News

POST TAGGED AS

ရခိုင်အရေး

24-Aug-2017

ရခိုင်အရေး
မွတ်ဆလင် ဒုက္ခသည်များအပေါ် ကန့်သတ်မှုအချို့ ဖယ်ရှားသင့်ဟု ကိုဖီအာနန်ကော်မရှင် အကြံပြု

ရန်ကုန်၊ ဩဂုတ် ၂၄

၁၉၈၂ ခုနှစ် နိုင်ငံသားဥပဒေနှင့် မွတ်ဆလင်ဒုက္ခသည်များ နိုင်ငံအတွင်း လွတ်လပ်စွာ သွားလာခွင့် အပါအဝင် ကန့်သတ်ချက်အချို့ကို ဖယ်ရှားသင့်ကြောင်း ကိုဖီအာနန် ဦးဆောင်သည့် ရခိုင်ပြည်နယ်ဆိုင်ရာ အကြံပေးကော်မရှင်၏ အပြီးသတ် အစီရင်ခံစာတွင် အကြံပြုထားသည်။

အဆိုပါ အပြီးသတ် အစီရင်ခံစာကို ဩဂုတ်လ ၂၄ ရက်က ထုတ်ပြန်လိုက်ခြင်းဖြစ်ပြီး ယင်းအစီရင်ခံစာနှင့်ပတ်သက်၍ သတင်းစာရှင်းလင်းပွဲ တစ်ရပ်ကိုလည်း ကုလသမဂ္ဂ အထွေထွေ အတွင်းရေးမှူးချုပ်ဟောင်း ကိုဖီအာနန်နှင့် ကော်မရှင် အဖွဲ့ဝင်များက ရန်ကုန်မြို့ရှိ ဆူးလေ ရှန်ဂရီလာဟိုတယ်တွင် ပြုလုပ်ခဲ့သည်။

မြန်မာနိုင်ငံအတွင်း လွန်ခဲ့သည့် ၃၅ နှစ်ကျော် ကာလအတွင်း ပေါ်ပေါက်ခဲ့သော အပြောင်းအလဲများသည် နိုင်ငံသား ဥပဒေ၏ အားနည်းချက်များကို မီးမောင်းထိုးပြလျက်ရှိနေပြီး ယင်းအားနည်းချက်များသည် လတ်တလော၌ပင် လူ့အဖွဲ့အစည်းအတွင်း တင်းမာမှုများကို ဖြစ်ပေါ်စေကြောင်း အကြံပေး ကော်မရှင်၏ အစီရင်ခံစာ ၁၉၈၂ နိုင်ငံသား ဥပဒေနှင့် ပတ်သက်သည့်အခန်းတွင် ဖော်ပြထားသည်။

၁၉၈၂ ခုနှစ် ဥပဒေသည် နိုင်ငံသားဖြစ်မှုအတွက် လက်ရှိကာလတွင် အခြေခံရသည့်ဥပဒေဖြစ်သည်ကို အသိအမှတ်ပြုသော်လည်း အစိုးရအနေနှင့် ထိုဥပဒေအား ပြန်လည် သုံးသပ်သည့် လုပ်ငန်းစဉ်ကို စတင်သင့်ပြီး အဆိုပါ ဥပဒေကို နိုင်ငံတကာ စံနှုန်းများ၊ ကလေးသူငယ် အခွင့်အရေးများဆိုင်ရာ စာချုပ်များနှင့် ချိန်ညှိခြင်း၊ နိုင်ငံသားဖြစ်မှုနှင့်ပတ်သက်၍ ကွဲပြားသော အမျိုးအစားများဖြင့် ခွဲခြားသတ်မှတ်ထားခြင်းကို ပယ်ဖျက်ခြင်း၊ နိုင်ငံသားဖြစ်မှု ဆုံးရှုံးခဲ့သူများ နိုင်ငံမဲ့ မဖြစ်သွားစေရေးတို့ကို လုပ်ဆောင်သင့်ကြောင်း အစီရင်ခံစာတွင် အကြံပြုထားသည်။

