News

POST TAGGED AS

ရဲတပ်ဖွဲ့

19-Feb-2017

ရဲတပ်ဖွဲ့
ပြည်သူက လေးစားယုံကြည်သော ရဲတပ်ဖွဲ့ ဖြစ်စေရေး (Weekly, Vol-13/No-4)
ဗြိတိသျှ ကိုလိုနီခေတ်က အိန္ဒိယ ဘုရင်ခံချုပ်၏ လက်အောက်ခံ ဗမာ့ရဲ Burma Police အဖြစ် စတင်ဖွဲ့စည်းခဲ့ကာ ၁၉၆၄ ခုနှစ်တွင် ပြည်သူ့ရဲတပ်ဖွဲ့ဟု အမည်ပြောင်းခဲ့ပြီး ၁၉၉၅ ခုနှစ်မှ စတင်၍ ပြန်လည်ပြင်ဆင်ခဲ့သော မြန်မာနိုင်ငံရဲတပ်ဖွဲ့၏ အဓိက ရည်ရွယ်ချက်မှာ ပြည်သူလူထု၏ လုံခြုံရေးနှင့် ပြည်သူ့အကျိုးပြု လုပ်ငန်းများ ဆောင်ရွက်ရေးဟု ဆိုနိုင်သည်။

ရဲတပ်ဖွဲ့က တရားဝင် သတ်မှတ်ထားသော လုပ်ငန်းတာဝန် ခြောက်ရပ်ရှိသည့်အနက် ပြည်သူကို အဓိက ဦးတည်စဉ်းစားသည့် အထက်ပါ တာဝန်နှစ်ရပ်အပြင် မှုခင်းများ မဖြစ်ပွားစေရန် ကြိုတင်ကာကွယ်ရေး၊ ဖြစ်ပွားပြီးသော မှုခင်းများ စုံစမ်းဖော်ထုတ် တရားစွဲတင်နိုင်ရေး၊ နိုင်ငံတော်အတွင်း စည်းကမ်းသေဝပ် တည်ငြိမ်စေရန် ဆောင်ရွက်ရေးနှင့် မူးယစ်ဆေးဝါးနှင့် စိတ်ကို ပြောင်းလဲစေတတ်သော ဆေးဝါးများ အန္တရာယ်ကို တားဆီးကာကွယ်ရေး ဟူသော အချက်လေးချက်လည်း ပါဝင်သည်။

သို့သော် မြန်မာနိုင်ငံရဲတပ်ဖွဲ့အပေါ် ပြည်သူလူထု၏ စိတ်ချယုံကြည်မှု၊ အားကိုးယုံကြည်မှုတို့မှာမူ ပွင့်လင်းစွာ ပြောရလျှင် လွတ်လပ်ရေးရပြီး နောက်ပိုင်းမှစ၍ တဖြည်းဖြည်း ကျဆင်းလာခဲ့သည်ဟု ဆိုနိုင်သည်။

ထိုသို့ ကျဆင်းလာစေသော အကြောင်းအရင်းများစွာ ရှိသည့်အနက် ရဲတပ်ဖွဲ့၏ စီမံခန့်ခွဲမှုမျာကို ရဲလုပ်ငန်းနှင့် ရဲတာဝန်များ အခြေခံကျကျ၊ လေးလေးနက်နက်၊ သဘောသဘာဝနှင့်တကွ တတ်သိနားလည်သော ရဲစစ်စစ်များထက် ရဲတပ်ဖွဲ့နှင့် သဘာဝချင်း မတူညီသော တပ်မတော်မှ အရာရှိများကို တိုက်ရိုက်ခန့်ထား တာဝန်ပေးခြင်းက ပထမအချက် ဖြစ်သည်။

ပြည်သူလူထုနှင့် တိုက်ရိုက်ထိတွေ့ ဆက်ဆံရပြီး မှုခင်းကြိုတင်ကာကွယ်ရေး၊ စုံစမ်းထောက်လှမ်း ဖော်ထုတ်၊ ဖမ်းဆီးရေးကဲ့သို့ လုပ်ငန်းများနှင့် ကိုယ်တိုင်ကိုယ်ကျ ထိတွေ့ထမ်းဆောင်ကြရသည့် ရဲလုပ်ငန်းစဉ်များကို စစ်ပညာနှင့် ရှေ့တန်းစစ်မြေပြင် စီမံခန့်ခွဲမှုတို့ ကျွမ်းကျင်သူ တပ်မတော် အရာရှိများက မိုးကျရွှေကိုယ် ဝင်ရောက်လာခြင်းကြောင့် ရဲစစ်စစ်များ တက်လမ်းပိတ်ကာ စိတ်ပျက်အားငယ်မှုများ တိုးပွားလာစေသည်။

