News

POST TAGGED AS

ရခိုင်အရေး

အစွန်းရောက် အကြမ်းဖက်မှု အန္တရာယ်နှင့် အဖြေရှာရတော့မည့် ခြံစည်းရိုးပြဿနာ
မြန်မာနိုင်ငံ၏ အနောက်ဘက်စွန်းစွန်းဒေသတွင် လတ်တလော ဖြစ်ပေါ်ခဲ့သော ASRA အစွန်းရောက် အကြမ်းဖက်သမားတို့၏ တိုက်ခိုက်မှု ဖြစ်စဉ်များကြောင့် သူ့ဘက်ကိုယ့်ဘက် လူ့အသက်များ ဆုံးရှုံးခဲ့ရပြီး ဒေသခံပြည်သူများသည်လည်း နေအိမ်များကိုစွန့်ခွာကာ စစ်ဘေးလွတ်ကင်းရာ အရပ်များသို့ ခိုလှုံနေကြရသည်။ အချို့အရပ်သားများမှာ ပိတ်မိနေကြသည်။ အချို့က တစ်ဖက်နိုင်ငံသို့ ထွက်ပြေးခိုလှုံသွားကြပြီး အချို့က အစိုးရဌာနများဘက်သို့ ခိုလှုံနေကြသည်။ ရွာပေါင်း အတော်များများ မီးရှို့ဖျက်ဆီးခံခဲ့ရသည်။ ထိုမီးသည် စတင် ဖြစ်ပွားသည့်နေ့ ဩဂုတ်လ ၂၅ ရက်နေ့မှ ယခုစက်တင်ဘာ လ ၄ ရက်နေ့ထိတိုင် တစ်ဆယ်ရက်ရောက်သည့်တိုင် မငြိမ်းနိုင်သေးဘဲ ထိုဒေသအတွင်း ဟိုတစ်စ ဒီတစ်စ ကွက်ကျားလောင်မြိုက်လျက် ရှိနေသေးသည်။

ထိုအရေးအပေါ် အစိုးရဘက်ကလည်း တပ်မတော်၊ မြန်မာနိုင်ငံ ရဲတို့နှင့်ပူးပေါင်းပြီး တိုက်ထုတ်ကာ သတိထား စောင့်ကြည့်ကိုင်တွယ်နေရသည်။ အစိုးရ၏ ကိုင်တွယ်ပုံအပေါ် အားမလို အားမရဖြစ်သူ လူထုထဲမှ အချို့ကလည်း ထိုဒေသကို အရေးပေါ် အမိန့်ထုတ်ဆင့်ပြီး စစ်အုပ်ချုပ်ရေးပေးရန် ဆန္ဒထုတ်ဖော်ကြသည်။ အချို့ကမူ အစိုးရ သတိထား ကိုင်တွယ်နေသည့် အခြေအနေကို စောင့်ကြည့်နေကြသည်။ ထို့ထက်ပိုဆိုးနေသည်မှာ အစိုးရနှင့် တပ်မတော်က ဘင်္ဂါလီလူမျိုးများကို သတ်ဖြတ်ပြီး နေရပ်တွင် မနေနိုင်အောင် ပြုလုပ်နေကြသည်ဟူသော ပြင်ပကမ္ဘာတွင် သတင်းမှားများ ရောက်ရှိနေသည့်အရေး ဖြစ်သည်။ အစိုးရအနေနှင့်လည်း ထိုသတင်းမှားများကို ယခုအချိန်တွင်မှ မီဒီယာအားကိုရယူပြီး ပြန်လည် တိုက်ဖျက်နေကြရသည်ကို တွေ့ရသည်။ ထိုအခြေအနေ အချိန်အခါနှင့် တိုက်ဆိုင်စွာပင် တပ်မတော်ကလည်း မီဒီယာများနှင့်ပတ်သက်ပြီး ပူးပေါင်းမှုများ တိုးမြှင့်လုပ်ဆောင်လာခဲ့သည်။ ယခင်က မီဒီယာများအပေါ် တရားစွဲဆိုခဲ့သည့်အမှုများကို ပလပ်ပြီး သင်ပုန်းချေခဲ့သည်။ ဩဂုတ်လ နောက်ဆုံးပတ်အတွင်း ဖြစ်ပေါ်ခဲ့သည့် အကြမ်းဖက် တိုက်ခိုက်ခံရမှုများနှင့် ထူးထူးခြားခြား တိုက်ဆိုင်စွာပင် ယခုလအတွင်းတွင်လည်း ကမ္ဘာ့ကုလသမဂ္ဂ အစည်းအဝေး ကျင်းပတော့မည်ဖြစ်ရာ ထိုကိစ္စမှာ အစိုးရအတွက် မလွဲမသွေချပြ ဆွေးနွေးကြရတော့မည့် ပြဿနာ တစ်ရပ်အဖြစ် တည်ရှိနေခဲ့တော့သည်။