အဆိုပါ နိုင်ငံသားပြုမှုနှင့် လွတ်လပ်စွာ သွားလာခွင့်များနှင့်ပတ်သက်၍ ကုလအတွင်းရေးမှူးချုပ်ဟောင်း ကိုဖီအာနန်ကလည်း အမြန်ဆုံး လုပ်ဆောင်ရန် အရေးကြီးသည့်ကိစ္စရပ်ဖြစ်ပြီး မြန်မာနိုင်ငံသည် ကမ္ဘာပေါ်တွင် နိုင်ငံမဲ့ အများဆုံးနိုင်ငံအဖြစ် ရပ်တည်နေကြောင်း၊ ယင်းမှာ အချိန်ကြာမြင့်လာပါက မကောင်းသည့် အခြေအနေဖြစ်ကြောင်း သတင်းစာရှင်းလင်းပွဲတွင် ပြောကြားသည်။

“လုံခြုံရေး အခြေအနေအရ ဆောင်ရွက်တာဆိုရင် ပြဿနာ ဖြစ်နေသူတွေကို အဓိကထား ကိုင်တွယ်ပြီး အပြစ်မဲ့တဲ့ နိုင်ငံသားတွေကို မထိခိုက်စေဖို့ ဆောင်ရွက်ရမှာဖြစ်တယ်”ဟု ၎င်းက ပြောကြားသည်။

ဒုက္ခသည်စခန်းများမှ မွတ်ဆလင်များသည် ခရီးသွားလာခွင့် ကန့်သတ်ခံရမှုများရှိနေပြီး ရခိုင်တိုင်းရင်းသား အချို့နှင့် ဒုက္ခသည် စခန်းပြင်ပတွင် နေထိုင်သည့် ကျန်မွတ်ဆလင်များသည်လည်း အစိုးရက ချမှတ်ထားသော ကန့်သတ်မှုများ၊ ဒေသဆိုင်ရာ ဝန်ထမ်းများ၏ သင့်သလို ချမှတ်သော ဆုံးဖြတ်ချက်များနှင့် အကျင့်ပျက်သော ဝန်ထမ်းများ၏ လုပ်ဆောင်မှုများ၊ တိုးမြင့်လာသော ခရီးသွားလာစရိတ်များကြောင့် ကန့်သတ်ချက်များ များပြားလာကြောင်း ကော်မရှင်၏ အစီရင်ခံစာတွင် ဖော်ပြထားသည်။

ယင်းသို့ လွတ်လပ်စွာ သွားလာခွင့် မရှိခြင်းသည် ရခိုင်ပြည်နယ်ရှိ လူ့အဖွဲ့အစည်းများကြား သဟဇာတဖြစ်မှု၊ စီးပွားရေးနှင့် လူမှုဘဝ ဖွံ့ဖြိုးတိုးတက်မှုတို့ကို အတားအဆီး ဖြစ်နေကြောင်း ခရီးသွားလာခွင့် ကန့်သတ်မှုကြောင့် ပညာရေး၊ ကျန်းမာရေးနှင့် ဝန်ဆောင်မှုများ ရရှိရေး လျော့ကျခြင်း ကဲ့သို့သော မကောင်းသည့် အကျိုးသက်ရောက်မှုများကို ဒေသတွင်း နေထိုင်သူများ ခံစားရသည့်အပြင် လူ့အဖွဲ့အစည်းအကြား သီးခြား ဖြစ်လာကြောင်း အစီရင်ခံစာတွင် ဖော်ပြထားသည်။

အဆိုပါ ကော်မရှင်၏ နိုင်ငံသားဖြစ်မှုနှင့် လွတ်လပ်စွာ သွားလာခွင့် ကိစ္စရပ်များနှင့် ပတ်သက်၍ ရခိုင်ပြည်သူလူထုက စိုးရိမ်မှုများရှိသည်ကို ကောင်းစွာ သိရှိပြီးဖြစ်သော်လည်း အဆိုပါကိစ္စရပ်များကို အစီရင်ခံစာတွင် ချန်လှပ်ခဲ့ပါက နိုင်ငံအနာဂတ် စိုးရိမ်ရကြောင်း ကိုဖီအာနန်က ဆိုသည်။

“ဒါက ရခိုင်များနဲ့ မွတ်ဆလင်များအတွက် ညီတူညီမျှ အရေးပါတဲ့အဆင့် ဖြစ်ပါတယ်။ ဒီလိုမှသာ သူတို့တွေရဲ့ဘဝကို ကာလရှည်ကြာ ထိခိုက်နေတဲ့ စိတ်ပျက် အားငယ်မှုနဲ့ အကြမ်းဖက်မှုတွေဖြစ်ဖို့ ဦးတည်နေတဲ့ ရန်လိုစိတ်တွေကို ဖယ်ရှားနိုင်မှာ ဖြစ်ပါတယ်”ဟု ၎င်းက ဆိုသည်။

