News

POST TAGGED AS

ဒီမိုကရေစီ

ချုပ်ကိုင်ကန့်သတ်သော ဒီမိုကရေစီစနစ်သို့ ဦးတည်နေသလော (Daily, Vol-5/No-271)
ငြိမ်း၊ စု၊ စီ ဥပဒေ ခေါ် ငြိမ်းချမ်းစွာ စုဝေးခြင်းနှင့် ငြိမ်းချမ်းစွာ စီတန်းလှည့်လည်ခြင်းဆိုင်ရာ ဥပဒေကို ပြင်ဆင်သည့် ဥပဒေကြမ်းတွင် ဖြည့်စွက် ပြင်ဆင်လိုက်သည့် အချက်များသည် ဒီမိုကရေစီစနစ်နှင့် မလျော်ညီကြောင်း ဝေဖန်မှုများ ထွက်ပေါ်လာခဲ့သည်။

အဆိုပါ ပြင်ဆင် ဖြည့်စွက်ချက်များတွင် ဆန္ဒပြပွဲကျင်းပရန် ငွေကြေး အကုန်အကျ ခံမည့်လူပုဂ္ဂိုလ် သို့မဟုတ် အဖွဲ့အစည်းနှင့် ခန့်မှန်း ကုန်ကျစရိတ်ကိုပါ တင်ပြရမည့်အချက်နှင့် အငြင်းပွားဖွယ် အဓိပ္ပာယ်ဖွင့်ဆိုနိုင်သော ပြစ်မှု၊ ပြစ်ဒဏ်ဆိုင်ရာ ပြင်ဆင်ဖြည့်စွက်ချက်တို့မှာ စင်စစ်အားဖြင့် မူလကပင် ဝေဖန်မှုများ ရှိနေသည့် ယင်းဥပဒေကို ပို၍ အကျည်းတန်သွားစေခဲ့သည်။

လက်ရှိ အသစ်ပြင်ဆင်လိုက်သော ဥပဒေကြမ်းသည် သမ္မတဦးသိန်းစိန်လက်ထက် ၂၀၁၁ ခုနှစ်တွင် ရေးဆွဲပြဋ္ဌာန်းစဉ်ကပင် လူ့အခွင့်အရေးဆိုင်ရာ လှုပ်ရှားသူများက အပြင်းအထန် ဝေဖန်ပြောဆိုခြင်းကို ခံခဲ့ရသည့် ဥပဒေထက် ပိုပို၍ ဆိုးရွားသွားခြင်းမှာ မရိုးသားသော အတုအယောင် ဆန္ဒပြပွဲများကို ရည်ညွှန်းဖွယ်ရှိသည်။

သို့သော် မည်သည့် ဆန္ဒပြပွဲကိုမဆို အလိမ်အညာလော၊ အစစ်အမှန်လော ဆိုသည်ကို ကုန်ခဲ့သည့် ၇ နှစ်ကျော် အတွေ့အကြုံရှိခဲ့သော ပြည်သူလူထုက ကောင်းစွာ ခွဲခြားနိုင်သည်ဆိုသော အချက်ကိုမူ ထိုပြင်ဆင်သည့် ဥပဒေကြမ်း တင်သွင်းသူ အာဏာရ NLD ပါတီမှ လွှတ်တော်ကိုယ်စားလှယ်များ မသိရှိ၍ပေလောဟု စောကြောစရာ ဖြစ်သွားခဲ့သည်။

အထူးသဖြင့် အခန်း(၇) ပုဒ်မ ၁၈ ပါ “မည်သူမဆို နိုင်ငံတော်လုံခြုံရေး၊ တရားဥပဒေ စိုးမိုးရေး၊ ရပ်ရွာအေးချမ်း သာယာရေးနှင့် ပြည်သူတို့၏ ကိုယ့်ကျင့်တရား အကျိုးတို့ကို ပျက်ပြားစေရန် အကြံဖြင့်ဖြစ်စေ၊ ထိုသို့ ပျက်ပြားတန်ရာသော အခြေအနေဖြစ်နိုင်ကြောင်း သိလျက်နှင့်ဖြစ်စေ၊ ငွေ သို့မဟုတ် ပစ္စည်းကို သော်လည်းကောင်း၊ အခြားနည်းလမ်း တစ်ခုခုကိုသော်လည်းကောင်း သုံးစွဲ၍ သူတစ်ဦးဦးအား ငြိမ်းချမ်းစွာ စုဝေးခြင်းနှင့် ငြိမ်းချမ်းစွာ စီတန်းလှည့်လည်ခြင်း ပြုအောင် လှုံ့ဆော်ခြင်း၊ သွေးဆောင်ခြင်း၊ ဖြားယောင်းခြင်း သို့မဟုတ် တိုက်တွန်းခြင်းကိုပြုကြောင်း”ဆိုသောအချက်မှာ တရားသူကြီးက လိုသလို အဓိပ္ပာယ် ကောက်ယူနိုင်သော အငြင်းပွားဖွယ် အချက်ဖြစ်နေပေသည်။

