News

POST TAGGED AS

သီရိလင်္ကာ

စိတ်ဒဏ်ရာများစွာကို ကုစားသူ သီရိလင်္ကာက ဆရာမကြီး


ဂတ်ဆီရှန်မူဂန်သည် သီရိလင်္ကာအခြေစိုက် ကျောင်းဆရာမ၊ စိတ်ပိုင်းဆိုင်ရာ နှစ်သိမ့်ဆွေးနွေးပေးသူ၊ လူမှုရေးလုပ်သားတစ်ဦးဖြစ်သည်။ သီရိလင်္ကာပြည်တွင်းစစ်ဒဏ်ကို ထောင်းလမောင်းကျေအောင် ခံထားရသည့် ပြည်သူများကို စိတ်ဒဏ်ရာ လျော့ပါးသက်သာ အသွင်ပြောင်းနိုင်ရေး ဦးဆောင်ဦးရွက်ပြုခဲ့သူဖြစ်သည်။ ဖိလစ်ပိုင်နိုင်ငံက ချီးမြှင့်သော အာရှနိုဘယ်လ်ဆုခေါ် ရာမွန်မက်ဆေးဆေးဆုကို ၂၀၁၇ ခုနှစ်အတွက် ရရှိထားသည်။ စစ်ဒဏ်ကြောင့် မုဆိုးမဖြစ်ရသူ၊ မိဘမဲ့ကလေးဖြစ်ရသူများကို ဗုံးများ၊ မိုင်းများ၊ ဖမ်းဆီးအရေးယူခံရရန် ခြိမ်းခြောက်မှုများကို အန်တုပြီး သွားရောက်ကူညီခဲ့သူဖြစ်သည်။ 

ဂတ်ဆီရှန်မူဂန်ကို ၁၉၃၄ ခုနှစ်တွင် သီရိလင်္ကာနိုင်ငံ British tea estate တွင် စာရေးစာချီ မိဘမှ မွေးဖွားခဲ့ခြင်းဖြစ်သည်။ မိန်းကလေး ဘော်ဒါကျောင်းတွင် ကျောင်းတက်ခဲ့သည်။ ပညာစုံလင်သော ကျောင်းဆရာမအလုပ်ကိုလုပ်ခဲ့ပြီး အိမ်ထောင်ရက်သားကျခဲ့သည်။ ၁၉၆၇ ခုနှစ်တွင် ကိုလံဘိုမြို့ စိန့်ဂျိုးဇက် ကောလိပ်တွင် အင်္ဂလိပ်စာပြဆရာမလုပ်ခဲ့ပြီး ထိုစဉ်မှစ၍ စိတ်ပိုင်းဆိုင်ရာ ကုသနှစ်သိမ့်ပေးမှုကို စိတ်ဝင်စားကာ လေ့လာခဲ့သည်။ ၁၉၈၃ ခုနှစ်တွင် ပင်စင်ယူခဲ့ပြီးနောက် ပြည်တွင်းစစ်ဒဏ်ကြောင့် ရွှေ့ပြောင်းတိမ်းရှောင်ရသူ အမျိုးသမီးများ၊ ကလေးများအတွက် စိတ်ဒဏ်ရာ ကုစားနားလည်ပေးခြင်းဆိုင်ရာ ကဏ္ဍတွင် လုပ်အားပေးခဲ့သည်။ စိတ်ပိုင်းဆိုင်ရာ လူမှုကုသပေးမှု၏ အရေးပါမှုကို မူဝါဒချမှတ်သူများကရော၊ ပြည်သူအများကရော သတိထားမိမှုနည်းပါးသည်။ သေသေချာချာလေ့လာခဲ့သော ဂတ်ဆီရှန်မူဂန်သည် လူမှုစိတ်ပိုင်းဆိုင်ရာ ကုသကူညီပေးမှု၏ အရေးပါမှုကို နားလည်ကာ ဒုက္ခသည် ဖြစ်ခဲ့ဖူးသူများအတွက် စိတ်ရောကိုယ်ပါ ပြုစုဆောင်ရွက်ပေးခဲ့သည်။ Save the Children Norway အဖွဲ့အစည်းနှင့်ပူးပေါင်းကာ ထိုသို့ ဆောင်ရွက်မှုများကို အချိန်ပြည့် နှစ်မြှုပ်ဆောင်ရွက်ပါတော့သည်။ 



