News

POST TAGGED AS

တိုက်ပွဲ

ငြိမ်းချမ်းရေးအတွက် အာဏာခွဲဝေပေးရမည့် မြန်မာနိုင်ငံ

ယခုဆောင်းပါးမှာ တရုတ်ကွန်မြူနစ်ပါတီ၏ အာဘော်သတင်းစာ Global Times တွင် ပါရှိသော Myanmar Must Share Power for Peace ဟု အမည်ရသည့် ဆောင်းပါးကို The Voice ပရိသတ်များ သိရှိနိုင်စေရန် ဘာသာပြန်ဆိုဖော်ပြခြင်း ဖြစ်ပါသည်။  
(အယ်ဒီတာ) 

တရုတ်နိုင်ငံ အနီးရှိ မြန်မာနိုင်ငံ၏ မြောက်ပိုင်းဒေသတွင် မြန်မာအစိုးရ တပ်မတော်နှင့် တိုင်းရင်းသား လက်နက်ကိုင် အဖွဲ့အစည်း လေးဖွဲ့တို့အကြား တနင်္ဂနွေနေ့၌ တိုက်ပွဲများ ဖြစ်ပွားခဲ့သည်။ မြန်မာနိုင်ငံ မြောက်ပိုင်းတွင် ဖြစ်ပွားလျက်ရှိသည့် အဆိုပါ လက်နက်ကိုင် ပဋိပက္ခများသည် မြန်မာနိုင်ငံ၏ ငြိမ်းချမ်းရေးဖြစ်စဉ်တွင် အရေးအကြီးဆုံး အဆုံးအဖြတ်ပေးရမည့် အချိန်ကာလ ဖြစ်လာသည်။ ကချင်လွတ်မြောက်ရေး တပ်မတော်ကို အစိုးရစစ်တပ်များ ဝန်းရံထားသည့် အခြေအနေကို ပြောင်းလဲပစ်ရန် လက်နက်ကိုင်လေးဖွဲ့ ဦးစွာ ထိုးစစ်ဆင် တိုက်ခိုက်ခဲ့ခြင်း ဖြစ်နိုင်ပေသည်။ 

ယခုနောက်ဆုံး လက်နက်ကိုင် ပဋိပက္ခများသည် အမျိုးသားဒီမိုကရေစီအဖွဲ့ချုပ် ခေါင်းဆောင် ဒေါ်အောင်ဆန်းစုကြည် ပြောဆိုစည်းရုံးနေသည့် အမျိုးသားရင်ကြားစေ့ရေးအပေါ် ဆိုးကျိုးသက်ရောက်မှု ရှိစေမည် ဆိုခြင်းကို သံသယဖြစ်စရာ လိုလိမ့်မည် မဟုတ်ပါ။ ဖြစ်လာနိုင်ခြေ ရှိသော အကျိုးဆက်များစွာ ရှိပါသည်။ 

တိုက်ခိုက်မှုများသည် အစိုးရ တပ်မတော်ကို အမျက်ဒေါသ ဖြစ်စေခဲ့သည့်အတွက် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ပါဝင်ပတ်သက်နေသည့် တိုင်းရင်းသား လက်နက်ကိုင် အဖွဲ့အစည်းလေးဖွဲ့မှ အဖွဲ့အချို့ကို အမြစ်ပြတ် ချေမှုန်းရန် စစ်တပ်များ စေလွှတ်နိုင်သည်။ သို့မဟုတ် NLD အစိုးရက မြန်မာတပ်မတော်ဘက်မှ ရပ်လိုက်လျှင်လည်း ငြိမ်းချမ်းရေး ဆွေးနွေးပွဲများ ရှေ့ဆက်၍မရ ဖြစ်သွားနိုင်သည်။ မြန်မာနိုင်ငံ မြောက်ပိုင်းသည် ပဋိပက္ခများ ပြန်လည်ဖြစ်ပွားသည့် အခြေအနေသို့ ဆိုက်ရောက်သွားနိုင်ခြေလည်း ရှိသည်။ ခြုံပြီးဆိုရလျှင် တိုင်းရင်းသား လက်နက်ကိုင်အဖွဲ့ လေးဖွဲ့စလုံးသည် သူတို့ သိမ်းပိုက်ထားသည့် နေရာများတွင် လုံလုံခြုံခြုံ နေထိုင်နိုင်ရေးအတွက် ဒေါ်အောင်ဆန်းစုကြည်၊ NLD နှင့် တရုတ်နိုင်ငံတို့အား မြန်မာတပ်မတော်ကို ဖိအားပေးရန် ကြိုးစားအားထုတ်စေချင်သည့် ရည်ရွယ်ချက်လည်း ဖြစ်ကောင်း ဖြစ်နိုင်ပါသည်။ 

