News

POST TAGGED AS

လွှတ်တော်ကိုယ်စားလှယ်

တနင်္သာရီ လွှတ်တော်ကိုယ်စားလှယ် ရွာသားကို နားရင်းအုပ်မှု NLD စုံစမ်းစစ်ဆေးမည်

မြိတ်၊ ဧပြီ ၂၃

လူမှုကွန်ရက် စာမျက်နှာများတွင် ပျံ့နှံ့နေသော တနင်္သာရီမြို့နယ် လွှတ်တော်ကိုယ်စားလှယ်က ရွာသားတစ်ဦးကို ကိုယ်ထိလက်ရောက် ကျူးလွန်သည့်ကိစ္စကို စုံစမ်းစစ်ဆေးမည်ဖြစ်ကြောင်း တနင်္သာရီ တိုင်းဒေသကြီး အမျိုးသား ဒီမိုကရေစီ အဖွဲ့ချုပ် (NLD) ဥက္ကဋ္ဌ ဦးအောင်စိုးက ပြောကြားသည်။

Facebook စာမျက်နှာတွင် ပျံ့နှံ့နေသော ဗီဒီယိုဖိုင်အရ တနင်္သာရီမြို့နယ် မဲဆန္ဒနယ်မှ တနင်္သာရီ တိုင်းဒေသကြီး လွှတ်တော်ကိုယ်စားလှယ်က ဒေသခံ ရွာသားတစ်ဦးနှင့် အခြေအတင် ဖြစ်ပွားရင်း နားရင်း အုပ်လိုက်ခြင်း ဖြစ်သည်။

တနင်္သာရီ တိုင်းဒေသကြီး၊ တနင်္သာရီမြို့နယ်ရှိ ကျေးရွာတစ်ရွာတွင် ဧပြီလ ၈ ရက်နေ့က ဖြစ်ပွားခဲ့ခြင်းပြီး ရက်သတ္တပတ် နှစ်ပတ်ခန့် အကြာတွင် Facebook လူမှုကွန်ရက် စာမျက်နှာပေါ် ပျံ့နှံ့ခဲ့ခြင်း ဖြစ်သည်။

ထိုကိစ္စမှာ နိုင်ငံတစ်ဝန်းရှိ အများပြည်သူများအကြား ဝေဖန်စရာ ဖြစ်လာခဲ့သည်။

ယင်းကိစ္စကို စုံစမ်းရန် တိုင်းဒေသကြီး အလုပ်မှုဆောင်အဖွဲ့ကို တာဝန်ပေးသွားမည်ဖြစ်ပြီး ထိုနောက် ပါတီဗဟိုစည်းကမ်းထိန်းသိမ်းရေး ကော်မတီသို့ တင်ပြသွားမည်ဖြစ်ကြောင်း ပြည်သူ့လွှတ်တော် ကိုယ်စားလှယ် တစ်ဦးလည်းဖြစ်သူ ဦးအောင်စိုးက Dawei Watch သို့ ပြောကြားသည်။

မြိတ်ခရိုင်၊ တနင်္သာရီမြို့နယ်၊ ပဝ ချောင်းထဲရွာရှိ စာသင်ကျောင်းဆောင်သစ် သတ်မှတ် အရည်အသွေး ပြည့် မပြည့်ကို တနင်္သာရီ တိုင်းဒေသကြီး လွှတ်တော် ကိုယ်စားလှယ် ဦးရဲမြင့်ဆွေနှင့် အုပ်ချုပ်ရေး၊ ဆောက်လုပ်ရေးတို့မှ တာဝန်ရှိသူများ သွားရောက် စစ်ဆေးရာတွင် ထိုသို့ ဖြစ်ပွားခဲ့ခြင်း ဖြစ်သည်။