ဒုတိယတစ်ချက်မှာ ရဲတပ်ဖွဲ့အပေါ် နိုင်ငံတော်က ပေးအပ်ထားသည့် လစာ၊ ရိက္ခာ၊ အဆောင်အယောင်၊ ခံစားခွင့်တို့ များစွာနည်းပါးခြင်း ဖြစ်သည်။ ထိုသို့ နည်းပါးသည့်အတွက် ရဲတပ်ဖွဲ့သို့ ဝင်ရောက်တာဝန်ထမ်းလိုသူ လျော့နည်းလာခြင်း၊ ချို့ချို့တဲ့တဲ့ဖြင့် တာဝန်ထမ်းဆောင်ကြရသည့် အတွက် အကျင့်ပျက် လာဘ်စားမှုများဖြင့် နပန်းလုံးနေခြင်းကဲ့သို့ အကျိုးဆက်များ ဖြစ်ပေါ်လာရသည်။

တတိယတစ်ချက်မှာမူ နှစ်ပေါင်းများစွာ သမားရိုးကျ ရဲလုပ်ငန်းစဉ်များအပြင် အပိုဝင်ငွေ ရှာဖွေနည်းများကိုပါ သင်ကြားပေးလာရသည်အထိ နာမည်ဂုဏ်သတင်း ကျဆင်းလာသော ရဲတပ်ဖွဲ့ဝင်များကို လေ့ကျင့်ပျိုးထောင်ပေးသည့် ရဲသိပ္ပံများ၊ ရဲအကယ်ဒမီများကို နိုင်ငံတကာအဆင့် မမီနိုင်လျှင်ပင် အာဆီယံ အဆင့်အတန်းမျိုးနှင့် တန်းတူဖြစ်စေရေး ယခုထက်ပို၍ အဆင့်မြှင့်တင်ပေးရန် လိုအပ်နေခြင်း ဖြစ်သည်။

ရဲတပ်ဖွဲ့ဝင်များ၏ လစာ၊ ရိက္ခာ၊ အဆောင်အယောင်၊ ခံစားခွင့်များ ထိုက်တန်စွာ တိုးမြှင့်ပေးခြင်းနှင့်အတူ ရဲသိပ္ပံ၊ အကယ်ဒမီများကို တက်ရောက်လိုသူ လူငယ်များ၏ ဉာဏစွမ်းရည်နှင့် ကိုယ်ကာယ ကြံ့ခိုင်မှုဆိုင်ရာ အရည်အချင်းများကိုလည်း တိုးမြှင့်သတ်မှတ်ပေးရန် လိုအပ်ပေသည်။ 

ကျန်းမာကြံ့ခိုင်သော ခန္ဓာကိုယ်၊ မြင့်မားသော အရပ်အမောင်း၊ သပ်ရပ်ခန့်ညားသော ဝတ်စုံ၊ လိုအပ်သော လက်နက်နှင့် ရဲလုပ်ငန်းဆိုင်ရာ အထောက်အကူ ပစ္စည်းများ၊ ယာဉ်၊ ယန္တရားများဖြင့် မိမိကိုယ်ကိုယ် ယုံကြည်မှုအပြည့် ရှိနေသော ရဲတပ်ဖွဲ့ဝင်များကို မြင်လိုက်သည်နှင့် အားကိုးယုံကြည်စိတ် ရရှိလာနိုင်ပြီး လူငယ်တို့၏ အမြင်တွင် ထိုသို့ စမတ်ကျသော ရဲတပ်ဖွဲ့ဝင် ဖြစ်လိုစိတ်များ ကိန်းအောင်းလာနိုင်သည်။

မြန်မာနိုင်ငံ တစ်ဝန်းလုံးရှိ ရဲတပ်ဖွဲ့ဝင် အားလုံးကို ထိုသို့သော အခြေအနေမျိုး အချိန်တိုအတွင်း ဖြည်းဆည်းမပေးနိုင်လျှင်ပင် ရန်ကုန်မြို့တော်နှင့် မန္တလေး မြို့တော်ကဲ့သို့ မြို့တော်များတွင် ပြည်သူလူထုနှင့် ပုံမှန်ထိတွေ့နေစေမည့် စံပြအထူးရဲတပ်ဖွဲ့များ ဖွဲ့စည်းပေးကာ ယင်းရဲတပ်ဖွဲ့၏ အရည်အချင်းနှင့် စွမ်းဆောင်ရည်ကို မြှင့်တင်ပေးခြင်းဖြင့် ပြည်သူလူထုက ရဲတပ်ဖွဲ့အပေါ် အမြင်ပြောင်းလာကာ ယခင်က မလေးမခန့် ရှိနေခဲ့သော ဒုစရိုက်သမားများလည်း လေးစားကြောက်ရွံ့လာနိုင်မည် ဖြစ်ကြောင်း အကြံပြုလိုရင်း ဖြစ်သည်။

အယ်ဒီတာ (၁၅-၂-၂၀၁၇)



FOLLOW US