တိုင်းရင်းသား လက်နက်ကိုင်အဖွဲ့များသည် ရေရှည်တည်တံ့သည့် စည်းလုံးမှု မရှိသေးသည့်အပြင် အစိုးရ တပ်မတော်သည်လည်း သဘောတူညီချက်များ ရအောင် လုပ်ဆောင်ရန် မည်သည့်အခါမှ လိုလိုလားလား မရှိခဲ့ပါ။ တပ်မတော်သည် တိုင်းရင်းသား လက်နက်ကိုင်အဖွဲ့များနှင့် ဆွေးနွေးညှိနှိုင်းရာတွင်လည်း တစ်ဖွဲ့ချင်းဖြင့်သာ ဆောင်ရွက်သွားလိမ့်မည် ဖြစ်သည်။

မြန်မာနိုင်ငံသည် အမျိုးသားစည်းလုံးညီညွတ်မှု ရရှိရန် အချိန်အတော်ကြာမြင့်ဦးမည် ဖြစ်သည်။ မြန်မာနိုင်ငံ လွတ်လပ်ရေး ရခဲ့စဉ်ကတည်း ဖြစ်ထွန်းလာခဲ့သည့် နိုင်ငံ၏ သမိုင်းကြောင်းသည် မြန်မာနိုင်ငံတွင်းရှိ တိုင်းရင်းသား ပဋိပက္ခ ပြဿနာကို စစ်ရေးအင်အားဖြင့် ဖြေရှင်းရန် မဖြစ်နိုင်သည်ကိုလည်း သက်သေပြလျက် ရှိနေသည်။ ၂၀၁၃ နိုဝင်ဘာလမှစတင်၍ မြန်မာအစိုးရနှင့် လက်နက်ကိုင် တိုင်းရင်းသား အုပ်စုများသည် ငြိမ်းချမ်းရေး ဆွေးနွေးမှုများကို ကိုးကြိမ်တိုင်တိုင် ဆောင်ရွက်ခဲ့ပြီး တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူညီမှု ရရှိအောင် ဆောင်ရွက်နိုင်ခဲ့သည်။ တိုင်းရင်းသား လက်နက်ကိုင် အဖွဲ့အစည်း ရှစ်ဖွဲ့သည် အဆိုပါ သဘောတူညီချက် စာချုပ်ကို လက်မှတ်ရေးထိုးခဲ့သည်။ 

ဒေါ်အောင်ဆန်းစုကြည်သည် ၂၀၁၆ ဧပြီလတွင် ၁၉၄၇ ပင်လုံညီလာခံကဲ့သို့သော အမျိုးသားရင်ကြားစေ့ရေး ညီလာခံ ကျင်းပနိုင်ရေးနှင့် နောက်ထပ် တိုင်းရင်းသား လက်နက်ကိုင်အဖွဲ့များ အပစ်အခတ်ရပ်စဲရေး သဘောတူညီချက်စာချုပ်တွင် လက်မှတ်ရေးထိုးနိုင်ရေးတို့အတွက် သူမအနေနှင့် များစွာ မျှော်လင့်ချက်များ ထားရှိကြောင်း ဖော်ပြခဲ့သည်။ အောက်တိုဘာ ၃၁ တွင် ၂၁ ရာစု ပင်လုံညီလာခံကို ပထမဦးဆုံးအကြိမ် ကျင်းပခဲ့ပြီး ၂၀၁၉ (သို့မဟုတ်) ၂၀၂၀ တွင် ငြိမ်းချမ်းရေး အပြည့်အဝရရှိရန် ဆိုသည့် မျှော်လင့်ချက်များဖြင့် ညီလာခံကို ခြောက်လတစ်ကြိမ် ကျင်းပရန် ကြေညာခဲ့သည်။  

NLD အစိုးရ၊ မြန်မာတပ်မတော်နှင့် တိုင်းရင်းသား လက်နက်ကိုင်အဖွဲ့များ၏ ကွဲပြားခြားနားမှုများ ကို အပြန်အလှန် နားလည်မှု ရှိစေသည့် ငြိမ်းချမ်းရေး ဆွေးနွေးပွဲများမှ တစ်ဆင့်သာ ဖြေရှင်းနိုင်မည် ဖြစ်သည်။ တိုင်းရင်းသား လက်နက်ကိုင်အဖွဲ့များအတွက် ၎င်းတို့၏ ဒေသများတွင် အာဏာနှင့် သယံဇာတ အရင်းအမြစ်များ ထိန်းချုပ်ရန် ကြိုးစားခြင်းသည် လက်တွေ့မဖြစ်နိုင်သလို မြန်မာတပ်မတော် အတွက်လည်း တိုင်းရင်းသား လက်နက်ကိုင် အဖွဲ့အစည်းများကို အမြစ်ပြတ် ချေမှုန်းခြင်းဖြင့် ၎င်းတို့အား စည်းရုံးသိမ်းသွင်းရန် ကြိုးစားခြင်းသည် ခက်ခဲပါသည်။