ထိုသို့ စစ်ဆေးရာတွင် ပဝရွာမနေ ဦးထွန်းလှဆိုသူက လုပ်ငန်းစစ်ဆေး ဆောင်ရွက်နေစဉ် သစ်သား အသုံးပြုထားမှုများနှင့် ပတ်သက်ပြီး ဝင်ရောက် ပြောဆိုခဲ့သည်ကို ဦးရဲမြင့်ဆွေက ပြန်လည် ရှင်းပြခဲ့ကြောင်း ပျံ့နှံ့နေသော ရုပ်သံဖိုင်အရ သိရသည်။

ရှင်းပြသည်ကို လက်မခံဘဲ အခြားရွာသားအချို့နှင့်ပါ အခြေအတင်ဖြစ်လာပြီးနောက် ဦးရဲမြင့်ဆွေက ထိုသို့ နားရင်း အုပ်လိုက်ခြင်းဖြစ်သည်။

“ခင်ဗျားလည်း နည်းပညာရှင် မဟုတ်ဘူး။ ကျွန်တော်လည်း နည်းပညာရှင် မဟုတ်ဘူး။ ဒီမှာ နည်းပညာရှင်တွေ ပါတယ်။ သူတို့က လိုအပ်တာတွေကို ပြောသွားလိမ့်မယ်”ဟု လွှတ်တော်ကိုယ်စားလှယ် ဦးရဲမြင့်ဆွေက ရွာသားဦးထွန်းလှအား ပြောဆိုခဲ့ကြောင်း ယင်းဖြစ်စဉ်တွင် ပါဝင်နေသူ ဒေါ်ညိုညိုသန်းက ပြောပြသည်။

“ဝိုင်းပြီး တောင်းပန်နေတာတောင် အဆင်မပြေဘူး”ဟု ဒေါ်ညိုညိုသန်းက ဦးထွန်းလှကို ရည်ညွှန်းပြောဆိုသည်။

ထိုကိစ္စနှင့် ပတ်သက်ပြီး ကာယကံရှင် ဦးရဲမြင့်ဆွေအား ဧပြီလ ၂၃ ရက်နေ့ နေ့လယ်က တယ်လီဖုန်းဖြင့် ဆက်သွယ်မေးမြန်းခဲ့သော်လည်း ဖုန်းပိတ်ထားခဲ့သည်။

ဦးရဲမြင့်ဆွေမှာ ယေဘုယျအားဖြင့် နာမည်ပျက် နည်းပါးပြီး တိုင်းအတွင်း နာမည်ရသော တက်ကြွသည့် လွှတ်တော်ကိုယ်စားလှယ် တစ်ဦးအဖြစ်လည်း မှတ်ချက်ပြု ကြသည်။

“သူက တနင်္သာရီမြို့အတွက် ပြည်သူတွေအတွက် တကယ် အလုပ်လုပ်တဲ့သူ တစ်ယောက်ပါ။ တိုင်းလွှတ်တော်မှာ ပြည်သူ့အတွက် မေးခွန်းလည်း အများကြီး မေးတတ်တဲ့သူ တိုင်းလွှတ်တော်အတွက် အားကိုးရတဲ့သူပါ။ လမ်းတံတားစတဲ့ စီမံကိန်းတွေ စစ်ဆေးတဲ့နေရာမှာလည်း စိတ်ချရတဲ့သူ တစ်ယောက်ပါ”ဟု တနင်္သာရီ တိုင်းဒေသကြီး လွှတ်တော် ဥက္ကဋ္ဌ ဦးခင်မောင်အေးက မှတ်ချက်ပြုသည်။

Facebook လူမှုကွန်ရက် စာမျက်နှာတွင် ပျံ့နှံနေသည့် ရုပ်သံဖိုင်နှင့် ပတ်သက်ပြီး ဧပြီလ ၂၄ ရက်နေ့တွင် ပဝကျေးရွာတွင် ရှင်းလင်းပွဲ ပြုလုပ်သွားမည်ဖြစ်ကြောင်း တနင်္သာရီမြို့နယ် လွှတ်တော်ကိုယ်စားလှယ် အသိုင်းအဝိုင်းထံမှ သိရသည်။

Dawei Watch



FOLLOW US