News

POST TAGGED AS

လွှတ်တော်ကိုယ်စားလှယ်

ပြည်ထောင်စုလွှတ်တော်နှင့် ပြည်သူ့လွှတ်တော် ကိုယ်စားလှယ်အချို့ သတိပေးခံရ၊ ပုဂ္ဂိုလ်ရေး တိုက်ခိုက်မှုဟု ကိုယ်စားလှယ်အချို့ ဝေဖန်
နေပြည်တော်၊ ဒီဇင်ဘာ ၂၀

ပြည်ထောင်စု လွှတ်တော်နှင့် ပြည်သူ့လွှတ်တော်တို့၏ ဒီဇင်ဘာလ ၂၀ ရက်က ကျင်းပခဲ့သည့် အစည်းအဝေးများတွင် ကိုယ်စားလှယ်အချို့ကို ပြည်ထောင်စု လွှတ်တော်နာယကနှင့် ပြည်သူ့လွှတ်တော် ဥက္ကဋ္ဌတို့က သတိပေးမှု ပြုလုပ်ခဲ့ရာ ပုဂ္ဂိုလ်ရေး တိုက်ခိုက်မှုဟု ကိုယ်စားလှယ် အချို့က ပြန်လည် ဝေဖန်ခဲ့ကြသည်။

ပြည်သူ့လွှတ်တော် လွှတ်တော် အစည်းအဝေး ကျင်းပနေစဉ်အတွင်း ဂျာနယ် ဖတ်နေသော ကောလင်း မဲဆန္ဒနယ်မှ ဦးမျိုးဇော်အောင်ကို စည်းမဲ့ကမ်းမဲ့ မလုပ်ရန်နှင့် ယင်းသို့ ပြုလုပ်နေပါက လွှတ်တော် အစည်းအဝေးအတွင်း ဝင်မလာရန် ပြည်သူ့လွှတ်တော် ဥက္ကဋ္ဌ ဦးဝင်းမြင့်က သတိပေးခဲ့ပြီး ပြည်ထောင်စု လွှတ်တော် အစည်းအဝေးတွင် ရခိုင်ပြည်နယ် မြောက်ဦး ပြည်သူ့လွှတ်တော် ကိုယ်စားလှယ် ဦးဦးလှစောနှင့် ရှမ်းပြည်နယ် နမ့်ဆန် မဲဆန္ဒနယ်မှ ဦးဝင်းထူးတို့က အရေးကြီး အဆိုနှင့် ပတ်သက်၍ The Voice သတင်းစာသို့ ပြောကြားခဲ့သော သတင်း အချက်အလက်များသည် လွှတ်တော်၏ ဂုဏ်သိက္ခာကို ကျဆင်းစေပြီး ပြည်သူလူထူ အနေနှင့်လည်း အထင်အမြင် လွဲမှားစေသည်ဟုဆိုကာ လွှတ်တော် နာယက မန်းဝင်းခိုင်သန်း၏ သတိပေးမှု ခံခဲ့ရသည်။

ဒီဇင်ဘာ ၁၅ ရက်ထုတ် The Voice သတင်းစာတွင် ဦးဝင်းထူး တင်သွင်းရန် ပြုလုပ်သည့် လက်နက်ကိုင် တိုင်းရင်းသားများ အနေနှင့် NCA လက်မှတ်ရေး ထိုးရန်နှင့် မကြာမီ ထပ်မံ ကျင်းပတော့မည့် ငြိမ်းချမ်းရေး ညီလာခံတွင် ပါဝင်နိုင်ရန် NRPC နှင့် ပြည်ထောင်စု အစိုးရ အနေနှင့် ခက်ခဲသော ကိစ္စများကို ဖြေလျှော့ပေးရေး အရေးကြီးအဆိုကို လွှတ်တော်နာယကထံ တင်ပြချက်ကို ပယ်ချခဲ့သည်ဟု ပြောဆိုမှုများကြောင့် ဥက္ကဋ္ဌက အထက်ပါအတိုင်း သတိပေးခဲ့ခြင်း ဖြစ်သည်။

ယင်းသတင်း အချက်အလက်တွင် ဦးဦးလှစော အနေနှင့် တိုင်းရင်းသား ပါတီများ၏ အခွင့်အရေးကို ပိတ်ပင်သည်ဟု မှတ်ချက်ပြု ပြောဆိုခြင်းကြောင့် နောက်နောင်တွင် လူကြီးလူကောင်းဆန်စွာ ပြောဆိုရန်နှင့် ထပ်မံ ပြောဆိုမှုများ ရှိလာပါက တူထု၍ သတိပေးသည်အထိ ပြုလုပ်မည်ဖြစ်ကြောင်းကို “နောက်ဆို ဒီလိုဖြစ်လာရင် နာယက အနေနဲ့ တူထုဖို့ လက်မနှေးပါဘူး”ဟု မန်းဝင်းခိုင်သန်းက ကြိုတင် သတိပေးလိုက်သည်။