စစ်ပွဲများ၏ နောက်ကွယ်တွင် မမြင်သာသော ကုန်ကျဆုံးရှုံးမှုများ ရှိပါသည်။ ထိုအရာကား ပဋိပက္ခဇုန်များတွင်ရှိကြသည့် ပြည်သူများအပေါ် စိတ်ပိုင်းဆိုင်ရာအရ ထိခိုက်မှုများဖြစ်သတည်း။ အမျိုးသမီးနှင့် ကလေးများကို ပိုပြီးထိခိုက်သည်။ သီရိလင်္ကာ ပြည်တွင်းစစ်အတွင်း ကလေးသုံးသောင်းခွဲ သေဆုံးခဲ့ရသည်။ ပဋိပက္ခဒေသများရှိ ကလေးငယ်လေးဦးတွင် တစ်ဦးသည် မိဘနှစ်ပါးလုံး သို့မဟုတ် တစ်ဦး ဆုံးရှုံးထားပြီးဖြစ်သည်။ ကလေးသုံးသိန်းခန့် နေရပ်ကို ရွှေ့ပြောင်းတိမ်းရှောင်ကြရသည်။ လူမှုပြန်လည် ကုစားထောက်ပံ့ရေး Psychosocial Support  ကောင်းကောင်းမရှိသည့်အခါ ပြည်သူအကြားရှိနေသည့် စစ်ကြောင့်ဖြစ်သော စိတ်ဒဏ်ရာများက မကုသဘဲ ပစ်ထားသလို ဖြစ်နေခဲ့သည်။ 

သို့ဖြင့် ရှန်မူဂန်သည် စိတ်ဒဏ်ရာကုစားမှုဆိုင်ရာ အစီအစဉ်များကို ချမှတ်ခြင်း၊ သုတေသနပြုခြင်း၊ ပြန်လည်သင်ကြားပေးခြင်း၊ နှစ်သိမ့်ဆွေးနွေးပေးခြင်း လှုပ်ရှားမှုများကို ဦးဆောင်ခဲ့ကာ ပြည်တွင်းစစ်ဒဏ်ထိခဲ့သော ကျောင်းများ၊ မုဆိုးမများ၊ မိဘမဲ့များ၊ စိတ်ဒဏ်ရာရခဲ့သော ကလေးများအရေးကို ဆောင်ရွက်ခဲ့ပါသည်။ စစ်ဘေးဒဏ်တွင်သာမက သဘာဝဘေးဒဏ်ထိသော ပြည်သူများလည်း စိတ်ဒဏ်ရာရတတ်ပါသည်။ ၂၀၀၄ ခုနှစ်က သီရိလင်္ကာကို ဆူနာမီထိခဲ့ပြီး လူသုံးသောင်းတစ်ထောင် သေဆုံးခဲ့ရသည်။ ဂတ်ဆီရှန်မူဂန်သည် ကျောင်းဆရာ၊ ဆရာမ ၈၀ ဦးကို လေ့ကျင့်သင်ကြားပေးခဲ့ကာ စိတ်ဒဏ်ရာရသော ကလေးများအတွက် ကောင်းမွန်သောဝန်းကျင် ဖြစ်စေရေး စီမံကိန်းများ လုပ်ဆောင်ခဲ့သည်။ ရာမွန် မက်ဆေးဆေး ဆုရွေးချယ်ရေးအဖွဲ့က “စစ်ပွဲက ဆုတ်ဖြဲခဲ့သော ဘဝများစွာကို ခက်ခဲကြမ်းတမ်းသော အခြေအနေအောက်တွင် ကရုဏာ၊ သတ္တိတို့နဲ့အတူ သီရိလင်္ကာ၏ စိတ်ပိုင်း လူမှုကုသပေးနိုင်စွမ်းကို ဆယ်စုနှစ်လေးခုကြာ မမောနိုင်မပန်းနိုင် အားထုတ်ကြိုးပမ်းကူညီခဲ့မှုနှင့် စစ်ပွဲကြောင့် ထိခိုက်မှုအများဆုံးခံရသည့် အားနည်းသည့် အုပ်စု အမျိုးသမီးများနှင့် ကလေးများကို စိတ်ခွန်အားပြည့်ဝစွာ ဆောင်ရွက်ပေးသည့် လူသားဆန်မှု” တို့ကြောင့် အဆိုပါဆုကို ပေးခဲ့ရခြင်းဖြစ်သည်ဟု ဆိုထားသည်။ 

