News

POST TAGGED AS

လူမှုရေးအသင်း

ပဲခူးလူမှုရေးအသင်းမြေနေရာ အစိုးရဖယ်ခိုင်း၊ အသင်းက မဖယ်ဟု ပြန်လည်တုံ့ပြန်


တောင်ငူ၊ မတ် ၂၅

ပဲခူးတိုင်းဒေသကြီး ပဲခူးမြို့နယ် တောင်သူစုကျေးရွာအနီး အခြေစိုက်ကာ ပဲခူးမြို့ပေါ်ရပ်ကွက်၊ ကျေးရွာများအတွက် ပရဟိတလုပ်ငန်းများ လုပ်ကိုင်ကူညီဆောင်ရွက်ပေးနေသည့် ကလျာဏမိတ္တ လူမှုကူညီရေးအသင်းကို ယင်းတိုင်းအစိုးရက ဖယ်ရှားပေးရန် ညွှန်ကြားချက်ကို လက်မခံကြောင်း အဆိုပါအသင်းထံမှ သိရသည်။

ယခုနှစ် ဖေဖော်ဝါရီလ ၂၇ ရက်နေ့ က တိုင်းဒေသကြီးအစိုးရအဖွဲ့က စာအမှတ် ၈/၂-၂၀/ ဦး ၆ (၁၉၃၄) ဖြင့် ဝန်ကြီးချုပ်ကိုယ်စား ပဲခူးတိုင်း စည်ပင်သာယာရေးနှင့် လူမှုရေးဝန်ကြီး ဒေါ်ညွှန့်ညွှန့်ဌေး လက်မှတ်ရေးထိုးထားသည့် ဖယ်ရှားပေးရန် စာဖြင့် အကြောင်းကြားခဲ့ခြင်းဖြစ်သည်။

“အသင်းမြေနေရာကိုလည်း အရင်ဝန်ကြီးချုပ် ဦးဉာဏ်ဝင်းလက်ထက်က မြေနေရာငှားရမ်းချထားပေးခဲ့တာဖြစ်ပြီး လက်ရှိပုံစံ ၁၀၅ လျှောက်ထားတယ်ဆိုပြီး ဝန်ကြီးချုပ်ဆီ စာတင်တဲ့ ဘုန်းကြီးကလည်း ဘာပိုင်ဆိုင်မှုမှ မပြနိုင်တဲ့အတွက် မဖယ်ရှားပေးနိုင်ကြောင်း စာပြန်တင်ပါမယ်။ အစိုးရအဖွဲ့က ပြန်ကြားစာပေါ်ကြည့်ပြီး တုံ့ပြန်မှုတွေ ဆက်လုပ်မယ်”ဟု ကလျာဏမိတ္တ လူမှုကူညီရေးအသင်း ဥက္ကဋ္ဌ ဦးတင့်ဆွေမြင့် (ခေါ်) ဦးကုလားက ပြောဆိုသည်။

ပဲခူးမြို့နယ် စကားဝါမြေ ကျီးတောင် တောရကျောင်းဆရာတော် ဒေါက်တာပညာသာမိက တောင်သူစုကျေးရွာအနီးရှိ အသင်းရုံးဆောက်လုပ်ထားသည့် ကွင်းအမှတ် ၆၄၀ (ခ)၊ ဖဲဖောင်တော်ကွင်း၏ မြေကွက်အမှတ် (၁+၂) မြေတစ်ဧက ငှားရမ်းသုံးစွဲခွင့် လျှောက်ထားမှုနှင့်ပတ်သက်ပြီး ကားပါကင်ဆောက်လုပ်ကာ ဝင်ကြေးကောက်ခံရန် သင့်လျော်သည်ဟု ယူဆရသည့်အတွက် လူမှုရေးအသင်းကို သင့်တော်ရာနေရာသို့ ရွှေ့ဆိုင်းရန် အကြောင်းကြားထားကြောင်း ညွှန်ကြားစာတွင် ထည့်သွင်းဖော်ပြထားသည်။

လက်ရှိယင်းနေရာကို အသင်းက မြို့နယ်အုပ်ချုပ်ရေး အာဏာပိုင်အဖွဲ့သို့ တစ်လလျှင် ၅၀၀၀ ကျပ်ဖြင့် တစ်နှစ်လျှင် ကျပ်ခြောက်သောင်း ပေးသွင်း၍ ငှားရမ်းထားခြင်းဖြစ်ကြောင်း ယင်းအသင်းထံမှ သိရသည်။

“နှစ်ပေါင်းများစွာ လူမှုရေးအသင်းကြီးကို ချထားပေးခဲ့တဲ့မြေနေရာ အနားမှာ ဘုရားတစ်ဆူ ရှိတယ်။ အဲဒီဘုရားက နောက်ပိုင်း ဘုရားဖူးလာတာများတော့ ကျီးတောင်တောရ ကျောင်းဆရာတော်က ကားပါကင်လုပ်ပြီး ငှားရမ်းခယူဖို့ လုပ်ချင်တော့ ဝန်ကြီးချုပ်ဆီစာတင်တာပါ။ ဒါကို အောက်ခြေမဆင်းဘဲ ဝန်ကြီးချုပ်က ညွှန်ကြားတာကို စည်ပင်ဝန်ကြီးက စာထုတ်ပြန်လိုက်တာပါ”ဟု ပဲခူးမြို့ခံ နိုင်ငံရေးတက်ကြွလှုပ်ရှားသူတစ်ဦးက ပြောဆိုသည်။

ပဲခူးမြို့ ကလျာဏမိတ္တ လူမှုကူညီရေးအသင်းကို ၂၀၀၂ ခုနှစ်အတွင်းက စတင်ဖွဲ့စည်းခဲ့ပြီး လက်ရှိတွင် အသင်းဝင် ၃၄၀၀ ခန့်ရှိကာ အဖွဲ့ဝင် ၅၀ နီးပါးဖြင့် နာရေးကိစ္စများ၊ လူနာတင်ယာဉ် ဝန်ဆောင်မှု လုပ်ငန်းများသာမက ပညာရေးလုပ်ငန်းများကိုလည်း တိုးချဲ့ဆောင်ရွက်လျက်ရှိကြောင်း ယင်းအသင်းထံမှ သိရသည်။

R-15



FOLLOW US