တစ်ဖက်က ASRA အစွန်းရောက် အကြမ်းဖက်သမားများအပေါ် အားပေးထောက်ခံ ကူညီကြသည့် နောက်ခံအဖွဲ့အစည်းများ၏ မမှန်သတင်း ဝါဒဖြန့်မှုများအပေါ် အနောက်ကမ္ဘာမှ နိုင်ငံအတော်များများကလည်း ယုံကြည်နေခဲ့ကြပြီး လုံခြုံရေးကောင်စီ အရေးပေါ် အစည်းအဝေးခေါ်ယူရန် တိုက်တွန်းခံခဲ့ရသည်။ ထိုအရေးကို တံခါးပိတ် ဆွေးနွေးခဲ့ကြသည်။ လွန်ခဲ့သည့် ရက်ပိုင်းကပင်လျှင် တူရကီနိုင်ငံမှ ဟက်ကာအဖွဲ့ တစ်ခုက အစိုးရ၏ ဌာနဆိုင်ရာ ဝက်ဘ်ဆိုက်အချို့ကို တိုက်ခိုက်လာခဲ့သည်အထိ ဖြစ်ခဲ့ရသည်။

ထိုသို့သော နောက်ခံ အကြောင်းတရား ကြီးမားသည့် အခြေအနေမျိုးတွင် အစိုးရအနေနှင့် ထိုအရေးကိစ္စအပေါ် ဖြေရှင်းရာတွင် ယခင်က လုပ်နေသည့်နည်းလမ်းအတိုင်း တစ်သမတ်တည်း ဆောင်ရွက်ရန် ခေါင်းခဲခဲ့ပုံပေါ်သည်။ ယခုဖြစ်ပွားနေသည့် ဖြစ်စဉ်များမှာ ယခင်က တိုင်းရင်းသားများနှင့် ဖြစ်ပွားခဲ့သည့် ဖြစ်စဉ်များနှင့်မတူ။ နောက်ခံအကြောင်း တရား၊ ရေခံ၊ မြေခံ၊ သမိုင်းကြောင်း၊ လူမျိုးကွဲပြားမှု ပဋိပက္ခ စသည်တို့ ကွဲပြားသည်။ ထို့ကြောင့် ထိုကိစ္စအပေါ် လွယ်လွယ်ကူကူဖြင့် အချိန်တစ်ခဏအတွင်း ပြီးစီးချင်ဇောဖြင့် ကမ္ဘာသိ ရပ်သိရွာသိ ထင်ထင်ရှားရှား ဖြေရှင်းရန်မသင့်ကြောင်းကို အခြားအိမ်နီးချင်းနိုင်ငံများတွင် ဖြစ်ပေါ်ခဲ့သည့်ဖြစ်စဉ်များနှင့် ယှဉ်တွဲပြီး လေ့လာကြည့်လျှင် မြင်ရနိုင်မည်ဖြစ်သည်။

