News

POST TAGGED AS

လုံခြုံရေး

ဘဏ်များရဲ့ လုံခြုံရေး အလေးထားစေချင်
ဇန်နဝါရီလ ၂၃ ရက်နေ့က မြစ်ကြီးနားမြို့မှာရှိတဲ့ ကမ္ဘောဇဘဏ်ကို လူလေးဦးက လက်နက်နဲ့ခြိမ်းခြောက်ပြီး ကျပ်ငွေ သိန်း ၉၂၀ ကျော်ကို လုယက်မှုဖြစ်ပွားခဲ့ပါတယ်။ တကယ်တော့ ကမ္ဘောဇဘဏ်ဆိုတာ ပုဂ္ဂလိကဘဏ်တစ်ခုပါ။ ဒါပေမဲ့ ဒီဘဏ်ထဲမှာရှိတဲ့ ငွေတွေက အများပြည်သူတွေကအပ်နှံထားတဲ့ တစ်နည်းပြောရရင် ပြည်သူတွေကပိုင်တဲ့ ငွေတွေဖြစ်တာကြောင့် အများပြည်သူနဲ့ဆိုင်တဲ့ ဘဏ်လို့ပြောရင်လည်း မှားမယ်မထင်ပါဘူး။ ဘဏ်ဆိုတာက ပြည်သူတွေရဲ့ငွေတွေကို လုံခြုံစွာထိန်းသိမ်းထားပေးခြင်းဆိုတဲ့ ဝန်ဆောင်မှုကို ပြုလုပ်ပေးတာပါ။ ဒီအတွက် ဘဏ်က ငွေအပ်နှံတဲ့ပြည်သူတွေဆီကနေ ဝန်ဆောင်ခကို ယူပါတယ်။ ဝန်ဆောင်ခယူတဲ့အတွက် ငွေကြေးလုံခြုံမှုနဲ့ပတ်သက်လို့ ဘဏ်က အပြည့်အဝ တာဝန်ယူရမယ်လို့ ပြောလို့မရပါဘူး။ မြန်မာနိုင်ငံမှာ ပုဂ္ဂလိကအဖွဲ့အစည်းများဆိုင်ရာ လုံခြုံရေးဥပဒေ မထွက်သေးတဲ့အတွက်ကြောင့် အများပြည်သူပိုင်တဲ့ ငွေကြေး၊ ပစ္စည်းနဲ့ ဓနဥစ္စာတွေအတွက် နိုင်ငံတော်အနေနဲ့လည်း အထိုက်အလျောက် အကာအကွယ်ပေးဖို့ တာဝန်ရှိတယ်လို့ ဆိုချင်ပါတယ်။

ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေ ပုဒ်မ ၃၅၆ မှာ “နိုင်ငံတော်သည် နိုင်ငံသားများ၏ တရားဝင်ရရှိပိုင်ဆိုင်ထား သောရွှေ့ပြောင်းနိုင်သောပစ္စည်း၊ မရွှေ့မပြောင်းနိုင်သောပစ္စည်းများနှင့် စပ်လျဉ်း၍ ဥပဒေအရကာကွယ်ပေးရမည်”ဆိုပြီး ပြဋ္ဌာန်းထားပါတယ်။ ပြည်သူတွေဟာ ဘဏ်တွေရဲ့လုံခြုံရေးအပါအဝင် ငွေကြေးလုံခြုံစိတ်ချရမှုရှိမှသာလျှင် မိမိတို့ရဲ့ငွေကြေးတွေကို ဘဏ်တွေမှာအပ်နှံကြမှာ ဖြစ်ပါတယ်။ ဒါမှလည်း ဘဏ်တွေကရပ်တည်နိုင်မှာဖြစ်ပြီး ငွေကြေးလိုအပ်တဲ့သူတွေကို ပြန်လည်ထုတ်ချေးနိုင်မှာဖြစ်ပြီးတော့ မြန်မာ့စီးပွားရေးကဏ္ဍ ပိုမိုဖွံ့ဖြိုးတိုးတက်လာမှာ ဖြစ်ပါတယ်။

