News

POST TAGGED AS

နည်းပညာ

08-Dec-2016

ပညာရေး နည်းပညာ
ပညာရေးတွင် အဘယ်ကြောင့် AI လမ်းကြောင်းကို လိုက်သင့်သနည်း
အနောက်နိုင်ငံ ပညာရေးစနစ်တွင် AI (Artificial Intelligence) ခေါ် လူသားကဲ့သို့ လုပ်ဆောင်နိုင်သည့် ကွန်ပျူတာနှင့် စက်တို့၏ ဉာဏ်ရည်တု တီထွင်မှုဆိုင်ရာ ပညာရပ်များကို သင်ကြား လေ့ကျင့်ပေးနေကြသည်မှာ ဆယ်စုနှစ် တစ်စုကျော်သို့ပင် ရောက်ရှိလာပြီ ဖြစ်သည်။ 

အနာဂတ်တွင် စက်များက လူသားများအတိုင်း လုပ်ဆောင်နိုင်ခြင်း၊ လူသားတို့ကဲ့သို့ တွေးခေါ်ဆောင်ရွက်လာနိုင်စေရန် အတွက် တီထွင်မှုများကို လူသားတို့ ပြုလုပ်နေကြပါသည်။ တိကျ၊ မှန်ကန်၊ မြန်ဆန်စေရုံမက ထုတ်လုပ်မှုဘက်ကကြည့်လျှင် စရိတ်လည်း သက်သာ၊ ကုန်ထုတ်စွမ်းအားကိုလည်း ပိုပြီး မြင့်မားလာစေသည်။

AI သည် လူတိုင်း၏ အိတ်ကတ်ထဲ၊ ကားထဲ၊ အိမ်ထဲ၊ လုပ်ငန်းခွင်များထဲတွင် ရောက်ရှိလာပြီ ဖြစ်သည်။ IBM ကုမ္ပဏီသည် ဆေးပညာလောကတွင် လူသားတို့အတိုင်း ဆုံးဖြတ်ခွဲစိတ်နိုင်သည့် စက်ရုပ်များကို တီထွင်နေပြီ ဖြစ်သည်။ Siri, Alexa, Google Assistant စသည့် ကုမ္ပဏီကြီးများကလည်း AI ကို တိုးမြှင့်ပြီး လူသားတို့အတွက် အဆင်အပြေဆုံး ဖြစ်စေမည့် ပစ္စည်းများကို တီထွင်ပေးနေကြသည်။

AI ကို အလေးပေးပြီး အလုပ်အကိုင် အခွင့်အလမ်းများကို ပြုပြင်ပြောင်းလဲပေးနေချိန်တွင် ပညာရေးသည် သမားရိုးကျအတိုင်း နည်းလမ်းဟောင်းပေါ်တွင် လျှောက်လှမ်းရန် မဖြစ်နိုင်တော့ပေ။ သတင်းအချက်အလက် (Information) နှင့် အသိဉာဏ် (Intelligence) တို့သည် လက်ချောင်းလေး တစ်ချောင်းနှင့် နှုတ်ဖျားလေး တစ်ခွန်းပေါ်တွင် ရှိလာပြီ ဖြစ်သည်။

စာသင်ခြင်းသည် ပြဋ္ဌာန်းစာအုပ်များ၊ အကြောင်းအရာများကို အလွတ်ကျက်ရန် မဟုတ်။ စာသင်ရာတွင် အချက်အလက် ဒေတာများ ရှာဖွေခြင်း၊ ရယူခြင်း၊ စုဆောင်းခြင်း၊ ထုတ်နုတ်တင်ပြခြင်း၊ မှီငြမ်းကိုးကားခြင်း စသည့် ကျောင်းသားကိုယ်တိုင် ဖော်ထုတ်ရမည့် အသွင်ကို ပြောင်းလဲလာပြီ ဖြစ်ကြောင်း သိထားရန် လိုပါသည်။ ဆရာသည် ကျောင်းသားကို သင်ကြားရန် ကွန်ပျူတာအကြောင်း နားလည်ရမည်၊ AI အကြောင်း သိထားရမည်။ အင်တာနက်အကြောင်း ကောင်းကောင်းသိရမည်။ အင်တာနက်တွင် ရှာဖွေနိုင်ရမည်။ ကျောင်းသားကို အွန်လိုင်းတွင် လမ်းညွှန်နိုင်ရမည်။ အနာဂတ် ပညာရေးသည် ဘလက်ဘုတ်၊ ဝှိုက်ဘုတ်များပေါ်တွင် အခြေမခံ။ စာအုပ်ပေါ်တွင် မရှိ။ အင်တာနက်နှင့် အွန်လိုင်းပေါ်တွင် ရယူသုံးစွဲ ညွှန်ကြားစီမံခြင်း မပြုနိုင်လျှင် ခေတ်နောက်ကျ ကျန်ခဲ့ရန်များသည်။

