News

POST TAGGED AS

စာမေးပွဲ

အငိုလွယ်ပြီး အရှိုက်ခက်မယ့် စီစီ
မကြာသေးမီကပဲ ပညာရေးဆိုင်ရာအစည်းအဝေးတစ်ခု ဖိတ်ကြားခံခဲ့ရတယ်။ မြို့နယ်ပညာရေးမှူးကဦးစီးပြီး မြို့နယ်အတွင်းမှာရှိတဲ့ အထက်တန်းကျောင်းတွေနဲ့ ကိုယ်ပိုင်ကျောင်းတွေက ကျောင်းအုပ်ဆရာကြီး၊ ဆရာမကြီးတွေ၊ ကျောင်းသားမိဘတွေ၊ ဆရာ၊ ဆရာမတွေနဲ့ ပညာရေး စိတ်ပါဝင်စားသူတွေကို ဖိတ်ကြားခဲ့တာပါ။

အစည်းအဝေးက အခြေခံပညာသင်ယူပြီးမြောက်မှု လက်မှတ်ထုတ်ပေးရေးနဲ့ ပတ်သက်ပြီး Gread 11 ကျောင်းသား ကျောင်းသူတွေမှာ ရှိသင့်တဲ့ အနိမ့်ဆုံးစံသတ်မှတ်ချက် အကြံပြုဆွေးနွေးပွဲပဲ ဖြစ်ပါတယ်။ တကယ်တော့ အဲဒီသတ်မှတ်ချက်တွေနဲ့ ပတ်သက်ရင် နေပြည်တော် ပညာရေးရုံးမှာ တိုင်းပညာရေးမှူးတွေ၊ မြန်မာနိုင်ငံစာစစ်အဖွဲ့တွေနဲ့ တွေ့ဆုံဆွေးနွေးပြီး အနိမ့်ဆုံးစံသတ်မှတ်ချက်တွေအဖြစ် ထုတ်ပြန်လိုက်တာပါ။ အဲဒီအပေါ်မှာ ဆွေးနွေးအကြံပြုကြဖို့ပဲ ဖြစ်ပါတယ်။

ဒီနေရာမှာ ပြောဖို့လိုတာက အရည်အချင်းမှတ်တမ်းချုပ် (ဝါ) အခြေခံပညာသင်ယူပြီးမြောက်မှု လက်မှတ်ဟာ အဆင့်သုံးဆင့်နဲ့ ထုတ်ပေးဖို့ပါ။ မူလတန်းဆင့် သင်ယူပြီးမြောက်မှု၊ အလယ်တန်းအဆင့် သင်ယူပြီးမြောက်မှုနဲ့ အထက်တန်းဆင့် သင်ယူပြီးမြောက်မှုလက်မှတ်တို့ပဲ ဖြစ်ပါတယ်။ အခု ဆွေးနွေးဖို့ကတော့ Grade 11 အတွက်ပါ။ ဒါကလည်း အမျိုးသားပညာရေး မဟာဗျူဟာစီမံကိန်း (NESP) ၂၀၁၆-၂၀၂၁ အရဆိုရင် ၂၀၂၁ မှာ KG+12 ဟာအသက်ဝင်လာပါပြီ။ ဒါကြောင့် Grade11 ဟာ စာမေးပွဲမရှိတော့ပါဘူး။ ဒီတော့ အခြေခံပညာအထက်တန်းဆင့် အောင်မြင်ပြီးမြောက်မှုလက်မှတ် (Completion Certificate) သာ ထုတ်ပေးတော့မှာဖြစ်ပါတယ်။ အဲ့ဒီအတွက် ကြိုတင်စဉ်းစားလာကြတဲ့ အစီအစဉ်ပါပဲ။