ဘဏ်တွေရဲ့လုံခြုံရေးနဲ့ပတ်သက်လို့ ၂၀၁၃ ခုနှစ် ဇူလိုင်လထဲမှာ ထုတ်ခဲ့တဲ့ DEMOCRACY Today သတင်းစာမှာ “အသိနှင့်သတိအစဉ်ပြု လုံခြုံမှုကိုဦးစားပေး”ဆိုတဲ့ခေါင်းစဉ်နဲ့ ကျွန်တော် ဆောင်းပါးတစ်ပုဒ် ရေးသားဖော်ပြခဲ့ပါတယ်။ အဲဒီဆောင်းပါးမှာ ရေးသားခဲ့တာကို ပြန်ပြီး ကောက်နုတ်ဖော်ပြရရင် ...

“ယခုအခါ မြန်မာနိုင်ငံရှိ ပုဂ္ဂလိကဘဏ်များတွင် ကိုယ်ပိုင်လုံခြုံရေးဝန်ထမ်းများ ထားရှိကြသည်ကို တွေ့ရပါသည်။ သို့ရာတွင် ဘဏ်လုံခြုံရေးဝန်ထမ်းများသည် (Customer Service) ခေါ် ဝန်ဆောင်မှုလုပ်ငန်းများကို ဦးစားပေးဆောင်ရွက်ကြပြီး မိမိ၏ပင်မတာဝန်ဖြစ်သည့် လုံခြုံရေးလုပ်ငန်းအပေါ် အာရုံစိုက်မှု၊ အလေးထားဆောင်ရွက်မှု အားနည်းသည်ကို တွေ့ရှိရပါသည်။ ဤသည်မှာလည်း မိမိ၏ဖောက်သည် (Customer) များ စိတ်ငြိုငြင်မည်ကို စိုးရိမ်သည့်အတွက် လုံခြုံရေးသတိပြုမှု (Security Awareness) ကို လျှော့ပေါ့တာဝန်ထမ်းဆောင်စေသည်ဟု ယူဆပါသည်။ မြန်မာနိုင်ငံအနေနှင့်လည်း ဘဏ်ဓားပြတိုက်မှုဟူသည် ယခင်က တစ်ကြိမ်တစ်ခါမျှ မဖြစ်ပေါ်ခဲ့ဖူးသကဲ့သို့ နောင်တွင်လည်း မဖြစ်ပေါ်လာနိုင်ဟူ၍ ယူဆသည့်အတွက်လည်း ဖြစ်နိုင်ပါသည်”။

“လောကတွင် မဖြစ်နိုင်သောအရာဟူသည်မရှိ၊ မဖြစ်သေးသည် သာရှိသည် ဟူသောဆိုရိုးစကားသည် လုံခြုံရေးနှင့်ပတ်သက်၍ သီးသန့်ထားရှိခဲ့သော အဆိုအမိန့်ဟူ၍ ယူဆရလောက်အောင်ပင် လုံခြုံရေးတာဝန်ရှိသူတို့ အလေးအနက်ထား လိုက်နာဆောင်ရွက်လျက်ရှိကြောင်း သိရှိရပါသည်။ ယနေ့ဘဏ်များတွင် (CCTV) ကင်မရာများ တပ်ဆင်ထားကြပါသည်။ ထို့ထက်ပို၍ အရေးပေါ်အခြေအနေဖြစ်လာပါက နီးစပ်ရာရဲတပ်ဖွဲ့သို့ အလိုအလျောက် အကြောင်းကြားနိုင်မည့်စနစ်မျိုးလည်း တပ်ဆင်ရန် လိုအပ်မည်ဖြစ်ပါသည်”။