ထိုအကြောင်း လေ့လာကြည့်လျှင် အိမ်နီးချင်း ဒီမိုကရေစီနိုင်ငံကြီး ဖြစ်သည့် အိန္ဒိယနိုင်ငံကြီး၏ ဖြေရှင်းနည်းများကိုလည်း အလျဉ်းသင့်သဖြင့် တင်ပြသွားလိုပါသည်။ ထိုနိုင်ငံကြီးသည် အနောက်ဘက်တွင် ပါကစ္စတန်နိုင်ငံ၊ မြောက်ဘက်တွင် တရုတ်၊ နီပေါ၊ ဘူတန်တို့နှင့် နယ်နိမိတ် ထိစပ်နေပြီး အရှေ့ဘက်တွင် ဘင်္ဂလားဒေ့ရ်ှနှင့် မြန်မာတို့နှင့် ထိစပ်နေသည်။ တောင်ဘက်တွင် သီရိလင်္ကာနိုင်ငံနှင့် ကျွန်းနိုင်ငံငယ်လေးများစွာက ဝိုင်းရံထားသည်။ ၎င်းတို့အနေနှင့် အနောက်မြောက်စွန်းဒေသတွင်လည်း မြန်မာနိုင်ငံနည်းတူ အကြမ်းဖက် သောင်းကျန်းမှုများဖြင့် မကြာမကြာ ပဋိပက္ခဖြစ်ပွားနေသည့် ဂျန်မူးနှင့် ကက်စမီးယားဒေသ ရှိသည်။ တစ်ဖန် အရှေ့ဘက်တွင်လည်း ဘင်္ဂလားဒေ့ရ်ှနိုင်ငံနှင့် နယ်နိမိတ် ထိစပ်မှုမိုင်ပေါင်းမှာ ၅၀ဝ၀ ကျော်ရှိရာ နယ်နိမိတ်ချင်း ထိစပ်နေသည့် ပြည်နယ်များဖြစ်သည့် အနောက်ဘင်ဂေါပြည်နယ်၊ ဘင်ဟာပြည်နယ်၊ မဏိပူရပြည်နယ်နှင့် မင်္ဂါရဟပြည်နယ်များ ရှိသည်။ အိန္ဒိယနိုင်ငံ အနေနှင့် လူဦးရေပေါက်ဖွားမှုနှုန်း အလွန်မြင့်မားသည့် ဘင်္ဂလားဒေ့ရ်ှနိုင်ငံအား ဂငယ်ပုံသဏ္ဌာန်ဖြင့် ခြံရံထားနေရသည်။

ထိုသို့သော အခြေအနေမျိုးများအကြားတွင် အိန္ဒိယနိုင်ငံအနေနှင့် ဘင်္ဂလားဒေ့ရ်ှနိုင်ငံ၊ မြန်မာနိုင်ငံ၊ နီပေါနိုင်ငံ၊ ဘူတန်နိုင်ငံ၊ ပါကစ္စတန်နိုင်ငံနှင့် သီရိလင်္ကာနိုင်ငံတို့မှ ခိုးဝင်လာသူများ၊ ဒုက္ခသည်များ၊ နေရပ်ရွှေ့ပြောင်း အလုပ်လုပ်သူများ အရေးကို မပြတ်ရင်ဆိုင်နေရသည်။ အချို့သော နယ်စပ်ပြည်နယ်များတွင်လည်း ယခုကဲ့သို့ အကြမ်းဖက် တိုက်ခိုက်မှုများ၊ မီးရှို့ဖျက်ဆီးမှုများကိုလည်း သတင်းများတွင် မကြာမကြာ တွေ့နေရပြန်သည်။ ထို့ကြောင့် နယ်စပ်ခြံစည်းရိုးများကို အကုန်အကျခံကာ  အခိုင်အမာ ကာရံထားသည်။ CCTV များဖြင့် စောင့်ကြည့်သည်။ ခိုးဝင်သူများကို ချက်ချင်း အရေးယူသည်။ နယ်စပ်မြို့များ၊ ပြည်နယ်များတွင် ဖြစ်ပေါ်သည့် အကြမ်းဖက် တိုက်ခိုက်မှုများ၊ မီးရှို့ဖျက်ဆီးမှုများအပေါ်တွင်လည်း ဗဟိုအစိုးရက မသိသလိုနေပြီး ဒေသအစိုးရကိုသာ အာဏာအပ်နှင်းထားသည်။ လုပ်ပိုင်ခွင့် အပြည့်အဝ ပေးထားသည်။ ဒီမိုကရေစီစနစ် ကျင့်သုံးသည့်နိုင်ငံ ဖြစ်သည့်အလျောက် လူ့အခွင့်အရေး လှုပ်ရှားတောင်းဆိုသူ၊ စောင့်ကြည့်သူနိုင်ငံရေးသမား ပြည်တွင်းမှ NGOs များ၊ ပြည်ပမှ အဖွဲ့အစည်းများ၊ UNHCR နှင့် ဒုက္ခသည်များဆိုင်ရာ ကုလသမဂ္ဂ မဟာမင်းကြီးရုံးနှင့် ပြည်ပ အကူအညီပေးရေးအဖွဲ့ ပေါင်းစုံရှိကြသည်။ ဗဟိုအစိုးရအနေနှင့် သတိကြီးစွာ ထားပြီး ကိုင်တွယ်သည်။ ဒေသအစိုးရနှင့် နယ်ခြားစောင့်တပ်များ၊ အဓိကရုဏ်း နှိမ်နင်းရေးတပ်များဖြင့် တိုးတိုးတိတ်တိတ် ဖြေရှင်းစေပြီး အစိုးရက မသိသလိုနေသည်။ ပြည်သူများကလည်း လိမ္မာပါးနပ်သည်။ ထိုကိစ္စအတွက် အစိုးရကို ဖိအားမပေး၊ အသံမထွက်။