ယင်းအဆိုသည် အစိုးရနှင့် သက်ဆိုင်ရာ တာဝန်ရှိသူများ အနေနှင့် ဆက်တိုက် ပြုလုပ်နေသည့် ကိစ္စဖြစ်ခြင်း၊ လတ်တလော ဖြစ်ပေါ်လာသည့်ကိစ္စ မဟုတ်ခြင်းကြောင့် ပြည်ထောင်စု လွှတ်တော်ဆိုင်ရာ ဥပဒေ၊ နည်းဥပဒေနှင့် ကိုက်ညီမှု မရှိခြင်း တို့ကြောင့် ကိုယ်စားလှယ်များ အနေနှင့် ဥပဒေများကို ကျေလည်အောင် ဖတ်စေလိုပြီး လိုအပ်ပါက ဥပဒေ နားလည်သူများကို မေးမြန်း ဆွေးနွေးစေလိုကြောင်း ပြည်ထောင်စုလွှတ်တော်နာယကက ဆိုသည်။

ယင်းကဲ့သို့ သတိပေးပြောဆိုမှုနှင့် ပတ်သက်၍ ဦးဦးလှစောက “ကျွန်တော်တို့ ကိုယ်စားလှယ်တွေ အနေနဲ့ မီဒီယာမှာ ပြောဆိုခွင့် မရှိဘူးလား။ လွှတ်တော်ထဲမှာမို့ အပြင်မှာဆိုရင် ဥက္ကဋ္ဌတွေကို ကျော်ဟိန်း စကားနဲ့ ပြောရရင် ပျင်းတယ်”ဟု မီဒီယာများကို ပြောကြားသည်။

နိုင်ငံရေး အတွေ့အကြုံအရ ၎င်းအနေဖြင့် ကြာမြင့်စွာ လုပ်ကိုင်ခဲ့သောကြောင့် လွှတ်တော်အတွင်း မဟုတ်ဘဲ ဒီဘိတ် ကဲ့သို့ ရင်ဆိုင် ဆွေးနွေးမည်ဆိုပါက အပြန်အလှန် ဆွေးနွေးလိုသည့် Issue အတွက် အဆင်သင့် ရှိနေကြောင်း ဦးဦးလှစောက ဆိုသည်။

ဦးဦးလှစောအပေါ် လွှတ်တော် နာယက သတိပေး ပြောကြားချက်သည် ပုဂ္ဂိုလ်ရေး တိုက်ခိုက်သည့် အခြေအနေ ဖြစ်ကြောင်း၊ လွှတ်တော်ဆိုင်ရာ ဥပဒေ၊ နည်းဥပဒေများသည် ကိုယ်စားလှယ်များ သာမက အကြီးအကဲ(ဥက္ကဋ္ဌ) များသည်လည်း လိုက်နာရန် လိုအပ်ချက် ရှိ မရှိကို ရှင်းပြရန်လိုကြောင်း ကျောက်ဖြူ မဲဆန္ဒနယ်မှ ဦးဘရှိန်က The Voice သို့ မှတ်ချက်ပေးသည်။

ပြည်သူ့လွှတ်တော်ဥက္ကဋ္ဌ၏ သတိ ပေးခံရသော NLD ပါတီဝင် ပြည်သူ့လွှတ်တော်ကိုယ်စားလှယ် ဦးမျိုးဇော်အောင်ကမူ လွှတ်တော်ဥက္ကဋ္ဌ အနေနှင့် ယင်းကဲ့သို့ ပြောဆိုခြင်းသည် လွှတ်တော်အတွင်း စည်းကမ်းလိုက်နာရန် ထိန်းညှိပေးခြင်း ဖြစ်ပြီး ၎င်းအနေနှင့်လည်း ဆင်ခြင်ရမည့် အပိုင်းဖြစ်ကြောင်း၊ အခြားမြို့နယ် ဒေသအတွက် မေးခွန်း မေးမြန်းသည့်အချိန်တွင် အချိန်ကို အကျိုးရှိအောင် အသုံးချခြင်းဖြစ်သော်လည်း ပြည်သူများ အနေနှင့် အထင်အမြင် လွဲမှားမှုရှိပါကလည်း တောင်းပန်လိုကြောင်း The Voice သို့ ပြောသည်။ 

“လွှတ်တော်ကိုယ်စားလှယ်တွေကို ကြည့်ရတာ မိထွေးအိမ်မှာ ကပ်နေရတဲ့ မိတဆိုး သားသမီးတွေ ကျနေတာပဲ၊ ဟိုလူ ကြောက်ရ ဒီလူ ကြောက်ရနဲ့၊ နိုင်ငံတကာ လွှတ်တော်တွေမှာ သားကလေးကို ခေါ်သွားပြီး နို့တိုက်လို့ ရတယ်၊ ကိုယ် မကျွမ်းကျင်တဲ့အပိုင်း စိတ်မဝင်စားတဲ့အပိုင်း မဆွေးနွေးလို့ရတယ်၊ လွှတ်တော် အစည်းအဝေးကို အချိန်ပြည့် တက်နေစရာ မလိုဘူး။ ဟို အရောင် မဝတ်ရ ဒီအရောင် မဝတ်ရဆိုတာတွေ မရှိဘူး။ လွှတ်တော်ရေးရာ ကော်မတီက အဓိက လုပ်ရတယ်”ဟု DVB Debate အစီအစဉ်မှ ကိုသာလွန်ဇောင်းထက်က မှတ်ချက်ပြုသည်။

S-01



FOLLOW US