“နောက်ဆုံးအနေနှင့် ရေးသားတင်ပြလိုသည်မှာ ပြည်သူများလည်း စိတ်ချယုံကြည်မှုရစေ၊ ဘဏ်များလည်းအကျိုးကျေးဇူးရှိစေ၊ နိုင်ငံတော်အစိုးရလည်း ဝင်ငွေရစေမည့် နည်းလမ်းဖြစ်ပါသည်။ မြန်မာနိုင်ငံရဲတပ်ဖွဲ့အနေနှင့် သီးသန့်ဝန်ဆောင်ခ (တရားဝင်) ရယူ၍ ဝန်ထမ်းအငှားစနစ်ဖြင့် ဘဏ်များ၏လုံခြုံရေးကို တစ်ဖက်တစ်လမ်းမှ ပံ့ပိုးကူညီဆောင်ရွက်ပေးမည်ဆိုလျှင် ရဲတပ်ဖွဲ့၏ မူလတာဝန်ဖြစ်သော ပြည်သူ့လုံခြုံရေးကို တာဝန်ယူရာရောက်သည့်အပြင် နိုင်ငံတော်အတွက်လည်း ဝင်ငွေရလမ်းတစ်ခု တိုးပွားလာမည်ဖြစ်ပါကြောင်း ရေးသားလိုက်ရပါသည်” ဆိုပြီးတော့ ရေးသားဖော်ပြခဲ့ပါတယ်။

ကျွန်တော်ရေးသားဖော်ပြခဲ့သလိုပဲ အခု ကမ္ဘောဇဘဏ်မှာ လုယက် မှုဖြစ်ပွားခဲ့ပြီဖြစ်ပါတယ်။ ဖြစ်စဉ်ကိုကြည့်ရင်လည်း ဘဏ်လုံခြုံရေးဝန်ထမ်း ကို တုတ်နဲ့ရိုက်ခဲ့တယ်လို့သိရှိရတဲ့အတွက် ဘဏ်လုံခြုံရေးဝန်ထမ်းတွေ အနေနဲ့ (လက်နက်ကိုင်ဆောင်ခွင့်မရှိတဲ့အပြင်) လုံခြုံရေးအသိနဲ့ သတိအားနည်းတယ်လို့ သုံးသပ်လို့ရပါတယ်။ ဘဏ်ကိုလာကြတဲ့သူတွေအားလုံးကို မိမိတို့ရဲ့ဖောက်သည်များအဖြစ်ယူဆပြီး ရိုသေသမှုပြုကာ ခရီးဦးကြိုဆိုကြတဲ့အဖြစ်ဟာ လုယက်သူတွေအတွက် အခွင့်အရေးတစ်ခုဖြစ်စေတာကတော့ အမှန်ပဲဖြစ်ပါတယ်။

ဘဏ်ဝန်ထမ်းများရဲ့ လုံခြုံရေးအသိ

ဘဏ်တွေရဲ့ လုံခြုံရေးဝန်ထမ်းတွေ လုံခြုံရေးအသိနဲ့ လုံခြုံရေးသတိရှိမှုအားနည်းသလိုပဲ ဘဏ်တွေရဲ့ ဧည့်ကြိုဝန်ထမ်းတွေ၊ ငွေကြေးဆိုင်ရာ ဝန်ဆောင်မှုဌာနတွေဖြစ်တဲ့ ငွေသွင်း/ငွေထုတ်/ငွေလွှဲ အစရှိတဲ့ဌာနတွေက ဝန်ထမ်းတွေအနေနဲ့လည်း မိမိတို့ရဲ့ပင်မတာဝန်ဖြစ်တဲ့ ငွေကြေးနဲ့ စာရင်းဇယားတွေ မှားယွင်းမှုမရှိရေး၊ ဖောက်သည်တွေ စိတ်ကျေနပ်မှု ရှိစေရေး အစရှိတာတွေကို ဦးစားပေးဆောင်ရွက်နေကြရတဲ့အတွက် ကြောင့် လုံခြုံရေးသတိရှိဖို့ဆိုတာမလွယ်ပါဘူး။ ဒါပေမဲ့ ဝန်ထမ်းတွေအနေနဲ့ လုံခြုံရေးအသိလေးတော့ ရှိကြဖို့လိုအပ်ပါတယ်။ လုံခြုံရေးအသိရှိမယ်ဆိုရင် လုံခြုံရေးသတိက အလိုအလျောက်ဖြစ်ပေါ်လာမှာ ဖြစ်ပါတယ်။