စစ်မှုရေးရာကိစ္စနှင့် အကြမ်းဖက် တိုက်ခိုက်မှုကိစ္စများအတွက် နိုင်ငံတကာ ကွန်ဗင်းရှင်း အဖွဲ့ဝင်နိုင်ငံအဖြစ် ဝင်ရောက်ထားခြင်းမရှိဘဲ  ၎င်းနိုင်ငံအတွင်းတွင်ပင် ပြည်တွင်းရေးကိစ္စ ဖြစ်သည့်အတွက် ပြည်တွင်း ဥပဒေ Domestic Law များဖြင့် အရေးယူ ဆောင်ရွက်သည်။ အပြည်ပြည်ဆိုင်ရာ ရာဇဝတ်မှုဥပဒေ (International Criminal Law) နှင့် အပြည်ပြည်ဆိုင်ရာ လူသားချင်း စာနာကူညီမှုဥပဒေ (International Humanitarian Law) နှင့် (International Process Of Refugees) အပြည်ပြည်ဆိုင်ရာ ဒုက္ခသည်များအရေး စသည်တို့ကို ထည့်တွက်ခြင်းမပြုပေ။

၎င်းတို့ပြည်တွင်းရေးကိစ္စ ဖြစ်သည့်အတွက် အကြမ်းဖက် တိုက်ခိုက်မှုများနှင့် အကြမ်းဖက် တိုက်ခိုက်မှုများကြောင့် နေရပ်စွန့်ခွာ ထွက်ပြေးသူများ၊ တစ်ဖက်နိုင်ငံမှ ခိုလှုံရန် ဝင်ရောက်လာသူများအပေါ် ပြည်တွင်း ဥပဒေဖြစ်သည့် ဒုက္ခသည်ဆိုင်ရာ ဥပဒေ (Indian Refugess Law)နှင့် ရွှေ့ပြောင်းသွားလာသူများဆိုင်ရာ ဥပဒေ (Internally Displaced Persons Law) စသည့် ပြည်တွင်းဥပဒေများ ရေးဆွဲထားပြီး ထိုဥပဒေများအတိုင်း အရေးယူ ဆောင်ရွက်ကြသည်။ သို့အတွက် ၎င်းတို့ပြည်တွင်း ရေးကိစ္စများအပေါ် အခြားကမ္ဘာ့နိုင်ငံများသို့လည်း အထူးကူးစက်ကာ သတင်းပျံ့နှံ့ခြင်းမျိုးများ မရှိဘဲ ဝင်ရောက် စွက်ဖက်ကြခြင်းမျိုးများလည်း မတွေ့ရပေ။