ထိုအချက်ကပင် ဥပဒေပြင်ဆင်သူများ၏ ဒီမိုကရေစီစနစ်အရ ဖွဲ့စည်းပုံ အခြေခံဥပဒေက ပေးအပ်ထားသော နိုင်ငံသားတို့၏ အခြေခံ အခွင့်အရေးကို ထပ်မံ၍ တားဆီးကန့်သတ်သည့်သဘော သက်ရောက်နေပေသည်။ 

ပိုဆိုးသည်မှာ အရပ်သားတစ်ပိုင်း ဦးသိန်းစိန်အစိုးရလက်ထက်ကပင် ထိုမျှတင်းကျပ်မှု မရှိပါဘဲ ပြည်သူလူထုက တစ်ခဲတနက် ထောက်ခံမဲပေး ရွေးချယ်ထားသော အစိုးရလက်ထက်ရောက်မှ ပြည်သူတို့၏ လွတ်လပ်ခွင့် ထပ်မံ ကန့်သတ်ခံရခြင်းဖြစ်သည်။

ဤနေရာတွင် များစွာ အရေးကြီးသည်မှာ မဲဆန္ဒရှင် ပြည်သူလူထုကို တိုက်ရိုက်ကိုယ်စားပြုနေသော ဥပဒေပြု လွှတ်တော်များ၏ အခန်းကဏ္ဍဖြစ်သည်။ အစိုးရက မည်သည့် ရည်ရွယ်ချက်ဖြင့် ယင်းဥပဒေကို ပြင်ဆင်သည်ဖြစ်စေ ပြည်သူ့ဆန္ဒနှင့် ပြည်သူတို့၏ အခြေခံအခွင့်အရေး၊ ရပိုင်ခွင့်များကို အလေးထားရမည့် ဥပဒေပြုလွှတ်တော်က ဤမျှ အရုပ်ဆိုးနေသော ဥပဒေကြမ်းကို အတည်ပြုမပေးသင့်ပေ။

ယနေ့အချိန်အထိတိုင် ပြည်သူလူထု၏ အခြေခံ အခွင့်အရေးများကို ပိတ်ပင်ဟန့်တားထားပြီး လိုလျှင်လိုသလို ဖိနှိပ်နိုင်သည့် အငြင်းပွားဖွယ် ဥပဒေဆိုးများကို ပြင်ဆင်၊ ပယ်ဖျက်၊ ဖြည့်စွက်နိုင်ခြင်း မရှိသေးသည့်ကြားက ထပ်မံ ကန့်သတ်ဖိနှိပ်နိုင်သည့် အငြင်းပွားဖွယ်၊ သံသယဖြစ်ဖွယ် ဥပဒေကြမ်းတစ်ခုကို လွှတ်တော်အနေနှင့် လက်ခံ အတည်ပြုလိုက်ပါက ပြည်သူလူထုအနေနှင့် အားကိုးရာမဲ့သော ခံစားချက်မျိုး ဖြစ်ပေါ်လာနိုင်ပေသည်။

ထိုမှတစ်ဆင့်တက်ပါက ပြည်သူလူထုက စိတ်ပျက်လက်ပျက်ဖြစ်ကာ လူ့အခွင့်အရေး စံနှုန်းများ၊ ဒီမိုကရေစီ စံနှုန်းများနှင့် မညီညွတ်လင့်ကစား အစိုးရလုပ်ချင်သည်မှန်သမျှ အတည်ပြုပေးနေရသည့် စက္ကူကျားလွှတ်တော်များအဖြစ် သိက္ခာကျ အရှက်ရသွားနိုင်သောကြောင့် အချိန်မလင့်ခင် စဉ်းစားဆင်ခြင် သုံးသပ်ဆုံးဖြတ်ကြပါမည့်အကြောင်း အကြံပြုတိုက်တွန်းအပ်ပေသည်။

အယ်ဒီတာ (၂၁-၂-၂၀၁၈)



FOLLOW US