News

POST TAGGED AS

စည်းကမ်း

ကျောင်းစည်းကမ်း၊ စာရိတ္တပျက်ပြားမှုဆိုင်ရာ စည်းကမ်းများပယ်ဖျက်ရန် ဗကသတောင်းဆို
ရန်ကုန်၊ ဇန်နဝါရီ ၂၉

နိုင်ငံရေးဆူပူမှုဆိုင်ရာပြစ်မှု၊ ပြစ်ဒဏ်များ ပယ်ဖျက်ပြီးနောက် ကျန်ရှိနေသည့် ကျောင်းစည်းကမ်းနှင့် အကျင့်စာရိတ္တ ပျက်ပြားမှုဆိုင်ရာပြစ်မှု၊ ပြစ်ဒဏ်များကို ပယ်ဖျက်ပေးရန် ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ် (ဗကသအဖွဲ့ချုပ်) က တောင်းဆိုသည်။

ဇန်နဝါရီလ ၂၉ ရက် နံနက် ၁၀ နာရီက ရန်ကုန်မြို့၊ သင်္ဃန်းကျွန်းမြို့နယ်၊ လေးထောင့်ကန်လမ်းမကြီးရှိ ရွှေသိမ်ဓမ္မသိင်္ဂီ စာသင်တိုက်တွင် ပညာရေးအသုံးစရိတ် တိုးမြှင့်သုံးစွဲရေးဆန္ဒပြသည့် ကျောင်းသားများ ကျောင်းထုတ်ခံရသည့်ကိစ္စ သတင်းစာရှင်းလင်းရာတွင် တောင်းဆိုခဲ့ခြင်းဖြစ်သည်။

ဗကသအဖွဲ့ချုပ် ဗဟိုလုပ်ငန်းကော်မတီက တက္ကသိုလ်ဝင်ခွင့်လမ်းညွှန်ပါ ကျောင်းစည်းကမ်းချက်များကို ဖျက်သိမ်းပေးရန်နှင့် ကျောင်းထုတ်ခံရသည့် ကျောင်းသားများကို ကျောင်းပြန်လည်တက်ခွင့်ရရေး အစိုးရ၊ ပညာရေးဝန်ကြီးဌာနနှင့် သက်ဆိုင်ရာတာဝန်ရှိသူများမှ ပြန်လည်ဖြေရှင်းပေးရန် တောင်းဆိုသည်။

လက်ရှိ ဒီမိုကရေစီအစိုးရအနေနှင့် လက်ရှိတောင်းဆိုချက်များကို ဖြေရှင်းမပေးလျှင် ၂၀၁၅ ခုနှစ်တွင် တောင်းဆိုခဲ့သော ဒီမိုကရေစီပညာရေး တောင်းဆိုချက် ၁၁ ချက်ကို တောင်းဆိုသည့် လှုပ်ရှားမှုများပြုလုပ်မည်ဖြစ်ကြောင်း ဗကသအဖွဲ့ချုပ်က ကြေညာသည်။

ဗကသအဖွဲ့ချုပ် ဗဟိုလုပ်ငန်းကော်မတီ အတွင်းရေးမှူး မရွှေရည်စိုးလင်းက “ဒီစည်းကမ်းကိုသာ သူတို့ တိတိကျကျ ကိုင်တွယ်မယ်ဆိုရင် တက္ကသိုလ်တွေမှာ ကျောင်းသားတောင် ရှိတော့မှာမဟုတ်ဘူး။ စည်းကမ်းတွေကိုလည်း ပယ်ဖျက်ပေးဖို့လိုတယ်။ နောက်တစ်ခုက ကျောင်းပြန်တက်လို့ရအောင်၊ ကျောင်းထုတ်ထားတဲ့စာတွေကို ပယ်ဖျက်ပေး၊ ကျောင်းတက်ခွင့်ပေး၊ ဒါလိုမပြောဘဲနဲ့ ဝန်ကြီးဌာနတွေက သူတို့လိမ္မာမယ်ဆိုရင် ကျောင်းပြန်တက်ခွင့်ပေးမယ်။ မင်းတို့ဆန္ဒမပြနဲ့၊ မင်းတို့ဘာမှမတောင်းဆိုနဲ့ ငါတို့စကားကို နားထောင်လို့ပြောတဲ့စကားဟာ ဒီမိုကရေစီစံချိန်စံညွှန်းနဲ့ မညီပါဘူး”ဟု The Voice သို့ ပြောကြားသည်။