ဆိုလိုရင်းမှာ ကျွန်ုပ်တို့နိုင်ငံ အနေနှင့်ကြည့်လျှင် အခြားနိုင်ငံတို့တွင် ကြုံတွေ့နေရသကဲ့သို့ပင်ဖြစ်ပြီး ထူးထူးခြားခြား အဖြစ်မျိုး မရှိပေ။ အရှေ့တောင်အာရှနိုင်ငံများဖြစ်သည့် ထိုင်းနိုင်ငံနှင့် ဖိလစ်ပိုင်တို့တွင်လည်း ကြုံတွေ့နေရသည်။ ယခုဖြစ်ပွားနေသည့်ဒေသသည် လူဦးရေ ပေါက်ဖွားမှုနှုန်း မြင့်မားနေသည့် တစ်ဖက်နိုင်ငံနှင့် နီးကပ်စွာ တည်ရှိပြီး နယ်စပ်ခြံစည်းရိုး လုံခြုံအောင် မကာရံထားနိုင်ခြင်း၊ နယ်စပ်ကင်းစခန်းများ ခပ်စိပ်စိပ် ထားပြီး မစောင့်ကြည့်နိုင်ခြင်း၊ ခေတ်မီနည်းပညာသုံး စက်ပစ္စည်းများ အသုံးမချနိုင်ခြင်းနှင့် တရားဥပဒေစိုးမိုးမှု အားနည်းခြင်းများကြောင့်  ယခုကဲ့သို့ အဖြစ်မျိုး ကြုံနေရခြင်းဖြစ်သည်။

ကျွန်ုပ်တို့နိုင်ငံအနေနှင့်လည်း အိန္ဒိယနိုင်ငံ အလားတူ လူဦးရေ ပေါက်ဖွားမှုနှုန်း မြင့်မားသည့် ဘင်္ဂလားဒေ့ရ်ှနိုင်ငံနှင့် နယ်နိမိတ်ထိစပ်မှု အရှည်ပမာဏမှာ ပြောပလောက်အောင် မရှိလှပေ။ ထို့အတွက် နယ်နိမိတ် ခြံစည်းရိုးကို ၂ ထပ် ၃ထပ် အသေအချာ ကာရံရန် အထူးလိုအပ်ပြီး နယ်ခြားစောင့် တပ်ရင်းလည်း များများလိုသည်။ ထို့ပြင် ICT နည်းပညာဖြင့် နေ့ ညမပြတ် စောင့်ကြည့်နေရန် အထူးလိုအပ်ပြီး ခိုးဝင်လာမှုများ ရှိလာပါက ချက်ချင်း အရေးယူနိုင်ရမည် ဖြစ်သည့်အပြင် အစွန်းရောက် အကြမ်းဖက်မှု များရှိလာပါကလည်း ဒေသတွင်းအစိုးရ၏ အခွင့်အာဏာဖြင့်သာ ထိထိရောက်ရောက် ချေမှုန်းနိုင်ရေး ရေတိုရေရှည် အထူးအစီအမံများ ထားရှိရမည်လည်း ဖြစ်သည်။

