News

POST TAGGED AS

ထန်းပင်

24-Jun-2018

ထန်းပင်
အညာသူ အညာသား ထန်းတောင်သူများ (Daily, Vol-6/No-57)
ခေတ်အဆက်ဆက် ထန်းသမားတို့၏ ဘဝပြောင်းလဲမှု မရှိသေးသော်လည်း ထန်းတောတို့၏အနေအထားကပြောင်းလဲနေပြီဖြစ်သည်။ ထန်းပင်တစ်ပင်အရွယ်ရောက်ရန် ဆယ်စုနှစ်များစွာကြာမြင့်သည်။ သို့သော်လည်း အညာဒေသတွင် ပေါ်ပေါက်နေသော ထန်းပင်အရေအတွက် အများအပြားကို ရောင်းချရန်အတွက် စက်လွှဖြင့် တိုက်ဖြတ်ခုတ်လှဲခြင်းအတွက်မူ နာရီအနည်းငယ်သာလိုအပ်မည်ဖြစ်သည်။ အသက်မွေးဝမ်းကျောင်းမှု ပုံစံ အပြောင်းအလဲ၊ နေရပ်ရွှေ့ပြောင်းလုပ်ကိုင်မှု၊ ဈေးကွက်လိုအပ်ချက်တို့သည် ထန်းပင်အို၊ ထန်းပင်ပျို များစွာကို ခုတ်လှဲရောင်းချနေကြခြင်း၏ အကြောင်းရင်းတချို့ ဖြစ်လာသည်။ မကြာသေးမီက အညာဒေသသို့ သွားရောက် လေ့လာသူ ရန်ကုန်သားသတင်းထောက် ဖြိုးသီဟချိုကထန်းလုပ်ငန်းခွင် မြင်ကွင်းတချို့ကိုမှတ်တမ်းတင်ခဲ့သည်။

ဓာတ်ပုံ- ဖြိုးသီဟချို / Myanmar Now

ကျောက်ပန်းတောင်းမြို့ ရွာတန်းရှည်ရွာတွင် ထန်းပင်များ ခုတ်လှဲထားမှု မြင်ကွင်းတစ်ခု။ ထန်းသီးတစ်လုံးကြွေကျလျှင် ထန်းပင် သုံးပင် ပေါက်နိုင်သည်ဟုဆိုသည်။ ပုံတွင် မြင်ရသည့် ယာခင်းထဲမှ ထန်းပင်ပေါက်များစွာကို အမြစ်မှတူးထုတ်ပြီး ဖယ်ရှားပါမှ စိုက်ပျိုးရေးလုပ်ငန်းပိုမို အဆင်ပြေမည်ဟု ဒေသခံတို့က ပြောကြသည်။

ထန်းပင်ပေါ်မှ ဆင်းလာသည့် အညာဒေသ ထန်းတက်သမားတစ်ဦး။ ထန်းလုပ်ငန်းခွင်အကြောင်း ရေးဖွဲ့ထားသည့် ရှေးကဗျာတစ်ပုဒ်တွင် ထန်းတက်သမားဇနီးက ထန်းရည်သိမ်းဆည်းပြီးနောက် မိသားစုဝင်များ ခွေးနှင့်အတူ အမဲလိုက်ကြောင်း၊ ရလာသည့် တောကောင်တို့ကို ထန်းလျက်ဖိုတွင် ကင်ကြောင်း၊ ယင်းနောက် “ဟင်းအိုးဆူလျှင်အကင် ခပ်ပြီး၊ အိုးကင်းနှင့်လှော်ရေနှင့် ကြော်”ရာမှ ထွက်ပေါ်လာသည့် အစပ်ကဲ ဟင်းလျာကို “ငုံ့လျက်ကိုယ်စီသာ ဆုပ်ကာ လွေးတော့သည်၊ ပြီးလျှင် ရေမရှာ ခွေးသာကျွေးတော့သည်”ဟု ခပ်သောသောရေးဖွဲ့ထားသည်။ ကဗျာအဖွဲ့အနွဲ့အရဆိုလျှင် ရှေးခေတ် ထန်းတက်သမားတို့ ချို့တဲ့ကြဟန် တူသည်။ ခေတ်ပြောင်းလာသော်လည်း ထန်းတက်သမားတို့၏ ဓနအင်အားက ပြောင်းလဲမှု မရှိသေးဟုဆိုနိုင်သည်။

မကွေးတိုင်းဒေသကြီး ချောက်မြို့ ထန်းတောတစ်ခုမှ ခုတ်ယူခဲ့သော ထန်းလုံးများမှာ ဧရာဝတီမြစ် ရေလမ်းကြောင်း ကောင်းမွန်ရေး စီမံကိန်းတစ်ခုအတွက်ဖြစ်သည်။

မြူအိုးဆေးကြောသန့်စင်နေသည့် အမျိုးသမီးတစ်ဦး။ ထန်းလုပ်ငန်း၊ အခြားစိုက်ပျိုးရေး လုပ်ငန်းများတွင် အမျိုးသမီး အများအပြားကို တွေ့ရသော်လည်း တောင်သူလယ်သမားဟု ဆိုလိုက်လျှင် အများအားဖြင့် အမျိုးသားကိုသာ ပြေးမြင်လေ့ရှိကြသည်။

ထန်းတောတွင် မြူအိုးကောက်နေသော ကလေးငယ်။

နွားစာခွက်အတွက် ထန်းလုံးကို ထွင်းနေကြသူများ။

မြူအိုးများ သယ်ဆောင်သွားသူတစ်ဦး။

ဧရာဝတီမြစ်ဘေး အထင်ကရ ပုဂံဘုရားတစ်ဆူဖြစ်သော လောကနန္ဒာဘုရားအနီး တည်ဆောက်နေသောရေကာ။ ကမ်းပါးပြိုမှုကို ဟန့်တားနိုင်ရန် ရည်ရွယ်သော ရေကာတည်ဆောက်ရေးတွင် ထန်းလုံး အများအပြား အသုံးပြုထားသည်။ မြစ်ကမ်းပါး ပြိုကျမှုကာကွယ်ရေး အစီအစဉ်အတွက် ထန်းလုံးတိုင်များကြား သဲအိတ်၊ ကျောက်တုံးတို့ထည့် သွင်းတည်ဆောက်မည်ဟု သိရသည်။



FOLLOW US