ဒီတော့ အခြေခံပညာသင်ယူပြီးမြောက်မှုလက်မှတ် (C.C) ဟာ အတန်းအဆင့်သုံးဆင့်အတွက် ထုတ်ပေးဖူးတဲ့ အစီအစဉ်ရှိခဲ့ပါတယ်။ CPR အဖြစ် လူသိများပါတယ်။ အဲဒီတုန်းက စံသတ်မှတ်ချက် ၆ ချက်တို့ ၉ ချက်တို့ဆိုပြီး သတ်မှတ်ပေးခဲ့တယ်။ အဲဒီအချက်တွေနဲ့ တိုင်းတာပြီး ဘက်စုံပညာထူးချွန်မှုကို တိုင်းတာခဲ့ကြတယ်။ အဲဒီလက်မှတ်ကို အခမ်းအနားတွေနဲ့တောင် ချီးမြှင့်ပေးခဲ့ကြဖူးတယ်။ ဒါပေမဲ့ မအောင်မြင်ခဲ့ဖူး။ ဘာကြောင့်လဲ။ အဲဒီလက်မှတ်တွေရဲ့ အသုံးချတန်ဖိုးမရှိခဲ့လို့ပါပဲ။ အသုံးချ တန်ဖိုးမရှိရခြင်းကလည်း ယုံကြည်ကိုးစားနိုင်တဲ့ အချက်အလက် (Data) တွေပေါ်မှာ အခြေမတည်ခဲ့လို့ပါပဲ။ (ဥပမာ - စိုက်ပျိုးရေးအတွက် အမှတ်ပေးရာမှာ ဘယ်လိုသစ်ပင်တစ်ပင်မှ မစိုက်ဘဲ A အဆင့်ပေးတာ။ ကျောင်းခေါ်ချိန်မပြည့်မီပဲ A အဆင့်ပေးတာ စတဲ့ အချက်တွေကြောင့်ပါပဲ။

ဒါကြောင့် ဒီတစ်ခါထုတ်ပေးမယ် (Completion Certificate) တွေမှာတော့ ခိုင်လုံကိုးစားနိုင်တဲ့ စံနှုန်းတွေနဲ့ အသုံးချတန်ဖိုးရှိဖို့ အထူးအလေးထားဖို့ လိုပါတယ်။ တကယ်တော့ စာမေးပွဲစနစ်လျှော့ချပြီး C.C နဲ့ အကဲဖြတ်ဖို့လိုလာပြီဆိုရင် အဆင့်အတန်းရှိတဲ့ C.C ဖြစ်ဖို့လိုပါတယ်။ အဆင့်အတန်းရှိတဲ့ C.C ဖြစ်ဖို့ဆိုရင် တစ်နှစ်တာပညာသင်ယူခဲ့တဲ့ ကလေး တစ်ယောက်ကို အကဲဖြတ်ဖို့ဆိုတာ ဘက်စုံပြည့်စုံတဲ့ စံနှုန်းတွေပါဝင်ဖို့ လိုပါတယ်။ အခုတော့ ပညာရေးညှိနှိုင်းပွဲက ချပေလိုက်တဲ့ အနိမ့်ဆုံးစံသတ် မှတ်ချက်က (၁) တစ်နှစ်လုံး ကျောင်းတက်ရာခိုင်နှုန်း ၇၅ ရာခိုင်နှုန်း၊ (၂) တစ်နှစ်အတွင်း စာမေးပွဲ ၄ ကြိမ်ဖြေဆိုမှုနဲ့ (၃) ဘာသာရပ် အသီးသီးမှာ အဆင့်သတ်မှတ်ချက် C ရရှိရမှာ ဖြစ်ပါတယ်။

ဒါနဲ့ပတ်သက်ပြီး ကျောင်းတွေကတော့ ချပေးတဲ့ အချက်သုံးချက်ပေါ်မှာပဲ အာရုံစိုက်ပြီး ဘယ်လိုတွေ ဆောင်ရွက်နေကြောင်း ပြောကြပါတယ်။ တကယ်တော့ အစိုးရကျောင်းတွေအနေနဲ့ကတော့ အပေါ်က ဒါဆိုရင် ဒီ့ထက်ပိုပြီး ဆွေးနွေးကြတာမတွေ့ရပါဘူး။ ကျောင်းအများစုကတော့ Centralization အဆင့်က ထိုးဖောက်ထွက်လာတာ မတွေ့ရသေးပါဘူး။ Accounding to the Order ဆိုတဲ့ညွှန်ကြားချက်အတိုင်း တစ်သဝေမတိမ်း လိုက်နာဆောင်ရွက်နေရဆဲပါ။ စာရေးသူအနေနဲ့ကတော့ သဘော မကျတာအမှန်ပါပဲ။ အပေါ်ကချပေးတာလည်း ချပေးတာပေါ့။ အောက်ခြေကလည်း ပွင့်လင်းမြင်သာမှုရှိရှိ တင်ပြဆွေးနွေးစေချင်ကြပါတယ်။