ယခုကဲ့သို့ ASRA အစွန်းရောက် အကြမ်းဖက်သမားများ အလွယ်တကူ တိုက်ခိုက်ဖျက်ဆီးမှုများ ပြုလုပ်လာနိုင်သည်မှာလည်း မိမိတို့နိုင်ငံ၏ လုံခြုံမှု အားနည်းချက်များကြောင့်ဟု ပြော၍ရသည်။ အများသူငါ ပြောနေကြသလို နယ်စပ်တွင် ယခု ကာရံထားသည့်ခြံစည်းရိုးမှာ အလွယ်တကူ နင်းကျော်၍ရပြီး နယ်စပ်တစ်လျှောက် အပြည့်အဝ မကာရံနိုင်သေးသဖြင့်  အစွန်းရောက် အကြမ်းဖက်သမားများအတွက် ခိုအောင်းလှုပ်ရှားရန် မျက်စိ ကျလာသလို ဖြစ်လာသည်။ ကမ္ဘာ၏ အလယ်ပိုင်းဒေသမှ အကြမ်းဖက်သမားများနှင့် အဆက်အသွယ်ရှိပြီး နယ်ပယ်ချဲ့ထွင်ရန်၊ အရှေ့တောင်အာရှသို့ ကူးပြောင်းခြေကုပ်ရယူရန် အလွန် လွယ်ကူသည့်ဒေသ ဖြစ်လာသည်။ အမှန်တကယ်လည်း အကြမ်းဖက်သမားများ အနေနှင့် ထိုဒေသထက်ပင် ကျော်လွန်ပြီး နိုင်ငံ့အတွင်းပိုင်း တောင်ကြောများပေါ်အထိ ခြေကုပ်စခန်းများ တည်ဆောက်ကာ လေ့ကျင့်ပြင်ဆင်ကြသည်။ လိုဏ်ဂူများတူးကာ အစားအသောက်၊ ရေ၊ ရိက္ခာများ စုဆောင်းကြသည်။ တိုက်ခိုက်ရန်အတွက် အထူးစီမံချက်များ ရေးဆွဲကာ အချိန်ယူ ပြင်ဆင်ကြသည်။ အမှန်ဆိုရလျှင် ထိုသူတို့ကို အပြစ်မဆိုသာ။ လွယ်လွယ်ကူကူ ဝင်ထွက်သွားလာ နေနိုင်ပြီး ထိုကဲ့သို့ လွယ်လွယ်ကူကူ ပြုလုပ်၍ ရနိုင်နေသည်ကပင် မိမိတို့ဘက်မှ အားနည်းချက်ဖြစ်သည်။ မိမိတာကို မိမိတို့ မလုံသလို ဖြစ်နေခဲ့သည်မှာ ထင်ရှားသည်။

ထို့အတွက် အချုပ်အားဖြင့်တင်ပြရလျှင် ယနေ့ကမ္ဘာပေါ်တွင် ဖြစ်ပေါ်နေသော အစွန်းရောက် အကြမ်းဖက်သမားများ၏ အဖျက်အမှောင့် အန္တရာယ်များ၊ ထိုအစွန်းရောက် အကြမ်းဖက်သမားများအတွက် အားပေးကူညီမှုများနှင့် မိမိတို့နိုင်ငံအတွက် မီဒီယာ ထုတ်လွှင့်ချက်နှင့် အထွေထွေ အားနည်းမှုများအပေါ် အမှန်ကို အမှန်အတိုင်း သိမြင်လက်ခံကြရတော့မည့် အချိန်အခါတစ်ခုကို အမှန်ကျရောက်နေပြီဖြစ်ပါသည်။ နိုင်ငံတစ် နိုင်ငံအတွက် အရေးအကြီးဆုံးအချက်မှာ မိမိတို့နိုင်ငံအတွက် မိမိတို့၏ အမျိုးသား အကျိုးစီးပွားကို ကာကွယ်စောင့်ရှောက်ကြခြင်းသာ ဖြစ်ပါသည်။ ထိုသို့ ကာကွယ်စောင့်ရှောက်ရန်အတွက်လည်း နိုင်ငံအတွင်းတွင် နေထိုင်ကြသည့် နိုင်ငံသား အားလုံးတွင် တာဝန်ရှိပြီး ယခုအချိန်သည် သူ့ကြောင့် ငါ့ကြောင့်ဟုပင် အပြစ်တင်နေကြရတော့မည့် အချိန်အခါ မဟုတ်ပါ။ နိုင်ငံရေးပါတီများ၊ တိုင်းရင်းသား နိုင်ငံသား အားလုံးက ပူးပေါင်းပြီး အစိုးရနှင့် တပ်မတော်ကို ကောင်းမွန်သည့် အကြံဉာဏ်များပေးပြီး ဝိုင်းဝန်း အဖြေရှာကြရတော့မည့် အခြေအနေသာဖြစ်ပါကြောင်း စိတ်ကောင်း စေတနာဖြင့် ရေးသားတင်ပြလိုက်ရပါသည်။

အောင်ဇေယျ



FOLLOW US