ပုဂ္ဂလိကဘဏ်တွေမှာ အခုမြင်တွေ့နေရတာတွေက ငွေထုတ်ပေးသူနဲ့ ငွေထုတ်ယူသူအကြားမှာ ဘာအတားအဆီးမှမရှိဘဲ ကောင်တာပေါ် မှာ ငွေတွေအပုံလိုက်တင်ထားတာတွေ၊ ကောင်တာအတွင်းမှာလည်း ငွေ တွေကို ဒီအတိုင်းစုပုံထားတာတွေကို မြင်တွေ့နေရတာပါပဲ။ အဲဒါကလည်း လောဘသားတွေရဲ့စိတ်ထဲမှာ ငွေကိုလုယူချင်စိတ်ဖြစ်လာအောင် လှုံ့ဆော် ထားမှုတစ်ခုလို ဖြစ်နေပါတယ်။ ဒီနေရာမှာ နိုင်ငံပိုင်ဘဏ်တွေနဲ့ကွာခြား တာကို သတိပြုမိပါတယ်။ နိုင်ငံပိုင်ဘဏ်တွေမှာတော့ ငွေထုတ်ပေးသူနဲ့ ငွေထုတ်ယူသူအကြားမှာ သံပန်း။သံတိုင်လေးတွေ ကာခြားထားပြီးတော့ အပေါက်ငယ်တစ်ခုပဲထားရှိတာကို တွေ့ရပါတယ်။ အဲဒါအပြင် နိုင်ငံပိုင် ဘဏ်တွေမှာ ငွေသွင်း။ငွေထုတ်ကောင်တာတွေကို အတွင်းဘက်ကလည်း သံပန်း။သံတံခါးတွေနဲ့ကာရံပြီး အခန်းကိုသော့ခတ်ထားပါတယ်။ တာဝန် ရှိသူမှအပ ဝင်ထွက်ခွင့်မရှိပါဘူး။ ဒါကြောင့် လုယက်သူတွေ ဘဏ်ထဲကို အလွယ်တကူဝင်ရောက်လာနိုင်စေဦးတော့ အချိန်တိုအတွင်းမှာ ငွေကြေး ပမာဏများများ ပါသွားစရာအကြောင်းမရှိပါဘူး။ ဒါပေမဲ့ တစ်ခုတော့ ရှိပါတယ်။ နိုင်ငံပိုင်ဘဏ်တွေမှာလည်း လုံခြုံရေးနဲ့တူတဲ့ဝန်ထမ်းတစ် ယောက်မှမရှိဘဲ အစောင့်လိုလို ဘာလိုလို ဝန်ထမ်းတစ်ယောက်လောက် ပဲတွေ့ရပါတယ်။ မြန်မာနိုင်ငံရဲတပ်ဖွဲအနေနဲ့ ပြည်သူ့ဘဏ္ဍာ ရန်ပုံငွေတွေ ကို စောင့်ကြပ်ထိန်းသိမ်းဖို့ တာဝန်ရှိတယ်လို့ဆိုပေမယ့် ပန်းဆိုးတန်း တစ်ဝိုက်က ဘဏ်တွေရဲ့အနီးအနားမှာ ရဲတပ်ဖွဲ့ဝင်တစ်ယောက်မှ မတွေ့ရ ပါဘူး။ အရင်တုန်းကတော့ ရန်ကုန်တိုင်း (တဝတ/တယက) ရုံးရှိတဲ့အတွက် ဘဏ်တွေနဲ့မလှမ်းမကမ်းမှာ ရဲကင်းတစ်ခုတော့ရှိပါတယ်။