ပြည်တွင်းငြိမ်းချမ်းရေးဟု ဆိုရာတွင် လူအများသည် စစ်ပွဲရပ်သွားခြင်းကိုသာ စိတ်ထဲ မြင်ယောင်လေ့ရှိကြသည်။ သေနတ်သံတွေ တိတ်သွားတိုင်း တကယ်တမ်း ငြိမ်းချမ်းရေး ရသွားခြင်းတော့ မဟုတ်ပေ။ စစ်ပွဲကြောင့် လူ့အဖွဲ့အစည်းအတွင်း အကွဲအပြဲများ ကျန်ခဲ့သည်။ မျိုးနွယ်စုများအတွင်း ရန်ငြိုးများ ကျန်ခဲ့သည်။ ကလေးများရင်ထဲ အမုန်းတရား နာကြည်းမှုများ ဆူပွက်ကာ ကျန်နေရစ်သည်။ ယင်းဒဏ်ရာများကို မကုစားပါဘဲလျက် ငြိမ်းချမ်းပြီဟု မဆိုသာ။ ထာဝရငြိမ်းချမ်းရေးဟု မပြောနိုင်ပါ။ အဆိုပါ စိတ်ဒဏ်ရာ ကုစားမှုအစီအစဉ်များကို အစိုးရ မူဝါဒချမှတ်သူများက အမြော်အမြင်ကြီးစွာဖြင့် ဆောင်ရွက်ကြသလို အရပ်ဘက်အဖွဲ့အစည်းများ၊ နိုင်ငံတကာအဖွဲ့အစည်းများနှင့် ပူးပေါင်းအကောင် အထည်ဖော်ကြသည်။ တောင်အာဖရိက၊ ရဝမ်ဒါ၊ ကမ္ဘောဒီးယား၊ သီရိလင်္ကာစသည့် အကြမ်းပတမ်း အနိဋ္ဌာရုံများကို ဖြတ်သန်းမြင်တွေ့ခဲ့ရသော လူ့အဖွဲ့အစည်းများတွင် ယင်းသို့အစီအစဉ်များ ဆောင်ရွက်လျက်ရှိသည်။ ဂတ်ဆီရှန်မူဂန်သည် ထိုသို့လုပ်ရ ကောင်းမှန်း သီရိလင်္ကာ လူ့အဖွဲ့အစည်းသို့ လူမှုစိတ္တ ကူညီထောက်ပံ့ရေး အစီအစဉ်များကို မျိုးစေ့ချပေးခဲ့သူ ကျေးဇူးရှင်ဖြစ်သည်။ သူတို့အဖွဲ့၏ မနားမနေ ကြိုးစားမှုကြောင့် စိတ်ဒဏ်ရာသင့်ကလေးများ မျှော်လင့်ချက်အသစ်ဖြင့် နေ့ရက်အသစ်များကို လှမ်းတက်နိုင်ကြလေပြီ။ 

သန့်ဇင်စိုး



FOLLOW US