News

POST TAGGED AS

တင်ဒါ

28-Aug-2018

ရန်ကုန် တင်ဒါ
တင်ဒါကိစ္စသည် အစိုးရအတွက် စိန်ခေါ်မှုကြီးဖြစ်နေကြောင်း ဒေါ်အောင်ဆန်းစုကြည်ပြောကြား
နေပြည်တော်၊ ဩဂုတ် ၂၇

လာဘ်ပေးလာဘ်ယူမှုနှင့် ပတ်သက်၍ အစိုးရ၏တင်ဒါကိစ္စသည် အစိုးရအတွက်စိန်ခေါ်မှုကြီးတစ်ခု ဖြစ်နေကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားလိုက်သည်။

နေပြည်တော်ရှိ MICC 2 တွင်ပြုလုပ်သည့် စီးပွားရေးလုပ်ငန်းရှင်များနှင့် တွေ့ဆုံရာတွင် ၎င်းက အထက်ပါအတိုင်း ပြောကြားခဲ့ခြင်းဖြစ်သည်။

တင်ဒါကိစ္စ နှောင့်နှေးကြန့်ကြာမှုများကြောင့် အစိုးရ၏ စီမံကိန်းလုပ်ငန်းများ မပြီးစီးနိုင်သည့် ကိစ္စများကို ကြုံတွေ့နေရပြီး ပြည်သူအနေနှင့် မမှန်မကန် လုပ်ဆောင်ချက်များတွေ့ပါက အကြောင်းကြားပေးပို့စေလိုကြောင်း အစိုးရ၏ လုပ်ငန်းဆိုင်ရာကိစ္စများကို လာဘ်ပေးလာဘ်ယူမှုများရှိပါက တိတိကျကျဖြင့် အစိုးရဌာနကို အသိပေးစေလိုပြီး အရေးယူပေးမည်ဖြစ်ကြောင်း၊ ယင်းမှသာ လာဘ်ပေးလာဘ်ယူမှုသည် ပပျောက်မည်ဖြစ်ကြောင်း နိုင်ငံတော်၏အတိုင်ပင်ခံပုဂ္ဂိုလ်က ဆိုသည်။

“တကယ်ပဲ (လာဘ်) မပေးလို့ အလုပ်မဖြစ်ဘူးဆိုရင် ကျွန်မတို့ကို တရားဝင်ပြောလို့ရပါတယ်။ တိုင်လို့ရပါတယ်။ကျွန်မတို့ အရေးယူမှာပါ။ မသိကျိုးကျွန်ပြုနေမှာ မဟုတ်ပါဘူး။ တိုင်သူမရှိရင် အရေးယူရတာ ခက်ပါတယ်”ဟု ၎င်းက ပြောသည်။

စီးပွားရေးလုပ်ငန်းရှင်များအနေနှင့် လာဘ်ပေးလာဘ်ယူမှုကို မကြိုက်သည်ကို ကြားသိရသောကြောင့် ၎င်းအနေနှင့် ဝမ်းသာရပြီး ပူးပေါင်းလုပ်ဆောင်စေလိုကြောင်း၊ အစိုးရအနေနှင့် နိုင်ငံတိုးတက်ရေးကို လုပ်ဆောင်နေခြင်းဖြစ်ပြီး နိုင်ငံတိုးတက်မှုမရှိပါက အစိုးရသည်လည်း အောင်မြင်သည့် အစိုးရဖြစ်လာမည်မဟုတ်ကြောင်း၊ ယင်းကြောင့် နိုင်ငံတိုးတက်ရေးအတွက် ပါဝင်ဆောငရွက်စေလိုကြောင်း ၎င်းက ထပ်လောင်းပြောသည်။

ဒေါ်လာဈေးနှင့်ပက်သတ်၍ နိုင်ငံပိုင် ရုပ်မြင်သံကြားတွင် အတိုင်းအတာတစ်ခုအထိ ရှင်းပြထားပြီး စီးပွားရေးလုပ်ငန်းရှင်များ၏ အကြံပြုချက်များကို အစိုးရ၏ စီးပွားရေးကော်မတီတွင် ဆွေးနွေးထားပြီဖြစ်ပြီး အကောင်အထည်ဖော်သင့်သည်များကို လုပ်ဆောင်ရန်ပြုလုပ်နေကြောင်း၊ ဒေါ်လာဈေး အတက်အကျဖြစ်သည့် ကိစ္စသည် မြန်မာနှင့်မဆိုင်သည့်ကိစ္စဖြစ်ပြီး ကမ္ဘာ့အခြေအနေနှင့် သက်ဆိုင်နေကြောင်း၊ ဒေါ်လာဈေး တက်ခြင်းသည် ပြည်ပမှစတင်လာခြင်းဖြစ်ပြီး ယင်းကိစ္စအားလုံးကို မိမိတို့နိုင်ငံတစ်ခုတည်းက ကိုင်တွယ်မရနိုင်ကြောင်း၊ မြန်မာ့စီးပွားရေး တောင့်တင်းခိုင်မာမှုသည် ရှိသင့်သလောက် မရှိသည့်အတွက် မိမိတို့နိုင်ငံကို ဂယက်ရိုက်နေခြင်းဖြစ်ကြောင်း၊ ယင်းအပြင် ဒေါ်လာကို မလိုအပ်ဘဲ တန်ဖိုးထားခြင်းသည်လည်း လူတိုင်းလူတိုင်းနှင့် သက်ဆိုင်သည့် ကိစ္စဖြစ်နေကြောင်း ဒေါ်အောင်ဆန်းစုကြည်က ဆိုသည်။ 