ဘဏ်လုံခြုံရေး အဆင့်မြှင့်ဖို့လိုပြီ

အခုဖြစ်စဉ်ဟာ ဘဏ်တွေရဲ့လုံခြုံရေး အားနည်းတာကို ထောက်ပြလိုက်ခြင်းဖြစ်သလို လုံခြုံရေးအဆင့်မြှင့်တင်ဖို့ လိုအပ်ပြီဖြစ်ကြောင်း အချက်ပေးလိုက်တဲ့ ခေါင်းလောင်းသံလည်းဖြစ်ပါတယ်။ ယခုအခါ မြန်မာနိုင်ငံမှာရှိတဲ့ ပုဂ္ဂလိကဘဏ်တွေအားလုံးမှာ CCTV ကင်မရာတွေ တပ်ဆင်ထားရှိတဲ့အတွက် အချင်းဖြစ်ပွားပြီးနောက် ပြန်လည်ကြည့်ရှုခြင်းဖြင့် ပြစ်မှုကျူးလွန်သူရဲ့ ပုံပန်းသဏ္ဌာန်ကိုရရှိပြီး ဖမ်းဆီးရမိရေးအတွက် အထောက်အကူရမှာဖြစ်ပါတယ်။ ဒါပေမဲ့ ထွက်ပြေးလွတ်မြောက်သွားသူကို ဖမ်းဆီးရမိဖို့အရေး ခက်ခဲမှာဖြစ်သလို တကယ်လို့ ဖမ်းဆီးရမိပါလျှင်လည်း ဆုံးရှုံးခဲ့တဲ့ငွေကြေးတန်ဖိုးအပြည့်အဝ ပြန်ပြီးရချင်မှရမှာ ဖြစ်ပါတယ်။ ဒါကြောင့်မို့ ဘဏ်တွေရဲ့လုံခြုံရေးကို ပိုမိုအဆင့်မြှင့်ဖို့ဆိုတာ မဖြစ်မနေလိုအပ်လာပြီ ဖြစ်ပါတယ်။

နည်းပညာအသုံးပြုခြင်းနဲ့ လူ့စွမ်းအားသုံး လုံခြုံရေးစနစ်

ယခုအခါမှာ နည်းပညာတွေဟာ များစွာ အဆင်မြင့်မားလာပြီဖြစ်ပါတယ်။ လုံခြုံရေးနဲ့ပတ်သက်လို့လည်း ပြစ်မှုကျူးလွန်ပြီးမှ ကြည့်လို့ရတဲ့ ကင်မရာတွေအပြင် အချိန်ပြည့်အဝေးကနေ လှမ်းကြည့်လို့ရတဲ့စနစ်တွေ၊ ထူးခြားမှုတစ်စုံတစ်ခုဖြစ်တာနဲ့ ရဲတပ်ဖွဲ့စခန်းနဲ့ အခြားမိမိအသိပေး၊ အကြောင်းကြားချင်တဲ့ တယ်လီဖုန်းနံပါတ်ကို ချက်ချင်းအသိပေး အကြောင်းကြားနိုင်တဲ့စနစ်တွေလည်း ပေါ်ပေါက်နေပြီဖြစ်လို့ မြို့ကြီးတွေမှာသာမက ဘဏ်ခွဲတွေအားလုံးမှာ တပ်ဆင်အသုံးပြုသင့်ပါတယ်။ နိုင်ငံပိုင်ဘဏ်တွေမှာလည်း လုံခြုံရေးစနစ်အားနည်းတာမို့ ဆုံးရှုံးသွားနိုင်တဲ့ငွေတန်ဖိုးလောက် ပမာဏမများတဲ့ လုံခြုံရေးစနစ်တွေကို တပ်ဆင်အသုံးပြုသင့်ပါပြီ။

နောက်တစ်ခုကတော့ နည်းပညာဘယ်လောက်ပဲ အဆင့်မြင့်မား ပါစေ၊ လူ့စွမ်းအားအကူအညီမပါဘဲနဲ့လည်း အပြည့်အဝ မလုံခြုံပါဘူး။ ဝန်ထမ်းတွေကို နည်းပညာသုံးပစ္စည်းတွေ ကိုင်တွယ်အသုံးပြုတတ်အောင် လေ့ကျင့်သင်ကြားပေးဖို့လိုသလို လုံခြုံရေးအသိ၊ လုံခြုံရေးသတိနဲ့ လုံခြုံရေးဆိုင်ရာ အသိပညာဗဟုသုတတွေကို မျှဝေပေးဖို့လည်း လိုအပ်ပါတယ်။ ဘဏ်တွေမှာ လုံခြုံရေးတာဝန်ယူထားကြတဲ့ ဝန်ထမ်းတွေအနေနဲ့လည်း Customer Service ဆိုတာဟာ ဘဏ်ကိုလာတဲ့ဖောက်သည်တွေကို ခရီးဦးကြိုပြုတာ၊ ငွေထုပ်တွေကို ကားပေါ်တင်ပေးတာလောက်သာ မဟုတ်ဘဲ၊ ဖောက်သည်တွေရဲ့ ငွေကြေးလုံခြုံရေးနဲ့ ဘဏ်ရဲ့လုံခြုံရေးအတွက် ဘဏ်ထဲကို မသမာသူတွေ၊ လုယက်၊ ဓားပြတိုက်မယ့်သူတွေ ဝင်မလာအောင် လုံခြုံရေးသတိအမြဲထားနေဖို့လိုအပ်မှာ ဖြစ်ပါတယ်။

