News

POST TAGGED AS

အခွင့်အရေး

အမျိုးသမီးများကို ဒုညွှန်ချုပ်အထိ ရာထူးပေးထားဟု ပြည်ထဲရေးဒုဝန်ကြီးပြော
နေပြည်တော်၊ ဩဂုတ် ၈

ပြည်ထဲရေးဝန်ကြီးဌာနအောက်ရှိ ဦးစီးဌာနများတွင် အမျိုးသမီးများကို ဒုတိယညွှန်ကြားရေးမှူးချုပ်အထိ ရာထူးနေရာပေးထားကြောင်း ဒုတိယဝန်ကြီး ဗိုလ်ချုပ်အောင်သူက ပြောကြားသည်။

ဩဂုတ် ၈ ရက်ကကျင်းပသည့် ပြည်သူ့လွှတ်တော်အစည်းအဝေးတွင် လေးမျက်နှာ မဲဆန္ဒနယ်မှ ဦးဇော်မင်းသိန်းက ပြည်ထဲရေးဝန်ကြီးဌာန၊ အထွေထွေအုပ်ချုပ်ရေးဦးစီးဌာန၊ မြို့နယ်၊ ခရိုင်နှင့် တိုင်းဒေသကြီး အုပ်ချုပ်ရေးမှူး ရာထူးတာဝန်များကို အမျိုးသမီးများ ခန့်အပ်ထားရှိ တာဝန်ပေးအပ်ရန် အစီအစဉ် ရှိ၊ မရှိ မေးမြန်းချက်ကို ၎င်းကဖြေကြားရာတွင် ယင်းကဲ့သို့ ထည့်သွင်းပြောကြားခဲ့ခြင်းဖြစ်သည်။

အထွေထွေ အုပ်ချုပ်ရေးဦးစီးဌာနတွင် ဒုတိယညွှန်ကြားရေးမှူးချုပ်ရာထူး အမျိုးသမီးတစ်ဦး၊ ညွှန်ကြားရေးမှူးသုံးဦး၊ ဒုတိယညွှန်ကြားရေးမှူး ၁၃ ဦး၊ လက်ထောက်ညွှန်ကြားရေးမှူး ၅၉ ဦး၊ ဦးစီးအရာရှိ ၁၆ ဦး၊ ဒုတိယဦးစီးမှူး ၅၅၆ ဦးရှိပြီး စုစုပေါင်း အမျိုးသမီးဝန်ထမ်း ၆၄၈ ဦး တာဝန်ထမ်းဆောင်လျက်ရှိကြောင်း ၎င်းကရှင်းပြသည်။

“အုပ်ချုပ်ရေးတာဝန်အဖြစ် ဒုတိယ မြို့နယ်အုပ်ချုပ်ရေးမှူးအဖြစ် တစ်ဦး တာဝန်ထမ်းဆောင်လျက်ရှိပြီး ယခုအခါ ရာထူးတိုးမြှင့်သဖြင့် ခရိုင်အထွေထွေအုပ်ချုပ်ရေးမှူးရုံးတွင် တာဝန်ထမ်းဆောင်လျက်ရှိပါတယ်။ ဒုတိယ ခရိုင်အုပ်ချုပ်ရေးမှူးတာဝန်ကို အမျိုးသမီးဝန်ထမ်း ၈ ဦး တာဝန်ထမ်းဆောင်ခဲ့ပြီး ၄ ဦးမှာ တိုင်းဒေသကြီးနှင့် ပြည်နယ်ရုံးများသို့ ပြောင်းရွှေ့တာဝန်ထမ်းဆောင်စေခဲ့ပြီး ၄ ဦးမှာ ဒုတိယခရိုင်အုပ်ချုပ်ရေးမှူးအဖြစ် ဆက်လက် တာဝန်ထမ်းဆောင်လျက်ရှိပါတယ်”ဟု ဒုဝန်ကြီးက ပြောသည်။

အုပ်ချုပ်ရေး ရာထူးအဆင့်ဆင့်တွင် လုပ်ငန်းသဘောသဘာဝကို အခြေခံ၍ အမျိုးသားဝန်ထမ်းများကိုသာ ရာထူးတိုးမြှင့်ခန့်အပ်ထားခဲ့သော်လည်း ပြောင်းလဲကျင့်သုံးလာသော လူနေမှုပတ်ဝန်းကျင်၊ အုပ်ချုပ်ရေး သဘောတရားတို့ကိုချိန်ဆပြီး နိုင်ငံ့ဝန်ထမ်းဥပဒေ၊ နည်းဥပဒေများနှင့်အညီ တန်းစီဇယားအလိုက် ရာထူးတိုးမြှင့်ပေးလျက်ရှိသောကြောင့် အမျိုးသမီးဝန်ထမ်းများသည် ထိုက်သင့်သော ရာထူးနေရာများ ရရှိလာမည်ဖြစ်ကြောင်း ၎င်းကဆိုသည်။

ယင်းကြောင့် အရာထမ်းအမျိုးသမီးများအနေဖြင့် ရာထူးများ အဆင့်ဆင့် တိုးမြှင့်ရရှိသည့်အချိန်များတွင် အုပ်ချုပ်ရေးမှူး ရာထူးတာဝန်များကို ထမ်းဆောင်ခွင့်ရရှိလာမည်ဖြစ်ကြောင်း ၎င်းက ထပ်လောင်းပြောသည်။

တပ်မတော်ကာကွယ်ရေးဦးစီးချုပ် ကိုယ်တိုင် ဝန်ကြီး၊ ဒုတိယဝန်ကြီးများ ခန့်အပ်ရန် အမည်စာရင်းပေးနိုင်သော ကာကွယ်ရေးဝန်ကြီးဌာန၊ နယ်စပ်ရေးရာဝန်ကြီးဌာနနှင့် ပြည်ထဲရေးဝန်ကြီးဌာနတို့၌သာမက ကျန်ရှိသည့် ဝန်ကြီးဌာနများတွင်လည်း ယနေ့ထက်တိုင် တပ်မတော်မှ ပြောင်းရွှေ့တာဝန်ထမ်းဆောင်သူများက အရာထမ်း (ဦးစီးအရာရှိ၊ လက်ထောက်ညွှန်ကြားရေးမှူး၊ ဒုတိယညွှန်ကြားရေးမှူး၊ ညွှန်ကြားရေးမှူး) တာဝန်များကို ဝင်ရောက် တာဝန်ထမ်းဆောင်နေဆဲပင်ဖြစ်သည်။

တပ်မတော်မှ ဝန်ထမ်းများကို ပြောင်းရွှေ့ တာဝန်ထမ်းဆောင်စေခြင်းတွင် ဌာနအလိုက် လိုအပ်ခြင်းနှင့် ပြောင်းရွှေ့ရန် အကြောင်းကြားညှိနှိုင်းပြီးမှသာ လိုအပ်ချက်အရ ခန့်ထားခြင်းဖြစ်ကြောင်း အစိုးရ နှစ်နှစ်ပြည့် သတင်းစာရှင်းလင်းပွဲတွင် ပြည်ထောင်စု ရာထူးဝန်အဖွဲ့မှ တာဝန်ရှိသူများက ဖြေကြားခဲ့သည်။

S-01



FOLLOW US