News

POST TAGGED AS

ဝန်ကြီးဌာနများ

မောင်းမကန်မြို့ပြစီမံကိန်း လွှတ်တော်တွင် ကြန့်ကြာ
ထားဝယ်၊ ဇူလိုင် ၁

မောင်းမကန်မြို့ပြ ဖွံ့ဖြိုးရေးစီမံကိန်းအား ဆွေးနွေးအတည်ပြုရန်အတွက် တနင်္သာရီအစိုးရအဖွဲ့က တိုင်းလွှတ်တော်သို့ ပေးပို့ထားသည်မှာ ၅ လ ကျော်ပြီဖြစ်ကြောင်း တနင်္သာရီတိုင်းဒေသကြီး လျှပ်စစ်နှင့် စွမ်းအင်ဝန်ကြီး ဦးကြည်လှိုင်က ပြောကြားသည်။

မောင်းမကန်မြို့ပြ ဖွံ့ဖြိုးရေးစီမံကိန်းအား နေပြည်တော် မြို့ပြနှင့် အိမ်ရာဖွံ့ဖြိုးရေးဦးစီးဌာနမှ မြို့ပြစီမံကိန်းရေးဆွဲရေးဆိုင်ရာ ပညာရှင်များက ၂၀၁၇ ခုနှစ်အတွင်း ရေးဆွဲခဲ့ပြီး တိုင်းအစိုးရအဖွဲ့က အတည်ပြုပြီးနောက် ၂၀၁၈ ခုနှစ် ဇန်နဝါရီလ ၁၆ ရက်တွင် တိုင်းဒေသကြီးလွှတ်တော်သို့ ပေးပို့ခဲ့ကြောင်း ဝန်ကြီးထံမှသိရသည်။

ယင်းကို တိုင်းဒေသကြီးလွှတ်တော်တွင် ယခုအချိန်ထိ တစ်စုံတစ်ရာ ဆွေးနွေးခြင်း မရှိသေးပေ။

မောင်းမကန်မြို့ပြစီမံကိန်းမှာ နားလည်တတ်ကျွမ်းသော အင်ဂျင်နီယာများ၏ အမြင်များ၊ စီးပွားရေးအမြင်ရှိသူများ၊ သဘာဝပတ်ဝန်းကျင် ထိခိုက်နစ်နာမှု စသည်တို့ကို စုဆောင်းကွင်းဆင်းရန်လိုအပ်ပြီး ကြားထဲတွင် လွှတ်တော်ကိုယ်စားလှယ်များ၏ အခြားသော လုပ်ငန်းတာဝန်များ များပြားနေခြင်းကြောင့် ယင်းကိစ္စကို ဆွေးနွေးရန် ကြန့်ကြာနေခြင်းဖြစ်ကြောင်း တိုင်းဒေသကြီးလွှတ်တော် ဒုတိယဥက္ကဋ္ဌ ဦးကြည်စိုးက ပြောကြားသည်။

“လာတာနဲ့ တန်းအတည်ပြုလိုက်ရင် ပြည်သူ့အသံမပါဘဲ ဖြစ်သွားမယ်လို့ ယူဆတယ်။ ပြည်သူတွေ တစ်ယောက်ချင်းစီသိလေ ကောင်းလေပေါ့လေ။ ကျွမ်းကျွမ်းကျင်ကျင် ဆွေးနွေးနိုင်သူတွေရဲ့ အသံ၊ အကြံပြုချက်တွေပါအောင် လုပ်ဖို့လိုသေးတယ်၊ ကျွန်တော်တို့ အဲဒီလိုယူဆတယ်”ဟု ဦးကြည်စိုးက ပြောဆိုသည်။

ကွင်းဆင်းအချက်အလက် စုဆောင်းမှုများ မြန်နိုင်သမျှ မြန်အောင်လုပ်ဆောင်သွားမည်ဟု လွှတ်တော်ဒုတိယဥက္ကဋ္ဌ ဦးကြည်စိုးက ဆက်လက်ပြောကြားသည်။

ယင်းသို့ စီမံကိန်းအတွက် မည်သည့်အချိန်တွင် ကွင်းဆင်း၍၊ မည်သည့်အချိန်တွင် လွှတ်တော်တွင် ဆွေးနွေးအတည်ပြုမည်ကို ခန့်မှန်းမပြောဆိုနိုင်သေးကြောင်း ၎င်းက ပြောကြားသည်။