နိုင်ငံပေါင်းများစွာတွင် အစဉ်အလာ လမ်းအိုလမ်းဟောင်းအတိုင်း ပညာရေးကို အကောင်အထည် ဖော်နေကြဆဲ ဖြစ်သည်။ ဖင်လန်နိုင်ငံသည် ကမ္ဘာ့နိုင်ငံများထဲတွင် ရှေ့ပြေးနေသည့်နိုင်ငံ ဖြစ်သည်။ ထို့ကြောင့်လည်း ပညာရေးကို အသွင်လမ်းကြောင်း ပြောင်းပြီး ထိပ်တန်းပညာ နိုင်ငံတော်အဖြစ် ကူးပြောင်းနိုင်ခဲ့သည်။

ဖင်လန်ကျောင်းများတွင် အစဉ်အလာ Passive Learning အစား၊ ဆရာများက ဟောပြောပို့ချ သင်ကြားနေကြသည့် ပညာရေးအစား အုပ်စုဖွဲ့၍ ပြဿနာကို ဖြေရှင်းခြင်း၊ Problem Solving ဆိုသည့် သင်ကြားမှုစနစ်များဖြင့် AI လမ်းကြောင်းပေါ်တက်ရန် ပြင်ဆင်နိုင်ခဲ့ကြသည်။ 

ကျောင်းသားသည် ကိုယ်သိချင်သည့် နယ်ပယ်ကို ကိုယ်တိုင်ရှာဖွေ လေ့လာနိုင်ရမည်။ တစ်နည်းအားဖြင့် မိမိဝါသနာပါသည်ကို အောင်မြင်စေရန်လုပ်ပြီး အနာဂတ်အတွက် ကျွမ်းကျင်သည့် တတ်သိပညာရှင်များ ဖြစ်လာစေရန် လမ်းဖောက်ပေးထားသည်။ 

The World Economic Forum အဖွဲ့၏ ထုတ်ပြန်ချက်အရ မူလတန်းပညာကို စတင်သင်ကြားသူ၏ ၆၅ ရာခိုင်နှုန်းခန့်သာ ပညာရေးကို ဆုံးခန်းတိုင် သင်ကြားနိုင်ခဲ့ကြသည် ဆိုသော်လည်း ဆုံးခန်းတိုင် ပညာသင်ကြားခဲ့ သူတိုင်းသည် လုပ်ငန်းခွင်အတွက် အသင့်အနေအထားတွင် ဖြစ်မနေကြသူက များသည်။ 

ကွန်ပျူတာက လူ့ဘောင်ကို များစွာ စိုးမိုးလာသည်။ လုပ်ငန်းတိုင်း နေရာတိုင်းတွင် မရှိမဖြစ် ဖြစ်လာသည်။ AI ကလည်း လူသားတို့၏ လုပ်ငန်းခွင်နှင့် လူနေမှုဘဝကို ပိုပြီးစမတ်ကျစေရန် မြှင့်တင်ပေးလာသည်။ လူတိုင်း ဖုန်းကိုင်သုံးနိုင်သည့်အဆင့် ရောက်လာသဖြင့် သတင်းအချက်အလက် ဆိုသည်မှာ လူသားနှင့် အလှမ်းမဝေးသော လက်တစ်ကမ်း အကွာတွင် ရှိနေသည်ဟု ဆိုရမည်။

ယခင်က သိလိုသည့် အချက်အလက်များကို စာကြည့်တိုက် အားကိုးရသည်။ စာအုပ်တွေအပေါ် မှီခိုရသည်။ ခေတ်သစ်တွင် အင်တာနက်ပေါ်ရှိ Search Engines များက စက္ကန့်ပိုင်းအတွင်း သိလိုသည့် အချက်အလက်များကို သိန်းချီပြီး ဖော်ထုတ်ပေးနေသည်။ ထို့ကြောင့် ကျောင်းသားများကို သင်ကြားရေးသည် စာအုပ်တစ်အုပ်တည်းဖြင့် ဘောင်ကန့်ကာ သတ်မှတ်ထားရန် သင့်၊ မသင့် ဆိုသည်မှာ စဉ်းစားသင့်သော အချက်များ ဖြစ်လာပါသည်။ 