ကော်မရှင်အနေဖြင့် ပြီးခဲ့သည့် ၂၀၁၇ ဖေဖော်ဝါရီလက ကြားဖြတ်အစီရင်ခံစာ တစ်စောင်ကို အစိုးရအဖွဲ့သို့ တင်သွင်းခဲ့ပြီး ယခုအစီရင်ခံစာသည် ကော်မရှင်အဖွဲ့၏ ရခိုင်ပြည်နယ်ဆိုင်ရာ အကြံပြုချက်များ၏ အပြီးသတ် အစီရင်ခံစာလည်း ဖြစ်သည်။

ကော်မရှင်အနေဖြင့် အပြီးသတ် အစီရင်ခံစာတွင် ပဋိပက္ခ ကာကွယ်တားဆီးခြင်း၊ လူသားချင်း စာနာထောက်ထားမှုဆိုင်ရာ အကူအညီများ ပေးအပ်ခြင်း၊ လူ့အဖွဲ့အစည်းများအကြား ပြန်လည်သင့်မြတ်ရေးအတွက် ဆောင်ရွက်ခြင်း၊ အဖွဲ့အစည်များ ဖွဲ့စည်းတည်ထောင်ခြင်းနှင့် ဖွံ့ဖြိုးမှု စသည်တို့ အပါအဝင် ကော်မရှင်၏ လုပ်ပိုင်ခွင့်ဘောင်အတွင်း အကျုံးဝင်သော အကြောင်းအရာများနှင့် ပတ်သက်သည့် အကြံပြုချက်များကို ပြုလုပ်ထားခြင်းဖြစ်ကြောင်း ကော်မရှင်က ထုတ်ပြန်ထားသည်။

ထို့ပြင် အကြံပြုချက်များတွင် မြန်မာအစိုးရအနေဖြင့် ချက်ချင်း အရေးယူ ဆောင်ရွက်နိုင်သည့် အကြံပြုချက်များနှင့် ရေရှည် လုပ်ဆောင်သွားရမည့် ကိစ္စရပ်များ၊ ဖွဲ့စည်းတည်ဆောက်ပုံဆိုင်ရာ ကိစ္စရပ်များနှင့်သက်ဆိုင်သော အကြံပြုချက်များလည်း ပါဝင်သည်။

ရခိုင်ပြည်နယ်ဆိုင်ရာ အကြံပေး ကော်မရှင်ကို ပြီးခဲ့သည့် ၂၀၁၆ ခုနှစ် ဩဂုတ်လပိုင်းတွင် စတင်ဖွဲ့စည်းခဲ့ပြီး ကော်မရှင်၏ ပထမဦးဆုံးအကြိမ် ရခိုင်ပြည်နယ် ခရီးစဉ်ကို ၂၀၁၆ စက်တင်ဘာလတွင် ကော်မရှင်ဥက္ကဋ္ဌ ကိုဖီအာနန် ကိုယ်တိုင် ဦးဆောင်၍ သွားရောက်ခဲ့သည်။

အဆိုပါ ကော်မရှင်တွင် ကိုဖီအာနန် အပါအဝင် နိုင်ငံတကာမှ အကြံပေးပုဂ္ဂိုလ် သုံးဦး၊ ပြည်တွင်းမှ လူ့အခွင့်အရေး ကော်မရှင်ဥက္ကဋ္ဌ ဦးဝင်းမြ၊ မြန်မာနိုင်ငံ ကြက်ခြေနီ အသင်းနာယက ဒေါက်တာ သာလှရွှေ၊ ငြိမ်းချမ်းမေတ္တာအသင်းမှ ဦးအေးလွင်၊ မြန်မာနိုင်ငံ ဆရာဝန်များ အသင်းဥက္ကဋ္ဌ ဒေါက်တာမြသီတာ၊ မြန်မာနိုင်ငံ လူ့အခွင့်အရေး ကော်မရှင် အဖွဲ့ဝင် ဦးခင်မောင်လေး၊ ရခိုင်စာပေနှင့် ယဉ်ကျေးမှုအသင်း ဒုတိယဥက္ကဋ္ဌ ဒေါ်စောခင်တင့်တို့ဖြင့် ဖွဲ့စည်းထားသည်။

J-08



FOLLOW US