ဒေါ်လာ ငွေကြေးလှည့်လည်မှု တည်ငြိမ်ရေးအတွက် ထုတ်ကုန်မြှင့်တင်ခြင်း၊ ရင်းနှီးမြှုပ်နှံမှု မြှင့်တင်ခြင်း၊ သွင်းကုန်အစားထိုးခြင်းများ ပြုလုပ်သွားရမည်ဖြစ်ပြီး အာဆီယံနှင့် မြန်မာ့စီးပွားရေး အခြေအနေကို ပြန်လည်သုံးသပ်ရန်လိုကြောင်း ဦးဇော်မင်းဝင်း (UMFCCI  ဥက္ကဋ္ဌ) က ထောက်ပြသည်။

လက်ရှိတွင် ဆောက်လုပ်ရေးလုပ်ငန်းများ ရပ်ဆိုင်းရသည့် အခြေအနေထိရှိနေပြီး ကုန်ဈေးနှုန်းကြီးမြှင့်မှုကို ရင်ဆိုင်နေရကြောင်း၊ ယင်းကြောင့် ရင်းနှီးမြှုပ်နှံသူများအနေနှင့် စောင့်ကြည့်နေသည့်သဘောရှိပြီး စီးပွားရေးလုပ်ငန်းများ ပြန်လည်ဦးမော့လာရန်အတွက် ပြန်လည်ဆွဲဆောင်ရန် လိုအပ်ကြောင်း စီးပွားရေးလုပ်ငန်းရှင် ဦးမောင်ဝိတ်က ဆိုသည်။

မြန်မာစီးပွားရေးလုပ်ငန်းရှင်များ ကြုံတွေ့နေရသည့် ဘဏ်ချေးငွေ အတိုးနှုန်းသည် ၁၃ ကျပ်ဖြစ်နေသည့်အတွက် လုပ်ငန်းများ တွက်ခြေမကိုက်သည့် အခြေအနေ ရှိလာကြောင်း၊ ယင်းနှုန်းကို ၉ ကျပ်နှုန်း သို့မဟုတ် ၈ ကျပ်နှုန်းအဖြစ် တစ်နှစ် သို့မဟုတ် ၂ နှစ် လျှော့ချပေးရန် လိုအပ်ကြောင်း၊ အခြေပစ္စည်းဝယ်ယူရာတွင် အခွန်ကို ၃၀ ရာခိုင်နှုန်း ဆောင်နေရသည့် ကိစ္စတွင် ၅ ရာခိုင်နှုန်းခန့်လျှော့၍ တစ်နှစ် သို့မဟုတ် ၂ နှစ်အဖြစ် ထားပေးစေလိုကြောင်း၊ အခြေပစ္စည်းဝယ်ယူရာတွင် ဘဏ်ချေးငွေနှင့် ဝယ်သော်လည်း ၃၀ ရာခိုင်နှုန်းကို ဆောင်နေရခြင်း ဖြစ်သောကြောင့် ဘဏ်ချေးငွေနှင့် ဝယ်ယူသူကို ယင်းအခွန် ၃၀ ရာခိုင်နှုန်းကို ကင်းလွတ်ခွင့်ပြုရန် တင်ပြလိုကြောင်း ဦးမောင်ဝိတ်က ဆိုသည်။

ယင်းအပြင် မြန်မာနိုင်ငံသားရင်းနှီးမြှုပ်နှံသူသည် စတင်ရင်းနှီးမြှုပ်နှံရာတွင် ရင်းနှီးမြှုပ်နှံမှုမတည်ငွေ၏ အခွန်ဆောင်ထားရသည့် စာရွက်စာတမ်း (ငွေဖြူအဖြစ်သက်သေခံ) ကို ပြထားရန်လိုအပ်ပြီး နိုင်ငံခြားသား ရင်းနှီးမြှုပ်နှံသူများ၏ မတည်ရင်းနှီးငွေအတွက် အခွန်ဆောင်ထားသည့်စာရွက် စာတမ်းပြစရာမလိုသည်ကို တွေ့နေရကြောင်း၊ ထို့ကြောင့် နိုင်ငံခြားသား လုပ်ငန်းရှင်များနည်းတူ အခွန်ဆောင်ထားသည့် စာရွက်စာတမ်း ပြစရာမလိုဘဲ လုပ်ငန်းလုပ်ဆောင်နိုင်ရန် ပြုလုပ်ပေးစေလိုကြောင်း ၎င်းက ထပ်လောင်းတင်ပြသည်။

ဒေါ်အောင်ဆန်းစုကြည်က အစိုးရအနေနှင့် လုပ်ပေးနိုင်သည်များကို သေချာစဉ်းစား လုပ်ဆောင်ပေးသွားမည်ဟု ပြန်လည်ဖြေကြားခဲ့သည်။

ယင်းအခမ်းအနား အပြီးတွင် ပြည်ထောင်စုအဆင့်အစိုးရ အဖွဲ့ဝင်များနှင့် စီးပွားရေးလုပ်ငန်းရှင်များနှင့် တွေ့ဆုံခြင်းနှင့် နိုင်ငံတော်အတိုင်ပင်ခံနှင့် သီးသန့်တွေ့ဆုံသည့်ကိစ္စများ ပြုလုပ်ခဲ့သည်။

S-01



FOLLOW US