတီနဲ့ ပါရီအိုလံပစ် အားကစားနည်း ရွေးချယ်ရေးအဖွဲ့တို့ ဆွေးနွေးနေတယ်လို့ တရားဝင် ကြေညာထားပါတယ်။ ဒီလိုအချိန်မှာ မြန်မာပြည်မှာတော့ အားကစားသမားတွေလည်း မမွေးထုတ်နိုင်၊ စီးပွားရေး အခွင့်အလမ်းလည်း မယူနိုင်၊ ကိုယ်တိုင်ဝင်ငွေ ရှာနိုင်မယ့် ဗီဒီယိုဂိမ်း ဖန်တီးထုတ်လုပ်မှု နယ်ပယ်ကိုလည်း အားမပေးနိုင်ဘဲ ခေတ်နောက်ပြန်ဆွဲတဲ့ အတွေးတွေနဲ့ ရှေ့ဆက်နေကြပါတယ်။

ဖွံ့ဖြိုးမှုနောက်ကျတဲ့ မြန်မာပြည်မှာ ဗီဒီယိုဂိမ်း လုပ်ငန်းတွေကို တားဆီးဖို့လုပ်တာဟာ လူငယ်တွေကို တခြားနယ်ပယ်တွေကို တွန်းပို့သလို ဖြစ်နိုင်တာကိုလည်း ထည့်သွင်း စဉ်းစားသင့်ပါတယ်။ အထူးသဖြင့် နိုင်ငံတကာမှာ ဘောင်ဝင်တန်းဝင် အားကစားနဲ့ စီးပွားရေးနယ်ပယ်တစ်ခုကို တားဆီးပြီး လူငယ်တွေကို မူးယစ်ဆေးဝါးနဲ့ အရက်သေစာဘက် ရောက်သွားအောင် တွန်းပို့မိသလို ဖြစ်သွားမှာ စိုးရိမ်စရာပါ။

မြန်မာပြည်က လူကြီးတချို့ရဲ့ မှားယွင်း လွဲမှားလှတဲ့ အယူအဆမှိုင်းတွေရဲ့ အပြင်ဘက် တကယ့် လောကမှာတော့ လူငယ်တိုင်း မဟုတ်သည့်တိုင် လူငယ်အချို့ဟာ ဂိမ်းတွကြောင့်ပဲ မူးယစ်ဆေးနဲ့ လောင်းကစားဘက်ကို လမ်းမှား ရောက်မသွားခဲ့တာ ဖြစ်ပါတယ်။ အလုပ်အကိုင် အခွင့်အလမ်း ရှာဖွေဖို့ ခက်ခဲပြီး ဆိုးသွမ်းပျက်စီးဖို့ လွယ်ကူတဲ့ ပတ်ဝန်းကျင်တွေ ရှိနေတဲ့ ဒီနိုင်ငံမှာ ဂိမ်းဆော့ခြင်းကြောင့် ပျက်စီးဆိုးသွမ်းသွားတဲ့ လူငယ် အရေအတွက်ဟာ လောင်းကစား၊ အရက်သေစာနဲ့ မူးယစ်ဆေးဝါး သောက်စားခြင်းကြောင့် ပျက်စီးသွားတဲ့ လူငယ် အရေအတွက်နဲ့ ဘယ်လိုပင် နှိုင်းယှဉ်ပါစေ ပိုမိုနည်းပါးနေမည်မှာ မြေကြီးလက်ခတ် မလွဲလှပေ။

ဒါကြောင့်လည်း နိုင်ငံတကာမှာ Profession တစ်ခုအဖြစ် သတ်မှတ်ထားတဲ့ ဗီဒီယိုဂိမ်းတွေကို လိုက်လံပိတ်ပင်နေမယ့်အစား ပညာပေးပို့ချမှုတွေ၊ Motivation Center တွေ၊ e-Sport Training Center တွေ ဖန်တီးပေးပြီး လူငယ်တွေကို မြေတောင်မြှောက်ပေးတာက အားလုံးအတွက် Win-Win Solution ဖြစ်စေမှာပါ။ သက်ဆိုင်ရာ တာဝန်ရှိသူတွေအနေနဲ့ ဒီနယ်ပယ်အကြောင်းကို ယခုထက် နားလည်အောင် ပိုကြိုးစားသင့်ပြီးတော့ ပြည်တွင်း e-Sports လမ်းကြောင်းကိုလည်း ပိုမိုတိုးတက်လာအောင် ဖွင့်ပေးနိုင်မယ်ဆိုရင် နိုင်ငံတကာက လူငယ်တွေလိုပဲ မြန်မာ လူငယ်တွေလည်း e-Sports ကို အသက်မွေးဝမ်းကျောင်း တစ်ခုအဖြစ် ရွေးချယ်ခွင့်ရရှိလာမှာဖြစ်သလို တိုင်းပြည်အတွက် အရင်းအမြစ်တွေ ပိုမိုပေါ်ထွက်လာမှာ ဖြစ်ပါတယ်။

ဒါကြောင့် တိုင်းပြည်စီးပွားရေးကို တစ်ဖက်တစ်လမ်းက ကူညီမြှင့်တင်ပေးနိုင်တဲ့ လုပ်ငန်းနယ်ပယ်ဖြစ်အောင်၊ တိုင်းပြည် ဂုဏ်ဆောင်တဲ့ အားကစားသမားတွေ မွေးထုတ်ပေးနိုင်အောင် ကြိုးပမ်းတာကသာ အားလုံးအတွက် ပိုကောင်းတဲ့ အဖြေဖြစ်သင့်တယ်လို့ ယူဆမိပါတယ်။ 

မောင်မိုးဇွန်



FOLLOW US