မြန်မာနိုင်ငံသည် နိုင်ငံ၏ စည်းလုံးညီညွတ်မှုကို သက်ရောက်မှု ရှိစေသည့် ဖက်ဒရယ်စနစ်ကို အကောင်အထည်ဖော် ဆောင်ရွက်နိုင်မှု မရှိလျှင် မြန်မာနိုင်ငံ၏ နိုင်ငံရေး အသွင်ကူးပြောင်းမှုသည် တိုင်းရင်းသားအရေးများကြောင့် ရှေ့ဆက်ဖို့ရန် ခက်ခဲနေပါလိမ့်မည်။ မြန်မာပြည်သူများသည် ရွေးချယ်ရ ခက်ခဲလျက် ရှိနေပါသည်။ 

မြန်မာတပ်မတော်နှင့် တိုင်းရင်းသား လက်နက်ကိုင်အဖွဲ့များ အကြား ပဋိပက္ခများကို ဖြေရှင်းနိုင်သည့် အဓိကသော့ချက်မှာ အာဏာနှင့် သယံဇာတ ခွဲဝေရေးအတွက် ဆီလျော်မှုရှိသည့် လုပ်ထုံးလုပ်နည်း တစ်ရပ်ကို တတ်နိုင်သမျှ အမြန်ဆုံး ရှာဖွေနိုင်ရေးပင် ဖြစ်သည်။ အမျိုးသားရင်ကြားစေ့ရေးကို ရရှိအောင် မည်သို့ ဆောင်ရွက်မည်၊ နိုင်ငံရေး အကူးအပြောင်း၏ ရည်မှန်းချက် ပန်းတိုင်များကို ဘယ်လိုနားလည် သဘောပေါက်အောင် ဆောင်ရွက်မည်လဲနှင့် မြန်မာနိုင်ငံကို စည်းလုံးညီညွတ်ပြီး ဒီမိုကရေစီစနစ် ထွန်းကားအောင်နှင့် ကြွယ်ဝချမ်းသာသည့် နိုင်ငံဖြစ်အောင် ဘယ်လိုပြောင်းလဲ ဆောင်ရွက်သွားမည်လဲ ဆိုသည့် အချက်များသည် မြန်မာပြည်သူများအတွက် အဓိက စမ်းသပ်မှုကြီးပင် ဖြစ်ပါလိမ့်မည်။ 

မြန်မာနိုင်ငံမြောက်ပိုင်းရှိ လက်နက်ကိုင် ပဋိပက္ခများအပေါ် တရုတ်နိုင်ငံ၏ ရပ်တည်ချက်မှာ တစ်သတ်မတ်တည်း ဖြစ်ပြီး ပွင့်လင်းမြင်သာမှုနှင့် ရှင်းလင်းမှုလည်း ရှိပါသည်။ တရုတ်နိုင်ငံသည် ပဋိပက္ခများတွင် ပါဝင်နေသည့် ပါဝင်ပတ်သက်သည့် အဖွဲ့များ အားလုံးအား ထိန်းထိန်းသိမ်းသိမ်း ဆောင်ရွက်ကြရန်နှင့် တရုတ်-မြန်မာ နယ်နိမိတ်ကို မြန်မြန်ဆန်ဆန် တည်ငြိမ်အေးချမ်းမှု ရရှိအောင်ရောက် ဆောင်ရွက်သွားဖို့ မျှော်လင့်လျက် ရှိသည်။ တရုတ်နိုင်ငံသည် တိုင်းရင်းသား လက်နက်ကိုင်အဖွဲ့များအား ပဋိပက္ခများ ထပ်မံလုပ်ဆောင်ဖို့ တိုက်တွန်းမှာ မဟုတ်သလို တော်လှန်ရေး အဖွဲ့အစည်းများအား ဖြိုခွင်းချေမှုန်းဖို့ တပ်မတော်အား ထောက်ပံ့ပေးမည်လည်း မဟုတ်ပါ။ မည်သူက ပဋိပက္ခများကို စတင်ခဲ့သည်ဖြစ်စေ တကယ်တမ်း ဒုက္ခခံစားရသည်မှာ ဒေသခံများပင် ဖြစ်ပြီး တရုတ်နှင့် မြန်မာနိုင်ငံတို့အကြား နယ်စပ်ဒေသများသည်ပင် လုံခြုံမှု ရှိတော့မည် မဟုတ်ချေ။   

လက်ရှိအခြေအနေများအောက်တွင် ငြိမ်းချမ်းရေး ဆွေးနွေးပွဲများကို မြှင့်တင်ရန် ပိုမိုကြိုးစားဖို့ လိုအပ်နေပြီ ဖြစ်သည်။ တရုတ်နိုင်ငံသည် စေ့စပ်ညှိနှိုင်းရေးနှင့် ပူးပေါင်းဆောင်ရွက်မှုတို့ကို ခိုင်ခံ့စေရန် အကူအညီပေးနိုင်ပြီး တပ်မတော်၊ အစိုးရနှင့် တိုင်းရင်းသား လက်နက်ကိုင်အဖွဲ့များအား စေ့စပ်ညှိနှိုင်းရေး စားပွဲပေါ်သို့ ပြန်လည်ရောက်ရှိအောင် တိုက်တွန်းနှိုးဆော်သွားနိုင်ပါသည်။ 



FOLLOW US