တစ်ချိန်တုန်းက Shopping mall/ ဈေးဝယ်စင်တာတွေမှာ ဈေးဝယ်လာသူတွေရဲ့အိတ်တွေကို ရှာဖွေတာ၊ စစ်ဆေးတာ ဘယ်သူမှမကြိုက်ကြပါဘူး။ ဒါပေမဲ့ မြေနီကုန်းက ဒဂုံစင်တာ၊ ရှစ်မိုင်က Junction City နဲ့ မင်္ဂလာတောင်ညွန့်နဲ့ ပုဇွန်တောင်က ကုန်သွယ်ရေးဗဟိုဌာနတို့မှာ ဗုံးပေါက်ကွဲပြီးနောက် ရန်ကုန်မြို့က ဈေးဝယ်စင်တာကြီးတွေအားလုံးမှာ ရှာဖွေစစ်ဆေးတာကို ဘယ်သူမှ မငြိုမငြင်ကြတော့ဘဲ ကြည်ကြည်ဖြူဖြူ လက်ခံနေကြတာ အားလုံးအသိပဲဖြစ်ပါတယ်။ ဒါကြောင့် ဘဏ်တွေမှာလည်း ငွေကြေးအပ်နှံသူတွေကို အသိပညာပေးပြီး လုံခြုံရေးအရ ဆောင်ရွက်သင့်တာတွေကို ဆောင်ရွက်မယ်ဆိုရင် ပြည်သူတွေက လက်မခံနိုင်စရာအကြောင်းမရှိပါဘူး။ ပြည်သူတွေက ဘဏ်မှာ ငွေကြေးနဲ့ပစ္စည်း အပ်နှံကြတဲ့ရည်ရွယ်ချက်ကလည်း မစို့မပို့အတိုးရရှိဖို့ဆိုတာထက် မိမိတို့ရဲ့ငွေကြေးနဲ့ ပစ္စည်း၊ ဥစ္စာ ရတနာရွှေငွေတွေ လုံခြုံမှုရှိဖို့က အဓိကဖြစ်ပါတယ်။ ငွေကြေးဆုံးရှုံးရင် ဘဏ်ကတာဝန်ယူပေးမှာဖြစ်ပေမယ့် ဘယ်လိုမှ အစားပြန်မရနိုင်တဲ့ မိမွေ၊ ဖမွေ ရတနာပစ္စည်းတွေဆုံးရှုံးမှာက ပိုပြီးအရေးကြီးပါတယ်။

နောက်ဆုံးအနေနဲ့ အကြံပြုတင်ပြချင်တာကတော့ ဖြစ်နိုင်၊ မဖြစ်နိုင်မသိပေမယ့် စီမံကိန်းနဲ့ ဘဏ္ဍာရေးဝန်ကြီးဌာနနဲ့ မြန်မာနိုင်ငံတော်ဗဟိုဘဏ်တို့အနေနဲ့ ပြည်ထဲရေးဝန်ကြီးဌာန၊ မြန်မာနိုင်ငံရဲတပ်ဖွဲ့တို့နဲ့ ညှိနှိုင်းပြီး ဘဏ်တွေရဲ့လုံခြုံရေးကို တစ်နည်းတစ်ဖုံ အဆင်ပြေအောင် ညှိနှိုင်းဆောင်ရွက်နိုင်ကြမယ်ဆိုရင် ပြည်သူတွေအနေနဲ့ မိမိပစ္စည်းကို ဘဏ်မှာအပ်နှံထားပြီး ရင်မောနေရတဲ့အဖြစ်က လွတ်ကင်းနိုင်မှာဖြစ်ပါကြောင်း တင်ပြလိုက်ရပါတယ် ...။

သိန်းထက်အောင်



FOLLOW US