စာရေးသူအနေနဲ့ တင်ပြခဲ့ပါတယ်။ ပညာရေးဆိုတာ ဘာလဲဆိုတဲ့ အဓိပ္ပာယ်ကို ဖွင့်ပေးခဲ့ပါတယ်။ အခြေခံပညာကျောင်းတွေမှာ ပညာသင်ကြားပေးရခြင်းရဲ့ အဓိကအချက်က အောက်ဖော်ပြပါလုပ်ငန်းစဉ် ၅ မျိုးကို လုပ်ဆောင်နေခြင်းဖြစ်ပါတယ်။ အဲဒါတွေက - 

(၁) ရှုမြင်သုံးသပ်ခြင်း (Induction) 

(၂) စည်းကမ်းအတိုင်းလုပ်ဆောင်ခြင်း (Deduction) 

(၃) အမှားအမှန်ဝေဖန်ခြင်း (Critical Thinking)

(၄) အကြောင်းပြချက်ပေးခြင်း (Reasoning)

(၅) ဆုံးဖြတ်ချက်ပေးခြင်း (Decision Making) တို့ပါပဲ။ အဲဒီ လုပ်ငန်းစဉ်တွေကို ကျောင်းတွေမှာ Homework ပေးခြင်း Group work နဲ့ Solving လုပ်ခြင်း၊ Assignment ပေးခြင်းတွေနဲ့ လုပ်ဆောင်နိုင်ပါတယ်။ အထက်ပါလုပ်ငန်းစဉ် ၅ ရပ်ကို ချုပ်လိုက်ရင် အဓိကရရှိတဲ့အချက်ကတော့ စိတ်ဓာတ်၊ စည်းကမ်း၊ ပညာသာလျှင်ဖြစ်ပါတယ်။ ဒါကြောင့် ယခု ထုတ်ပေးမယ့် C.C ဟာ အဲဒီစိတ်ဓာတ်၊ စည်းကမ်း၊ ပညာကို ပြည့်ပြည့်ဝဝ လွှမ်းခြုံနိုင်မယ့်စံနှုန်း သတ်မှတ်ဖို့လိုပါတယ်။ လက်ရှိမှုကြမ်းကို လေ့လာသုံးသပ်ရင်းကိုပဲ စိတ်ဓာတ်ပိုင်း (အကျင့်စာရိတ္တ) စံနှုန်းသတ်မှတ်ချက် လိုအပ်နေတာကို တွေ့ရမှာပါပဲ။ ဒါကြောင့် ကလေးတွေရဲ့ စိတ်ဓာတ်၊စည်းကမ်းနဲ့ ပညာပိုင်းဆိုင်ရာကို လွှမ်းခြုံအကဲဖြတ်နိုင်မယ့် စံနှုန်းတွေ ထည့်သွင်းဆွေးနွေးကြဖို့လိုပါတယ်။

နောက်တစ်ချက်ကတော့ ရှိသင့်တဲ့အနိမ့်ဆုံးစံနှုန်းတွေ သတ်မှတ်ပြီးရင်တော့ အဲဒီစံနှုန်းတွေကို အဓိက တာဝန်ယူဆုံးဖြတ်ပေးရမယ့်သူတွေကတော့ အခြေခံပညာက ပညာရေးဝန်ထမ်းတွေပါပဲ။ မှန်မှန်ကန်ကန်၊ အဂတိတရား ရှင်းရှင်းနဲ့ ဆုံးဖြတ်ကြဖို့လိုပါတယ်။ မိမိတို့လုပ်ဆောင်မှုတွေအတွက် တာဝန်ယူမှု တာဝန်ခံမှုအပြည့်အဝရှိရမှာ ဖြစ်ပါတယ်။ ဒါမှသာ အဆင့်အသီးသီးမှာ ထုတ်ပေးလိုက်တဲ့ C.C တွေဟာ တန်ဖိုးရှိမှာပါ။ ခေတ်ဟောင်း စနစ်ဟောင်းအတိုင်း မမှန်မကန် ဖြည့်သွင်းလိုက်မယ်ဆိုရင် တန်ဖိုးရှိလာမှာ မဟုတ်တဲ့အပြင် ကလေးအတွက်လည်း ထိခိုက်နစ်နာနိုင်ပါတယ်။

