News

POST TAGGED AS

တိုင်းရင်းသား

တိုင်းရင်းသား လူမျိုးရေးရာ ဝန်ကြီးဌာန တိုင်းရင်းသားများကို ဦးစားပေး ခန့်ထားမည်
ရန်ကုန်၊ စက်တင်ဘာ ၉

အစိုးရသစ် လက်ထက်အတွင်း အသစ် ဖွဲ့စည်းလိုက်သည့် တိုင်းရင်းသား လူမျိုးများရေးရာ ဝန်ကြီးဌာန လက်အောက်ရှိ ဦးစီးဌာနများတွင် တာဝန် ထမ်းဆောင်ရန် ဒေသ အသီးသီးရှိ ဒေသခံ တိုင်းရင်းသား လူမျိုးများကို ဦးစားပေး ခန့်ထားရန် စီစဉ်လျက်ရှိသည်။ 

အဆိုပါ ဝန်ကြီးဌာနတွင် ဝန်ထမ်းများ ခန့်ထားရာတွင် ဒေသခံ တိုင်းရင်းသားများကို ခန့်ထားခြင်း မရှိဘဲ ခွဲခြားမှုများ ရှိနေခြင်းနှင့် ပတ်သက်၍ ရခိုင်ပြည်နယ် မဲဆန္ဒနယ် အမှတ် ၉ မှ အမျိုးသား လွှတ်တော် ကိုယ်စားလှယ် ဦးမောင်ကျော်ဇံ၏ မေးမြန်းမှုကို ပြည်ထောင်စုဝန်ကြီး နိုင်သက်လွင်က ယနေ့ ပြုလုပ်သည့် အစည်းအဝေးတွင် ပြန်လည် ဖြေဆိုခဲ့ခြင်း ဖြစ်သည်။ 

တိုင်းရင်းသား လူမျိုးရေးရာ ဝန်ကြီးဌာန၏ လုပ်ငန်း သဘာဝအရပင် တိုင်းရင်းသားများ၏ အရေးကိစ္စများကို နားလည် တတ်ကျွမ်းသည့် တိုင်းရင်းသား ပေါင်းစုံကို ခန့်ထားရန် အစီအစဉ် ရှိကြောင်း ပြည်ထောင်စု ဝန်ကြီးက ဆိုသည်။ 

“လုပ်ငန်းသဘောအရကို တိုင်းရင်းသားတွေရဲ့ စကား၊ စာပေ၊ ယဉ်ကျေးမှု၊ သမိုင်းအစဉ်အလာတွေကို နားလည်တတ်ကျွမ်းတဲ့သူကို ပိုပြီးတော့ ကျွန်တော်တို့က လိုလားတယ်။ ရခိုင်ပြည်နယ်မှာဆိုရင် ရခိုင်ဒေသခံ လူမျိုးကို အထူး အလေးပေး ဆောင်ရွက်မှာ ဖြစ်ပါတယ်”ဟု ၎င်းက ဆိုသည်။ 

ပြီးခဲ့သည့် မတ်လက နိုင်ငံတော် သမ္မတအဖြစ် ရွေးချယ်တင်မြှောက် ခံထားရသည့် ဦးထင်ကျော်က အစိုးရ အုပ်ချုပ်ရေး ယန္တရားကို ပြင်ဆင် ဖွဲ့စည်းခဲ့ရာတွင် အချို့ကို ဖျက်သိမ်းခြင်း၊ ပေါင်းစည်းခြင်းများ ပြုလုပ်ခဲ့ပြီး တိုင်းရင်းသား လူမျိုးများရေးရာ ဝန်ကြီးဌာနကို အသစ် ဖွဲ့စည်းခဲ့ခြင်း ဖြစ်သည်။ 

ယင်းဝန်ကြီးဌာန လက်အောက်တွင် ပြည်ထောင်စု ဝန်ကြီးရုံးအပြင် တိုင်းရင်းသား စာပေနှင့် ယဉ်ကျေးမှု ဦးစီးဌာနနှင့် တိုင်းရင်းသား အခွင့်အရေးများ ကာကွယ် စောင့်ရှောက်ရေး ဦးစီးဌာနဟူသည့် ဦးစီးဌာန နှစ်ခုဖြင့် ဖွဲ့စည်းခဲ့သည်။ 

အဆိုပါ ဌာနများ၏ ညွှန်ကြားရေးမှူးရုံးများကို လာမည့် ဘဏ္ဍာရေးနှစ်တွင် ဖွဲ့စည်းမည်ဖြစ်ပြီး ၂၀၁၇-၁၈ ဘဏ္ဍာရေးနှစ်တွင် တိုင်းဒေသကြီးနှင့် ပြည်နယ်အဆင့် ဦးစီးဌာနများကို ဖွဲ့စည်းမည်ဖြစ်သည်။

ပြည်ထောင်စု အစိုးရအဖွဲ့အစည်း ဆုံးဖြတ်ချက်အရ ယင်းဝန်ကြီးဌာနအတွက် အရာထမ်း ၃၇၀ ဦး၊အမှုထမ်း ၇၆၁ ဦး၊ စုစုပေါင်း ၁၁၃၁ ဦး ခန့်ထားမည်ဖြစ်သည်။ 

“ရခိုင်ပြည်နယ်မှာဆိုရင် ရခိုင်ဒေသခံ လူမျိုးကို အထူး အလေးပေး ဆောင်ရွက်မှာ ဖြစ်ပါတယ်။ ရခိုင်ဒေသ၊ ရခိုင်ပြည်နယ်မှာ မရရှိမှ၊ သတ်မှတ်တဲ့ အရည်အချင်း၊ ပြည့်ဝတဲ့သူ မရရှိတဲ့အခါမှ ရန်ကုန်တိုင်းတို့လို ဧရာဝတီတိုင်းတို့လို ရခိုင်လူမျိုးကို ဦးစားပေးပြီးတော့ ကျွန်တော်တို့ခန့်အပ်မယ်”ဟု ပြည်ထောင်စုဝန်ကြီးက ဆိုသည်။ 

ဝန်ထမ်းများ ခန့်ထားရာတွင် အစိုးရ၏ အသုံးစရိတ်ကို ချွေတာသည့်အနေနှင့် အခြားဝန်ကြီးဌာနများမှ လက်ထောက် ညွှန်ကြားရေးမှူးနှင့် အောက်ခြေအဆင့် ဝန်ထမ်းများကို ပထမအဆင့်အနေနှင့် ပြောင်းရွှေ့ခန့်ထားခဲ့ပြီး ဒုတိယအဆင့်နှင့် အခြားဝန်ကြီးဌာနများမှ ညွှန်ကြားရေးမှူးနှင့် ဒုညွှန်ကြားရေးမှူး အဆင့်များကိုလည်း ခေါ်ယူ ခန့်ထားနိုင်ရန် ဆောင်ရွက်သွားမည်ဟု ပြည်ထောင်စုဝန်ကြီးက ဆိုသည်။ 



FOLLOW US