တက္ကသိုလ်ဝင်တန်းအောင်မြင်သူများအတွက် တက္ကသိုလ်ဝင်ခွင့်လျှောက်လွှာများနှင့်အတူ ပေးပို့ရာတွင်ပါဝင်သည့် တက္ကသိုလ်ဝင်ခွင့်လမ်းညွှန်စာအုပ်တွင် ၂၀၁၆ ခုနှစ်အထိ နိုင်ငံရေးဆူပူမှုဆိုင်ရာ၊ အကျင့်စာရိတ္တပျက်ပြားမှုဆိုင်ရာနှင့် ကျောင်းစည်းကမ်း ဖောက်ဖျက်မှုဆိုင်ရာဟူ၍ အခန်းသုံးခန်းပါရှိသည်။

သို့သော် နိုင်ငံရေးဆူပူမှုဆိုင်ရာအခန်းသည် စစ်အစိုးရလက်ထက် ပြဋ္ဌာန်းချက်များဖြစ်၍ အရပ်သားအစိုးရလက်ထက်တွင် မသင့်လျော်တော့ဟုဆိုကာ ၂၀၁၇ ခုနှစ်မှစ၍ ဖြုတ်ပယ်ခဲ့ပြီး ကျန်ရှိသည့် အကျင့်စာရိတ္တပျက်ပြားမှုဆိုင်ရာနှင့် ကျောင်းစည်းကမ်းဖောက်ဖျက်မှုဆိုင်ရာကိုသာ ထည့်သွင်းသတ်မှတ်သည်။

အကျင့်စာရိတ္တပျက်ပြားမှုဆိုင်ရာတွင် မူးယစ်ဆေးသုံးစွဲခြင်း၊ ထားသိုရောင်းချဖြန့်ဖြူးခြင်း၊ ဥပဒေတစ်ရပ်ရပ်အရ အရေးယူခံရခြင်း၊ နိုင်ငံပိုင်နှင့် ကျောင်းပိုင်အဆောက်အအုံ၊ ပစ္စည်းများကို ဖျက်ဆီး၊ ခိုးယူ၊ အဓမ္မယူပါက ကျောင်းမှ ထုတ်ပယ်၊ သတိပေးနိုင်သည်ဟု ဖော်ပြထားသည်။

ထို့ပြင် ဆရာ၊ ကျောင်းသားများ ကာယိနြေ္ဒပျက်အောင် ပြောဆို၊ ပြုမှု၊ လုပ်ဆောင်ခြင်း၊ ဆဲရေး၊ ကြိမ်းဝါး၊ နှောင့်ယှက်ခြင်း၊ ဆရာများဆိုဆုံးမသည်ကို မနာခံခြင်း၊ ကျောင်းတွင်း၊ ကျောင်းပြင် လောင်းကစားကျူးလွန်ခြင်းမပြုရန် တားမြစ်ထားသည်။

ကျောင်းစည်းကမ်းနှင့်ပတ်သက်၍ စာသင်ခန်း တွင်း၊ ပြင် အနှောင့်အယှက်ဖြစ်ရန် ပြောဆို၊ ပြုမှု၊ လုပ်ဆောင်ခြင်း၊ ခိုက်ရန်ဖြစ်ခြင်း၊ အရက်သေစာသောက်ခြင်း၊ ကျောင်းစည်းကမ်းမလိုက်နာခြင်း၊ ကျောင်း၏ ဂုဏ်သိက္ခာကို ညှိုးနွမ်းထိစေခြင်းအတွက် ကျောင်းမှတ်ထုတ်ပယ်၊ သတိပေးနိုင်ကြောင်း ပြဋ္ဌာန်းထားသည်။

အဆင့်မြင့်ပညာဦးစီးဌာန ညွှန်ကြားရေးမှူးချုပ် ဒေါက်တာသိန်းဝင်းက တက္ကသိုလ်ဝင်ခွင့်လမ်းညွှန်ပါစည်းကမ်းများကို ခေတ်ရေစီးကြောင်းနှင့်အညီ ပယ်ဖျက်ခြင်း၊ အသစ်တိုးခြင်းများကို ခေတ်အဆက်ဆက် ဆောင်ရွက်ပေးခဲ့ပြီး လက်ရှိ စည်းကမ်းချက်များသည် ခေတ်ဟောင်းစည်းကမ်းချက်များနှင့် ယှဉ်လျှင် များစွာ နည်းပါးသွားပြီဖြစ်ကြောင်း ပြောကြားသည်။