မောင်းမကန် မြို့ပြစီမံကိန်းကို အကောင်အထည်ဖော်မည်ဆိုပါက မြေပြင်ပြဿနာများကို ပြေလည်သည်အထိ ရှင်းလင်းပြီးမှ စတင်သင့်ကြောင်း မောင်းမကန်ကျေးရွာအုပ်စု အုပ်ချုပ်ရေးမှူး ဦးသန်းနိုင်က ပြောဆိုသည်။

“ဒီမြေကို တိုင်းဒေသကြီးအစိုးရ စီမံခန့်ခွဲပိုင်ခွင့်ရှိသော မြေဆိုပြီးလုပ်တယ်၊ အဲဒီမြေထဲပိုင်ဆိုင်မှု အထောက်အထားရှိတဲ့ လူတွေ ရှိတယ်၊ ဒီလူတွေအတွက် တိုင်းအစိုးရအဖွဲ့က တာဝန်ယူ တာဝန်ခံမှု ရှိရမယ်ပေါ့”ဟု ဦးသန်းနိုင်က ဆိုသည်။

မောင်းမကန်မြို့ ပြစီမံကိန်းကို မောင်းမကန် ကမ်းခြေတန်းတစ်လျှောက်မှ အထက်ဘက် မြေ ၃၅၄ ဒသမ ၆၄ ဧကတွင် အကောင်အထည်ဖော်ရန် စီစဉ်နေပြီး ယင်းမြေမှာ ယခင်က တပ်သိမ်းမြေဖြစ်သည်။

ယင်းမြေမှာ တနင်္သာရီဟိုတယ်အစပ်မှ ထားဝယ်အများပိုင်ကုမ္ပဏီ (DDPC) လုပ်ပိုင်ခွင့်ရ မြေအစပ်ထိရှိသည်။

ယင်းမြေကို ၂၀၁၆ ခုနှစ် နိုဝင်ဘာ ၃ ရက်နေ့မှစ၍ တိုင်းအစိုးရ စီမံခန့်ခွဲ ပိုင်ခွင့်ရရှိခဲ့သည်။

စီမံလုပ်ဆောင်မည့် လုပ်ငန်းများတွင် ဟိုတယ်ဇုန်၊ ဈေးဆိုင်ခန်းများ၊ အခမဲ့အများသုံး အပန်းဖြေနေရာများ၊ ကားရပ်နားရန် နေရာများ၊ ပန်းခြံများ၊ အားကစားကွင်းများ၊ လုံခြုံရေးစခန်းနှင့် ကွပ်ကဲရေးရုံးခန်းများ၊ အမှိုက်စွန့်ပစ် နေရာများပါဝင်မည်ဟု တိုင်းအစိုးရက ထုတ်ပြန်ထားသည်။

ယင်းဧရိယာအတွင်း နေထိုင်လုပ်ကိုင်နေသူများအား လျော်ကြေးပေးချေခြင်း၊ ပြန်လည်နေရာချထားပေးခြင်းများကို အစိုးရအဖွဲ့ အတည်ပြုချက်ဖြင့် အကောင်အထည်ဖော်မည်ဖြစ်ကြောင်း တိုင်းအစိုးရအဖွဲ့က ထုတ်ပြန်ထားသည်။

ယင်းဧရိယာအတွင်း လူနေအိမ် ၂၅၆ လုံး၊ ဘန်ဂလို ၃၁ လုံး၊ ဈေးဆိုင်ခန်း ၁၄၂ ခန်း၊ ခြံမြေကွက် ၆၂ ကွက်အား စာရင်းကောက်ယူရေး ကော်မတီမှ ကောက်ယူမှတ်တမ်းပြုထားသည်ဟု ထုတ်ပြန်ထားသည်။

မောင်းမကန် ကမ်းခြေ၌ စားသောက်ဆိုင်များ၊ ပျံကျဆိုင်များ၊ ဘန်ဂလိုများ၊ တည်းခိုခန်းများ၊ ကေတီဗီများနှင့် ကျူးကျော်နေအိမ်အချို့ရှိပြီး အချို့မှာ တိုးချဲ့ဆောက်လုပ်လျက်ရှိသည်။

Dawei Watch



FOLLOW US