နည်းပညာလောကတွင် AI ဆိုသည့် အခန်းကဏ္ဍက နေရာဝင်ယူလာသည်။ ယနေ့အထိ AI ကို လေ့ကျင့်သင်ကြားပေးနိုင်သည့် ကုမ္ပဏီသည်ပင် ၂ ရာခိုင်နှုန်းခန့်သာ ရှိသေးသည်ဟု ဆိုသည်။ AI ပညာရေးကို ချဉ်းကပ်ရန်ဆိုသည်မှာ မည်သို့ လေ့လာရမည် ဆိုခြင်းကို ပြန်လည်လေ့လာနေရသည့် အဆင့်တွင်ပင် ရှိနေသေးကြောင်း ပညာရှင်များက ဆိုသည်။ 

AI လမ်းကြောင်းကို ပညာရှင်တို့ အသည်းအသန် လိုက်နေရခြင်းသည် လူသားတို့အတွက် အဆင်အပြေဆုံး၊ အသက်သာဆုံး၊ အကောင်းဆုံးဖြစ်စေရန် အကျိုးဆောင်ခြင်းဟု Global Future Council မှ တွဲဖက်ဥက္ကဋ္ဌ မာရီကမ်းမင်းကလည်း ပြောကြားသည်။ တစ်နည်းဆိုရလျှင် လူသားတို့ကို များများတွေးပြီး နည်းနည်းလုပ်ကိုင်စေနိုင်မည့် နည်းလမ်းများ ဖော်ဆောင်ပေးခြင်း ဖြစ်သည်။ အချို့သော ပညာရှင်များက ထိုသဘောတရားသည်ပင် လူသားကို ပျက်စီးစေရန် ဖြစ်ပေါ်လာလိမ့်မည်ဟု ဆိုသည်။ 

အနာဂတ်သည် အတွေးအခေါ် မြင့်မားသော ပညာရှင်များ၏ အခန်းကဏ္ဍဖြင့် နိုင်ငံတည်ဆောက်မည့် လမ်းကြောင်းကို လိုက်နေသည်။ သိပ္ပံ၊ သင်္ချာ၊ နည်းပညာ၊ ကွန်ပျူတာ ဆိုသည့် လမ်းကြောင်းပေါ်ကို မဖြစ်မနေ ရောက်အောင် သွားနေကြသည်။ The World Economic Forum က ထောက်ပြသည့် အချက်သည် အနာဂတ် ပညာရေး အတွက်လည်း စဉ်းစားစရာ ဖြစ်သည်။

“တီထွင်ဖန်တီးနိုင်စွမ်းသည် အနာဂတ် လုပ်သားများအတွက် မရှိမဖြစ် လိုအပ်သည့် ပညာ ဖြစ်လာပေလိမ့်မည်။ ကုန်ပစ္စည်းသစ်များအတွက် အမှာစာတွေ ရောက်လာမည်။ ထိုအမှာများကို အချိန်မီအပ်နိုင်ရန် နည်းပညာကို သုံးရတော့မည်။ လုပ်သားထက် စက်များက လွှမ်းမိုးလာသည့်ခေတ် ရောက်လာပြီ ဖြစ်သောကြောင့် လူသား၏ အခန်းကဏ္ဍသည် စက်အားကို ထိန်းကျောင်းနိုင်သူများ ဖြစ်ရန် လိုသည်။ ပြောင်းလဲမှုသည် လူက ဝင်လုပ်ရန် မဟုတ်။ လူက ထိန်းကျောင်းရန်နှင့် တီထွင်ရန် ဖြစ်သည်”
 
အနာဂတ်ပညာရေး အမြင်က ရှင်းသည်။ စက်တွေက AI အဆင့်မြင့်မြင့်ဖြင့် လုပ်ငန်းခွင်များတွင် နေရာဝင်ယူလာမည်။ စက်တွေကိုပြိုင်ပြီး လူတွေက ကုန်ထုတ်လုပ်မှုကို မယှဉ်နိုင်။ ထို့ကြောင့် ကာယအားတွေ အသုံးမလို ပိုလျှံနေမည့် အနာဂတ်အတွက် မည်သို့သော ကျောင်းသားကျောင်းသူများကို ကျောင်းများက မွေးထုတ်ပေးမည်နည်းဆိုသည့် အဖြေကို ယခုကတည်းက အဖြေမရှာနိုင်သည့် နိုင်ငံသည် နောက်ကျကျန်ခဲ့နိုင်သည်။              
 
(Ref:  Why education should become more like artificial intelligence, Sylvain Kalache)

E01



FOLLOW US