“တက္ကသိုလ်ဝင်ခွင့်လမ်းညွှန်ဆိုတာ ဆယ်တန်းအောင်ပြီး တက္ကသိုလ်တက်တဲ့အချိန်မှာ ဝင်ခွင့်လမ်းညွှန်ထုတ်တာ။ အသစ်ထုတ်တဲ့ အချိန်ကျရင်တော့ ဒီလို Issue တွေရှိတယ်ဆိုတာ တင်ပြပြီး ညှိနှိုင်းဆောင်ရွက်ရမှာပေါ့”ဟု ဒေါက်တာ သိန်းဝင်းက ပြောကြားသည်။

မြစ်ကြီးနားတက္ကသိုလ်၌ စိတ်ပညာအထူးပြု အဝေးသင်ဒုတိယနှစ် စာမေးပွဲဖြေဆိုထားသော ကျောင်းသား ကိုခေါင်နုတ်က တက္ကသိုလ်ဝင်ခွင့်လမ်းညွှန်စာအုပ်သည် ကျောင်းသားထုကို ထိန်းချုပ်ထားသဖြင့် ဒီမိုကရစီစံနှုန်းနှင့် ကိုက်ညီမှုမရှိကြောင်း ဝေဖန်သည်။

“ကျောင်းသားဆိုတာ အရာရာကို ဆည်းပူးနေတဲ့လူတွေဗျ၊ မှားတာလည်း ရှိမှာပေါ့။ ဒါကို ကျောင်းက ပြုပြင်ပေးရမှာပေါ့။ ကျောင်းထုတ်တာဟာ အဖြေစစ် မဟုတ်ဘူးဗျ၊ စည်းကမ်းချက်အရဆိုတော့ ကျောင်းထုတ်လို့ရနေတယ်။ စည်းကမ်းချက်တွေကို ဒီမိုကရေစီနဲ့ ကိုက်ညီတဲ့ အသစ်တစ်ခုကို ရေးဆွဲသင့်တယ်”ဟု ကိုခေါင်နုတ်က မှတ်ချက်ပြုသည်။

ပညာရေးအသုံးစရိတ် တိုးမြှင့်သုံးစွဲပေးရေး ဆန္ဒပြသည့် ဗကသကျောင်းသား ၇၂ ဦးအနက် ၄၀ ဦးကို (ဇန်နဝါရီ ၂၉ ရက် မွန်းလွဲ ၂ နာရီအထိ စာရင်းအရ) ဆရာများ၏ ဆိုဆုံးမမှုကိုနားမထောင်ခြင်း၊ စာသင်ခန်း တွင်း၊ ပြင်တွင် သင်ကြားမှုကို အနှောင့်အယှက်ဖြစ်စေရန် ပြောဆို၊ ပြုမူ၊ လုပ်ဆောင်သည်ဆိုကာ သက်ဆိုင်ရာတက္ကသိုလ်များက ကျောင်းထုတ်ခဲ့သည်။ 

ကျောင်းထုတ်ခံရသည့် ကျောင်းသားများနှင့် ပတ်သက်၍ ပညာရေးစနစ် ပြုပြင်ပြောင်းလဲရေး နိုင်ငံလုံးဆိုင်ရာ ကွန်ရက်ကလည်း ကျောင်းသား၊ ကျောင်းသူများကို ကန့်သတ်ချုပ်ချယ်မှုမရှိဘဲ ဂုဏ်သိက္ခာရှိစွာ ကျောင်းပြန်တက်ခွင့်ပေးရန်နှင့် ကျောင်းသား၊ ကျောင်းသူများ၏ ဂုဏ်သိက္ခာကို ညိုးနွမ်းထိခိုက်စေသည့် ဥပဒေ၊ စည်းမျဉ်းစည်းကမ်းများကို ဖျက်သိမ်းပေးရန် ဇန်နဝါရီလ ၂၈ ရက်တွင် ကြေညာချက်ထုတ်ပြန် တောင်းဆိုထားသည်။

J-19



FOLLOW US