နောက်ဆုံးတစ်ချက်ပြောချင်တာကတော့ C.C တွေရဲ့ အသုံးချတန်ဖိုးပါ။ တစ်ဖက်ကထုတ်ပေးလိုက်တဲ့ C.C တွေကို ခိုင်လုံကိုးစားမှုရှိအောင် ဆောင်ရွက်သလို၊ အဲဒီ C.C တွေဟာ ကလေးတွေအတွက် လုံးဝကိုအသုံးဝင်နေစေရပါမယ်။ တကယ်လို့ ကလေးတစ်ယောက်ဟာ အလယ်တန်းဆင့်ပြီးမြောက်ခဲ့မယ်ဆိုရင် အဲဒီ C.C နဲ့ ဖွင့်လှစ်ထားတဲ့အသက်မွေးဝမ်း ကျောင်းသင်တန်း (Volcational Tarining) တွေမှာ ဆက်လက်ပညာ သင်ကြားခွင့်ရရပါမယ်။ ဒီလိုပါပဲအထက်တန်းအဆင့်မှာလည်း ထုတ်ပေးလိုက်တဲ့ C.C ဟာ တက္ကသိုလ်ပညာ ဆက်လက်သင်တဲ့နေရာမှာ အဓိကကျတဲ့ အစိတ်အပိုင်းတစ်ရပ်အနေနဲ့ အသုံးဝင်ဖို့လိုပါတယ်။ ဒါဆိုရင် C.C ဟာ ကျောင်းသားတိုင်း အရေးထားရမယ့်လက်မှတ် ဖြစ်လာသလို အသုံးချတန်ဖိုးမြင့်မားလာနိုင်ပါတယ်။

ဒါကြောင့် ပြောချင်တာက ဒီကနေ့ ဆွေးနွေးအကြံပြုမှုတွေဟာ C.C အတွက် အရေးကြီးပါတယ်။ ၂၀၂၁ ခုနှစ် အလွန်မှာ စာမေးပွဲမရှိတော့တဲ့အတွက် နဖူးတွေ့ ဒူးတွေ့ကြုံမှ လိုအပ်ချက်တွေ အားနည်းချက်တွေနဲ့ ပူပူညံညံတွေ ဖြစ်လာကြဦးမယ်။ ဘာကြောင့်ပြောရသလဲဆိုတော့ ခုလို ဆွေးနွေးနေတဲ့အချိန်မှာ သိပ်စိတ်မဝင်စားကြဘူး။ အားလုံးပါဝင်ဆွေးနွေးကြတာလည်း မတွေ့ရဘူး။ ဆွေးနွေးကြတဲ့ကျောင်းအများစုကလည်းကောင်း ပါသည်ခင်ဗျာပဲ။ တချို့ အစည်းအဝေးသာတက်ပြီး ပြန်လာတယ်။ ဘာအစည်းအဝေးမှန်းတောင် မသိခဲ့ကြဘူး။ သိကြတဲ့အတိုင်းပဲ ဒီမှာက ထိပ်ချမှ ဓားပြမှန်းသိကြတာ။ အဲဒီကျမှ အမျိုးစုံဝေဖန်နေကြဦးမှာ။ အဲဒီကျမှပဲပွဲစဉ် ကြည့်ကကြဦးမှာ။ အဓိကပြောချင်တာက အစကတည်းက အနိမ့်ဆုံးစံတွေမပြည့်စုံဘဲ၊ ပါဝင်သင့်ပါဝင်ထိုက်သူတွေ အကြံဉာဏ်တွေမပါဘဲ ခုချိန်ကတည်းက ထဲထဲဝင်ဝင် စိစစ်သုံးသပ်မှုမရှိဘဲ ခပ်လွယ်လွယ်စီစဉ်ဆုံးဖြတ်ကြမယ်ဆိုရင်တော့ ၂၀၂၁ အလွန်မှာ အငိုလွယ်ပြီး အရှိုက်ခက်မယ့် C.C မျိုး ဖြစ်နေမှာကိုတော့ စိုးရိမ်မိသဗျာ။

ခင်မောင်ဌေး (ပညာရေး)



FOLLOW US